Salpha Ngalliam – Thangzalian Phaipi' Tanchin

User Rating: 0 / 5

Star InactiveStar InactiveStar InactiveStar InactiveStar Inactive
 

Salpha Ngalliam – Thangzalian Phaipi' Tanchin
By Manipur Express Team

thangzalianfamily

Manipur Express Team in, singtangmi-te' gam leh leitang humbitna dinga hinna ana pia 'Tribal Martyrs' 9te 'Zahna' pekawm in, atanchin uh mipi' theih ding in taklat kisawm hi. Amaute' tanchin tungtawn in mipi hi'n makai hitaleh, ana lungke simte'n leng thathak hong laak ua, kitaat hiamna ding a azat zel theihna ding uh ngiimna leng ahi hi. I mihangsan-te' uh min leh mel theilou leh mukhalou, ei singtangmite lak ah a vang (tawm) mahmah ding. Himahleh, a innkuan khosakna uh banah, atanchin uh ana theikha tamlou maithei ahihman in; amau tanchin I theihte tungtawn in thathak hon guan zelzel leh chih, 'Manipur Express Team' in kideih mahmah hi.

September 24, 2015 ( Ningani) nitak in, 'Tribal Martyrs' 9te lak a khat; Thangzalian Phaipi' nutsiat a innkuante houlimpihna va kinei a, mipi' theih ding in anuai ah a 'Tanchin' saulou i taklang suk ding.

Salpha Thangzalian Phaipi ahihleh April 1, 1985 in piang hi. Amah, (late) P. Zelzamung leh Nu Vungching' gil a gah goutan 4te laka aneupen (nautum) leng ahi hi. Sanggam numei 2 leh pasal 1 nei a; a sanggam numeite'n pasal neizou vekta in, a upa'n leng sihsan khinta hi. Naupangchik ahihlai ( 1988 kum ) in a Pa'n, Kal (Kidney) lam buaina ziakin sihsan hi. Apa' sih hun a Class – B lel simpan ahihman in, a Pa' mel-le-puam banah ithuai ahihdan theihoih law manlou ahihdan a Nu'n gen hi. Huai hun apan, asihtan dong, inkuanpihte toh Hiangtam Lamka ( Tipaimukh Road) ah a zi leh ta banah, a nu toh ana khosatou den uhi.

Aneu apan mi damtheilou khat ana hihman in; tawsa natawm nei manglou in om dildel hi. Anu'n, Doctor a etsak leh Tuberculosis (TB) vei ahihdan mankhia ua, hoihtak a etkol ahihnung in hong hoih hiaihiai hi. Nautum ahih mahbang in, a nu-le-pa ngai diak a, apa' pawtna lam teng bang ah zuihsawm sek hi. Apa pawt dia a kisak chiang in, a 'Scooter' mai uah va ding pah a, apa' toh kikhah ngeilou uhi. Apa'n, Veterinary a aseplai in omlouh san a, a Nu'n 'die in harness' in 'sweeper' na sem hi. Apa'n, Auto khat nutsiat ahihman in, a hektu ding zong ua, sum loh in heksak uhi. Apa' sepna tungtawn a ana khosathei hamham uh ahi hi.

Siamsinna lam ah ahihleh, St. Mary School (Tuibuang) ah a U-te toh ana kai uhi. A ute'n Class – X leh XII khawng a zoh tak un, kuan leh pai a ahuaitu ding gina omlouh man in, Hostel khawng ah achang in omsak uhi. Class – VI tan huaimun a kai in, aban St. Paul Institute leh Children Training School khawng ah kisuan kual hi. Laisimna mabante lamzangtak a sunzom zel dia kikoih himahleh, khosakna haksat ziak in sunzom theilou in, Class – X leh XII leng 'Open' in zouthei hamham hi.

Class – XII azoh in, Delhi a om a U Mawi ( a unau ua upapen) kiang ah va pai hi. Hotel Management khawng zilnuam sim bang mahleh, lunglut zou taktak lou ahi ding a, a zil hial kei. Music bel a lunglut mahmah mai a, Delhi a va omsung in leng, a inkiang ua Vai naupangte toh guiter aneih sunsun ngaihpipi a tum in, la sa ek-ek sek uhi. Vai naupangte'n leng a ngaina mahmah mai ua; a guiter tumging uh a inkiangte un ngaih sasim mahle uh, a tate un kipahpihlua ahihman un, bangmah gen ngamlou uhi. Mi pautam leh kamsiamlua ahihlouh hang in, aneu-alian in ngaina mahmah uh ahihdan leng hiai apan kilang chian mahmah hi.
Hun bangtan hiam nungin, Lamka ah kik nawn hi. Kum 2003 in, a lungtang kumpinu bang a angaih banah, sihtanpha a ding a 'ZI' dia ateel – Laldinsangi toh 25th December ni'n kiteng uhi. Huai nung in,a zi toh Delhi aom a Unu' kiang ah va pai nawn ua, a zi college kaisak in, a graduate tan dong a zi' a di'n kipumpiak tak in khosa hi. Aman leng a laizilna maban sunzom nuamlua himahleh, a zi a itluat ziak in, a zi sunzom sak a, 'Beautician Course' leng hihkhawmsak hi. Huainung sawtlou in, a zi'n Beauty Parlour (Private) ah sem a, a zi' ann leh meh di huantu in pang gige hi. 2007 kum in Lamka ah hong paikik nawn ua; 2009 kum in tapa melhoihtak khat neikhia uhi. Atapa, Kenneth Mungsuankhup (6 yrs) in tu'n Dawn School ah Class – B simlel hi. Salpha Thangzalian in, Class –B a simlai in a pa'n sihsan a; tu'a amah a sih in leng atapa (Mungsuankhup) in Class – B sim lel hi.

Zi-le-ta nei mahleh, kivaakna di detdou a neikei. Huaiziak in, a nu' kiang ah, " Nu, Van (gari) hon leisak in la'n, School naupang khawng ka kha zel ding a, huai in sum ka zong di " a chihziak in, a nu'n leng ngaihtuahsak pah hi. Dawn School naupang bangzah, hiam vakhak leh piikik zel tuh ama' nasep pipen hong hita hi. Pautamlou himahleh, naupangte'n a ngaina mahmah mai uhi. Anu'n, " a naupang puakte'n, a school kaitheih nawn hunchiang ua a tuanna di uh lungkham in, ka inn uah hong hoh ua, lungkhamlou ding leh, kumtawptan a, kuan leh pai a hon pawtuah di ngaihtuahna di I hi " chi'a ana khamuan zel ahihdan gen hi.

Mi banga kholak pawt mengmeng ahi kei. A naupang khakte', 'school timing' a lappih louh hun leng a om ngeikei. Dak ( time) en chetchet in gamtang zel a, 'Manipur Timing' kichi zuihlouh teitei sawm hi. Ann anek hun ngei in nezel a, alup hun ngei mah a lum in, athoh hun ngei mah a thou chetchet mi khat ana hiden hi. Anu angai mahmah mai a, kholak a pawtkhiat zek chiang in leng 'phone' pah sek hi. Anu, azi, atapa leh a invengte' kiang a apau chiang in leng aw-khum(kam neem) a zang ngeikei. Aheh bel ahikei a, kamsiamlou ahihziak ahi zaw. Anu' kiang ah leng pau bukbuk mahleh, aheh leh itlou ahi kei. Anu'n a tai(salh) hunchiang in leng, a nu'n itlua ahihlam thei ahihman in, heh ngeilou hi.

Khovel buaina leh siatna te khawng, anu' kiang ah gen zel a; a inn ua vapawt peuh kiang khawng ah leng ana genpih zel hi. ILP toh kisai anu' kiang a agen leh, a nu'n Gas (LPG) toh kisai khawng gensek hidan in ana ngaihtuah zel hi. Anu'n, " na Bible chang leng a hizen a hia, huai ngen huchi gengen " a chih chiang in, anu' kiang ah, tunung chiang a thil hong omthei ding tangpite leh, mahni innmun natawm chaan theih ahihdan khawng hilh ngiitngit zel a, anu theihsiamsak sawm teitei sek hi. Anu'n bel bangmah a theikei. Gamdangmi kisuak ngeingeilou di ahi chi'n, anu'n Manipur gam mi hihna 'sumkuang chiang keih' hi.

Hunte hongpai zel in, Moreh lam ah buaina hong om a, bildoh pen in neiden hi. Apaukhiat phot leh, buaina thu lou a gen ngeikei phial – a lungtang zaw sunkha lua ahi ngei ding. Zingkal a thoh chiang in, 'Exercise' a la zel a, kawltu-tui dawn in, News simkawm zel hi. News ah, tulai buaina thu a kigelhkei ngeingei leh chu, simnuamlou himai dan ahi. Apuaknat-te pawng genkhiat pahpah mi ahi kei a; agenkhiat nakleh chu, pawzounawn mahmah lou chihna ahi mai hi.

August 31, 2015 Ni'n Bandh om hi. Ama'n leng naupang khak leh pii ding neilou ahihman in, inn ah omden a, a phone en den hi. Suun in, Mualveng a anupi' kiang ah va pawt in, " Nupi, 'lungleng' kichi bang chihna a?" chih khawng va dong hidan in gen uhi. Nitaklam hong hi a,Singtangmi MLA-te'n suaikai uh a, Bill 3-te leng ki-passed ahihdan a phone tungtawn in theipah hi. Nidang a Kobi(ankam luum) kang ngei leng hilou, atapa a di'n kangsak hi. Amak mahmah ahihleh, nidang a dak 8:00 khawng a ann nezel hinapi, huai nitak dak 6:30 lak in ne a, tam bel a ne kei. Anu'n ahihleh, nidang a ann tam nezou ngeilou hinapi, huai nitaak akam lim in, tampi mahmah ne hidan in gen hi.

Ann nezou, Delhi a om a U Mawi in houpih a, New Lamka lam ah innkang leh buaina om leh omlouh akan tak in," ka theikha nai hetkei ; ka va en di..ka va taipah di.." chi'n dawng a, a phone 'off' in banyan vuak toh New Lamka lam zuanpah vengveng hi. Hun sawt kihallou in a nu' kiang ah, atapa Damdawi Inn a om ahihdan va hilh ngal ua, anu'n leng dangtawng hul zen in delhtou ngal hi. Casualty a vatun chiang in zaw, a tapa et-ngamhuai di vual ahi nawnkei. Akhe meksak kawm in, " Bawi, bang chi maimah e? Na lungtang a na puaknat gige puakzakta ahi maw Bawi?" chi'n kahtam lohkhum ngoihngoih hi. Beidong kisa a, " Toupa, ka tapa sisak mahmah ken aw? Doctor, ka tapa silou di eive maw? Damzou di eive maw?" chi'a a dot chiang in, " ..Theilou maw...!" chi'n dawng zel ua, anu beidong kisa deuhdeuh hi.

Damdawi inn ah, awlmohtu ding mipi atam mahmah mai ua, anu'n huaite amuh chiang in thupi sa mahmah hi. Gam leh nam adia, a 'lubuk' a tatkhapsa tuamsak ua, himahleh a kam, bil leh naak ah sisan luangpawt zungzung hi. Alu atuamsak zoh un, sisan kai zutzut kawm in 'Ward' ah koih ua, Nurse a kidaihlah luat ziak in, a paneute mounu'n 'glove' ngen in, ki-etkol mai hi. Apaneu' tapa ( Siam ) leng a om a, a zi'n leng hihtheih tawp a panla in, a hinna humbit teitei sawm uhi. Huchih hunsung in, a nu'n bangkil khat ah thuumna ana nei den hi. Anu'n athumna ah, " Ka tapa neihsun hi a, mi' a di'n bangmah hikei leh leng, kei adia thupilua ahi. Toupa, ka tapa' hinna hawisak lai in la, damsak lai hamham ve maw?" chi'n thuum hi.

Atapa lah a naak(breathing) kia et himai ahihman in, a hehpih mahmah mai a, dailenbuk sung a va lut in, " Toupa, ka tapa nang hon piak ahi a, ahinna tung a thuneitu nang mah na hi. Nang thuthu hi hen..." chi'n, Toupa' khut ah atapa va laankhia hi. Hong pawtkhiat tak in, atapa khatvei mah leng a naak nawn kei. Huai hun in, dak 9:55pm ging ta hi. Akha muangtak a tawldam a, nat-le-sat thuaknawnlou dia om pen, heutute'n 'morgue' a koih di a chih ziak un, Morgue lam ah suankhe ngal uhi. Gam-le-nam a dinga hinna piak a lunggulh gige pen, huai nitak in a taksuah ta.
Anu'n agenna ah, " ka tapa in a vei mahmah - gam leh nam a di'n a hinna a pe ta. Damdawi inn a mite' kipiakzohna ka muh chiang in vuina(khasiatna leh lungngaihna) ding himhim ka nei kei. Ka tapa' kipiakna bang in, kou a damlai teng leng apoimoh leh kipe dia mansa ka hi ua, a sisan athawn a aluan ka gingta kei uhi. Salpha 9-te tungtawn in, KIDEIDANNA PUANZAK lakkhiat ahi ta a, singtangmite' lak ah KIPUMKHATNA a om ta. Hiai pen, Pathian lemgel ahi ngei ding. Huaiban ah, Pathian in ka tupa Mungsuankhup kemtu dia hon muang ahi chih leng ka thei a, ahoihlam ngen ka kipia hi. JAC-te panlakna ah gensiatna di bangmah ka theikei. Bill 3-te leng a 'withdraw' sak zoh ngei uh ka lam-en hi. Ka suul ah ka hingkhia a, tu'n mipite a di'n a si ta. Huaiziak in, mipite' tapa ahita a, kou-a vuak ahi nawnkei. Mipi' thuthu hita ahi" chi'n gen hi. Aban a genbehna ah, " ka innsung uh a hawm mahmah mai a, sithei di'n leng ka koih naikei. Melmuh di'n lah a omnawn kei a, inn hong pai hun chiang in, ' Lian hongpai hun hi aaa' ka chisek a, ka lungleng mahmah. Tuni tanpha a lupna ah leng ka lumngam naikei ua, ka lungsim uah a si naikei " chi'n hi.

Azi ahihleh, huai hun in Aizawl lam ah omkha chet hi. Delhi a College a kailai a, a pasal in a khotuahdan khawng thupi sa mahmah ahihdan gen a, apasal' ziak a 'graduate' thei ahihdan leng gentel kha hi. Mak asak mahmah ahihleh, Aizawl a aom lai - 30th August, 2015 nitaak in a ihmukip thei mahmah kei a, kiguih zel in khanglou zotzot zel ahihdan gen hi. Himahleh, ama'n leng, bang ziak a huchibang a om ahia, chih athei tuankei. A innkiang ua dawr bawl leh innluah a ana khosaden, Pa Lian kiang ah; Salpha Thangzalian' tapa kum 6 lel a upa in , " Ka pa' luang ka va muh leh, ka mittui hong taktak inchin, mi lah tamlua ahihchia, kuamah omlouhna ah ka kapkhe ek-ek nuam e ,Pupu" chi'n gen tiautiau hi.

Aneulai pek uapan, a innkiang ua ana khosa leh dawr ana bawl, Pa Lian in agenna ah, " A sihma, Dak 5:00 lak vel in hong pawt a, 'Phaijang khua koisan a?' hong chi mawk a, ke'n leng ka hilhtheih dandan in, ' Santing apan Phaijang kizuan ahi' ka na chihleh, ' huai apan Silchar lam tunna di'a khaw bangzah omlai a?' chi'n hon dong nawn hi. Hon zahtak mahmah khat ka hi a, apa' omlouh apan apa bangmai a hon et leh zahtak ahi. Huaiziak in, avei mahmah louh ngal hon gen ngeikei. Tua Silchar zotna di hon dot khelkhel ziak ka dotkik tak in, ' Jiribam leh Dimapur lam lah Bandh tamtheilua – Lifeline khat poimohlua ihi uh. Guite Road leh Tipaimukh Road lah ka neulai pek apan asiatdan kigen hita. Politician te'n phawklou ahi d'uam ah. Lamka apan Santing tan lah lampi ahoihsa, huaiziak in Santing leh Phaijang khuate tawn a Silchar toh kizop didan ngaihtuah poimohlua ahi. Lifeline dia hiai kan zaw omlou di ahi' chi'n hon gen a, ke'n leng kikhawm di'n ka kuansan a, kikhoplai in Damdawi Inn a om ahihdan ka zak ziak un, ka nupa un ka delhtou ngal uh " chi'n gen a, " Thangzalian' LAST MESSAGE ahihleh LIFELINE ahi " chi'n hon genbeh hi. Pa Lian' Zi nu Jam ( a innkiang ua dawr bawlte) in, " Lialian in Pathian alau mahmah mai a, a tapa thuumna neilou a, a ihmut ding aphal ngeikei. Huaiziak in, 'na pipi va kithuumsak masa in' chi'n a lupnma un hon sawl zel a, thuumna ka na neihpih zel hi. Thangzalian leng aneu apan ka na etkol khak ahi a, anu' sang in leng ka thuhilh mun zaw ding a, ngai leng ka ngaina mahmah " chi'n, tomkimtak in hon gen hi.

Huaiban ah, aneulai apan a sihtanpha a kituahpih det a naupa'n ( a paneu' tapa – Siam Phaipi) agenna ah, " kou ahihleh, ka unau un ka kibang vek sim ua, pautamlua ka hikei uh. Ka puaknat mahmah louh uh ka pawng gen mengmeng kei uh. Ka U Lian ka iit in ka ngai mahmah mai a, damdawi inn a sihsual a aom lai in leng ka zit oh ka va delh ngal ua, ka mittui khaamzoh vual di ahikei. Dawn School a naupangte pii di'a hong kuan chiang in, amun a chimtak a om sangin chi'n ka dawr uah hong bang sek a, nitaak bang leng atapa toh hong pawt zel uh. Nitak hongpawt hun ahihchiang in, ka thawmhau mahmah mai uhi. A omdan, a nuihmai khawng ka mitkha ah hong lang dundun zel a, mitsi zel mah leng ka mitkha ah ka U Lian a mang ngeikei. Ka iit in ka ngai mahmah mai a, himaleh mualliamsa hunte sapkik theih vual ahi nawnkei " chi'n khasetak in gen hi. Siam Phaipi' Zi'n leng (Damdawi Inn a, a khoitu leh enkaitu pen ahi – Nurse kidaihlou), " ka U Lian, mehhuan asiam mahmah mai a, ama' mehhuan louh lim ka sakei uh. Sa meh diakdiak bang, a sihnung in midang' huan ka nekha ua, alimna di khat leng ka thei kei uh. Meh limdeuh ahuan chiang in, amah mah in hong hawm chenchen zel hi. Ahoupen a gen in, ka U Lian' mehhuan lim mahmah nekhaa nawnlou di ka hita mai uhi " chi'n hon genbeh hi.

A U Mawi ( a unau ua upapen) in, " ka neu apan ka na kithuapih pen ahi a, ka nautum pen uh leng ahihman in, ka ngai mahmah. Atapa leng it in a thunun zou mahmah mai a, a zi leng a itluat ziak in, amah kailou zen in College a kaisak hi. Nitak dak 8: 00 lak a kihouzel ka hihman un, huai hun hongtun chiang in, ka omthei mahmah kei a, ka phone ka 'off' top zel. A sihni a, buaina thu ka dot lai in, aman bangmah a theihkhaklouh ziak a, va etkhiat sawmpah ahihman in, " Lian, va pai dah mai in " ka chih hang in, a phone a 'off' man a, ka 'aw' a zakhaman nawnkei. Asih ka theih phet in, Lamka k'ong pai a, a music vante khawng ka muh chiang in, ' Lian, hiaite zang di'n hong paikik thak mai ve maw?' ka chisek a, ka ngai mahmah. Himahleh, a deih mahmah 'music' van tuamtuam-te hon gen chianga ka na leisak zelzel ziak in, a deihteng aneih nung a si ahi a, ka lung anuam zel. Nitak ka lup dek chiangin, a lupna ah ka va pai zel a, ' Lian, Good Night....' ka va chizel a, zingkal ka thoh chiang in, a room kong ah ka va dak a, ' Lian, kei thouta kei ve...Good Morning..' ka va chih zel hang in, honna dawng di kuamah a om nawnkei " chi'n, khasetak in hon gen hi.

Dakkal tamtak, Salpha Thangzalian Phaipi' nutsiatsa a innkuante toh houlimna neih ahihzoh in, Anu'n " Salpha 9-te sihna tungtawn a, ka lungsim a laa hong suaksuak khat ahihleh; Pathian Ngaih La 73 na a' Aw nam tengteng leh, chi chih pau chihte; Vanmang naubang akahna Kalvari ah, khentuam neilou uh' chih la ahi " chi'n hon gen hi. Huaizoh sawtlou omzek lai in, Pathian in amau innkuan hinkhua leh a khosakna uah lamkaihzel ding a deihsakna thu, Manipur Express min a khakkawm in 'Mangpha' kikhak in, kipaisanta hi.

meteam2