UPDATES:

S5 Box

ZOGAM.COM Login

Agenda for Missionary Day 2014

AGENDA FOR MISSIONARY DAY 2014

Upa Thangzalun Khuptong    
Central Delhi.
E-mail: This email address is being protected from spambots. You need JavaScript enabled to view it.

tzlun
Thupatna:I theihchiatsa mah bang un ei Zomi Manipur sim(South)lam a teeng te lak  ah May 7,1910 in Tangthupha (Gospel) meivak hongtung a chiamteh ahi. Huai ziak in 2010 in Tangthupha honglutna a kum 100 chinna (Centenary) Manipur ah hi in Delhi leh khopi tuamtuam ah thupi thei bangpen in i lawm uhi. Tuni in tangthupha i zakna kum 104 bang hong hita Haleluijah!, Hiai tan honpi Jehovah Pathian thupina i pia hi.   Tukum Missionary Day I zatna ah  Tangthupha dalhzakna ding in panlakna thak i neihtheih a huai tungtawn a I nam leh gam laptouh a om lunggulhna toh a nuai a thu tamlou kikum le i chi hi.

1.  Tangthupha i gam a honglut ziak in lam chi tuamtuam ah khanlohna leh masawnna tamtak i dong uhi. Romte kianga Sawltak Paul in a laikhakna ah “A sawl om kei leh kua kuan ding, a gen om kei leh kuan thu za ding” chih bang deuh in, England gam a halhna (welsh revival) ziak in veina nei in gam tampi kantan in i gam tanpha ah  missionary a hong kuanna tungtawn un tangthupha meivak ina ngah uhi. Tutung ah kalungsim a om mahmah ahih leh  Ei Zomite ziak in kua nam/gam bang  in tangthupha a na zakha de aw...or a neu deuh gen le nang leh kei ziak in tangthupha ana za a Jesu khebul a kha mangthang bang zah tut in a om de aw....chih ahi.

2. Missionary nasepna i genchiang in Gam mial gam a kuan khete mahmah i lungsim ah om sek hi. A dikna chiang om mah leh kha mangthang matna ding ah a panla tu poimoh mahmahte Pawl thum om hi. Huaite tuh i) Missionary dia taksa mahmah a kuan khia a tangthupha va gente ii) Missionaryte vakna sum -le- pai a gin-omtaka pangte leh  iii) Thumna a nasatak a ana pangte ahi uhi. India gam a Missionary Organisation poimoh mahmah lak a khat Friends Missionary Prayer Band (FMPB) in “Go or send” chih thupi a nei in, nang mahmah missionary in kuan in, ahihkeileh na tangding a kuan ding mi sawl in/ thilpiak tungtawn in mi sawl in achih uh ngaihtuah tham hi.

3. Khovel pumpi ah United States of America(USA) gam thupi, gam hausa  leh ngaihsan pen leh tung et ahi tadih hi. America  gam pen TV leh film khawng ah a hoihlouhna  lam tamtak taklat in om hi. Himahleh a theite gendan in  mi chitak mahmah, Pathian lau a Ama a dia gin om tam mahmah ua theih ahi. Missions nasepna  toh kisai in  khovel pumpi ah Missionary sawlkhe tampen USA ahi nalai hi. A nihna ah South Koreate a chi uhi. {2006 statistics dungzui in Cross-cultural Missionary sending continents te  a percent in - N.America-36%, Asia – 35%, Europe -11%, Africa-6%, Latin America-5%, Pacific – 3% & Others -4%} Toupa gam nasepna a dia kipia mi a tam ziak ua Pathian in USA ,South Korea, Singapore etc te vualzawl in om ua,mite ngaihsan in om ua,nang leh kei in le I ngaisang uhi.Ei Zomi te  in Missionary nasepna ah bangtan pan kila hiam chih mimal ah leh i Saptuam pawl chih uah  kiveel tuak hi,I nam leh gam lah Toupa laptouh  a deih huai ngal a…u nau.

4. Nigeria te kikhop pi khat ah a geel geel chiang un a muh suah uh tuh Pahtian in Sap/Englishte vualzawlna pia ahi chih ahi. Pathian in a vualzawl ziak ahih leh Sappau/English tungtawn a Pathian thu a kihah gen ban ah amau Pathian thu genzak na ah thupi pan mahmah ziak uh ahi, a kichi. Huaiziak in Nigeria ten le a thupi theihna ding un Pathian buan petmah a buan a, Amah thu hah taka tangkou pih di’n a hanchiam uh chih thu nikum October 2013 a Lamka khopi a 3rd World Zomi Convention a Myanmar apat a hongkuan thugenpi khat a I neih uh Rev Pau Khan Khai, President, Zomi Baptist Convention of Myanmar,ZBCM, (tua Louisville,Kentucky,USA a Doctorate zil a om lel) in a thugen Youtube tungtawn ah kangai kha hi. Huaiziak mah in lam chi tuamtuam ah amaute dopsang in om zou ta uhi! Sia Khai gendan in “Ei Zomi te zong Pasian chih tak na toh a biate i hih a Pasian toh vaikhat peuh i pat peuhleh Aman hong lamsang ding hi. Zomite i om nana uah USA, Malaysia leh gam tuamtuam ah hitaleh  Zomi  Fellowship omzou khin a Toupa bete i hih man in tu in ei Zomi te vanleng/lenna a lengdia kisa toh katehkhin hi” chi in gen hi. Hiai a thugen ka ngaihkhiak in ka gintak ban ah dik mahmah di’n ka gingta hi. Pathian in “…honpahtawi peuhmah ka pahtawi dinga, honmusit peuhmahte lah ka ngaineu sin ngala.Those who honor me I will honor, but those who despise me will be disdained"(1 Samuel 2:30)  chi hi.

5. Jawlnei Daniel laibu apat in mihingte kivaisaina ah Pathian  thuneipen hihna (sovereignty) leh thilhih theihna(power) kilang mahmah hi. Aman a ut te kumpi toukhom a tusak a a utte kai khia hi. “….mite gamah Tungnungpen in vai a hawm a; a ututna kiangah huai tuh a pia ….” (Daniel 4 :25).Pathian toh vai khat peuh a pante hile hang Toupa’n hun a sak chia hon laamsang lo mahmah na di ahi chih muang ngam ni.

 
Conclusion:A tung a I taklat tak mah bang in Pathian thu in thil hih thei hi.Jehovah Pasian thupi bawl a gam tangzaina dia kalsuan nam leh gamte tawisan leh ngaihsan in om hamtang uhi.I mimal ah hi in, Saptuam tungtawn ah hi in, I minam ah hitaleh Toupa  Pathian a nei’ Nam hi chiat in Amah pahtawi te hilehang, Namte lak a a mei(tail) hilou in a lu(head) ding in hon bawl thei law mahmah ahih dan phawk thak chiat le hang ut huai isa hi. Hiai Gospel meivak I tawisan zahzah a I Zomi nam laptouh a om ding lah ahi ngala!Tutung i missonary Day ( Gospel ilak hong lutni) ah  Pathian thu a za nailoute zak sak a om na ding in mimal hi in, i minam leh saptuam tungtawn a kal khat beek suan thei ding in Toupa’n hon vualzawl chiat hen.Amen.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING