Heloise leh Abalerd Ki-itna

User Rating: 1 / 5

Star ActiveStar InactiveStar InactiveStar InactiveStar Inactive
 

Heloise leh Abalerd Ki-itna
European Medieval Love Story
Compiled (in Paite) by : Chinkhanmuan Samte @ Muan Samte

chinkhanmuantesamte

Heloise leh Abalard ki-itnathu na simkha ngei hiam? Theihsa zaksa ahi in ahikei ta zong, a thutuun leh a sungthu mi' tampi'n i tuahsa leh i ki neelpih sa uh ahi ding hi. Himahleh hiaite geel tangthu in ki-itna/kingaihna tungtang ah 'itna taktak' zekhemna tellou a ki-itna hang in tuambiikna nei hi. Tuate tamlou, election thu kia gen le a nin huai si a, I pholh khe ding. ):

Hiai tangthu ahihleh atak tak a thiltung hi a, tuni chiang in kum 900 val pailiamta mah leh a 'love affair' uh mangthang theilou in, 'Vaang Kingaite leh Anbang ki-itte' hiaite geel tanchin in nakpi in thunun zou lai lai hi. A ki itna uh hal leh khen in om sek mah leh, gen vual louh, hal vuallouh a, a tou mahmah ziak in khang sawn sawn ah leng mang nawn lou ding hi. A ki-itna uleh kingaihna uh thagum leh zuau a veek in om mah le uh a dalzou bangmah omlou ahihmah bang in tuni tan daih lai chi le hang I genkhial het kei ding hi. Ei la in leng itna thu hichi'n ana gen hi.

"Aw itna Sim sing bang gil,
Aw itna kha na hiam mi?
Na heina leh na vangkhua
Angelte'n zong leel theilou"

Itna kichi, a suut mite a ding in itna tak tak theihsiam haksa ahi ngei ding. a definition va piak mawk theih le'ng hilou maithei hi. Bang toh tehkak a hoih ding hiam chih leng kichian tak a gen mawk theih hilou chihna ahizaw kha diam ka chi hi. Laisiangthou in "Itna' hihna tuam tuamte' hichi'n gen hi. Nunnem, migi, englou, kiliansak lou, dohzou, angmasial lou leh adang dang. Itna tuh a tehpih ding omlou Limitless ahihman in, ei late mah gen le "Nang kon itna Van bang in sang, tuipi bang in thuk ,ahihkeileh leh, Sial bang in lian" chi in la phuaktute'n ana gen ua a tuui thei pen ding in tongdam i na kikhak sek uhi. Itna ngei leng daltu a hat leh itna leng hat deuh deuh ahi ngei ding. I taksa pumte sia in muat thei a, himahleh, mihingte' i hamphatna mahmah uh khat ahihleh i lungsim' ngaihsutte selmangsak a om ahih hial kei leh muat in mang thei mawk lou hi. Tua bang in hiai tangthu leng ahi hi.

Hiai taangthu ahihleh Europe gambup sung a om France khopi Paris a nungak leh tangval ki-it kingaihna toh kisai a 1115 akipan 1130 vel a thiltung, a tuam deuh khat ahi. Awle, Vang kingai Heloise leh Abelardte' tangthu i sim suk ding.

Nungaknou melhoih leh duangchingtak san sinsen Canon Fulbert a dia a sanggam kinaih pih mahmah (niece) Heloise kichi tuh theih ut leh dot nop haau, ban ah a ziak (reasoning) kan det det leh dawnna di kichian tak amuh ma zong sek teilol kizentak leh fel khat ahi. Hiai hun in Heloise kum 17 lel a upa hi a, hiai bang a, a thuduhna (curiosity) amah kum toh et in sangmah mah hi, laigelhtu tampi in "gifted intellectual" chi uhi. Tua bang a thil a kansui sui na lam in mihingte bangchi bang a khovel a ki om kha jen jen hi hiam chihte nasan theih utna intellectual leh philosophical approach pansan in nei hi.

Huchi'n, hiai dotnate dawng thei ding Paris ah amah sang a kum 20 a senior zaw Abelard, tangval upa lou dang omlou hi. Huchi'n Abelard tuh Heloise a ding in tutor in hong pang hi. Amah ahihleh Philosopher leh Theologian leng ahi hi. Dotna pangai lou taktak a dotte leh a theih utte ziak in Abelard in Heloise mak sa mah mah kawm kawm un, a hun zatkhopte uh nuamsa thei mahmah hi. Perfect! (: Hun hong pai zel in "Sial kang leh sial kang kingai" chih bang deuh in, lunglut kibang chihmah tak tuh kihipna liantak leh kineelna liantak akal uah theihman louh kal in hong kuang suahta hi. Huchin gentam ngailou in kilawmtakna bawlkhit leh leplemsa a om chihna suak hi. Hichi khawng mah, lia leh taangte'n nuam i sak mahmah te uh ana hi ngei hi. "Paallai am ni, Paallai am ni" a chih chih uh hiaite khawng mah ahi ding e! Theory of Relativity dungzui in genteh le hang, teaching (logic, theology leh natural philosophy) sung hun tawk mahmah himahleh minit khat khawng toh kibang in bei bei maimah ahihman in. "the law of attraction" in a phankhawm (knitted) toh kibang houh amai diam?

Sa le kha lam a a kinaihna uh lah hat deuhdeuh, mailam nawt deuh deuh nilouh mawk, pung hul hul ahihman in taisiat mai mai theih vual hinawn lou dinmun in om kha uhi. Himahleh, huai hun lai in hichi bang a relationship (teacher leh student) neih dan (religious law) in phallou ahihman in itna a koltang suak uhi. Ahihhang in Itna sihna bang a gu haat kichi ahihman in itna a koltang bel koltan na dang sang in ut huai zaw ahi him hi. Tua bang din mun ah, a amau gel a dia buai huai mahmah khat ahihleh, mihing hatna teng teng in le a zawh louh, sum in le a lei zohlouh, ngaihtuahna pansan a itna hong kuangkhia ki-deihna ahi. Kineelna, kinaihna pansan a Itna om ahihman in mihing ngeina hi a, mihing hihna mah le hizaw hi. Pathian in hon bawl dan tuabang mah leng ahi ngei hi. Ki-it ding, kingai ding, hiai khawng sang a thupi zaw khovel ah omlou mah hilou hiam? Ki deihta mahmah ahihhang a a nanghtu ana om khak sek bang le thilpoi mahmah khat aitam?

Hun hong pailiam zel in seltheih nawn louh, sel theih nawn mahmah louh in Heloise in nau hon paita hi. Heloise sungkuante' sahkhua a mi kipezou mahmah ahihman un a sungkuante maizum saklouh theihna omsun, ban ah kiseel na ding lampi dang om nawn lou ahihman in Paris nusia in Abalerd pianna mun Brittany ah hong kitaipih (kigu) uhi. Tua mun a tapa nei uhi. Huchi'n Fulbert in (Heloise sanggampa'n) laithon tungtawn in, "hong kik un, kuamah theihlouh ding in (a guuk in, a sahkhaw dinmun uh venna in) kiteenna ka hon bawlsak ding uh, Naungek le hiai mun ah hoihtak in kon etkol pih ding uh, hong kik un, Nou a leng ahi dia, kou a leng ai ding " chi a a zol zol nalam in atawp ah Abelard in tua bang a, kiteenna hon phalsak di ahihleh chi'n Paris ah kik uhi. Ngim bang loutak in Paris a tun un Secred Marriage di hun in zekhem in om uh a, Fulbert, thumu kisa in a lawmte leh mitampi ana hilh hi. A tup guuk tinten khat ahihleh Heloise leh Abalerd khen ding chih ahi. Fulbert muhna dan in Abalerd in a sanggamnu Heloise minthanna leh melhoihna (intellectuallity and beauty) hihsiatsak chih ngaihdan nei in thangpai kisa tet tet a phuba laak a tup tinten mawng ahi. A kiteenna uh secred in kikoih kei leh Abelard leh Heloise in khotang ah dinmun neithei nawn lou ding ua, society in pawsiah ding hi. Hiai teng mah tuh Fulbert thubawl a Heloise leh Abalerd in a tuah uh ahi hi. Tua hunlai in France ah sahkhaw dan, dan paipi leh dan kizang ahi a palsat theih mawk mawk louh dankhauh tak leng ahi hi. Heloise leh Abalerd tung beek ah sahkhaw dan neu khah beek ahun a munzil a bawllem theih mai louh ahitam? Sahkhua in tua bang a ki-itte mawh a tan dia hia chih tuh kei mimal ngaihdan mai mai ahi. Pathian in itna hon pia a, sahkhua in tua itna siamlouh hon tan ding chih, itna thu lam ngaihsak khanon lou in i dan uh suak aitam ka chi hi. Aw, ahimah ve, a kilawm lampi mihing a ding in le'ng om hi i chi ding.

Huchi'n, Heloise tuh a ut leh utlouh thu hilou in Abalerd toh a kikhen theih na'ng uh ahihnak leh chi in a sanggampa Fulbert huauna in, zumna tuazah a thuak nung un Nun ding a koih in om hi. Nun a a om nung siah a ta leng amah toh kimu nawn lou ding a laksak in om hi. A pasal toh leng kimu nawn lou ding a dalna leng ahi hi. Hiai bang dinmun tuh anuam ding chihna thu omlou hi. A maban uh, ki itte gel a ding in lungzin huaipi ahih ban ah, chik chiang a kimu nawn ding uh hiam chih theih hi lou hi. Ngaih toh kikhen ding lah kuama'n I ngaihngam louh uh hi a, "khen dia lawm lou gibang khen uh" chi mai le'ng maw.
[Khen dia lawm lou gibang khen uh -Thangboi Mangte la ahi]
Phetlou in, Fulbert leh a lawmte'n zankhat thagum in Abalerd va buluh uh a, va get (castrated) uhi. Hiai bel kikhen mahmah uhen, chihna ahi i chi mai ding. Hichi bang a a ngaihnou Abalerd tung a thil tung Heloise in leng ana zakchiang in nna sa mahmah a, Abalerd a ding a banghiam bek ahihtheih om hiam chih lametna lianpi toh convent apan pawtsuah hi. Himahleh, Heloise, ahuntak a a tun theihlouh man in, azekaita a, a kikhel khinta hi. Huchi'n, Fulbert deihna bang in convent a khitui toh a lut nawn louh ngal atan ding dang omlou suak hi.

Sawtlou nung in Abalard ngei leng Abbey of St. Denis ah Monk in hong pang tei hi. Himahleh, daalna tampi lai ah itna zong hatsem sem, koi teng ah khen leh suan in om mah le uh khen a om theilou, a kimu theilou, itna, gui bang in zaampha deuh deuh deuh hi. "Itna leh khuh kiseel theihlou" chih bang in mun tuam tuak a khen a om hang un, amau a ding a tongdam kisaan theih na'ng omsun tuh laithon gelh a, pilvangtak a, tampi vei khak utlua hinapi, mite'n a theih suah louhna ding, abiik a Fulbert in a theihlouh ding ngimna in a tawm theilam kideekzoutak in hong kikhak thei liai liai uhi. A laithonte uah aki amm lai dan uh leh aki khiatlahdan uh, nidang a hunnuam kichingtak zalenntak a a zatlai laikhawng uh gelh khia uhi. Aw, eigeel, bang ding a khen a om se se i hi hiam chih tuh dawnna omlou dotna ahi sek hi.

Huchi'n, a kum a sim hong pai chiang in, a laithon uh zong tam mahmah ta hi. Tuate tuni chiang dong kepbit hi a, mitampite lungsim, hiai laithon hing mahmahte'n kuai in kuikunguuk sak mahmah uhi.

Khenkhat in "Hun mahmah leng damna ahi" achih bang un, amau ding in tung suunni kilawmtak nikhat, nidang bang hetlou, hong suak hi. Hiai ni tuh amau a ding a kimuh tuah ni leh hunsawtpi nung a kidam hetlou a, khut kilet ni, banah, amailam hun ua ding a hunthak nithak, a ngak lah mahmah uh kipat ni hong suak hi. Kimutuahlou, phetlou in khenna leh halna lak a a kum a sim monk leh nun a asep nung un Paris ah mipi theihpih in leh taksa mahmah a kigawmna leng hon nei thei nawn ua, Lungdam tak in bawlsiatna tampi nung ah" Forever One, Kiteenna" thak kichian nei thei khawng khawng uhi.

Abalerd sihnung in Heloise in a itna etsakna in a ngaihnou luang kum 20 mawng mawng duattak in kemlai hi. Aw itna, itna bang hi hiam theihzawh ahikei. I hinkhua lah zuau ahi si kei a, Pathian in ki-it ding a honna siam mah hi hang maw!

Kum 600 nung in Nepolian Bonaparte zi Josephine Bonaparte' hiai tangthu in khoih lua ahihman a luang uh vuikhop ding in thupia hi. "Hiai gel vuikhawm ding, a luang uh le'ng khenlouh ding ahi" chi in a kivuina uh mun tuam tuak apan toukhia in 'lungtuakte gel lungtuak tak in', a sihnung tanpha un vui khop in om uhi. Kiteenna zaw pahtawi ding mah himahlou hiam? [Kitenna I chih ceremony pen genna kia hilou in married life genna dan in theihsiam tek ni] Tuni in a luang uh Paris suahlam ah Pere Lachaise Cemetery ah vui ahihban ah, chiamtehna et theih ding ; theih gige na leng bawl uhi. France gam leh khualzinmi abiik in "Vang kingai te'n" hiai han mun veh in pak leh laithon itna genkhiakna ding in va nuse jel uhi.

True love never fail. When there is hardships and opponents, strength stronger.

Source: European Classic Text.