UPDATES:

Politics | UPA v/s NDA Government

notepadPOLITICAL DEMAND NEITE ADINGIN UPA GOVERNMENT LEH NDA GOVERNMENT AKOIPEN LAMETHUAI ZAW DING AHIA?

India gama teeng hinapi hangin Inteek zoulou kisa leh Akeupi tangzou kisalou a Political Demand nei tampi omte lakah North-East India State te lakah bangzah hiam I om uhi. Tu a I gennoptak ahih leh adiakin eite pawl omna Manipur Hill Area (Outer Manipur) Indigenous people te lakah Naga, Kuki-Zomi-Hmar ihideuh uhi. Huchi ahihleh India danbupi pansana i political dream leh demand te Phualpi Sorkal Lentu Congress led Government (UPA) leh Phualpi sorkal ana len ngei BJP led government (NDA), tulela Opposition NDA te akuapen tungah eilawi adingin Political Upliftment omtheipen ding hiam chih ngaihtuah vengveng poimawh ding hi. A taktaka tuabang tup-leh-ngim a neiloupi a mipite vanzata nei a sum-leh-pai zonna anei maimai ihihleh bel huchipi a ngaihtuah angai kholkei ding hi. Hiai anuaia bangin suichetna ibawlding.

NAGA, KUKI-ZOMI LEH HMAR.
I theihtaksa bangun Naga lamte’n kum sawmguk val vingveng Sovereign state/Independent Country India thahattak nuaiah tunitan asual ua, Sovereign state hiam Independent country hial hikei leh zong, Alternative Arrangement Government apolitical demand uh ahi phot hi. Ahihleh, eilawi Hmar, Kuki-Zomi te’n I tulel Political Dream uh ahihleh I ANPALCHANGPAL ding uh 6th Schedule Constitution uh tawmkan in Kuki state, Manipur Hills State (State within state) leh SINLUNG  STATE chih khawng ahi hi. Hiai ithildeih Political demandte uh mutheileng ahoihlou aom tuankei chiphotni, ikithutuah ua leh apiangtheilou dingin zong ngaihtuah tuan keini. Ahizongin Phualpi Kumpi Vaihawmna kuate pawlah eilawi lunggulh hon kingaihsak zawdia, abaihsam zawdeuh dia?

CONGRESS LED UPA GOVERNMENT
Central a NDA led BJP Government in thuneihna akhahsuah nung ua UPA led Congress hong dinsuah takun Congress President Sonia Gandhi leh Prime Minister Manmohan Singh makaihin a Coalition Partnerte utawh India maban ding gelkhawmna (Common Minimum Programme) kichi bawlkhia uhi. Tua Common Minimum Programme abawlna sung uah, State Re-Organisation himhim bawlkhiat ahikei ding chih thukhun aomkha hi. Tuabel aomsa State, UT leh 6th Schedule Provisionte koimah India gamsunga koihbeh louhding chihna ahi. Huaibanin Congress te paipih leh Ideology himhim ah India ateeng mite khempeuh India khualehtui, a Innteekvek ihi ua, India Danbupi nuaiah khentuam omlouin Lungkimtakin iteengkhawm ding uh. Huchilou a buaina bawl aomleh sukchimihvek ding ahi, tua dingin India Galvan leh Sepaih amuanhuai huntawk ahi, sisan luangin hinna tampi beitaleh India Kipumkhatna kuamah suksiatsak ahikei ding chi’h athumeilet uh ahi. Huaiziak mahin Nagate, Bodote leh Andra Pradesh a Talegana MP tamtak neite’n Chin-leh-ha suangin bei mahle uh tutadih in kawlok tuanlou hi. Nagate abang zong amakaite uh Th.Muivah, Ishak Chisi Swe leh S.Khaplang tepawl tawh Kum 15 hial Peace Talk nei mahle uh tunitan masawnna agah muhding omnai tuanlou hi. Amakaite Upa huntawkta uh ahihchiangin asih hun uh hong tungdia, makai hoih tuate bang hongneih nawnlouh hun uh hong tungding chi a asihhun uh ngakna lela Peace Talk amin a neih pihpih lel ahih ding uh zong gintakhuai mawhlou hi.
Huchibang imuh leh itheihsa Congress tullel paidan leh Ideology aneih na sung uah Eilawi Hmar, Kuki-Zomite adingin a lamethuai mahmah diam? Tuabanga political Demand ineihna uah I lawhchin na dingun UPA led Congress Governmentte maipha izonzon ua tuamah a iki Baptist lut uh a lampi naipen mah dingin ingaihsun uhia le? Tulela Demand nei eilawi UPA Sorkalin bang Political Solution ahontah ngei ua?

BJP LED NDA GOVERNMENT
Ina theihtaksa bangnu tullel UPA Government te madeuhin Dawi-havang kala suakta chihbang in NDA Led BJP Government, Prime Minister Atal Bihari Vajpayee heuin Term khat Phualpi Vaihawmna honlen uhi. Amau pawl bel Hindu Communal Force deuh ahi uh. Communal Force deuh ahih mahbang un India gam kichi Nam tuamtuam tampi tenkhawmna ahia, tua nambing tuamtuamte amau omna Compact Region zui a dopkang ding, Amau Region chiata India integration nuaimah a State, UT, 6th Schedule or Any Possible Indian Constitution nuaia a hichitan koihtouh ding, State Boundary Change and Re-organisation hitheitana bawla Inteekpan sakchiat ding, huchia nuainung kisadeuhte hong inteek panchiat dingua kuamah thauvui-thautang pua a gamnuai bela Helna bawl omnawnlou ding, Economic leh Development Peaceful taka India gamsung pumpi hongkhangtou ding, huaichia Khovela India kichi kongbangkima Super Power tawitu hong hi theiding chih amau paipihdan ahi hi. Tuabang ahihmanin Sisan-Naisan leh Sihna omlouin State Thum Jharkhand, Uttarakhand leh Chhattisgarh bawlkhe hiau ua, huaimunte ah gam demand ziak leh Nuainunglua kisakna ziaka Internal Problem himhim omlou pah hi. Naga Problem bangzong India Constitution in ahuam khakna chiangah Problem hihveng ngeingei dingsa, Kuanglaia Mehthuksa chihbanga aomlaiun sempiching manlouin centre a thuneihna NDA in akhahsuah ziakun tunitan hiai aw chihding omlouin angei in omtou nilouh lai uhi. BODO  problem zong tua mah bangin ahi hi. Ahihleh hiai BJP makaih Government te Communal Lungsim neite, Sahkhua Zalenna susete ichihchih laiun, I Political Demandte ah hong lunglutpih uhenla, 6th Schedule UT leh State te ah hondomsang tou tale uh tua i inteekna sungah Biakna Sahkhua zalenna hongsuk siatsak teitei ding uam? Amau Ideology ah mi amau omna Region chiatah inteektak leh suaktatakin om uhenla, Peaceful takin siamsinin, Nekletak kizon theih chiat leng tuaval omding hiam chih ahi.

CONCLUSION  
Hiai kon thugelh tawh kisaiin India Economic, All round Development tuamtuamte tawh kisaiin NDA hiam UPA hiam government phattuam leh demtuam aomkeia, huailam tawh kisaiin bel akuakua hileh a policy uh ahivek ahi. Himahleh Eilawi Indegenous People I omna state hiam, India gamsungah phawkphaklouh leh sikden deuh a om kisa a Inteekpan nuama political Dream a Demand naneitheite pawlin koilamah kong akihong zawin alampi anaizaw ( Short-cut zaw ) aomhiam chih ikivelna dia kahongelh ahi. Tuabanga inam makaite’n I thildeihte uh bang genna dinga New Delhi khawng leh I State Capital khawng a avahawh chiang ua athawmhaulou, ahulum Ruling Ministerte kiang kia va phapha uh hileh kilawm. Gualhau leh Pawlching kisate kianga kuamah thutumlouin chin, Pangpa leh Thawmhau kisa a Lawmngai mahmahte kianga ihawh leh kituitumin, ahong lawhchin hunchiang ua deih ineiha ihoulimna omsate pansana I lenglat leh kituituma kilawhching thei mahmah chih bangzong omthei eivoi. India in Kum 300 val Zalenna asuallai un zong, Britishte alungmuan laiteng uh bangmah akawlokkei, himahleh Second War World hong oma hong patauh chiang ua Indiate kianga Galdoupihdia zawn uh a, ih  zawhleh Zalenna konpeding uh chihthu chiam uha, tuabanga doupih unchin a zawhtak un, athuchiam bang ua independent pemai mah uhi. Telegana State bangzong BJP ten thuneihna aneih ngeingei uhleh Full Fledge State bawlsakdia chiam uhi. Tulela MP te kitellai inzong BJP candidate Loli Adany adia Vote Campaign ahongpai National BJP President Huailaia pen Shri Rajnath Singh in Pu Sielkai Hrangchal kiangh Tipaimukh Sihpuikawn ah, Hibang in vaikhakthu gen hi. “Hmar mipite haksatna leh na Lungulhte uh hoihtakin kathei chianta, Mipite’n Centre Sorkala thuneihna neidia na honkoih ngeingei uh leh ka gam katun chiangin konthei gige ding, hahpan in napang un” chi hi. Banghiam hun hongtung dingte ah BJP in Phualpi Sorkal ah thuneihna alet hun hong om nawn zenzen bang hita leh, Sihpuikawna Shri Raj Nath Singh thugen leh a Dairy Book a agelhte ziakin Pu Sielkai Hrangchal maingal mahmah maithei ahi aw. Pu Sielkai Hrangchal duhthusam khat kigen, “MLA, Minister leh MP hileng zong keimah mimala dingin neih leh lam, Gouthupi kamai khekei zongin, kami kasate inteekna ding mun leh gam Leitang Aktamaibei chia lel ahizongin kadeihpen leh kalung gulhpen ahi” chi hi. Leitung neih leh lamte adeihhuai in zonding mah hi. Pawlkhatte ading ngialin bangzahta in gou-le-gam kikhol mahleh, ama khang abeitawh kiton in abeipawl tam mahmah hi.

Abei theilou leh adeihhuai a Lunggulh huaipen Gou tuh Hotdamna ahia, India dan tawh kituak leh International dan tawh kituak ichiphial zongin Leitang tunga Innteek taka thunei Imakaite’n khangthakte nutsiat theihding GOUDET hon nutsiat sawm le uh, Leitung khang omsungteng daih ding hi. Heutu muan, Nang khangsawnte a dingin bang nutsiat hoihpen ding in na ngiahsun a? Humpi asih chiangin a Hapaak nusia a, mi asih chiang in amin nusia hi. Zalenna sual Mahatma Gandhi, M.A. Jinnah leh Netaji Subhash Chandra Bose te’n  India leh Pakistan mite adingin amin uhleh leitang manpha nutsiat uh a. Bokyok Aungsan in zong amin leh Burma Leitang ana nutsiat hi.

Heutu deihhuai, Na TRIBAL INDIGENEOUS PEOPLE pihte ading bang non nutsiat dia? chih damlai thudot leh nget ahi.

.
COMMENT (1) PHA TA..  
  •  
  •  

#1#1 esty » 2012-08-26 18:00

ki ngaih tuah tham cing mah2 ei....

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING