UPDATES:

S5 Box

ZOGAM.COM Login

Hiai Khovel Kidang-kidang!

Hiai Khovel Kidang-kidang!
By VzSiam

vzsiam new

I sahkhua leh thuginte dem leh nial ding in hangsanna i nei hetkei maithei. Himahleh tu a mi khenkhatte'n sihngam a i gup i sahkhua leh thuginte tuh tua bang a ana dem ngam leh nial ngamte' ngaihsutna a pan suak ahi.

Lei leh van a Pathian' gamtatdan tuh theihsiam hakpi ahi a, theihsiam zoh ding leng ahikei. 'Ka hih ka hi,' ana china mah a, Ahih tuh ahi mai ve. Tuma kum sangthum-sangli lai khawng in hehpihna bei in a namteel Israel-te tungtawn in namdangte hih chimit ana sawm a, Noah hunlai a tuichiim a athah hunsalou in, himahleh Israel-te' kizenlouh ziak in a bangzah hiam hawi in a om uhi. Huai lai a Pathian huham leh ngentel tuh tu in dohzohna leh lainatna a dim in i thei uhi. Amah Pathian kikheek taktak mah hia ahihkaleh eite'n i tangthute uh toh kituak dia Pathian kheek i hi uhiam chih leng ngaihsut bat ahikei. Bangteng hileh Pathian' hihna tuh a gen a gentaaklouh suut leng suutbat ding ahikei a, i mihing lungtang om maimai theilou in a va suut khanaak chihman thu lel ahi.

Tulai a thiltung vengvungte'n ei Jesu' nungzuite khaphaanna khat hon pia hileh a kilawm hi. Tuma hunlai khawng a Khristian ginna ana tawisang gige gam America-te bang in Khristiante' a dia pomtheih ngeingeilouh ding daan a hon bawl ua, Khristiante dinmun dengdel tak a hon koih a bang uhi. Hiai hihna kibangte kitenna tuh mihingte'n tua khangthak hun a i theihtawm ahi zenzen kei a, hiai chiindan tuh mihingte' upat zahzah a upa ahi chih khangthu suut mite gentaklouh i Laisiangthou mahmah ah leng i muthei hi. Hiai thu gingtute'n bang i loh dia? I sahkhua bangzah dong in a hon nawngkai sak dia? Hiai dotnate dawnna ding in nidang a hiai bang a thugol i sahkhua ana sukhate sui le'ng i sahkhua hon sukkhaak didan bangtan hiam a theihtheih kha mai ding e.

Galileo in leitung tuh khuavannuai laizang hilou a, khuavannuai laizang tuh i tung sunni hizaw a, huai kiimvel a leitung leh sol dangte paikual ahi chih hon telsui a hon puanzaak chiang in saptuamte', huai lai a Galileo omna saptuam tuh Catholic hi ve'n, ei pawl a piang dek panpan, dengkha mahmah a, a naa uh a am mahmah hi. Saptuam' pomdan bel a pupa' khang ua a na theih leh ana pom uh, leitung pen khuavannuai laizang ah om a, huai kiimvel ah ni leh solte diang hehu uh chih ahi. Huchi in saptuam makaite toh kinawkna ana neikha zeuhzeuh uhi. Bang teng kiloh uhiam chih bel thu-le-la tam vengvung ziak in theichian khol khang in. I gen ut pen bel a ngaihdan, a ma' ngaihdan kia le hilou, a ma' hun ma a Copernicus-te khawng in a bulpi ana patsa uh, tuh huai lai a saptuam' ngaihdan toh kikalh bilbel ahihman in saptuam in sa-ik pih mahmah hi.

Tu in hiai thu bang i lohta ua le? Leitung pen khuavannuai laizang ahihlouhdan gentaaklouh i omna solbawng (solar system) bang leng aksi khopi (galaxy) ning khat a om tiuteuh hi a, aksi khopi leng khuavannuai a simsenglouh omlai chih pom haksa i sa hetkei uhi. Huai naaksang in tulai telsui mite' buaipih tuh khuavannuai a aksi (nitak a aksi i muh tengteng uh bang leng i tung sunni ngenta hi unchin, a gamlaat luat ziak ua kineu muh hilim in) a hichi tam leh huai aksite' lak a tampite'n sol nei ding ua, huai sol tampite lak a bangzah hiamte i leitung dan a hinna a om theihna sol hi thei uh, chi in sol zonna a tha-it mahmah ua, sol zong ding mawngmawng in leng khawlsol (sattelite) vanlaizawl ah a koih hiilhial uhi. Himahleh tu tadih in bel huchi bang a hinna om theihna ding a gintaak sol muh in a om nai tadihkei. A sol muh sunsunte uh a tamzaw a ni utoh kinaihlua a a tangkaangtui (moltel lava) ngen a dim phial khawng hiam, ahihkaleh a ni a pan gamla lua a khalgawp a, hinna om theihna ding himhim hilou chih khawng ahi lai hi. Hon zongzong mahtak uh hen aw. Bang hon mu uh hiam ah.

Hiai thilte zaw le vanlam thu khawng a hi ua, ei singtang nupi mawl taktakte' gentaklouh nungak-tangvalte nangawn in leng i batlah uh thuthuuk hi in. Nau nei theilou dia kibawl gentaaklouh sangvanna (birth control) leltak bang leng saptuam makai masate pawl in naaktak in ana nial ua, gilou, tualthahna toh kikim in ana koih tang hilhial uh. Himahleh tu chiangchiang in saptuam tamzaw in pomta a, pom chih phetlouh mihingte a dia kuul mah ahi chipawl bang leng om. Ei mahmah in leng hiai tuh i sahkhua toh a kikalhna ding i thei hetkei a, i chiing mahmah uhi. Nau nei theilou ding bang in i kibawl lamdang gaihgaih uhi. Hichi bang a tulai a bangmah a i simlouh, khovel ngeinadan a i koih, i sahkhua toh leng kikalh a i theih khollouhte bang leng chiin a ana om tuung ua naaktak a doudaal a ana om uh hi in chin. Nau nei theilou dia kibawl chih thahah, natna ziak a taksa them paih ding bang leng Pathian zaakdah ahih khaak di lau a ana doudaal mahmah pawl om tageet uh. Huailai khawng a. Tuhun a bel huai toh piangkhawm hang a, huaiziak a a lamdanna ding himhim omlou, ahi ding mah a kithei, sahkhua toh kikalh a le simlou hi hang.

Tulai mite' siamna bang houh naak saan theih lua. Leitung hichia a paitouh zeel letuh tunung kum sawm bangzah hiam nung chiang in taksa kahiang tuamtuam leh isin-ilungte'n siatna manna a tuah hun chiang un a maute kheekna ding a omkei ding chih genngam hilou hi. Tu in leng a kheek theih tham a, himahleh lungtang khawng kheekna ding in midang' lungtang a kuul hi. Den chiang in bel bazar a leimai theih dia a hon bawl hun uh hong om khamohlou ding. Hun hong pai zel dia, Pathian mahmah hong kigolh a khaamdan khat hong nei ahihkei leh tuh mihing bang leng hon bawl khong le uh kilawm. Mihing pilna khanhaatdan tuh i phone tawite leltak uh et in leng theihsiamhuai mahmah hi. Zanzek in phone neu chik, a vom leh a kang kia a kigelh, a maivaak theihna neuchik, sms leh call bawltheihna lel khawng tawi i kisaklai in tu in computer tuk a haat leh thilhihthei kitawi dengdong manta hi. I neu apan leng hilou, zan zek, BA i pass a pan leng hichi tel a khanna a om leh, i damsung in khanna bangzahta a hong tung dia? I tate' khansung in bangzah a khanna a om dia? I tute' khansung in? Hiai khantouhna leh kikhenna tuamtuamte lak ah i sahkhua toh kiheetkha ding bangzah hong om dia chih tuh bildohhuai mahmah.

Khuavannuai a i theihsiam zoh telsuina teng kia leng hichitel a a thupiit a, hinkhua hichitel a a kheek lumlet leh, i theihsiamzoh nailouh, i suikhiatzoh nailouhte naak thupiit in hinkhua naak kheek lumlet theihna un chia!

Sahkhua i chih bang leng kidamkheek (evolve) a de aw chih in omthei hi. A ziak bel Jesu sih apan tuni tan saptuam' khangthu i suut chiang in kapha deuhdeuh kapha deuhdeuh a, tu chiangchiang in tuh gindan tuamtuam zai in zai beembuam hi. Ei pawl saptuam i chi hiam, thugin i chizaw hiam bang leng tuma kum zali-zanga lai khawng a pan hong kakhia hi nengnawn in chin. Tu in tua i thuginte zui in i kipathian thu-awi sak mahmah na a zaw, a hon phuhkhiat tunglai khawng ua Setan toh kiguulluk chia a kaatkhiatna saptuam lianzaw leh haatzawte'n sukman ana sawm tawntung mah zaw hi ve un. Pathian in leng a na gum mah tuh ahi diam ah, sumang zoulou in tu in khovel ah mi tamtakte'n tua ginna hiang tuamtuamte zom in, a pha zeizaita hi. Tu a hangsantak a i gup uh, huailai a mite'n ana pankhelou uh hileh tulai in eite'n i pawkhe ngam ding uam? Pathian thilhih ahi a, Pathian in mite' lungtang ah thugen a, hichi bang hong piang ahi i chih chiang in genbeh ding om tuanlou in a thu maai a, i gindan leng ahi him hi. Himahleh mihing lampang a i va ngaihsut khaak chiang in tuh khawl dedu a ngaihsut ek ding khop thil a suakthei hi. Pathian' nasep a i koih lelah thunung-thuma omlou a veng, huchilou a mihing' tawndan lampang a i et leh tuh mihingte' khantouh dungzui a saptuam leh sahkhua bang leng kibawllem toutou, kidamkheek abat ton tam hi.

Khenchiang in khovel paidan tuh a hangsante'n ngaihdan leh gindante pawkhia ua, a dawilokte'n tua a hangsante' ngaihsutna a suakkhete gin-om leh hangsan tak a kizui nainai abat ton a tam hi. Buddhism sahkhua mukhete khawng tuh hangsan tak uh ahive. A pupa khang ua pan a a sahkhua uh diklou ahi chia kalh ngam giugeu un, sahkhua dang muhkhiat loh hiilheel uh. Houh tunglam apan huauna ana mu taktak mah uh ahi diam chih in om hi. Huauna mu hetlou a tua bang thil hih ding chih tuh namailou khat ahi. Ei lawi bang in tuh huchi bang hihhak mahmah le'ng kilawm.

Thil bang leng a lui deuhdeuh leh thupi a kingai deuhdeuh hilel in chin. Huai a Palkhuang khokhang a Ngambawm' khekhap bang leng kithupi ngaih mahmah in, a phakha liai in tuh va muh teitei kisawm hamtang. Ngambawm' khekhap le hi taktak mah ahiam ah. Ahih taktak leh leng a sik lai a zaw naak thupiit louh lawtel di. Gamlak buannawi lak a khekhap leltak. Vuahnuai a sialhawl, vuah bang ning sim kawm a phunsan zuauzuau kawm a sial hawl le hikhamohlou lai ding. I Laisiangthou a laibu tamtak bang leng mi khat in midang khat hiam, saptuam khat hiam kiang a a mimal laikhaak hi nengnawn in chin. Nengnawn i chih hang in a simmoh a thulaaklou hi zenzenlou in, Pathian' nasepdan a lamdan khiakdan gen utlaw selam i hi. A gelh tupa bang in leng a laithonte ni khat ni chiang in Laisiangthou ah a tuang ding chih thei dia gintaakhuai hetlou. Theikhol bang hileh hoihzaw deuh a le gelh ut maithei tak. Himahleh ama' theihse ngailou in, a nasempa'n a thei a, gelh ding a chih bangbang, lah kisamlou, lah vaallou a gelhsak hilel zaw in chin. A gelh tupa pen a laikung leltak a hong pang hizaw in chin. Hiai tuh i pomdan uh ahi.

A tuung lai in tua laithonte tuh a thutuun ahoih ziak bang, saptuamte' a dia khaak himhim ahihziak bang in saptuamte' lak a a vangkim a simkhiat ana hizel ding in. Mimal khat laithon leltak hi napi, Pathian' vaihawm ahihziak mah hi'n teh, hun hong paipai in saptuam upa hon khat hong tukhawm in, 'Laisiangthou kichian neilou hi hang, i pomkip ding Laisiangthou kichian bawl ni ei,' chi in huailai a tua bang a laithon leh laigelh tuamtuam, saptuam sung a kiveikual, a kallak a simkhiat zelte, leh saptuam makaite'n khalam thu a kingakna dia a neihte uh hon kaikhawm in, 'Khaile, hiai teng hoih in, hiai teng hoihkei e,' chi'n hoih a sak teng uh khuikhawm in i Laisiangthou uh hong piang hi. Mihing lampang a et in bel huchia hon khuikhawm maimai uh Pathian' thusiangthou a pom ngam ding i hi umaw a chih theih tham a, himahleh Pathian in van a pan hon khesuklou a, mite mah zang a a deih bang nna semzel ahihman in huchidan a hong piang ahi lel hi. Laisiangthou chih phetlouh, Pathian hihna, a Jesu' hihna leh amau tegel' kizopna bang leng hichi bang a saptuam tuamtuam apan upa paikhawmte'n, 'Hichi bang ahi,' chia pomkipna aneih uh tua en pomtou sawnsawn hi hang.

Tuhun chiang in nikhat a Laisiangthou taang khat beek simlouh bang khamiit zohlouhna'n i ngai a hive'n, Khristian ana hi masate' a di bang a tuh ut tawk le uh leng sim ding omlou hi hiilheel. Kal khat a khatvei biakinn a a va zaak uleh huai hun himai in. Hun hong paizel in mipite'n Laisiangthou deihna hon nei ua, himahleh saptuam in Laisiangthou mimal' khut a a om ding naakpi in na daal leuleu. Mangkangte bang in a tuung a Latin pau a Pathian thu na awi un, Latin Laisiangthou zang un, amau pau a leh ding bang sianglou khop in ana ngai uh. England kumpi bang ngial in tua bang a Laisiangthou let a hawmzaakte naaktak in dou a, hallum tang hilhial mah hi. Himahleh Pathian' deihdan kua ma'n daal zoulou a, awlawl in Laisiangthou tuh mipite' a ding a muh baihlam hong hi deuhdeuh a, tu chiangchiang in tuh i innsung chiat ah leng simsenglouh a omta hi.

A lehlam Khristian sahkhua in le katam a nei lawta a, i tate a ding in tuh lungbuaihuai tak di ei ve. Ngaihtuah seselou a pianpih sahkhua leh thugin adikpen hi a pomsuk pahpah thei mi a tamzaw kihi a, i pian apan dik a i theih tuh paihkhiat haksa pi leng a himah hi. Himahleh mi khenkhatte geel detdet a, suut vengveng mi omsam ahihman in tuate a ding in lungbuai huaipi ding bang hi. Ei lak a i theih teng bang tawmchik hilai. Asia minor lak khawng a saptuam chituam pipi a tam khiatdan. Dikvek dia kigingta chiat in, lah kikalh pipi le omsam. Bangteng hileh Jesu i hondampa a i pomnaak leh vangam kai veve ding chih a kihehnep tuh a lampi omsun hi phot mai in. Pathian' deihdan va chih nilouh tel di le a diam ah. Mihingte' helhaat ziak, duh-am ziak, thuneihna etlah ziak leh adang tampite' ziak le hitawk di hi veh aw. A koiteng Pathian' lemgeel, a koitel mihingte' helhaat ziak chia sehkhen a haksa bilbel mawk a hi ve'n.

Bangteng hi leh khovel tuh kikhengkheng mah ana hi ngiitngeet a, tua bang in i sahkhua leng tua bang a kikhenna toh ana kibawllem tou ngiitngeet mah zaw ana hi. I za nuamkei sim na dia, huchi mah zaw hi veh aw. Tu a thil hi theilou bang a i ngaihsut America a neih kibang kiten theihna bang leng lah hon hihmang nawn kholkei ve un chin, ei a di'n pomtheih bilbellou himahleh khangthakte tuh huai toh hong piangkhawm ding ua, aneu ua pan a muh leh a zaak uh, amau a ding in bel thil lamdang leh thupilua hong hi nawnlou ding a, a tawptawp chiang in bangchi hiam a pomna hon neithei khong ding uh hileh kilawm hi. Lah alehlam daih bang le hithei. Bangteng hileh tunung kum zakhat-zanih chiang a saptuam' dinmun ding tuh thil lungluuthuai mahmah khat eive. Bangchi lam in a pai dia?

Thil peuhmah tu a a omdan ngen a omom ding i sak thahahlouh ding uh ahi. Kikhenna a om touzel ding a, tu nung kum za bangzah hiam chiang a saptuam omdan ding tua mukhol thei hi leng lamdang i sa ding a, gintaak haksa i sa ding hi. Tuma kum zanga lai a mite'n tu a i saptuam hon muleh uh a kiguih hial ding bang un. Tunung kum tampi nung chiang in mihingte' siamna a sang mahmah ding a, mihing bang leng hon bawl khong hun uh hong om khamohlou ding hi. Huai chiang in kha toh kisai i thuginte bang leng kheek lamdang a ngaih hun hong om mai thei. Khovel i chih tua bang ahi a, hun paisa in ana kikheek a, tu in a kikheek lellel a, hun hong tung ding ah leng a kikheek zel ding hi. Bangteng hileh Pathian tuh Pathian ahi a, Ahih ahi a, a zahngaihna i don tuh i hamphatna thupipen ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING