UPDATES:

Theihpihtu Muanhuai

Theihpihtu Muanhuai ~By: Kei'min Pau Ngaihte

keiminpaungaihte latestLeitung kisiam chil in Pathian in nikhatni apan nigukni tan A thilsiam thu Laisiangthou ah I mu hi. Tua thilsiamte tuh A Siamtu mikhat-Pathian- a om chih theihpihtute ahi uhi. A khutsuakte'n a hihna genkhin uh ahihman in mihingte’n Theihpihtu hihna chikhat tua hun apan I tang khin uhi(Rom. 1:20).

Thukhun Lui hunlai in Toupa'n Israelte' kiang thuchiam a piak chiang in theihpihtu di’n Ni, Kha leh Aksite zang zel hi. Kuapeuh in thilhih khelh a neih chiang in leng, tua mi moh/diktansakna dingin theihpihtu nih-le-thum a poimoh hi(Diut. 19:15). Ei mihingte'n leng ei-le-ei kal a thuchiam I bawl chiang un theihpihtu tuamtuam I nei uhi. Pathian toh mihing kal a theihpihtu a poimoh bang in mihing leh mihing kal ah leng a poimoh hi. Thil bangkim ah theihpihna tellou in bangmah sepsuah a om theikei. Tua ahihman in I gen tup pen tuh Pathian in a Tapa neihsun Jesu eite' adi'n hon lan a, A Tapa kia ah Tangtawn hinna a om, chihTheihpihna ahi(1John 5:11). Mihing leltak theihpih dia kichihmuh I hikei ua, Pathian’ Tapa theihpih dia kisa I hihna uah I mohpuakna uh lian lua hilou hiam? Thilsiam khatpeuh theihpihtu dia zang thei himahleh eite hon tel sese hamphat huai I sa hi.

Ei gingtute' tung a Toupa'n mohpuakna hon guan tuh gam chih a Tanchin Hoih puangzak a, nungzui tamsem bawl ding ahi. Huai bel namchih lak a A hon Tatna Thu Theihpihtute I hih ding uh chihna ahi(Mat. 28:19). Eimi nam diakdiak bang I hampha ua, Khristian Innkuan ka hi uh kichi thei di ngen I hita uhi. Tuchiang in Pathian Thu' ziak mah in I nam, I gam a khangtou ta a, gamdang, namdang lak ah siamsinna leh nekzonna ziak a khosa I tamta uhi. Huchi ahihleh nam dang, Pathian neilou I chihte' muh in Pathian hing bia, Jesu neite ihi chih bangchi'n I langsak uh chih ngaihtuah huai mahmah hi. Mite' lak a I gamtat dan, thilchiin leh kampaute'n I mizia leh I kipatna innsung genlang pha mahmah ahihman in I lawmpolhte, a bik in ginglou I chihte' lak ah Jesu' theihpihtute I hi chih I langsak hia, I zumpih zaw hia, a'ihkei le lah Pathian neiloute toh kilamdanna omlou in I hing hia?

Ahi a, midang theihpihtu a I pang di leh ei-le-ei leh I hihna kitheihchet a poimoh masa hi. Pa in a zi' pasal a hihlam, nu in a pasal' zi ahihlam a kitheihlouh chiang in angkawmna a tun hi. Nu-le-pa’n ahihna kithei in Innsung a tate kepna ah a mohpuakna zou leh tulai I buainate uh a dou neepzaw kha ding hi. Ta in a pa' tapa/tanu ahihlam a kiphawk louh a, student in student ahihlam amah-le-amah a kitheihpih louh chiang in a mohpuakna a zoukei a, banglam peuh ah lohsapna in a zui hi. Kumpi David amah, a zi' pasal ahihlam a kitheihpih louh ziak in Uria' zi Bathsheba a suhsak hi. Tua in amah leh a inkuante' ading kia in siatna a tunkei a, Israel gam-le-nambup' adi'n siatna a tun hi(2Samuel 12). A lehlam ah, Joseph in kuamah muhlouhna, Potifar' Zi' mai nangawn ah Pathian hing’ tapa ahihlam a kitheih ziakin Toupa’n a tawisang a,Kanan kial apan a Pa leh a sanggamte a hukhia hi(Genesis 42-44). Hiai ah 'hihna' I gen pen 'identity' kia hilou in 'responsibility' leng gen ihi. I hihna mahni I kitheihpih louh ziaka Insung, khotang leh saptuam kivaipuakna 'sytem failed' tampi om di'n ka um hi. Mahni hihna kitheihlouhna in siatna a tun thei a, hihna kitheihpih a mohpuakna zoh ziak in leng thilhoih tampi piang thei hi.

Mahni hihna eimah I kitheihpih louh in zaw koimah ah theihpihna nna sem taak I hi naikei ding. Ahihziak in, I hihna-mikhial, bangmahlou-I hihlam kithei lua a kiniamkoih ding bel a hikei. Mikhialte zong a hondam dinga Jesu hong pai ahi a, en Amah I theihma in Ama'n Theihpihtu Muanhuai hi ding in eite hon tel khin hi(Mat. 18:11,John 15:16). Mikhial I hihna kiphawk ding mah, Amah kiang zuan a Hotdamna I tan khit chiang in Toupa' adi'n theihpihna nna I semthei pan ding hi. Theihpihtu maimai dia Toupa’n hon tel a hikei a, theihpihtu muanhuai dia mohpuakna hon guan ahizaw hi. Muanhuai I chihte bel mohpuakna ginomtak a semsuahte ahi leuleu zel uhi.

Huaiziak in, Khristian I kichih ngal leh I omna peuh ah, niteng hunzatna leh thilhih khempeuh apat Pathian Hing Omsun nei mipa/minu(namte) I hihna I latsak ding kisam hi. Haksatna, lungkiakna I tuah hun in hon samPa I Pathian A Thuchiam a Muanhuaipa bel le hang, Amah ah Hatna bukim om a, a muanhuailou pen nangawn a muanhuai pen in hon bawl ding hi.

(Hiai pen BYF, EBCC Shillong in Tuailaite’ Ni 2013 zatna a Thugelh Tomkim kidemna a First Prize winner ahi)

 

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING