UPDATES:

Lunglutna

Lunglutna

By Ginza Vualzong

Ginza New

Mihing ten lunglutna i neih uh hamphatna ahi. Lunglutna neilou hi leng ka hinkhua chimhuai di dan ka ngaihtuah chiang in mangbat huai ka sa hi.

Ka neu akipan in lunglutna tuamtuam ka na nei hi. Drawing gelh kana lunglut ngei a, Bruce lee lem khong poster ah kana gelh sek hi. Tua banah a cinema film poster collection bang kana bawlsek hi. Newspaper a cinema film suakte lemte tepkhia in, lehkhabu a ki belh khawm sek hi.

Cinema suah bang kana lunglut kha ngei a, bangvang neuchik atvang in limlang leh power (magnifying glass) zang in, cinema reel luite akipan cinema kana suahzel hi. Inveng naupang hon tawh cinema ticket khong bawl in, ka neulai in cinema peuh kana suah sek hi. Huchi a cinema suah ka lunglut luat ziakin ka pa in electric zang a cinema suahna hon leisak hi. Tuni tan in movies et ka lunglut mahmah lai hi.

Sports lam bang le kana lunglut mahmah hi. Volleyball, Batminton, Hockey leh Football kana hah kimawl sek hi. Ka inkong uh naupang te a dia kimawlna dia lian huntawk ahih manin, lawmte toh tournament khawng bawl in cup kituh in  ki om sek hi. Maubul kisui in hockey stick dingin ki zang sek hi. Class 8 akipan khong in Football ka hah kimawl a, school team khong in le kana pang ngei hi. International players te lim magazine leh newspaper khong akipan tep khia in lehkhabu ah kana tak sek hi. Himahleh ka mit a hong hatlou ziakin Football leh physical games te akipan kana ki daang koih a, Class X tan kia active deuh in ka kimawl hi.

Ka neu akipan music ah kana lunglut gige hi. Insung ah CCR, Smokies, Eagles, The Beatles etc chihte music ngai khia in kana khangkhia hi. Music lunglut ka hi ngei dia, guitar lem khong bawl in lasa dan khong kineih in ka om sek a. Huchi a ka lunglut ziakin ka nu leh ka pa in Acoustic Guitar khat Imphal ah hon leisak uh hi. Guitar ka neih tung bang in a key chihte le thei khollou in ka mok tum ging sek a, ka sung ten bengseng hon sa petmah uh ahi dia, ka guitar khong honna selsak zel uhi. Huchi in guitar ki sinsakna lehkhabu te en in lasak toh ka hon thuah thei ta hi.

Huchi in high school kailai class 9 leh 10 khong hih lai in, Siamsinpawlpi khawmpi khong ah la bang kava sa sek a,huai hun lai in Siamsinpawlpi Unit program teng bang ah lasa dingin va ki hoh sek hi. Ka school uh Dobosco program te bang a le kou lawmta in band bawl in la bang ka sa deuh neknak sek uh hi.

Lasak ka lunglutna bei lou in Class X ka zoh in Shillong leh Delhi a college ka kaina mun te a leng la kana sa sek hi. Delhi ka college uh Hans Raj College bang a Music Society ah ka tel a, show tuamtuam kana nei sek ua, recognition tampi leng kana mu hi. Ka college festival ua bang guitarist minthang Thanlian te loi toh concert bang va nei kha ka hi uh.

Ka graduate zoh toh ki ton in i gam ah internet hong lut chet hi. Huchi in internet lampang ah nasatak in ka lung hong lut nawn a, email leh chat kia a lungkim lou in website bawl khiat dan te ka hong lunglut a, Zogam.com bang ka na bawl khia hi. Tun le website mi a di a poimoh hun in ka bawlsak sek lai hi. Hiai toh ki zawitawn in Graphic designing lam le ka lunglut a, banner khong, poster khong ka design sek hi. Computer bang le zil sese tuanlou in ka thei mai a, lawmte khong in a computer uh a siat chiang bang in hon bawlsak sek uh hi.  

Tu lel in Photography lam ka lunglut mahmah ta zel a, DSLR khat lei in YouTube khong leh seminar tuamtuam a tel in nasatak in kana zil hi. Tu kum bul bang in awlmoh lua kisa in Lamka ah Photography Workshop bang ka va nei hi. Limlak lam lunglut lua in zi le ta bang model dia zang in lem lala mai. Tu chiang bang a tate bang limla dia ki zawn zou khol non lou haha.

Ka lunglutnate hi hunbi nei dan in a pai a, ka lunglutna a hun dungzui in kikhek tou den bang sim hi. A nawn chiah bang ka hong lunglut nawn diam ah - video lam leh cooking lam tuh ka lunglut sim in ka kitei. Lunglutna tuamtuam ka neih hi blessing dan in ka ngaihtuah a, ka hinkhua nasatak in a nuamsak a, chimluat ni ka nei tawm mahmah in ka ki thei hi. 

Ka neu a kipan ka lunglutna hon nang lou a, ka lunglutna bangbang a hon support ka nu le pa pahtak huai uh ka sa hi. Huchi mah bangin ken le ka tate a lunglutna uh lunglutpih a, a lunglutna uh a tuptan uh a tuntheihna ding ua support pe dingin ka ki hanchiam hi.

COMMENT (2) PHA TA..  
  •  
  •  

#2#2 Enty Paite » 2017-03-24 02:35

Na siam lua

  •  
  •  

#1#1 Enty Paite » 2017-03-24 02:35

Na siam lua

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING