UPDATES:

Tedim Pau Ong Pianna

TEDIM PAU ONG PIANNA
By Dr James Suan Za Dong, MB,BS., D.O. Sydney, Australia

articlenew

Kampau in ong kinai sak in, ong gawm khawm aa, minam khat ong suak sak hi. Pau om masa lo-in minam om thei lo hi. Minam kician khat i hih nadingin, pau, athupipen khat ahi hi. Tua ahih ciangin, i taang pau, i Tedim pau bangci bangin ong piang khia cih i theih tel ding thupi hi.

Mi pawlkhatte-in “Tedim pau pen, Tedim ah i teen khop ciangin pau nam tuamtuam kigawmna pan ong piang khia hi “ ci-in agen, lai aa a-at uh i za, i sim kha zeelzeel hi. Hih pen athupi mahmah Tedim mi nampi khat ii taang-pau, i common dialect,  i Tedim pau, ong pian khiatna taangthu laai-gil hi aa, zaangkhai laak lo-in, limtak ngaihsunin i etcian phat ding thupi  hi. I tangthu leh leitung ah apiang ngei thute siksanin, logical, theithei dingin i enpha ding hi.

Pau tuamtuam azang minam tuamtuamte ateen khopna panin taang pau, lingua franca,  khat ong pian khiat theihna dingin anuai aa thu nihte lak ah khat zawzaw hang ahi hi.

I.  Pau tuamtuam kigawmna panin pau thak nam khat, taang-pau common dialect in ong piang khia (evolved ), (born) thei hi. Hih pen haksa mahmah ban ah sauveipi, kum a-tulin akiteen khop, khit ciangin damdamin piang thei bek hi. Tuhun ciangin piang mengmeng nawn lo hi   
 
II. Pau tuamtuam kigawmna panin a thahatpen khat, taang-pau ong suak  thei hi. Amasa sangin hun tomzaw tham la hi. Tu mahmahin zong piang piang lai hi.

I. PAU TUAMTUAM KIGAWMNA PAN PAU NAM KHAT ONG PIAN KHIATNA
‘Tedim ah i ten khop ciangin pau tuamtuam kigawmna panin Tedim pau ong piang khia hi’ i cih ciangin, “pau-kee tuamtuam,(Teizang, Saizang, Sihzang, Zo, Thado, Gangh pau, ctp.,(cihtepawl) kigawmna pan, a-om ngei nai lo, kam-pau thak (Tedim pau), ong piang khia tawm, ‘evolved,’ hi “ cih nopna ahi hi. Ahi thei ding mah hiam?, a hi ding sa kha aa akizuun mawk hiam? limtak i enpha ding hi. Bang ci bangin pau nam tuamtuam kigawm khopna pan kam-pau thak nam khat, evolution, tawh ong piang khia tawm thei hiam cih i theih masak kul hi. Hih pen piang mengmeng lo-in, hun sawtpi kisam hi.  Mang pau, English, hih bangin ong piang khia ahi hi. English pen Germanic peoples ahi, Angles, Saxon, Jutes, Frisii leh Franks-te ban ah Latin pau azang Roman Empire mite tawh Migration hun lai aa kipan kum  tul nih dektak sung ki hel zau-in ateen khopna pan un ong piang  khia, evolved, kam pau thak, English language, ahi hi.

Hih mite kum tampi sung ong teen khop zau uh ciangin 5th Century panin 11th Century dong, (kum 600) khit ciangin Old English ong piang khia zo liailiai pan hi. Tua khit, Middle English pen 11th pan 15th Century ( kum 400 ) khit ciangin ong piang pan aa, tua zawh ciangin15th pan 17th Century dong ( kum 200 ) khit  ciangin Early Modern English ong piang zo pan ahi hi.  Tuni aa kizangh Modern English pen17th Century pan tu ciang, kum 300 val bang hun saupi la lai hi. A vekin, tua pau nam tuamtuamte kigawmna pan kum 1500 val khit ciangin,  tuni aa kizangh English pau piicingtakin, ong suak khia, evolved, zo pan ahi hi.    (History of the English language, Wikipedia Encyclopedia; Cecigani Fousto 1981, Mallory, JP 2005 and Simek, Rudolf 2007 )

Hi bang aa ong pian khiat theih nadingin ateen khop hun lai-un, sumzuak-sumlei, trades, leh Roman galkap sung ah nasepna cihbangin kihel-kigawm khopna hoih mahmah nei uh hi. Lai zong nei khin uh hi. Pau kigawm theih nadingin, trades, sumzuak-sumleina athupipen khat ahi hi. Tua bang hi napi, Angles, Saxon, Jutes, Frisii, Franks leh Latin  mite pau kigawmin pau thak nam khat ahi, English,  piicingtak aa, ong pian khiat nading kum 1500 val kisam mawk hi.

Tua ahih leh, Tedim ah Zomite i pau tuamtuam kigawmin pau ‘picingtaak’ khat ahi, ‘Tedim pau’ ong pian khiat nading zah dongin bang tanvei Tedim ah i teeng khawm ngei hiam?, i ‘suulzuih’ ding hi. Ciimnuai aa kipan tu ciang, hun thumin i khen ding hi. 1. Tedim kisat maa, (Pre-Tedim); 2. Tu-maa aa Tedim, ahk.(ahih keh),Tedim Masa(Former Tedim), 3. Tulaitak aa Tedim (Today Tedim) ci-in khenin i en ding hi.

1.  Tedim kisat-maa: ( Pre-Tedim ) : Hih hun pen, Ciimnuai i teen lai 1569 kiim [ Dr E H East-Burma Manuscript, page 123. (1400 kiim a-ummawh zong om hi )] pan Tedim Masa akisat 1650 kiim ( pawl khatte’n, 1550 kiim ) sung teng ahi hi. Ciimnuai ah khang giat akiteen khit ciangin mun tuamtuam ah ki lal khia hi. Tu aa Tedim khua mun pawlteng ah nidang pekin, Thahdote, Vaipheite, Guite, Ganghte, Thawmte, Kawmte, mun tuam ciat ah hun tuamtuam sungin nateeng ngei uh hi. Tual gal om hun lai ahih ciangin, khat leh khat kikihta-in teeng khawm lo uh hi. Khuangzang, Sekzang, Phuaizang leh adang mun tuam-tuam ah na teng  uh hi. Tedim kisat maa, Pre-Tedim, hunin teeng khawm lo uh ahih ciangin, pau kigawm lo hamtang ding  hi

2. Tumaa Tedim ahk. Tedim-Masa : ( Former Tedim ) : Hih pen Tedim kisat pan kipan,     Mangkang kumpi-in Tedim ahal ciang sung teng ahi hi. Tedim khua Thadote-in na sat ngei uh ahih manin Thadote-in tuni dong mah, “Tedim, ko khua hi” ci liuliau lai uh hi. Zote Pu Em Do in Thaang-Thuam panin a-te deldel gal muh aa a-va et ciangin bualtui (=dim) nitaang sung ah a-te na hi-in ‘tedim’ na ci-in a la phuah zong atupa Pu Do Za Kham (Pu La Cin Khup pa) ciaptehna kem lai uh hi.

Tua bang mahin Guite Pu Gui Mangin, zong Tedim na sat ngei kici hi. “Khukpi, ko Thawmte khuat hi” ci-in a-angtanpih zong om hi. Tedim khua hi bangin mi tuamtuamin na sat uh aa gal leh sa hangin, ki lawi kikkik hi. Anunung lam, later, hun ciang bekin hoih takin kiteeng khawm pan hi.

Hih Tedim Masa hun pen (i) Earlier Former-Tedim leh (ii) Later Former-Tedim  ci-in hun nihin i khen leuleu ding hi.

(i) Earlier Former-Tedim : Tedim-Masa ii atuunglam, 1650-1840 : Hih pen,Tedim kisat pan kipan, Pu Kam Hau, Pu Mang Gin leh Pu Khoi Lamte ( atomin, MKK ) makai-in ong uk maa hun teng ahi hi. Tedim kisat maa hunte mah bangin, gal leh sa tam lai ahih manin kiteeng suak zo lo-in kinusia kik zeelzeel hi. Tua ahih manin, “Tedim ah tap kuavei kiluak hi” ci-in khangluite-in na gen uh hi. Teeng suak zo lo-in giatvei na lal uh ahih ciangin, Tedim-Masa ii atuunglam, Early Former-Tedim hun sungin zong i pau-te kigawm lo ding hi.
(ii) Later Former-Tedim : Tedim-Masa ii anunung lam, (MKK)te-in ong uk hun, 1840-1889 : Hoihtak leh nuamtakin khuapi lian khat asuah dong Tedim ah amasapen akiteen khop hun ahi hi. 1800 ma pawl aa kipan Thawmte Pu Mang Sum in a uk ciangin gal launa ong tawm semsem ahih manin kilawi nawn lo-in khang to semsem hi. 1840 kum aa kipan Pu Kam Hau, Pu Mang Gin leh Pu Khoi Lam (MKK)te-in,  ong makaih uh ciangin Dimtui vang khua, inn 300 val aphak dong lungmuangtakin Tedim ah kiteng khawm hi. Hih pen minam-kee tuamtuamte Tedim ah kihelzau-in ngaihmuang-takin i tenkhop amasapenpen hun ahi hi. Ih pau kigawm ding hi leh hih hun sung bek hi thei kha ding hi.
 
Ahih hangin kum 50 bek sawt hi. 1889 kum ciangin gamkeek Mangkang kumpi-in Tedim haal ( Dr Desmond’s Kelly’s Burma Campaign, page 29 )   ahih manin kinusia-in, ‘Dimtui vang khau-inn 300 val, Tedim - Masa (Former-Tiddim) ong bei leuleu hi. Tedim khua 1889 kumin kilawi leuleu hi.
    
Tedim ah i ten khop hih hun tomno, kum 50 sung bekin i pau tuamtuamte kigawmin Tedim pau khat ong piang tawm, evolved, thei vat lo ding hi. Banghang hiam cih leh ei sangin, atamzaw, sumzuak-sumleina leh lai anei khin, aki helzauzaw, Europe gam mite nangawn kum tul nih dektak ateen khopna sung uah, Mangpau-aluui, Old English, ciang bek ong pian nading nangawn kum 600 val kisam hi.( Page 1 na ) Tua nangawn, apiicing Mangpau, English, hi nai lo lai hi.
    
Tua ahih leh, i pau-kee tuamtuamte kigawmin pau nam khat, Tedim pau, picingtakin ong pian khiat nadingin kum 600 sangin sauvei la zaw kaan lai ding ci-in uphuai hi. Bang hanghiam cihleh, trades i nei kei hi. Lai i nei kei hi. Amimal mahmah i tawm hi. Kum 50 sung bek kihelzau-in Tedim ah i teeng khawm ngei hi. Tedim-Masa ii anununglam, MKK hun, kum 50 sung bekin, pau nam khat, Tedim pau, piang khia tawm, evolved, lo ding hi.

3. Tu-aa Tedim  hun : ( Today-Tedim ), 1910 pan tuni dong :  A nihveina nuamtak i teen khopna : Gam-keek Mangkang kumpi-in Tedim ong haal ciangin Tedim masa ong bei-in kum sawm nih sung Tedim ah Zomi ateeng om lo-in kinusia hi. 1891 kumin Tedim ong la(KBC), aa, ong tonpih uh anasem Gorkhate, Kala sumbuk bawlte leh Sen inn lam thei khutsiamte bek na teeng uh hi.Tua hunin Tedim ah Golkha pau leh Urdu pau bek kizang hi.
    
Tu laitak aa i Tedim khuapi ( Today-Tedim ) ah, 1910 kiim aa kipanin Zomite tawmtawmin kiteeng kik panpan hi. Tua Zo mite, Losau minam-kee, Pu Neng Thawng, Teizang minam-kee Pu Pau Za Kam, Saizang minam-kee Pu Gin Thual, Pu Thang Langte, leh Khuano minam-kee, Pu Thawng Cin ( tawmvei  khit ciangin, ciah kik ) te Tedim ah nateeng masa uh hi.
     
Pu Neng Thawng, Gawngmual khua pan hi aa, Lamzang-Losau pau ( Lai i neih ciangin Kamhau pau kici ) na zang hi. Pu Pau Za Kam, Teizang pau, Pu Gin Thual leh Pu Thang Langte, Saizang pau, Pu Thawng Cin, Khuano pau na zang ciat uh hi. Tua zawh kum thum, 1913 ciangin, Lamzang-Losau pau ahi, Kamhau pau ci-in Zolai ki bawl hi.( anuai ah acingzaw-in) Hih kum thum hun sung bekin i kigawmna pan pau athak, Tedim pau, ong piang khia tawm lo ding hi.

Tua hi aa, Tedim ki sat maa aa kipan, Tedim Masa (Former Tedim) hun nih (earlier leh latter) sung ahi zongin, Tuni-aa-Tedim (Today-Tedim) ah akiteen kik tuung kum thum hun sung ahi zongin, i pau tuamtuamte kigawmin Tedim Pau ong pian, evolve, theih nading in hun, mun leh thu om ngei lo hi.

II.  PAU TUAMTUAM KIGAWMNA PAN A THAHATPEN TAANG-PAU ONG SUAHNA:
Tu aa ih taang-pau ‘ Tedim pau’ thu i gen ciangin, Losau-Lamzang thu gen loh phamawh hi. Banghang hiam cih leh, i taang-pau, Tedim Dialect, pen akhanglui mahmah Lamzang-Losau mite pau-awkaih ahi hi.

Losau pau leh tuu-aa Tedim pau pen 98% sang atamzaw kibang hi. Paukee dangte mah bangin, khua khat leh khua khat awkaih ki lamdanna tawm nono om hi. Gentehna (gtn.) in Teizang pau ciatciat Mualbem khua leh Mualnuam khuate awsuah kibang khin lo hi. Saizang pau veve Saizang khuate leh Phaizate awsuah ki lamdang hi. Sihzang pau mah hinapi, Thuklai leh Voklak khuate awsuah kibang lo hi. Ahih hangin pau-kee nam khat ahi khawm ciat uh hi. Tua bang lian mah bangin Losau leh Tedim pau-kee , nam khat ahi hi.

“Lamzang aphat lai-in inn 700 ciang pha in Guite Pu Mang Sum in Ukpi sem hi. A sialkong aa asuan mawng kung tu-in po lai hi”  ci-in kum 87 apha Pu Lo Za Khen leh Pu Thang Khen Cinte-in Rev Thang Khawm Pau tung ah 23.05.2014 ni-in a interview-na ah gen uh hi. Tedim inn 300 aphak ma pekin, Lamzang inn 700 pha khin ahih ciangin, akhanglui mahmah khuapi khat ahi hi. Tu-in Lamzang leh Luipi kikal teng ah daai, phuung, seek kungte kimu thei lai hi.

Lamzang pen Ciimnuai khit, khua lian masapen khatin kigen hi. A mite zong, Teizang, Saizang, Sihzang, Zo, ctp.(cihtepawl); tawh Ciimnuai hun maa pekin a om khinsa, Lamzang (Losau)  minam-kee ahi uh hi.Tangthu aa kigen, Phucil leh Nan Tal zong Lamzang ah na teng aa, Losau pau mahin  Nan Tal asih ciangin a zi, Nei No (Ni No zong kici) in la phuak aa,:
“ Nan Tal na han tualzaang ah ee, Sialcing naupang lam nalingling ee//,  Nan Tal nong lam ding sang ee “ (Rev. Dr Go Za Kham kiangpan)Hih la-in tua hun lai pekin Losau-Lamzang pau leh tu aa i Tedim pau kibang hi cih ong lak hi.

Hun khat lai-in Lamzang Hausa Pu Thang Go in a zikik leh a tate nih tawh Losau khua   (anihveina) na sat hi (Zomi Encyclopedia- Sia Pum khan Nang)  Losau pen Lamzang khua gei hi aa, amite zong Lamzang pan mah ahih ciangin, Losau mite Lamzangte/Lamzangte Losaute mah ahi hi ( Pu Lo Za Khen 23.05.2014). Tua ahih manin, khanglui, upa mite-in, Lamzang awkaih azang, Anlang, Buanli, Gawng, Kansau, Lailui,  Ngennung, Suangsaang, Thangkhal, Tonzang, Tuithang, ctp.,  ‘Losau mi - Lamzangmi’ na ci uh hi. ( Pi Ging Zen, No. 1, Pu Vum Tual,. No. 2, Page 6 leh Pu Dam Khupin agen, atupa,  Pu Kham Go Pau zakna bang, Pu Kham Zen, leh adang khangham mite gennate)

Lamzang pen awkaih akibatpih, Anlang, Buanli, Gamlai, Gawng, Lailui, Mauvom, Ngennung, Suangsaang, Taaklam, Tonzang, Tuithang, ctp., khua 30 valte sung ah akhangluipen, a-uhaampen, abulpi, aphungpi ahihna kimu thei hi.  

Losau-Lamzang mite amimal limlimin tam, (khua 30 val) hi. A awsuah uh neem hi. Teitangin navaak uh hi. Mi pawlbawl siam uh hi. Kipawl khawm thei uh hi. Thu khual uh hi. A pau uh thakhauh hi.
“ J H Cope Topa 1910 kumin Tedim ong tun khit ciangin  “Zolai ong bawlsak ding aa aki pat, hunin  Kam Hau uk kici i gam sung ah pau nam 10 val bang na om khin hi. Tuate-in: Teizang, Khuano, Phaileng, Losau, Paihte, Dim, Saizang, Zo, Thahdo, Hualngo, cihte ahi hi.”( ‘Tedim pau tawh Zolai ki bawl cilna’  - Pi  Luan Za Cing )

Zolai akibawl ding ciangin, siahkai tingteng, Thahdo, Zo leh Paihte hausa gukte-in Tedim khua sung aa kizangh pau tawh bawl ding adeih uh ciangin, (Pu Ngul Lang’ Diary),  Cope Topa-in Tedim khua sung aa kizangh pau tawh Zolai ong bawl sak hi. Tedim khua sung ah bang pau kizangh cih, i en leuleu ding hi.

Tedim kiim teng ah Losau pau-awsuah azang tingteng Gawng, Lamzang, Lailui, Ngennung, Thangkhal khuate leh, Lamzang-Losau tawh awsuah akinaipen, Saizang pau azang, Teklui, Lailo, Tualzang, Sezang, leh Saizang khuate-in Tedim uumcih diimdiam uh hi. Tedim  pen  Mangkang Vuandok  zum omna leh sumbuk om masakna khua ahih ciangin, vanlei ding, vanzuak ding, zum vai leh apai, ahawh mawkmawk, a-va en dingin hih khuate panin ki nilehin nisimin Tedim nawksuk-nawkto uh ahih manin, Tedim khua sung ah Lamzang (Losau pau) leh Saizang pau akizangpen pau ahi hi.  

Tua hun, 1910 kiim pawlin Kamhau Uk sung ah, ‘Tedim Pau’ cih  om nai lo hi. ( Atung ah, Tedim pau tawh Zolai kibawl cilna.) Om hi leh, na kihel hamtang ding hi. Tua ban ah, Mangkang kumpi-in, i ngeinate ong kem suak sak lai-in, siahtung-siahphei zong ong pia sakin, Kamhau upadi zong ong zang sak lai ahih ciangin, ‘Tedim Pau’ om hi leh, ‘Tedim Dialect’ na ci pahlian ding hi. Tua tham lo-in, Tedim aa omte-in zong na deih, na kal ding uh hi. Om lo ahih manin, Tedim khua sung aa kizangh Losau (Lamzang) pau tawh Zolai kibawlin,‘ Kamhau Dialect ’ na ci hi. Hihin, 1913 ciangciang Tedim pau cih om nai lo ahihna ong lak hi.

Pau-kee tuamtuamte lak pan Losau-Lamzang pau ong thahat semsem hi. Tu-ni aa Tedim ( Today-Tedim) khua akisat tuung lai-in Tedim khua sung ah akizang masapen pau nam nihte sung ah khat ahi hi. Cope Topa-in Tedim khua sung ah kizangh Losau pau tawh Zolai abawl ciangin, Losau mi, Gawngmual khua Sia Cin Lang in na huh hi. Tua Losau pau pen ’Kamhau Dialect’ ci-in saang ah kisin sak ahih maninofficial dialect, ong suak aa, zum lai leh laipai khempeuh ‘Kamhau pau’ kizangin, i gambup ii taang pau ong suak hi. Tua hun lai-in Kamhau gambup pen tu aa Tedim gam, Tonzang gam leh Kansau gamteng khempeuh ahi hi. Suahtakna i ngah ciangin hih gam teng avekin Tedim gam kici hi.

1919 kumin, Cope Topa in  ‘Tedim Thukizakna Lai’ ci-in tadensa, ‘Kamhau pau’-in ong bawl sak hi. ‘Tedim pau‘ ci nai lo lai hi. Sang aa kisin laisim bute zong ‘ Kamhau Dialect ‘ na ci hi.1923 kum Nov 21 ni-in Sia Po Ku leh Zomi tapidaw suak masa Pu Tun En, Vial Nang, Dam Suan, Cin Lang, Khup Thang, Ngul Suan Dam Khup leh Awn Khua Ningte-in ong bawl phat uh, athumveina, Third edition, i labu, ‘Tedim La Bu’ kici ta aa,‘Tedim pau’, cih kipan ta hi.

1948 kum, Independence i ngah khit ciangin, hun ong kikheel pha mahmahin ‘Kamhau’ cih sangin, i gambup a-uk Vuandok zum omna, ‘Tedim’ ong minthang zaw semsem ahih manin, Tedim Subdivision min hang tawh  ‘Tedim gam - Tedim pau’ ci-in  ong kizang paisuak ta hi.

   Tua aa kipan,....1951-1952  kumin Rev Hau Go-in, Xristian La, ‘Tedim Kam’ ci-in, ahi zongin,  . . . ................. .1969 May 14 ni-in TBCEU in ‘Tedim Labu’, ci-in  ahi zongin
 . . . ................. .1992 kum ciangin ZCLS in zong ‘Tedim Labu’ mah ci-in ong bawl uh hi.  Hih bangin i taang pau, ‘Tedim Pau’ – ‘Tedim kam’ ci-in ong kip semsem hi pan hi.

Hih i ‘Tedim pau ‘ pen paukee khat hi lo hi. Teizang, Saizang, Sihzang, Zo, Khuano, Vangteh, Hualngo, Paihte, Phaileng, Hualngo, Thado, Dim, ctp.te bangin paukee hi lo hi.  A neituam om lo, i gam bup aa i taang pau,  ‘Tedim pau’ ahi hi.

Tua hi aa, ’Tedim pau’ cih kammal, tangthu tawh i et ciangin, 1948 khit ciangin damdamin ong kip, established, hi pan aa, khangmoi mahmah hi. Kamhau Gam bup ii pau-in Kamhau pau ahih mah bangin, Kamhau, Tedim tawh i laih ciangin, ‘Tedim pau’ zong ‘Tedim Gam bup ii, anei tuam om lo, i taang pau ong suak hi. Hih pen i tel ding thupi hi; ‘ Pau-kee hi lo hi.’

Atomin et kikna: 1. Earlier part of Former Tedim hun : Kiptak kiteeng lo-in, ‘tap kuavei kiluak’ hi  Tap kuavei ki luak ahih ciangin giatvei, gal kitai ding aa, I pau kigawm man lo ding hi  2. Later part of Former Tedim hun : kum 50 sung bek nuamtakin kiteeng khawm hi.Kampau khat kum 50 sung bekin, evolve, thei lo  hi. 3.  Today-Tedim, (Tuni - aa i Tedim), hun : Tedim akiteen kik zawh kum thum ( 1910-1913) khit ciangin, Kamhau (Losau/Lamzang) pau-in lai i nei ta hi. Kum thum sung bek  in pau nam khat  piang khia, ‘evolved’ tawm lo ding hi. Hici bang teng hi aa, Tedim ah i teen khopna pan Tedim pau ong pian khiat theih nading thu, mun leh hun om ngei lo hi.

Sakhi tui nekin pan leng : Tedim ah i teen khopna pan Tedim pau ong piang khia tawm hi phiingphiing lo hi. Tedim kici kammal apian maa Ciimnuai laipekin adang pau-kee te bangin a-omsa, Lamzang-Losau pau-kee khat ahi hi  1913 kumin tua Lamzang/Losau pau tawh lai i nei aa, ‘Kamhau Pau’ kici-in, saang ah akisin aa kipan ong thahat semsem hi.  Suahtakna i ngah, 1948 khit ciangin, ‘Tedim pau ‘ kici pan ahi hi. Pau kee tuamtuamte sung lakpan Losau/Lamzang pau-kee ong athahatpen aa asawt ciangin, i taang pau, Tedim pau,  ong suak ahi hi.

Mai lam ah ‘Zopau’ ,  ‘Zokam’  i cih hun zong ong tung lai ding hi ci-in ka um hi.
             
Lamzang - Losau minam-kee thu, ka tuah khak ngei thu nih:

1. Ka neu lai, Tuu-aa Tedim (Today-Tedim)  ah inn 30 val bek ka phak lai-un, ong peemta, Pi Ging Zen pen numei pilvaang, tangthu-tuanthu  athei mahmah nupi khat ahi hi. Amuiciai ciangin, Tedim naupangte ong phin thei zeel aa, “ Hei, Tedim naupangte kiphasak kei un,Losau mi ka hi uh! Tedim bulpite ka hi uh maw ! ” ong ci thei zeel hi.  Ni khat, Ginpi (Kim Khua Gin) leh ‘NaSuan (Nang Za Suan) hehin “ Lo nei beek kei uh teh; na huan uh lah sau pet kei “ acih uh leh suang tawh deen ong sawm mawkin  deel zeenin ka tai keek uh hi. A mau Suangsaang khua pan ong peem uh hi aa, awkaih pen, Lamzang-Losau i cih te ahi hi. Tedimte’ bul, ‘Losau hi’,  ci hi. ‘Tedim pau ii abuipi Losau pau hi’ zong, aci hipah hi.

2.  1948 kum, Independence ih ngah khit ciangin, Tedim gam ah amasa pen  Party nih mee tawh kiteelna 1952 kumin om aa, tua hun laitakin Pu Vum Tual Tedim ong pai khat tawh kituak hi. Ka pa, Gin Thual, tung. “ Hih pen Thu Hoih Vaihawm Pawl ( THVP ) leh Khamtung Suahtak Vaihawm Pawl ( KSVP ) kiteelna hi aa THVP te pen Lamzang mi - Losau mite-in panpih zawdiak in tua lo tengin KSVP panpih uh hi. Kei zong Lamzang - Losau mi  hi’ng. Ahi zongin ke’n ka mee-tang KSVP-te pia ning” ci hi. ‘Losaumi ‘ aki
cih ciangin, suang tawh deen ong sawm pi Ging Zen’ khuapih sa-in kihta sim pian pah ka hih manin ka mangngilh thei ngiat kei hi.
 
Pu Vum Tual pen Kansau khuate hi aa, Losau-Lamzang pau awkaih azang khuate khat ahi hi. Tapidaw suak masa, a khua ah Pawlpi keem sia hi-in Tedim ah Sangmang F O Nelson tawh ki mu dingin ong pai sialin ko inn ong tung den hi. Mite thudot, tangthu aciing mi pil khat zong ahi hi. Kansaute Losau-Lamzang mi hi ci hi. Kansaute pau zong Losau-Lamzang pau hi aci hipah hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING