UPDATES:

Manipur Singtang Mite: Electoral Politics – IV

Manipur Singtang Mite: Electoral Politics – IV

By Dr Sanga R Laingek

rsanga

Thupatna:

Sehkhen 3-na simkhin chiatta diing i hihman in tu'n sehkhen 4-na gelhnawn le'ng i chi ahi: Manipur Singtang Mite in ahuap pen alompi a gen in Naga, Zomi/Mizo, Kuki & Hmar chihte i chihnopna ahi hi. Mi kimkhatte in bel tulel a Manipur State huapsung ah mi zaat thum kia phasak nuam pawl om leuleu uhi (i.e., Meitei, Naga & Kuki). Hiai pen adik lou ahi chih chiamteh chiat ni...!! Gamdang mite leh pawlam mite hon sapna pen khangthakte in kipomsiam thei lou a, I pu-i-pa akipan kiminlohna kichian aneisa hi hangh. Lapau leh Lavui tamtak ah kiminlohna leh i hihna kichiantak a taklat in om a, tuate pen tanglai akipan eite kiminlohna ahihlam i phawkthak a i paipih giugeu diing mah uh ahi chih i pulak masa nuam hi.

Kitelna:

Mipi thuneihna tungtawn a India kivaihawmna ah Kitelna pen kum nga hal a om zel ahihman in Manipur State ah February/March, 2017 vel a MLA kitelna om diing a gintak ahi hi. Kitelna toh kisai in thu tualleeng atam mahmah mai a, azaak chimtakhuai khop hial a thu-le-la phuahtawm Facebook & WhatsApp tungtawn a thehzaak in om lellel hi. Singtang Mipite theihtuak poimoh masa penpen ahihleh India Daan Bupi sung ah thuneihna leh hamphatna tuambiik bangteng kinei hi hiam chih leh Manipur State huapsung ah Singtang Mite: Electoral Politics toh kisai bangchi bang lungsim putzia neih kiphamoh masa hi hiam chih Kitelna maituah sawm kuapeuh in a theih masak uh kisam hi.

1. Manipur Kivaihawmna Paizia pen chinih in kikhen thei hi: (i) Phaijang (Plain Areas) huapsung kivaihawmna leh (ii) Tang-Gam (Hill Areas) huapsung kivaihawmna ahi hi.

2. State pumpi huapsung Daan thu toh kisai Manipur Inpi (Assembly) ah luikhiak leh genkhawm in om zel hi. Daan Bawltu (Legislators), MLAs tengteng kihel a genkhawm in om zel a, Phaijang leh Tang-Gam sehnih a kikhensa ahih toh kiton in Daan tuam om ahihlam phawkkawm a, Daan thak bawl diing khempeuh ahihchiang in avelchiantu leh enkaitu diing a muang mahmah a telching om: MLAs teng in akhentel siam petmah uh kisam hi.

3. State khat sung ah zaat tuamtuam kitengkhawm hi a, abiiktak in Manipur phaijang mi leh singtang mite pen Customs & Culture kituam vilvel ahih dungzui in Kivaihawmna toh kisai zong atuam ana om mah ahi hi (References: (i) Rules of Procedure and Conduct of business In Manipur Legislative Assembly; (ii) Hill Areas Committee Order, 1972).

4. India Daan Bupi ah singtang mite tanpual leh hamphatna tuambiik hunkhop piak in om hi. Tuate dungzui in State khat peuhpeuh in zong alompi a azuih chiat diing uh om hi. State atuam dungzui in singtang mite hamphatna tuambikte zong kibang sipsip lou ahihman in i teenna state dungzui a tanpual leh hamphatna omte khempeuh mipite in a ngahtheihna diing un bel mipi ai-oh MLAs-te vaihawm siamna ah kinga petmah ahi chih zong haihvual ahi kei hi. Manipur Singtang Mite: Electoral Politics pen velthak thak le'ng aphatuamna om ngei diing in lamen hangh...!!

(a) Bangziak a MLA hih ut? – Thuneihna deihziak lel maw? Dinmun saang ahi chi a ut maw? Baihlamtak a sum-le-pai, neih-le-lam tampi ngahtheih ahi chih ziak a ut maw?
(b) Gam-le-Nam humbit utna ziak a MLA hih ut maw?
(c) Bangziak pentak a MLA a pang ut a – Candidate sawm na hi hiam?

Thukhupna:

1. Thuneihna leh Mohpuakna paikhawm helhel ahihman in Mipi ai-oh a thuneihna piak a om, mohpuakna saangtak nei – Manipur Singtang mi MLAs tutu a pang lel leh hong pangtou zel diing kuapeuh in chiamteh di'a i deihsak ahihleh Daan Bawltu (Legislator) ahi chih chiklaipeuh a mangngilh lou a, Assembly (Inpi) sung ah Daan Thak puaklut ahihchiang a gen-le-sak diing hoihtak a kisakholsa diam a Assembly Session aom peuhpeuh chiang a kuankhiak heuhheuh diing: Debate – Kinial hun a apaukhiak ziahziah diing uh ahi chih i deihsak petmah hi.
2. Mipite ai-oh a MLAs a pang ahihlam akiphawk gige diing kisam hi. Gam-le-Nam vai ah apilpi a hoihna leh hamphatna diing amasapen a koih gige diing in i deihsak bok hi.
3. Daan Bawltu ahih toh kiton in India Daan Bupi leh State sung a Daan (Acts & Rules) tuamtuam siamna tuambiik nei kei mahle uh theihna leh theihkakna bel abulpi a (basic knowledge) aneih teitei diing uh kisam hi.
4. Manipur State Kivaihawmna toh kisai MLAs kuapeuh theihtuak: Hill Areas Committee Order, 1972 sung ah kichiantak a kigelhte zuih teitei diing ahi chih chiamteh dia hoih ahi.
5. Development Plans toh kisai: Phaijang leh Tang-Gam atuam vilvel a bawl diing ahi chih kichiantak a thei kilkel kawm a, Five Year Plan & Annual Plans bawl ahih peuhmah chiang a kuhkaltak a pang a atuam a Plan Schemes neih diing ahi chih changteel a aneih gige diing uh kisam hi (Ref.: HAC Order, 1972, Clause 6).
6. Gam-Leitang toh kisai Manipur Phaijang a zat diing Daan: MLR & LR Act, 1960 kichi om hi. Himahleh Tang-Gam a Singtang Mite zat diing tunitan bawl in om nai lou nilouh hi. Hiai pen thukin leh poimoh lua khat ahi peuhmah hi. Tribal MLAs ahihke'h Hill Areas Committee Members-te mohpuakna ahi hi (Ref.: HAC Order, 1972, The Second Schedule (Schedule Matters) No. 3).
7. Manipur Governor thuneihna tuambiik piak in om bok hi: Special Responsibility of the Governor – (Ref.: HAC Order, 1972, Clause 9).
"The Governor shall have special responsibility for securing the proper functioning of the Hill Areas Committee in accordance with the provisions of this Order and shall, in the discharge of his special responsibility, act in his discretion".

Chiamteh Diing: Gam-Leitang toh kisai Hill Areas huapsung ah HAC in Daan abawlkhiak diing, huchia Governor assent (lemsakpihna) laak diing – Manipur Gazette a suahkhiak a zat leh zuih a omthei diing ahi. Manipur Assembly ah 'Bill' puaklut masak ngai vet lou chihna ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING