Nakpitaka Deihtuam Nu Manpha Mary

User Rating: 0 / 5

Star InactiveStar InactiveStar InactiveStar InactiveStar Inactive
 

Nakpitaka Deihtuam Nu Manpha Mary | Ms. Ching Mangte, Bethel Baptist Church, Lailam Veng.
chingboimangte

I. Thupatna:
Mihing te ikhelhna ua pat ei leh ei suakta theilou ihih man in Jesu Khrist eite tanding a ahong pian ding Pathian thiltup ahi. Huai athiltup hihbuchin ahihtheihna ding in mihing suan apat Nungak siangthou apoimoh hi. Pathian siangthoua, khelhna neilou ahihmah bang in atapa hong piang ding leng mihing leh Pathian mitmuh a siangthou, khovel buahna lak akipat kikem siangthou ahih ding kul hi. Huai ding in Nazareth khua ateng nungak siangthou Mary (Juda te dan bang a apasal ding Joseph toh kikham lellai), numei pasal khelhna leh buahna a gensiat bei, Pathian lau leh thumang telkhiak a om in numei tengteng lak a Numei hampha pen, Nute Nu, Nu manpha chih in a om hi. Hiai bang hamphatna thupi Pathian teltuam ana hihna apat eiten bang hiam I phattuampih theih om ngei dia lamen in ahinkhua tamlou I sut ding.
Laisiangthou telin laibu tuamtuam apat imuh bang in Mary tuh Pathian laumi, Pathian thumang leh hinkhua kem siangthou mahmah ahi chih imu thei. A hinkhua a bangteng atun a atuah hang a ama deihdan hizaw lou a Pathian deihdan zui dia kipia nungak ahi. Mi kingainiam leh nunnem, ban ah ginna khauhtak nei, a hinkhua a haksa tampite douzou ding a dohzohna hattak toh kigal van numei ahi chih I muthei.


II. Mary khanletna mun:
Nazareth khua bel kho lian lou Lebanon simlam tang a om huaihun lai a mihing 15000-20000 khong tenna mun ahi. A mite akim akiang a galilee mite leh Zentel te khong in thuzoh in simmoh bawl ua, laisiam lua tamlou, changkang lawmlawm lou, sepaih tamna ban ah sahkhua thil a leng etton tham ching hihtuak lou uhi. Huai khong ziak mah in polam miten  khoniin leh botloh, asung ateng mite mah leng salam leh khalam  a etton tham a siangthou zoulou deuh chia theih in aom uhi. Khovel mite et in lamet ding him him omlou, thilhoih kia genlouh mihoih tak leh suanhuai piang khe ding a lametna omlou khua ahi (John 1:46). Sepaih te mun leh galdou na munpi ahihsek man in abiik in numeiten a siangthouna uh mansuah in khovel sa utna toh tampin ahun uh azatna mun uh ahi. Huchih na mun a Pathian tapa pianna ding numei siangthou omding in mihing te lametna om lou a, huaisang mah in numei kijuak leh beven, khovel mite kia tenna mun hi a theih ahi.


III. Bang ziak a Pathian in Mary teltuam:
Mary hinkhua a siangthou a, Pathian laumi leh Pathian thumang ahi chih igenta. Pathian muang mahmah ahihman in Pathian thu gingta takin a zui hi. Juda te dan bang a apasal ding Joseph toh kikham laitak nitakin Angel in Pathian lak a pat tapa paai a nau neiding ahi chih ahong gen in kiguih in lamdang sakna lianpi toh om hi. Himahleh alungbuaina leh lunghimohna te Pathian apat ahi chih atheih chet in ginglel hetlou in ana pompah thei hi. Mihing lam et a zumhuaina, zahlakna  mualphouna te Pathian min a thuak in huaite apat vualzousak theitu muang in athugen dandan a pompah thei mawk numei ahi. Pathian thuzui leh ngaikhe gige mi numei, Pathian toh kizopna hoihtak nei, Pathian thu leh manglam hiam khovel thil maimai te khenchian a theichian thei mi ahi chih imu. Huaite ziak mah ahingei ding Pathian in mihing tengteng khelhna pua a eite hon tantudi atapa pianna Nu dia sit hetlou a ana sehtuama ana teltuam. Pathian mitmuh a lungtun huai na zaw hauhsak ziak, pilziak, inkuan hoihtak akhanlet ziak, leh melhoihziak te hipah lou in Pathian deihdan a hin a, athu gingta a zuih a kikepsiangthou na ahizaw.


IV. Pathian muang leh Dohzohna hau ahi:
Apasal dia akikham pih Joseph toh a kipii nung un Jesu khrist tuh ahong piang ta hi. Apian nung in kumpi Herod in thah sawm in zong chihthu Joseph mang lam in Angel in hilh hi. Hiai hunte in Mary in hiai hilhlawkna te gingta lou in ngaihsakpih keileh Herod in athiltup tangtung sak kha thei hi. Huai hilou in a Pathian thupiak te zuidia mansa aom in naungek piangtung (nau neikhin phet) himahleh gimle tawl khawksa lou in Aigupta gam a kiselmang din a zan azan in kuan uhi (Luka 2:14). Pathian thupiakte zahtak a zuitu kia hilou in a pasal thumang a dohzou numei ahi chih imu. Pathian hihna muchian a, thuhaksa hin anuam ah hitaleh Pathian thu toh kituak ahihnak leh zui dia kithutuak nupa ahih man un thupi isa a hampha tungtuan uh ichi ahi.


V. Pathian vanzat hithei dia kimansa aom mi ahi:
Toupa sikha nu kahi, nathu bangzel in katung ah tung hen (Luka 1:38) Pathian in anasep nop sepsuahna dia atellai in a telpa deihdandan a zatdin kimansa (available) in om theimawk hi. Aman Pathian ahihna bangtaka ana mu lou hileh, khovel lam en in nungak hingal a minsiatna tawpkhawk tuak ding ahih thei in Pathian thu nial ding hi. Himahleh Pathian adia thuak ding te thuak a hamphatna teleng tang sam ding in ahinkhua laankhia in a thu bangzel a tungsak din kipia hi. I niteng hinkhua ah ei deihdan hilou a ahon piipa piinana a pai a zuidia ikiman ding kisam mahmah hi. Pathian in mitengteng tung ah lametna liantak honnei a, ihihtheihna te leh hihtheihlouh te ei sang in aman theichian zaw hi. Saptuam te tungtawn bang, pastor te hiam upa leh heutute tungtawn bang a sepna mohpuakna hong kipete bang mahni thu leh deihtelna zang a I na nial a inawl khinkhin leh Pathian thiltup leh gelte tangtung sak loutu hikha thei ihi. Samuel in “Toupa genin na sikha in angaikhia (1Sam 3:10),” a chih bang a Pathian aw ngattak zathei a pom a zuitu hihtheih pen Pathian a dia kimanna thupitak ahi chih itheih poimoh ahi.


VI. Mahni kithuzoh leh kidek thei mi ahi:
Mari hi numei mahni kithuzoh mahmah mi ahi chih imu thei (Matt 1:21). Apasal dia akikhampih Joseph in Pathian thumangtak a a neih nung inleng etton tham ching takin ata neihma uh kikemsiangthou zou hithet uhi. Pathian thiltengteng mu a thei pailet ahihdan theichian mahmah hiding uhi. Aguka kikham leng hilou, nupa a kiteng ta himahle uh Pathian mitmuh a siangthou chih lohzou din nupa kipolhna ah kidek zou uhi. Amaute banga mihing ihi a, kikham thoh omzel mahlehang nungak tangval lai a bel ki itt kingaih thoh  akiheel te ihi uhi. Huai hunsung na ngawn in mihing a om taksa utna amasa a koih in Pathian mitmuh a diktatna kidekzohna te inanun kha nak sek uhi. Mari te nupa zaw amau thuthu apai lou in Pathian in aom dan ding ua agelsak dandan in om zaw ua, numei tengteng lak a HAMPHA chih zaw lohtak mah ahi ichi ahi.

Huaiziakin, Mari hinkhua ah zilding a biik in ei numeiten tampi kinei hi. Nu tengteng lak a Nu manpha ahihman in etton a mitsuan ding ahi. Amah hoihna tampi lak ah thum te, (a) ahinkhua (lungsim leh sapum) siangthou tak a akepsiangthou na, (b) a Pathian mitna leh Pathian nei hinkhua, (c) Thumang dohzou  leh kingainiam ahihna te etton tham ching ahi. Mari hunlai a hindan toh tulai hindan ah tuamna tampi aom ding. Himahleh Pathian in Mary hinkhua a thiltup aneih bang a eihinkhua aleng thiltup leh lametna nei ahi chih iphok thak ding. Hiai atung a quality aneih te gawmkhawm na din dohzoutak a ahinkhua azatdan tampite lak ah  tamlou igen lai ding.

i) Luka 2:7 a imuh bang in Jesu khrist apian in gan anpiakna kuang a sial in a om hi. Amah deihtel na masa hilou napi a Pathian thu thumang taka a pom nung aleng hiaibang a simmoh huai na mun a tapa aneih hun nangawn in Pathian kiang ah phun leh khasiat kampau zang het lou hi. Huai naksang in Luka 2:19 a I muh bang in thu kigensa teng alungtang a vom gige in a veh mite kipaktak in ana muak thei hi. Numei tampi ten nau ipaai tung apat ineih a ikep sungteng inleng khasiatna, phunna, hanghatna, leh lungkim louhna ngen a kidim te ihi. Alimpen te ne a kikem hang a, ahoihpen akigente ne a silh a zuan hang a, hinapi a khaat na toh kidim sek mah lehang I Nu uh Mari in zaw atamasa a paai apat gimletawl thuak pah  a, amah in ah leng hilou, khualbuk na ngawn zong hilou lai, kholak a ganbuk ah I Toupa honnei a, puanlum aleng tuam in omkei mahleh lungkim leh kipaktak in Pathian phatthei lai hi. Pathian neitaktak ten zaw khovel a zahlak huaina te atuah hun unleng Van kipahna toh dohzoutak in hinkhua zou theizel uhi maw.
ii) Matt 12:46-50 Jesu Khrist tuh ahong khang lian a anasep honpanta hi. Nikhat mipite kiang a thu agenlai in a nu Mari leh a unaute amah munuam in va ngak uhi. Huaihun in I Toupan ana lutsak pah hiam kimuhpih pah hetlou in, ka nute kasanggam leh tanaute zaw Pa deihlam hihte ahi ana chihsan hi. Hiai hun in nang Mari dinmun a om din kingaihtuah mah dih ve? Na tapa in mitampi lak a honna ngaina lou bangtak a om a honna nawlkhin a hiaibang kampau honna zatkhum hileh bang na chi om dia unau? Mari in zaw a zuihpa a thei a, atapa in bang ziak a huai chi ahia chih athei a, theisiam, doh zou tak a om in  asih dong in zathuap tou den lai hi.
iii) Johan 2:3-6 Kanaa khua a kitenna thu ahi. Hiai kitenna ah Jesu Nu Mari a om a Jesu leh anungjui teleng a tel uhi. Uain ahong bei a, anun Jesu kiang ah Uain akitasam ta uh e a chih in Jesun, “Numei nang nonna theihsak ding bang ahia aom ka hun atung naikei hi” a chihsan hi. Hiai hun a nang leh na tapa mipi kitenna uap a omte mai a kihouna bang hileh bang chiin na om dia? Na tapa pan mipi mai a Nu chia leng honsam lou a, Numei chiin hon sam leh bang chiin na react dia unau? Huai hun inleng Mari in zaw a dohzou a, dawng kawm leh hehsan naksang in a sikha tekiang ah a genpeuhmah hihzel din ana hasuan lai hi. Nu in atapa nasepna ah a zathuapa, amau nuta kia vakisel leh kibuaipih tak a om lou in Pathian thilhihtheihna  atapa tungtawn a hong suakding ahi chih theiin a thumang din mite hasuan theilai hi. Huaiziakin, hiai in Pathian gamna isepna a nu leh ta kizopna hoih nak poimoh hinatel e hon chisak a, nuten itate, taten I nulepate nasepna a ipantheihna teng a I pankhawm chian a vualzawlna let noinoi hial a hon pethei tuzaw Pathian mah ana hi.

VII. Thukhitna: Unaute Nazareth khua thupi leh a hoih lama minthang a hihetkei chih itheita. Naksang in, Rome sepaihte munpi khat hia theih ahi zaw. Huaimun a pat thilthupi leh mimanpha piangdia lametna aom hetlouh namun a numei tengteng lak a Nungak siangthou ana om khak mihing ngaihtuah na ah thillamdang ahi. I tenna munleh mual, ikhanletna gam leh nulehpa te siangthou a siamna pilna hau ahikholkei maithei, I nektak zonna a haksa salua a gim-le-tawl a om a sumlehpaai muhsuahna dia a siangthou lampi zong zou gige lou le hikha thei ihi. Himahleh Pathian in ei a athiltup ten amah apahtawi a, a ma thiltup tangtung sak tu hidia Mari a vanzat a azat bang in I omna mun, ikhosakna mun te hon mu in honna mitsuan den ahi chih theithak ni. Dohzohna hautak toh apasal nungzui apang a, mualphouna, zumhuaina leh gentheihna athuak ding tengteng theikhol na pi a a thu ana man Pathian in amah apat mihingte tankhe ding I Toupa Jesu hon piangsak  a, amah jiak in eiten hamphatna itan te suangtuah thak a ngaihtuah thak kisam mahmah hi hang. I kiim ipam I insung mahmah ah haksatna tampi toh hingkhom ihi maithei, huai hun leh munte a I om hun in leng eite midangte hingsak leh tha petu muanhuai hi ding a Pathian in hamphatna honpiak te ihih man in I mohpuakna om chiat hi. Toupan hoih honsak dan penpen a ahon bawl te ihih man in ihoihna hin I vuallelhna te ah hita leh Toupa pahtawi tu leh minthangsak tu hihtheih sawm chiat ni chiin iki ngen. Mari leng apumpi leh lungsim siangthou taka a kepsiang man in amah ah Pathian lunglut in eite tantu ding amah apan hong piang hi. Siangthouna lou a kuaman Pathian mulouhial ding (Heb. 12:14) ihih man in eite apat asiangthou nuntakna, lungsim leh sapum te Pathian in hon lamet tan a kemsiang a, initeng hinna a Mari bang a Jesu piangsak gige theidin sim tute Toupan hon vualzawl chiat ta hen. Simtute na vek un Krismas leh kumthak zatnuam.


Hiai article ka gelhlai a Pathian in hiaila hon piak thak ahih manin konkoih khom hi.


Hon siangsak in

1. Pianchil khelhna ziak sidinglai sian in lemhon gelsak
Nazareth khua a nungak siangthou Mari teltuam in
Kakhelhmohna sawpsiang din Jesu a hongpiang a
Kakhelhnateng siangsak in kros a hong si
          
          Toupa na sikhanu (kei) nata it kahi
          Nathu bangzel in katung vaihawm in
          Nangdia thuak a nang dia kipak gige ding in
          Hon siangsakin nang na sianthou bang

2. Ka leinunna Mari bang in siangthou zou keng e Pa
Kakim kapam a kamuh akazak ten kei hon tumzel
Hizong Mari’n nang mah hatna toh azohsam bang
Mari dungsun in ka siangthou nuam Toupa

3. Tuapan ka leinunna siangthou sem din kakem tading
Mihing hihtheihna tan ah kapang dia hon veng in aw
Kalungsung a nang mah piangsak gige theidin
Na lungtunna mi hampha hon suaksak aw

4. Nang deihtelna kia masuan a zuidin hon len in Pa
Leinopna pallun  mubang ngainon loudin honkem in
Simmoh mualphouna nangmin ahamphatna ngaidin
Simlei zilza ah honpii in aw Toupa