UPDATES:

S5 Box

ZOGAM.COM Login

Paite Pau Chi Thum

article-logoZapi uap vaisai in kipeipei mah le’ng tangtunzou nailou ihihman in angmasial huai takin Zomi chi a igen-isak laka nam khat Paite pau chi 3 (thum) a nuaia bang in ka hon gelh a, behlap/paihkhen/bawldik ding awmte hon bawldik/paihkhen/behlap tei dih ua.

LA PAU : Tulai hunin kizang tam nawn kei mahleh vualluite ngaihnat leh lungsimtong deng kammalte laka khat tuh lapau ahi. Paite pau hauhsakna akigen chianga a ki nawse theilou ahi. Nidanglai late leh tulai late enkak lechin kilamdang mahmah ding hi. Nidanglai ate’n Lapau toh laphuak in Lathu sa ua, tulai te’n Thuthu toh laphuak in Thula kisata hi. Khang kikhek, mihing khantouhna ki lamdangta ziak i ngoh leh bel pawmzam theih pah ding a bang hi. A hihhangin, sui ngai-sut kul, genchet-hilhchet poimoh i chihte ‘thil thupi kiselgu’ ahi. Lapau tampi i neihte laka thupi ka sak diak ‘Senchil vangngaih’ chih ka hon telkhia hi. A khiakna, ‘sen’ ichih naungek/neulai/ngeklai genna ahi a; ‘vangngaih’ i chih chiangin ngaihzawng/deihzawng/lunggulh chihna hiin a tangpi in nungak-tangval kala ki ngaih-kiitna genna ahi deuh hi. A hihna takah ‘kam-uang paukam/lathu’ ahi. English a ‘first love’ i chih zatzat un ‘senchil vangngaih’ in agen genban deksuailou, akal uh tong-leh-lam a kigamla lai ahi. ‘Naungeklai apan ka ngaihnou’ chihna hita lawmlawm ahihchia.   Tangval khat in nungak kiangah ‘naungek ka hihlai apan ka ngaihnou na hi aw’ chiin la vasakkhum hawhaw leh a ngaikhetu adia nuam geugou lou ding pen aw hoih ngelloupi a ‘ka senchil vangngaihnou aw’ chi ava sak niapniap chiangin nungak lungtang zulgop thei mok hi v’aw. A hihna takah bel naungeklai apan a ngaihzawng zaw hi zenlou ding hi. Ngailaw petmah ahihdan thuktaka a genna Lapau ahi.

THUPAU : Thupau i chih pen mihing pauzat tangpi pen genna ahi. Pau tualleng, kholak pau, khawbing pau chih te khong thupau ahi uh. Khaw tuamtuam in khawbing pau kinei a, tua dungzui in khawlak pau leh pautualleng kizangte zong a khua a tuam dan zilin kibang vek theilou, ’nou a diklou koua dik’ kichihsak theih moklouh pau tuh Thupau ahi ken ka chi hi. Laigelhna a kizang hi chitchiatlou, zattak pen leng hi khollou lah paihtheihlouh pauzattangpi tuh Thupau ahi. La pen khawbing pau tuamtuama kisa tuam thei hetlou ahihlai in thupau pen bel a kilamdanna ki theikhe pah geih thei mok hi. Upalam thusiam mahmah te’n a kiang ua paute azak lel un leng ‘huai khawsuak na hive maw ’ chipah thei uhi. Jesu nungzui minthang Peter kianga “ nangleng a nungzuite laka mi na hi tawk ve na pau ah a kithei aka” ana chih geih theih bang uh i ngaihsut leh huaihunlai pek apan khawbingpau/thupau na om hitah chih hon ngaihtuah sak hi.

LAIPAU : Mihing kam in a genkhiak leh sakkhiak kia ah pau bukim theilou a, midangte theihsiam dia gelhkhiaka kepbit theih pau tuh Laipau ahi. Huai tuh English te’n ‘Literature’ chi a honna lehkhiak sak uh hiin ka thei. Mihing khantouhna dia poimoh mahmah pau laka khat tuh hiai Laipau ahi. Laipau hausa mite nam khangliante ahi kichi zezen veh aw. Laipau siam tuh siamna khat hi teitei ahihmanin siamsinna ah tua laipau ki nawse theilou phet hilou in a bulpi ahi. Paite kampau mite lak bang ah zong Paite Literature Society chih ana om thamta a, tuchiangin Paite Laipau Sawipawl a chita uh a bang. Laigelhdan buaipih pawl tuh ahi pen mai ua, laigelh paidan tangpi guhgel bawlkhetu ding leng amau mah ahih ding ahi. Khovel pilna leh siamna a khantouh zel dungzuiin tua pawlpi poimohna lian semsem ding hi. Tuchiangchiang ah kuamah ki thulak ut nawn phalou chiat ihi maithei, laipau chih leng om thei manglou khop in laigelh a taizak piansima poi mahmah hi. Paukhiak/Thupau leh Laigelh/Laipau pen kinai mahmah napi akal uh gamla lua ahi chi a i ngaihsut ut kei nilouh leh a hunsawt in Laipau pen in omzia neilou dinga a zang mite zong nam mumallou kisuak thei ding hi. Thupau pen laigelhna ah zang hileng dikkim vek theilou in zong kilawm khollou napi i zat ut nakleh Laipau pen Thupau ah zattheih vek hi.

 

COMMENT (4) PHA TA..  
  •  
  •  

#4#4 zopalbawm » 2013-09-15 18:46

Pu Jk Guite, author in hon genciang pah a kipahhuai kasa. Gelhkhelh omtheilua leh om gige ahi cih ka pom, keimah inle gelhkhial gige kahihna ah. Author in ka comment hici zawdeuh hen cih a neih leh edit dia mansa kahi.
Tong le laam, saknuamsak ci in hon na simsak hamham un e.

  •  
  •  

#3#3 J K Guite » 2013-09-15 17:00

Ngaihdam : Paite Laipau Sawipawl chih pen gelhkhelh khak 'Paite Laipau Saipawl' chih ding ahi simtute leh PLS ngaihdam ka ngen. 'Zopalbawm' comment 1.a tong-le-la & 4. a 'saknuasak' bang deuh a gelhkhelh khak zenzen hi ei, poilua. ngaihsiam.

Hilhchetna : 1.Sawi ichih ut leh zong selou : Paite pau ah 'sawi' i chih in kawk tampi nei mah e. PLS toh kituak dia bultheihdan om tham a utte kikum leng poilou lua. 2. 'Lungsimtong' & ' zulgop thei mok' ka hon huchi gelh khak bialbual ziak taka PLS poimoh mahmah chidan ka samzen ve.
Ka kipak : Lunglut taka comment bawltate leh bawllai dingte ziakin ka kipak.

  •  
  •  

#2#2 zopalbawm » 2013-09-15 11:01

A gelhtu in behlap/paihkhen /bawldik tuak 'awmte' hihthei dia kong hon honsak ahihna ah i gen sam ut a.
"awm" kasakte ahihleh -

1. 'Lungsimtong', 'zulgop thei mok' cihte kbawng leh 'awm' acihte a gentup leh a genkhiakdan ah tong-le-la a kikhia in ka thei. 'aw' leh 'o' zatdan a ciangkuang zou naikei deuh.
2. Va cih thumal tangdin diing, 'ki' (mabelh hi diing), 'dan' (nungbelh) hi diing.
3. Paite Lai Sawipawl - Paite Lai Saipawl engkouna, simmawhna leh thusimlouhna ahi. "sawipawl" asak a ahihleh zong "sawi" cih thumal theikim zou nailou hikha diing hi. Khuam bang a kiphuh ciang in dettak leh kiptak ahihna di'n a kua i huk ciang in kisawi tuantuan mah hi. PLS' deihna leh tup theiban loupi a a sawi tanlel theipha ahihleh pen, a kipa diing, a detdouna diing a a sawiliing phot zezen uh hikha diing hi. Tuabang kal ah, kua phuhsa/kua lepkipsa sawiliing ahi ua? Kuamah!
4. La tungtang leuleu bel, tulai ate'n lapau zangtawm leh a zatna mun bang zong inappropriate thei mahmah hi. La hoih leh la hing a pianna diing in a phuaktu in a phuahna pau a theihcet mahmah kul a, a sakhetu in zong a kammal lawhdan siangset a hon lawhtheihciang in hoih sese hi. Tua kia hilou in la i cih kaihnei ahihna ah a kaih bawltu/phuaktu a pilvan mahmah kul hi. A tangpi a et in la hong kiphuah nakleh a thu hoihsa hi a, a kaih in lahoih ahihleh hihlouh ding thupua hi. I cihbel, i pau ah 'tone' (kaihsang, kaihpheii, kaihtom om) huaite ahihna mun leh akizatna di munlou a akizat ciah nuam theilou, lemtheilou hi. Lusei la leh tedim lam late a tamzaw thumal kaihsau leh tomte a sau leh tom mah in zang uh a, hoih kisa thei hi. Paite la manipur suakte en le ucin, tom let di khawng kai sau pawpaw, a sauna dite tomsak lutlut uhi. Huai in hingsak zoulou deuh hi ci ing. Tuaban ah, la ah thumal (vocabulary) siamte' phuahte hoihzaw deuh hi. Thumal gennop kibang, lawhdan tuam zatsiamna in la gilsak in saknuasak hi.

  •  
  •  

#1#1 aihnake » 2013-09-13 16:12

Gelh hoih mah mah e. Hiai bang le dik kasa lua Quote:
Tuchiangchiang ah kuamah ki thulak ut nawn phalou chiat ihi maithei, laipau chih leng om thei manglou khop in laigelh a taizak piansima poi mahmah hi.


Lapau lam ah niamkiak kasa. Tuchiang a laa kiphuakte bang le dau lua a kei hiam. Hahpan sem in gelh/phuak tam sem ni.

Tomkim tak leh navak huai tak hiai article simchiat din hoih kasa. Kholai pau/thupau pen laipau a i hon gelh tam luat chiang in ki lawmlah sim hive aw. Chiamnuihna dan a gelh vet ihih kei ngal le. Tua banah laipau gelh khenkhat i et veng veng leh mahni a paipih aihkaleh manhi style kineih mawk hang a siamsinte khen khat chiang a su lung am thei mawk hi ve hang aw. A ki lual deuh in gelh thei le hang hoih mah mah ding. Paipi dan khat hong piang ding a zomah ve.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING