UPDATES:

S5 Box

ZOGAM.COM Login

U'Muan, nangle ngawlta maive maw

Innsungkuan khosak nuam leh duhduh, deihdeih neizou lua in om kei mah le ung, Pathian hehpihna, khazak nuai ah ka nek khop uh zaw ka mu gige vanglak uhi. Ka naupang chik apat a ka na theih, ka pa zaw mahni a kitoudelh, mite subuai lou, sawk guigui lou, midangte’ ngaihsak ngailou i chihiam, midangte vatokbuai louh a mahni a kitoudelh deih mi ahi. Suang le suang mah ing, ka sungkuan un le ka khamuanna pen uh le ahi a, ka kingakna bulpi uh le ahi. Lawm leh vualte eng a ka unau ua ka om di uh a deih lou ziak mah in a hih theih khomkhom gimtak in lit le neilou phial in na a sem sek hi.

Gimtak a hichi bang a na a hon sep nasat luat  chiang in a taksa a hong chau deuhdeuhta a, a changchang in ZU a hon dawn panta hi. Himahleh, kou a ding a mitsip huai tak leh khamsia a’ a om di zaw a kiveng lua. Innsung natawm ah le dawn ngamlou, Pa dia le pa zaidam, kamtam lou ahi a, midangte PA sang mah in le hoih tungtuan chia ka na theih ahia, hih le ahi mah. A ngaihdan lou a ka om khak chiang bang un le bangmah a gen se kei a, hilele a chet dan in a hon langsak zel a, a chang in bang a kisuanglah huai thei mahmah sek hi.

Hichi bang in tam loulou a hon dawn a, hun leh kumte hong kivei in, innsung chouh ah le dawn nawn lou chih phet louh, a seppih lawmte toh dawn khawm a hong zongsang zomah lai hi. Nasem zou a hong pai teng in zu gim a nam gige chih zaw kou a ding in thil lamdang lua leh thilthak ahi nawnta kei. A thatawldamna dia a dawn lai toh tehkak theih vual ahi nawn kei..!! Hun paisa a innsung awlmoh a sum zong gige, a poimoh lou a sum zang ngei lou ka pa in a deih louh lam tak ah sum chu a hon zang touta a, aw, apoi taktak ahi aw !!

Hichi bang a ka innsung dinmun uh a hong paitouh zel chiang in etliam mai a haksa thei tak ahi. Ka pa ahi chi’n theihsiam ka sawm sek na a,  hilele kou a ding a thil hoihlou deih ngeilou in kou nopsak di khual nawnlou in amah kia nopsakna di ngen ah sum a hon zangta mai zaw, nidang a innsung nuamtak ah ka Nu leh Pa toh ka unau ua nitak ka kipolh sek lai uh ka ngai vungvung thei tak a hi aw !  Unau ah kei a upa pen ka hi a, khasia a ka om chiang bang in ka kisuanglah sek a, himahleh numei nehnou khat ka hih na ziak ei diam, ka kidek zohlouh hun a tam a, a guk in khitui ka na nul gige sek hi. Khasia zenpi a vakidek bang le thil haksa mahmah khat eive. Kei khasia in kapta leng ka nau in bang a chi ngaih maizen dia.

Sum na deih ua leh kizong ua, na kiloh di uh khawng a hon chi sek a, kei siamna leh pilna nei nailou, nungak dek panpan in koi ah bang sem in sum ka zongta maizen dia oi ? Hichi bang in haksatna thuak mah leng le ka Pa zaw ka mohsa tuan kei a, ka nu mahmah in le kamsia in a hou tuan kei. Ka Pa ahihna le a bei tuan kei di.

Zing a thoh baih leh khambaih, khua a hong mui a, a hong kham zel a, amel diktak le ka mu thei nawn kei. Innsung ah nopna kichi himhim a om nawn kei a, kisel, kinakna in a dimta. A thuak zoh louh chiang in ka nu’n le a tai sek a, himahleh khatvei mahmah le kamsia a  ahou lam ka zakei himhim hi. Ka nu kampau lamdang ka sak mahmah leh thupi ka sak mahmah ahih eh, “ Toupa, midangte pasalte ka na eng gu sek, midangte pasal zu dawnlou te bang ka na eng gu sek a, himahleh hiai innsung ah ka pasal zu ngolvei kol dia hatna leh dohzohna na hon piak ziak in ka kipak a, nang mah ka hon muang ziak in mihoih suak sak zou ngei di ka hi chih le ka thei..” a chih ahi. Ka nu’n ka pa a it dan ka theih beh semsem hi.

A mitmei veng in niteng in ka hun uh ka zang sek ua, hilele zu a kham chiang in ka om dan peuh uh a hon soisel gige sek. Ka pa ka khongaih mahmah a,  hilele gimtak a, hat lou sasa a ka nu nitaklam mehzuak a hong tung a, meh di anteh lom tam lou a hon pua tung hamham sek. Aw, nidang a zaw karkhat a sa nihvei-thumvei kimeh gige sam hia !  samui gim ka zak louhna le a sawtta ngei mai. A lim dan bang le mangngilh thei di khop ka hi ta ve…. A neih sunsun a ka nu’n a hon lei anteh a hon huan sek a, meh duhlou chi’in ka pa sa duh in a hong kitom a, ann le ne manlou in ka meh teng uh a hon buaksak lai zomah sek. Huchih chiang in ka nu’n a neih sunsun sum a lukham nuai ah a koih lakhia in ka pa a di sa minsa a valeisak sek hi. Kei zaw ka kihehpih ngam kei. Hilele , ka nu hat nawnlou leh ka nau gilkhial a nitak chiang a’ a hong kah chiah kidek a haksa thei tak ahi. Hichi bang hilele ka pa zaw ka mohsa ngam tuan kei. A duh a’ a ut a Zu dawn hilou ding in ka gingta tinten hi. Numei nehnou mahmah khat himahleng le ka lungsim ah ka ngaihdan khat ka paipih vanglak chu ka sumkuang chiangpeh vanglak a, ka huchih ziak hia ka thei kei, bawl hoih thei di ka hi chih ka thei a huai tupna ka neih in ka Pa a hon it sak semsem hi.

Innsung khosakna ah mite ka phazou kei uh. Niteng nek khop nei hamham ka hi uhi. Innsung haksatna thei zou nawnlou khop in a omta a, a duhna in a hon phak chiang in ka innsung vante un a hon thuak beh zomah lai hi. Innsung ah ka gou neih sunsunte uh, khatkhat in a hon zuak panta, haksa taka a mahmah in a leisa leh a muhsuahsa ahi chih ka thei a  ka pau ngam tuan kei uh. A silh lai na tan in le a thuak behlap lai, ka pa mi pautam lou, mibang a kamsiam het lou in sum nei kei lele a duh lam a muhlah het louh chu mak ka sa top. Aw, ka pa ka na suang guk tak mai hichia hong omta mai zaw, gen didan le ka thei zou nawn kei a ka lungtang a na taktak ahi.

Mangbat huai himai, lawm leh vual le ka pawl ngam nawn kei. Innkim- Innkiang teng in le a hon thei lua mahmah ta ua, a kiang uah va om a vapolh le kou a ding in a nuam nawn kei hi. Khotang vai, lengkhopna hiam, haan hohna hiam khawng ah kihel nuamsa in vakihel sek mah leng le, ka nunglam ah a hon gen suihsuih sek ua, mite nuihzabuk ka hi ta mai uhi. Khotang vai ah kihel bang zaw mang in le ka man ngam nawn kei. Hichi bang in ka pa’ zu ngolvei ziak in mite’n, khotang in hon simmoh in hon nuihsan mah le uh le kei hon suangtu ka Pa zaw ka pa a hi den dia, ka itna a bei ngei kei dia, mi lak ah ka zahpih di ahi tuan kei. Ka zahpih le a siang tuan kei..!! Amah ziak a hiai khovel ah piang ka hia, hiaitan tung ka hilai hi.

Niteng phial in ka inn uah Sum leiba sik a hong pai deuh zut ua, a khente’n a hon theisiam sek na ua , hilele a khen te’n ka neih sunsun uh vante bang, bang a zat tak di hikei lele um-leh-bel a hon laksak guigui zomah uhi. Ngaihdam nget a le phatuamlou ahi top mai, pau zek lelah khut hon khak khum pahpah sek uh. Huchih hun chiang in zaw maw ka lungtang anaa  thei tak ahi. Kei kia a ka kah guk hun a tam thei lua. Himahleh ka pa ziak a hichi bang thuak ka hi a, amah ka pa ahi lailai hi. Ka thuaknate a hon theihsiam hun a hong om ngei ka lametna om sun ahi ta. Ka Pa’n le haksa a sa a, a lungtang naa a sa thei mahmah chih ka thei. Aman le a ning lawta ahi chih ka haih het kei. A  doute zaw amah kia in a dou zoukei di chih le a haih kei lai a, Pathian hatna muang kawm a dou zoh ka lametna uh om sun ahi ta hi. Huchih hunte a hong tung chiang in mangbang tak mai in a lutung ah ka khut koih in thumna neih sak ding in a hon ngen sek a, ken le hatlou sasa in ka thumsak sek hi.

Fresh tak leh hoih tak a hun tomchik a hong om khak maimai bang kou a ding in Paradise ah om kisak hun a tam sek a, ka thuaknate uh bang mangngilh thei mai di khop ka bang sek uhi. Kam khat maimai a, “ZU ka dawn nawn kei di” a hon chih khiak maimai bang le kou a ding in a zak a nuam thei tak ahi. Ka Innsung uh a nuam tuan a, kuamah ka eng kei sek uhi. Huchih hun chiang in kou sang mahmah in le aman nuam  sa bik mah a bang hi. Pathian apat kipahna a hon muh zual chiang bang in ka Pa mel muh a nuam a, huchih hun chiang in a melmel bang a hoih tuaituai sek hi. Hilele  khemna, Setan nasep a hong hat chiang in sawt a hon daih tuan kei. Ka innsung uah nopna leh lemna huihkhi a nung sung a tom thei taktak ahi. Ka theih di uh aman le a lau sek a, kou zaw ka na kitheih khemmoh bawl sek uh. Hilele hoih lam sang in siatna lam a hon naih telhtelh zel  hi..

Nitak khat zaw bang ngaihtuah kha ei diam ka thei kei. Ka room ah a hong lut a, “Bawi, na Pa ding in ka ching nawn kei, hehpihtak in hon ngaidam in aw..Na naupanlai ua innkuan kikhopna I neih sek lai khawng ua, innsung nuam zaw Vangam naipen ahi, chia laa I sak khop lai khawng uh ka ngai thei lua. Kei ziak a hiai innsung vangam hi nawnlou in meidil a suakta. Na nu le ka houpih ngam nawn kei, kei ziak in nou le na unau un na thuak sawt law mahmah ta uh. Ka doute zaw kei kia in ka zou kei di chih ka thei lua, ka tha le a hat nawn kei. Bawi, hehpihtak in khatvei bek hon thumsak lai in aw, ka hinkhua a dangtak lua, kei bangbang a misual zaw a om kei di, ka kisiamtan thei kei, nou tung leh Pathian tung ah ka na gamtang khial….”  chi’in ka lupna bul ah a hong khuk dinta mai zaw, dan vuallouh in ka khitui a luang zoihzoih mai. Ka dawng dek chiang in ka nak a bing a, ka awm a bing a, ka aw a pawt thei kei. Bangmah gen tamlou in ka pa, taksa zoi dildel chu kiptak mai in ka pom a, “Pa, bangchi bang teng in om le chin le nang khovel ah PA hoih penpen na hi. Mite mitmuh in zu ngolvei himah le chin le kei a ding in zaw, mihoihpen, pa zaidam pen na hi lailai, hichi tuk in zu khamsia in kitom le chin le ka nu leh kou tung ah khut nakha ngei het kei. Na gimnate leh na muhsuah sa teng kou a ding in a hun lua. Na mohpuakna zoulou na kisa kha mawk di, na mohpuakna zou lawta na hi. Tu’n Pathian hehpihna zar in ken le sepna khawng ka hon neita a, nang leh ka nu hon thadawnta di ka hi. Pa, leitung ah mihoihte zong ding in Jesu a hong pai kei, nang leh kei bangbang a misual leh khelhna kisikte zong dia hong pai ahi zaw..” chi kawm in ka khut a lutung ah nga in ka hih theih bangbang in ka thumsak ta hi.

Thumna ka zoh in, “ Pa, ding in ka nu le hong thou a bang e, na zun a suah le bathroom ah ka hong len na di..” chi kawm in ka kaitou a.. a hon dawng nawnta kei. A zukham ihmut pih ka sa a, ka kaih sawm chiang in a zoi deuhdeuh a bangta, kintak in ka nu ka sam pah a, ka nau le ka phawng a.. Ka zekai ta…!! Zan khovak in ka nuta un kah louh ngal bangmah hih theih ka nei nawnta kei uh.

Chi’in Chingbawi in ka kiang ah a hon gen vek a, a dawng didan le ka thei kei, ka dai dide a, bangmah gen lou in ka kawiphei a.. “ Ching, bangchi bang in innsung nuamlou leh haksa tak apat khang khia himah le chin le nang ka hon itna a kilamdang tuan kei di. Kuamah a zawng leh a hau in ka khen kei. Na pa bang a zaidam leh mihoih na hi chih le ka haih kei..” chi kawm in ken le ka khitui ka nulta.

U’MUAN NANG LE NGAWL TA MAI VE MAW chi kawm in Chingbawi in a hon en kilkel a…

COMMENT (1) PHA TA..  
  •  
  •  

#1#1 ezee » 2013-04-27 19:48

khasiat huai hina maizen e ....Sim nop mah2 ei..

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING