Review - S. Chingnu Album thak - Kon Ngilhzou Diam

User Rating: 0 / 5

Star InactiveStar InactiveStar InactiveStar InactiveStar Inactive
 

chingnualbum3

Kon Ngilhzou Diam album management team te deihsakna ziakin album ki release ma in Review Copy Zogam.com in kana muhtheih man un kipah thu Album vaisai te tung ah ka gen uh ahi. Zaila Kumpinu chi a title kana piak uh lasak siam Pi S. Chingnu album thak ki release dek chih thu a ki than a ki pan in khovel pumpi a Zomi om te tawk ling mahmah a, mite bildawh pen in hong om hi. S.Chingnu la te 1960s a kipan ana ki bawl a, ana ki thang himahleh tuni tan a khangthak te lung kuai zou lai hi. A la te rock version a bawl bang in om a, classical piece bang a bawl bang le ana om hial hi. Tua banah 2012 in TMI te saina nuai ah Pi S.Chingnu pahtawina in 'A Nite with S.Chingnu' chih sai in ana om ta hi. Hiai album S.Chingnu a dingin a 13 na ding ahi ta (mi dang toh a record khawm te toh sim in).

Hiai album bawl di a ki chih a pat in kana thei kha pah a, 2010 July vel a pat audio recording Pi S. Chingnu in ana pan ta in ka thei hi. Recording nasep pen pai tou tou in tukum mah a la record pawl bang le om hi. A ki gawm a kum 3 bang ki vei zou dan ahi. Recording bawl na ah Gideon Studio toh Roulngoul Studio te zat tuak hi a, a la ki khum na studio a engineer ten music bawl sak ngal uh ahi.

Tulai nidang banglou in music album a ki bawl chiang in video a tel kei leh a sam om mah bang ahih manin, video shooting tawh kisai nasep December 2012 in New Delhi a pan ua, huai zawh February 2013 in Lamka lam a sunzom uh hi.

Kon Ngilhzou Diam Album ka et ma a ka lungsim a ka suangtuah sang a niam zaw a hong hih khak di kana lau gu mahmah hi. Lamet mah bangin S.Chingnu a nana chu lungkiatna di khat le a om het kei a, a DVD ka play den hi. Pi S. Chingnu a kum bang upa sim ta mahleh a aw a hoih ngeingei in a hoih lai hi. A album lui te a music puak roprop te tulai music ging ki lawm toh a hong ki bulh tuah chiang in, a aw hoihna hon su lang semsem in ka mu hi. Album a la te theihsa ngen a hih ziak a diam ah, ngaihkhiat nuam kasa diak hi. A la te nalh vek mahleh ken hoih kana sak diak te - Pengpelep, Lailung Heh Hong Nem Ding, Kon Ngilhzou Diam leh Na Gel Ngam Diam chih te ahi.

Videography lam a hih leh tulai trend dan in ka ngaihtuah a, hu chi lawm lawm a outstanding taka va gen luat di ka thei kei, hoih kasa vek. Upat nung a New Delhi Select City Walk Mall khong a shooting dia ki pose ngam pen pahtak huai kasa. Shooting location te tel siam uh kasa a, casting te a siam ua, a val lua leh a hi guigui chih te muh ding ka thei kei a, decent kasa mahmah. Thil khat ka notice ahih leh a la tawh ki tuak a video a scene te in background story gen ana nei in ka mu. Video editing siam kasa, phe zual zual chih te om lou in, hi diai diai in etnuam mahmah.

A la thu te a gil dan i theihsa uh ahia, hi chi bang a la phuah siam te pahtak huai kasa a, zahna ka pia ahi. Hiai album ah S.Chingnu in a phuah Gawm Ding Simthu i Chiam Zong leng tel hi. Duhthusam hi leh hiai sang a la tam zaw om thei lai leh chih huai sak in om mahmah. Himahleh album bawl na mai ahih louhmanin, hiai teng le thupi lua, hoihlua!

I lasasiam te uh i pahtawi theihna leh support theihna om sun, a album uh leisak ahi. Hiai DVD copy khat a Rs 150 kia man ahi a, i market uh neu lai ahih manin copy sawn mai lou in leisak chiat dingin iki ngen ahi.

La te leh a phuaktute:
B K Swanno - Pengpelep (1994)
K Vungzalian - Na Gel Ngam Diam (1960)
N Vungzasin - Duangzen Ngaihnou (1965)
Romeo Hangzo - Ka Tan Tawk (1973)
S. Chingnu - Gawm Ding Simethu i Chiam Zong (1987)
T. Thongpao - Lailung Heh Hong Nem Ding (1965)
(L) T. Thanglianding - Kon Ngilhzou Diam (1986)
(L) Thanglianding - Sakmel Etlawm (1986)
(L) T. Jamkhothang - Zuanna danglou (1961)

Audio Recording Sponsored by L. T. Ngaihte
Videography and Editing - Sam Guite (Zawlbuk)
Supporting Videography - Rinawm Tonsing

Distributors, Manipur - CT Lian Guite
Distributors India & Worldwide - LS Munsong and John Hanghal


Zogam.com Ratings:
AUDIO and MUSIC : 4-star-rating
VIDEOGRAPHY: 4-star-rating
CASTING : 3-star-rating
LYRICS : 5-star-rating
MANAGEMENT : 4-star-rating
OVERALL : 4-star-rating

 

chingnualbum1

chingnualbum2

schingnu distributors

Videos:


 

Reviewed by Ginza Vualzong for Zogam.com

.