UPDATES:

Football pek siam David KC Ngaihte tawh houlimna.

davidkngaihtewithmuanavualnam

Football pek siam David KC Ngaihte tawh houlimna.

Interview na mun: Hyatt Regency Hotel, Room No. 525, Teynampet, Chennai- 600018.
Interview bawltu:  Muana Vualnam for Zogam.com
Date of Interview:  8 November 2014, after NEUFC vs Chennaiyin FC match.

Zogam.com: Telephone tungtawna I ki dawpna hon pomsaka, tu nitak huna hunlem na hong piak ziakin Zogam.com vaisai te tengteng sikleh tangin na tungah kipahthu ka hon gen masa hi.
David KC Ngaihte: Keile na tung uah nakpi in lungdam ing, kei neuchik himahleng na mi nasa na chipih te uh na awlmohna ziakua aneupen le tawisang sawma keibang houlim pih dinga nong kisak uh thupi kasa a kipak mahmah ing.

ZC:.Na family leh education background hon gen ve maw.
DN: Ka Pa ahih leh John K Ngaihte (Social Worker) ahi a. Ka Nu Hauzaching, Puan khui siam a Imphal leh a sehveel a minthang mahmah khat ahi. Unau Sanggam pasal thum (3) ka hi ua, kei a milai pen kahi. Ka “U” toh ka “Nau” Delhi ah naseem in a om lellel uhi. Laisinna lam ah B.A (Graduate) ka hi.

ZC: Chik a ki pan football pek lunglut na hia? Kua in hon inspire a?
DN: Kong lungluut taktak zaw 2006 lak khawng ahi di, huaima khawng in le tuh ka kimawl zeuhzeuh thou na a. Hiai chet in hon inspire chih di zaw ka neikei. TV a i muhte khawng ahi mai di’n ka gingta.

ZC: Football academy a zilna na nei kha hia?
DN: Ka nei khakei vanglak.

ZC: Professional Club a na lut ma in bang club khong ah na ki mawl a?
Dn: Manipur ah sawt lovaklou kana kimawl kha a (Youth Physique Union, Lalambung). Huai zoh Delhi ah club neu nou nou 2 Goodwill FC, AHBAB FC, TARUN SANGHA chihte leh Delhi state team a din Santosh Trophy 3vei kana kimawl kha.

ZC:.Bang chi dan a professional football hong lut kha na hia?
DN: Kum 2012 a Santosh trophy Delhi aioh a ka kimawl un (ODISHA ah). Ka performance hoihsa in Kolkata club khat SOUTHERN SAMITY kichi I- League 2nd Div a kihel dingin hon zawn ua, huai tuh ka first pro-club ahi mai.  Hiai tournament ah Goal 5 ka khum h.

ZC: Lajong FC a kum bangzah ki mawl na hia? Lajong FC a na ki mawl na hih hoih na ki sa thou hia?
DN: Lajong FC kha tutung a luut pan kahi a, official match kimawl kha nailou chih daan eive.

ZC: Tua North East United FC ah bang chi dan a lut kha na hia? Loh hon pe hoih thou uh hia? Contract bang tan ding a?
DN: Hiai khah hoih taka ana follow loute adi’n a theih hak sim liamluam a bang a kon gensau zek mai di. Indian Super  League a franchise 8 lak ah 2(Nih) te kha I-League team in a Co-own ahi. Huai tuh NEUFC (Lajong FC & John Abraham) leh GOA FC (Dempo SC & Dattaraj Salgaolar). Huai toh kiton in hiai team 2 te’n Domestic player te ISL player pool apan lalou in amau Club a existing contract neite lak a qualified a sak pen te uh mi 14 hiai ISL a dia loaned out uh chihdan ahi.
Lajong a 1 year contract ka neih toh kiton in NEUFC ah leng Kum khat ahi phot mai ve. Loh chuh a hun ma bang ale kimu guih zeel hehe.

ZC: I-League a bang chi dan a hong lut kha na hia?
DN: 2012 Odisha a Santosh Trophy zoh in Kolkata (I-League) 2nd Div. Club Southern Samity  June 2012 in kon join hi. Kolkata league leh tournament adang dang kimawl tou in March 2013 in Bengaluru ah I-League 2 preliminary round kimawl in main round kongluut uhi.

2013 a I-league Second division a final round a kimawl te standings  a nuai bang ahi a, top 2 te gel I league a lut tou uh hi:
Rangdajied FC, Shillong (Winner)
Mohammedan Sporting, Kolkata (Runners)
Langsning FC, Shillong
Bhawanipore FC, Kolkata
Mumbai Tigers, Mumbai
Southern Samity, Kolkata (Kei panna)

Hiai league ah Goal 5 ka khum khia a, a tung a club teng apan offer ka mu a, hilele Shillong team Rangdajied United FC ka na zom hi. (Kei a dia le ka I-League debut banah a club adia le).

ZC: I League toh Indian Super League bang chi na sa, a hoihna leh hoihlouhna hon comment ve.
DN: I-League I chih chiangin I gam pumpi a football adia top league ahi a, ISL I chih nawn chiang in Tournament thupi tak khat khovel a om masapen ahi lai. A sai tute leh a neitute kibang ahih chiangin Sum sik (coin) khat in alang tuak tuaka mai tuam tuak aneihbang ahi mai hi. Khen khat ten a number pakta omdia a khenten a symbol, a poimawh na zaw a kibang veve di tulel in.

A hoihna tuh (ISL) mi nuai bangzah hiam te’n Football hon phawksuah uh tuh ahi phot mai a. Banah player point of view ah training standards, infrastructures, packages, exposures leh facilities dang dang, etsakna in- Five Star Hotel ngen a single room a ki om chiat etc..etc.., chihte kha I-League a om kha nailou dan ahi. A hong hoih taktak leh tak taklouh di zaw Organisers te intension ah hong kinga mahmah in teh.

A game quality et in a kibang phial or I-League pen Competitive zaw phial di’n ka gingta. I-League bang le tua Camera kizang mah khawng kizang leh a etnop zaw phial dingin ka gingta. ISL pen Aged players te ziak in a game a slow luat hun atam mahmah, hilele good quality TV coverage leh mipi thawm ziakin a ki ignore thei zel.
Bangteng hileh khat pen League khatpen Tournament ahi a, a teh dan a kibang thei ngei kei di unless ISL has been converted into a full blown LEAGUE.

ZC: NEUFC a play na ki mawl mun kei a, bang ziak a? Coach pan hon deihsaklouh hia ahih kei leh a ziak dang om hia?
DN: Pre Season ka neih ua kipan in a fit pen in ka pang tou char char a, team ah ka mun a muang mahmah a, huaiziak mahin ka first match uahle kana kimawl hi. Huai ah natna thupilou ka tuak kha a, treatment khelh ziakin sawt hong ki suangtou khasim a, tu’n bel ka kimawl khak nawn di ngaklah in ka phe tet tet mai ta hehe…

ZC: John Abraham toh na ki nungpuakna lem bang eimi nungak ten hon haza lotel ua, John Abraham a taktak ah mi bang chi mi ahia? John toh kisai hon gen zek ve.
DN: Actor leh business man khawng ahi a, a emotions read hak di’n ka gingta. Tomlou chik chik khong kimuh khakna a om chiangin tuh anuam mahmah, pau le pau uut mah, kei toh kibang LOL.

ZC: Delhi a NEUFC ten nava pek/kimawl lai ua, na fans tampi ten nang lim maipho (mask) bun tampi om uhi. Hi chi bang fans tampi om na theih in bang ngaihtuahna na nei a?
DN: Ka chihuum (Goosebumps) bang a thou zezen. Ka kipak mahmah a amaute kisak theihpih seem di’n kimawl hoih touh zeel ka ut mahmah hi.

davidngaihtefans

ZC: Delhi a tournament minthang Tamchon ah ei singtangmi a diak a SSPP FC te a dia hasotna/advice piak theih na nei hia?
DN: I lunglut taktak aleh ahun dek chiang chauh a ki train leh exercise mailou in, kum tawn in hihthei leng mahni a di’n leng ahoih dia, i pan na team managers te le i dawn zangkhai mahmah ding. Excuse piak ding a bei ngeikei ding chih chiamteh ahoih kasa. Tui mal neuneu in tuilian abawl chih bang deuhin, Tamchon a i hih hoih in Delhi league-club, semi Pro club somewhere finally I-League club chih te ah maban omthei ding ahi.

ZC: Ei lak a football pek siam tam a tam, himahleh Club level a ki mawl ki tam het lou. Bang ziak ahi di? A channel om deuh hia? Khangthak a lunglut mahmah te khualna in advice hon pe ve maw.
DN: Club level a kimawl zoh na di’n siam naran ahithei khol kei a, siam taktak leh hat taktak ngai hi. Eiloi a di diakin vualtung tuan mahmah angai ding - aziak bel mi khazaap nuaia om i hihkhol diak ziak un. Huai ziakin siamna, hahpanna te ban ah dawhzohna, thunuailutna, lunglelh pahpah louh leh tupguhna khauh tak neih poimawh mahmah a, hiaite ki tasam sim tangpi hi’n ka thei. A channel chih chet omkei mahleh district, state leh national level a apaidan leh ki vaipuakdan thei a panlak a mavan huai di’n ka gingta. Banah experience ana nei kha samte apan information laka khop zel ding ahi.

ZC: Zomi FC ten hih hoih uh nasa hia? Zomi FC toh kisai hon kum ve na muh dan.
DN: Infrastructure leh resource a tawm tukin hih hoih uh kasa mahmah. Manipur football map a sulangtu ahih na uah phat huai leh ngaihsaan huai kasa mahmah. Coach pa toh le ka ki houkha zelzel ua, a course lak thu khong hon gena, huaiin masawn na lian tak hon posuah di’n ka gingta. Ka nu-le-pa te leng Zomi FC die-hard fans uh ahi ua, Imphal a match om chian ava en gige uh. Hon hih hoih touh zel uh ka deihsak.  

ZC: Tu chiang in khangthak te Football lam ah siamna tampi in nei ta ua, academy tuamtuam - SAI, Liverpool Academy (Pune) etc chih te a lut tamkhop ki om ta hi. Tua te toh kisai na ngaihdan bang a? A maban uh a hoih thou diam?
DN: I kiim-i-kianga namdangte toh tehin tawm I lut lolai uh kasa a kana pona thei mahmah, a lutzou sunsun te ahihleh nakpi takin ka kipahpih. Future a nei mahmah mai ua, lunglelh mawk ziak- vaite politics hiam, midang te toh khosak khawm haksa sakna ziak etc.. khawnga hon give up di uh a lauh huai mahmah. Academy hong tamsem sem dia production rate hong sang di chihna ahih chiangin, khot hoih a hong om nadi’un hong tungtuang deuh uh le a ngai ding. A focus uh a khahsuah louh ua dohzohna hoihtak a neih uh a kuul mahmah ding. Tamsem lut zungzung thei lehang a chih huai mahmah. Education facilities le pekawm tangpi ahih na uah nu-le-pa te a dingin leng a lungngaih huai lolawm lawm kei ding.  

ZC: Tutung Indian Super League ah nasatakin India sung a Football lam ah halthakna tung a theih ahi. Football player te a dingin opportunity tam ki hon beh dingin na gingta hia? Indian Football international level ah ki lang zaw deuh ta dingin na gingta hia?
DN: Player te highlight in hong om zaw sem  di ua. A hong hoih omtouha ahong paihoih touh zel leh sum muhna hoihtak leh cricketer te banga Celeb Status ngah theihna hun bang hong tung hial din a gintak huai. Huchi hileh endorsement contract leh side packages bonus ichi hia hong tam sem ding. A kimawllou te a dingin leng koi lamlam hiam ah job opportunity hong tamsem ding. Report dungzuiin khovel a league minthang taktak BPL, LALIGA, BUNDESLIGA, LIGUE1 te zoma a ki en tampen hiin a kigen a, huai dan ahihleh tuh a minthang mahmah chihdi ahimai. Next Season ah foreign recruits quality sang zawsem hong lut zungzung di ua a thupi zawsem lai ding.  

ZC: ISL zoh chiah league/kimawlna di na telna di om hia?
DN: ISL zoh chiangin Shillong Lajong FC min in GOA ah FEDERATION CUP December 28 apan ka kimawl pan di uh.

ZC: Ei singtangmi player minthang taktak – Boithang Haokip, Len Doungel, Siam Hanghal leh adangdang te toh na ki thuzak thou uh hia? Ei singtangmi player te namdang te laka nelhsiah a om na ki sa uh hia? Fair takin hon treat thou un na mu hia?
DN: Ka ki thuzak gige uh. Ngaihzawng te natan le ki theihpih vek sim ka hi uh. Hahaha
Huai khah mimal chiat a i experience dan a tuam chiat di’n ka gingta a, hilele ei lungsim puut leh kihon dan in a ki nga ka chi maiding. Vaigam a deuh te (player) a nu zodeuh uh chihdi hia (lungsim lam) mi gensiat khawng a hat tangpi uh. I siamna leh chitna in hon zuak zoh sung teng zaw hiai issue a om lovak kei in kathei.

ZC: Football first 11 a pan khak theih na dia bangbang poimoh? Bang position a tai ten play ngah deuh uh a?
DN: First 11 pang khak theihna di’n chuh fitness hoihtak neih banah Coach leh Management te deihsakna a poimawh (Politik a play uh le chuh thutuam). Indian Club contex ah chuh eilam mi adi’n full backs (side back) toh flanks (winger) a kimawl siam te’n chance a hau deuh pen in ka thei.

ZC: Indian Football Scene ah nek muh na dia kingak natak na sa hia?
DN: I-League tan leh tunung chianga ISL a kimawl kha ban te a ding in a ki ngak tak lua.

ZC: Na football gear dingin bang brand na zang? Bang brand hoih na sa pen?
DN: ADIDAS ka zang sek a hilele NIKE in chuh ka mit ala zaw pahpah.

ZC: Football pek siam a kua na ngaisang pen? Bang ziak?
DN: Khat chauh gendi chu haksa mahmah. CR7, Messi, Torres, Kaka, Villa, Beckham, Robben, Zlatan….aaa atam lua.
A masapen in chuh a siamna leh chitna ziak mahmah un ngaisang huai kasa a. A nawn in a consistency (performance uh) leh availability (game kimawl kha gige sim) ziak in. Huai banah a Winning attitude/mentality uh. A mi hinzia uh- ki ngaihniamna leh kisak theihlouhna mahmah uh ka ngaisang khol diak.

ZC: Ball pek fit na dingin diet, exercise, tep le muam ki control chih te poimoh hia? A poimoh na hon gen beh zek ve.
DN: Poimawh lopetmah. I diet leh correct way of exercising in i career sawt leh sawtlouh ding leng a define mahmah ding. Hoih taka training hih zoh REST-EAT-DRINK-SLEEP a poimawh mahmah. Huai in recovery hoihtak hon tun dia i fitness a kal pah ding. Hiai pen nikhat ni nih kia na hihding ahikeia kum khotawn a ding ahi. Hydrate mode a om gige kimawl mi adi’n a chidam pen.

ZC: Lamka, Manipur a dia 2nd town chih hial a om hi na pi in stadium chih phetlouh play ground quality hoihtak i neih louh un, sports lam ah kiakniamna tun hi in na thei hia? Bang chi leh sports lam infrastructure bawl hoih theih hi dingin na gingta?
DN: A hi lotel, lunglut petmah kichite leng niteng niteng in ground taak gego tung ah a kimawl kum khua in i peih kei ding uh.  Taksa inle ana lel pahpah a, huai in i theihlouh kal in honna demoralize man pahpah ahi.
Huai lam hon lunglut pih ding leh hon hih mualsuah pih di MLA/Minister i neih uh ngai ven LOL…  

ZC: Football na ki mawl louh chiang in na hun awl bang chi in na zang?
DN: Laa khong ngai zel….TV a Match suakte khong en zel. A chang in Social Networking.  Hihtheih khom khom in hong khang khe dite ka encourage sawm zel. TELEPHONING hehe…

ZC: Maban a bang tup na nei a? Football ki mawl touhtouh di chi na hia? International Club khong a ki mawl na sawm hia? Bang a na plan?
DN: National team a ka lut matan guhtui kang zen in ka kimawl tou zel ding.  International  tan zaw ka tum ngamkei, a ki naupang law nawnkeia. Hilele ISL in bang hon puak hiam chihzaw a ki gentheikei, a ziakbel ka team mate foreigner khen khat te’n Europe a kimawl zou di’n hon gingta uh- Ka potential et in. Plan chih chet ka na draft chiah kei, hilele tu season a match a tam theilam kimawl a masuan zel di chih ahi ka tup.

ZC: Na hun ki bichilh tak kala na tawldamna hun neihsun hong suam sak kahi ua kisuanlah huai samah leng, hiai bang hun hoih leh manpha nah hon piak theih na tungah Zogam.com vaisai Admin te banah Zogam.com ngainatu, simtu te tengteng leh gamsung buppi sunga na Fans te tengteng sikleh tangin lungdam thu a thakin ka hon gen hi.
Houlim anuamlua a zan sawtlam le ki phok pha nonlou eivele, dak tampi ana gingsuk der avele, zingchianga hon paisan di nahih uleh ki mukha man nonlou di i hih chiangin damtak leh lamzang takin pai un awle Mangpha.
DN: Keile lungdam lua na hong vak ua chimtaka omdi lai hun nuamtak hong zatpih nahih manin ka kipak mahmah hi. Tunung tuban ah leh a poimawh bangbang tanchin i ki thuzak zel kei di ua mo. Awle, kipak noule mangpha.

davidngaihteposter2

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING