UPDATES:

AA-ONN 2009/1 Block, Manipur kichi bang hi hiam?

Mung-TonsingDraft Report AA-ONN 2009/1 Block, Manipur Leh I GAM

Hiai AA-ONN 2009/1 Block, Manipur Pu. Dr. H. Kamkhenthang in Paite Version a abawl ahi

Kuamah thumuh a ka gelh hilou ahi, aziak public domain a document muhtheih ahihman in.

 

Hun bangtan hiam paita akipan in, ngaihdan leh duhthusam tuamtuam khantouhna (Development) toh kisai I na gen leh iki kupkhit sa hi ding in ka na um hi. Tua kia hilou in, ka-chi-ka-sa leh ka-gam a ding in chi a, angmasial hetlou a pang leng I om ngei lam en ing. Hichi I hih lai in, gamsung dinmun et in, hun hong paitou zeel ding ah, bang lampi tawn ding ihi hiam chih theih haksa mahmah ing.    

Khantouhna chiphot ni, meivaak kiniching deihna (kilam etna) in dam I bawl sak a, meivaak hon pe zolou in, I gam leh neekmuh na mun acre bangzah hiam hon luah mangsan maimah hi. In-ten-lou-ten taanna, tui-lian muhna, picnic site, luang bangzah hiam taanna leh nga-beng na mun suakta. Zangna dopna sum tamlou chikte a kineme in, mu zounailou leng tampi I om ding hi. Kingaihtuah thakni…!

Gen tam thu a phatuam ding om vak kei mahleh, hoih isak na leh hoih I sak louhnate uh pansan neitak in (being constructive) leh ei-leh-ei I din mun ki- enkhia (introspect) in leh kithei in pang masa zaw leng bang a chi dia? Hiaite lungsim a neikawm in, hiai a thute lungsim tak toh gelh ahi zaw hi.

 

AA-ONN 2009/1 Block, Manipur kichi bang hi hiam? 

Hiai AA-ONN 2009/1 Block, Manipur kichi Exploratory Drilling Activity Draft Report ahi. SENES Consultants India Pvt. Ltd.  kichi company ten Jubilant Oil & Gas Pvt. Ltd. te adia leikawm thilmanpha zonkhiak na dia lai (document) pansan poimoh masapen ding a agelh sak uh ahi. Hamphat huai tak ichi diam, Paite pau siang sitset a simtheih leh muh theih ding in Heutupa Dr. H. Kamkhenthang in Paite version in a na letkhe khinta hi.

India kumpi in AA-ONN 2009/1 pansan in hiai thil manpha zonkhiatna ding in Jubiliant Oil & Gas Pvt. Ltd. (JOGPL) kiang ah phalna pekhia a, July 2010 & November 2010 nite in, hiai thil muhkhiak kihawmna (production Sharing Contact) India Sorkar, Petroleum Exploration License (PEL) toh Manipur Sorkar in tua gam sung a leikawm dap a zonna ding in ana kilemkhin ta uhi. Hiai kilemna pansan in, JOGPL in leikawm ah Hydrocarbons a omtuak na hiam chih zonna panta uhi. Tua zonna a muhkhiak pansan in, leisung dapkual leh vuhna munding mun sawm-leh-sagih (17) gam chiamteh uhi. Hiai chaimtehna pen Block AA-ONN-2009/1 kichi hi. Leivuh a kokhuk khat zel bawlna ding in a kituat $ 8 million ahi hi.

Bangziak a hiai Draft Report AA-ONN 2009/1 Block, Manipur poimoh ahiam?

Hiai Draft Report ahihleh leikawm thilmanpha zonna leh dapkual na dia khutsuak masa pen ahi hi. JOGPL in SCENES India kichi pawlpi guai in, tuabang leivuh nasepna in kim-leh-kiang nawngkai saktheite (Environment Impact Assessment) leh khotang mite nawngkai saktheite puahphat theih na dia kalbi masate (Environment Management Plan) geel na ahi hi. Hiai suina leh ettelna uah; mun zatdaan, kiim-leh-kiang a om thilte tel a, JOGPL palaite toh chilgil tak a thusunkhawm na le ahi hi. 

Tua ahihman in, hiai Report eite’ a ding in koih-dap-theih thil hilou ding a, I kalbi masa leh I gal-van masa uh ahihngei ka lam en hi.     

Draft Report Thutuun Bang Hi Hiam?

1.1.  Gam leitang toh kisai in:

  1. a)Gam leitang kul ding zah: Leivuhna kokhuk khatna ah gam hectare 5, kokhuk nihna apan kokhuk dang teng ah gam hectare 7 zel a lian kul ding hi. Atawmpen in, kokhuk vuh na ding in gam leitang hectare 90 (225 Acres) kul hi.
  2. b)A gam sung ah sumsinna kham a thau leh Gas leikawm ah tampi Hydrocarbons kikhol keihkeuh om ahi hiam chih theih na dia leivuh a zon ding. Leivuh na mun dingte bawllem a, naihna lampi bawlphat ding.
  3. c)Leivuhna kokhukte a Hydrocarbons tampi om kei leh, kokhuk khakbing vek a nasep tawpsan ding.
  4. d)The Bureau of Indian Standards (BIS) 2000 seismic zone te suina ah, zinling hatdaan laihawl pawl omtheihna mun ahi.
  5. e)Churachandpur, Tamenglong leh Imphal East district in gamlak 90.96%, 88.11% leh 34.08% a lian neichiat hi. Reserve Forest area letdaan a block gam area letdaan apan 9.76% ahi. Hiai block sung ah Tolbung Reserve Forest, Kaiphundai Reserve Forest, Vangai Reserve Forest leh Kaihlam Wild Life Santuary om hi. Block sung a gamlak letdaan pumpi a pan 73.34% unclassified gam ahi. Himahleh, kokhuk vuhna ding apan 10Km huamsung gamla ah National park, Wild Life Santuary leh Reserve Forest te omkha lou hi.

1.2.  Tui toh kisai in:

  1. a)Kokhuk khat 2500-4500m a thuk ding, leivuh na tuipansan a vuh ding. Leivuhna sai leh buannawi peuhmah CPCB dan bang a hepsiang ding.
  2. b)Leivuhna mun khat ah nikhat in tui 6750 KLD (KLD: Kilo Liter Per Day, 1 KLD= 1000 Liters) poimoh ding (6,750,000 liter). Etsinna leh testing neihsung ni 90 sung luut dia hisaap ahi. Huai ding in, leinuai tui, luitui leh local supply te mitsuan ahi
  3. c)Atangpi in, ni khat sung in kokhuk silna, buannawi tui kai, pump leh bangbang hiam silna tui leh damdawi nengneng in tuisia leh buansia nikhat40,000 liters piang ding hi.
  4. d)A gam omdaan piaunel leh leibuan suang toh kihelleh sing-leh-louhing in mualkuam tuamkhum ahih man in leinuai tui omna pen suang kizop tuahna munte ahi. Tuisam ginalou leh daichik in leng tuisam vungthei a, innmun (camp) a zat di omthei ding hi.
  5. e)Tui neek hoihdan etchetna ah, tui neek ching a theih ahi. Tua mah bang in, Leimai tui (surface water) leh Leinuai tui (Ground water) etchetna te ah, adeih huai hun sung a om a theih ahi hi (as per IS:10500).
  6. f)Tui niin te luankhiat na ding in, Manipur a Barak lui mitsuan ahi.

1.3.  Mei (Power) toh kisai in:

  1. a)Generator thahat na zing in leivuh leh camp ah meivaak piak ahi ding hi. Huchi in camp mun ah DG set 1000 KVA a haat leh leivuhna mun ah DG set 970 KVA li (4) chiat zat ahi ding hi.

1.4.  Khawmi te toh kisai in:

  1. a)Innten-louten leh khotang toh kisai thei peuhmah December 2011 sung in primary data kilakhinta in, thusui zoh hita. Hiai ding in inntek dongkawm a thu-leh-laa kilakhawm ahi hi.
  2. b)Atangpi in khut siam leh siamlou mi 40-50 tan khul khat ah guaih hiding a, nasep suukpi lai n hunbi nih a khen in, mi 80 tan in na seem ding hi.
  3. c)Leivuhna mun apan 2 Km huam a khua omte: Aina, Dailon, Parbung, Parvochom, Santing, Kamkeilong, Sipikon/Tipaimuk, Damdei, Tinsung, Lungthulien, Sartuinek, Patpuimun, Kangreng, Savaipaih, leijangphai, Bukpi leh Lower Kharkhuplien ahi. Hiai gamkuam a innkuantangpi 6.19 ahi. Hiai khua te ah, 99% singtangmi ahih baan ah, pasal leh numei laisimthei leh gelhthei 71.87 % leh 63.25 % ahi hi.

 

Kim-leh-kiang Hih Nawngkai Thei Thilte

Hiai section ahih leh, a tung a kigeen sa mah bang in, JOGPL in leivuh nasepna ziak a kim-leh-kiang nawngkai saktheite (Environment Impact Assessment) leh khotang mite nawngkai saktheite puahphat theih na dia kalbi masate (Environment Management Plan) geel na ahi hi.

  1. 1.Drill rig leivuhna a a ging husa hatdan kilometer 10 a gamla ah 95.0 dB(A) ahi. Husaging hat louhsakna (aging dalna omlou in) ngaihna a a ging awlsakna mun gamlatdan 100 m leh 200 m mun a leivuhna rig umna daibul an pan in 75.0 dB(A) leh 68.9 dB(A) zah tuaktuak ahi uh hi. Hichibang zah a husa ging bawlniam theih 200m a gamla a pan in 56.9 Db (A) a niamsak theih ahi.
  2. 2.Leithuah ponung lakkhiat in leihhoihna a beisak ding hi.Lei vuhna mun khat zel ah leithuah ponung 1620 m3 khohkhiak ahi ding hi. Leih hoih manlouhna ding a a company in leinuai siate a bawlphatkik nawn hun chiang in a bawlding hi. Hiai in leihoihna leithuah a omte a hihsiatna a thupi hilou a laihawl bang kingai hi.
  3. 3.Gam khelh, gamlaksak hiam mun a a leitual bawlphatna leimai 0.25 m a sang a lei sehsaang kul ahihman in tui luan hulsak na hawklamte hih lamdang kha hi. Himahleh, cross drainage structure viz. Lampi sehsang na leh lui kantanna mun a culvert khawng a kitatlak lou a tui a luan paisuak theih tawntung ding nasem company in tuate haksa a ngailou, a laihawl hi. A company (proponent) in a kuldungzui a enkol in, ama a a om bang ngaihsutna kawm a, tui luantheihna bang in a bawl ding hi.
  4. 4.Leivuhna tui leh buannawi, sathau zatsiatsa chemical koihna mun khawng buah in tuiluanna hawklam, dilkhuk leh adangdang buahsak hi. A mun a hawklam drainage bawlna leh sediment control na a company in CPCB Inland Water Discharge Standard dungzui a a bawlphat ding ahi. A sia pen ahihleh a se thupi a ngaih kham hilou hi.
  5. 5.Drilling DG set (Generatorte) nasepna mun a a hong kizat chiang un huihkhua hihbuah thei pollutants PM, N0x, S0x leh HC khawng in tomkhat sung huih hihbuah thei uh hi. Gamlatna mun tuamtuam a a niam pen leizul a pan a huih ahihbuah theihna ding in air modeling kibawl hi. Leizul hihbuahna Ground Level Concentration (GLC) sanglou hial hi chih kimu hi.
  6. 6.Khotual mite in a lou neihna mun ua a zatna uah leh unclassified forest gam sung ah leivuh a exploratory block mun lian zaw leh gam za zaw leh tamzaw omkha ding a a gintak ahi. Bangteng hileh unclassified forest area ah leimai tuamin singteh-louteh om hi.Leitohna ding teng teng Reserved Forest leh Wildlife Sanctuary polam ngen a omkha ding ahi. Nasepna ding a leimai vatsiang a kisakkholhna in leimai tuam sing-leh-loute leh singliansa leng vatmai ngai ding hi.
  7. 7.Exploratory well bawlna ding gamte peuhmah akho mite lou neihna gam mun a hiam unclassified forest gam sung hiam ngen a omkha ding uh bang hi. Tua tengteng ah bangteng hileh, gamneite kiang ah gamleina leh haichi hihsiatna man zangna dopna sum compensation piak vek ahi ding hi.
  8. 8.Project semkhia company in venbitna huntawktak in a enkol ding ua ama a ngeina bang in gam a lakte uh leimai kisiatnate , leikhuk thautui ommellouohnate tanpha in a bawlhoihvek ding uh hi. Hiai project in lamlian omsate bawlpha in leite dohhoih thak in leivuhna vangik puaksuanna a zat theih ding in a bawlhoih vek ding uh hi.

 

I Gam Bang A Chi Ta Dia Le…?

Vai dangka $136 million seng a “Leikawm Thilmanpha” zonna dia thasial hetlou JOGPL ana hidaih ta hi. Tua kia leng hilou in, Manipur Sorkar leh India Sorkar in akul-leh-poimoh daan a panpih dia mansa ahi chih leng imuthei hi. Hiai Draft Report AA-ONN 2009/1 Block, Manipur ngentak a isim leh, I Gam Leitang, neek-leh-taak zonna, kim-leh-kiang a louhing te, lei (soil), leh a gam a khosa mite a ding a nawngkai sak thei thiltampi om hi’n ka mu hi. JOGPL te muhdaan a kim-leh-kiang hih nawngkai thei thilte (Environment Impact Assessment) deihkhop lou in, himahleh tuamah pansan in ka hon gelh beh zek hi.  

  1. 1.Gam Leitang: I gam leitang acre 225 a lian kokhuk vuh na ding chauh in a bei dia, tua kia hilou in, acre bang zah hiam mah lampi leh tuilam (canal) bawl na ding a piakchauh hilou in, nasep pat na ding in I sing-le-louhing teng vaat mai ahong hita ding hi.

Tua nasep a hon pat na ding pen uh, a zonkhiakna (exploration) maimai hilai hi. A lung tunna tan ua leinuai a hydrocarbons kikhol keihkuih omkei leh, kokhuk khak bing vek a nasep tawpsan ding chih ahi.

Ahi, kokhuk tawh sa khakbing theih mah maw, himahleh sing-leh-louhing vaat mai te ahong piching khiak nawn na ding un khangkhat beek I ngak hong ngai lai dia, hydrocarbons deih bang omlouh ziak in I gam acre lianpi sing-leh-louhing omlouh na gam ahong suah khak ding lauhhuai hi. 

Tua kia hilou in, kumteng a loubawlna (shifting cultavation) ding suanlam a sing-leh-louhingte I vaat mai kia in leng I gam kho-hun omdaan kheklam dang zou mahmah hi. Sing-leh-louhing om masate zuun zawlou a omna in tuuktui luanhun a luanglou in I gam uh keu gawpta hi. Lou I bawl a, leihoih teng tuuktui in tolhmang pih khin, lou a hai piang ding zah piangzou nawn talou, gamsa muh ding om nawnlou ta hi. Gam Leitang puahlouh a om, a sung a bangmah piang ding omlou chihte ngaihngam huai salou ing.               

  1. 2.Tui: Kokhuk khat 2500-4500m a thuk, tui zang a vuh ding nikhat in mun 17 kokhuk te ah 114,750 liters tui bei zoudia, ni 90 etsinna neih sung maimai in 10,327,500 liters tui beizou ding hi. Tua kia hilou in, kokhuk silna, buannawi tui kai, pump leh bangbang hiam silna tui leh damdawi nengneng in tuisia leh buansia nikhat in 40,000leh ni 90 sung in 3,600,000 liters tungzou hi.

Hichi tuk a tui poimohna lian ahihlai in, kokhuk vutna a zat ding in leinuai tui, lui tui leh local supply te mitsuan ahita hi. Tua kia hilou in, I singtang khuate a tui dawn leh innsung a zat ding pianna Tuisam, daichik a tui muhtheih bang leng, JOGPL te’n a camp mun ua zat ding in enlah mahmah uhi. Hiai mitsuannate suk buching hita leh, I mualdawnte uh keu gai leh haichi piantheihna ding kham tui gen louh, I nek-leh-dawn ding tui taaksapna lian lou theilou ding in ka koih hi. Huchilou sa a leng, tuuktui (monsoon) luanhun ding ngak leh muang a khosa hamhamte a kihi hi. 

Achih leh, hiai a khutsuak nung a tuiniinte, Barak lui tunma in I gam a lei (soil) leh leinuai tui (ground water) a ding in poikhoih baan mahmah ding ahi chih thei ni. Nikhat maimai a piangkhia tuiniin 40,000 liters te bangloh ding hi hiam chih ka thei baankei hi. Lungkham huai mahmah ding hi, I gamlei leh I tuineekte’n a thuak ding uh gingta ing.   

  1. 3.Leihoihna: A tung a I gensa mah bang in, sing-leh-lou-hingte vat mai ahih in chu lei hoihna teng vuahtui/ tuuktui in tolh mangpih mah ding ahi chih theih sa ahi. JOGPL te muhdaan in leithuah ponung 1620 m3 khohkhiak hiding hi. Hiai ding a apan laakna uh lungtung huai isa diam; leinuai saite bawlphatkik ding…?

Leihoih/ leithuah ponung (surface soil, that is being fertile) bawlhoihkiik na ding in a-kum-a-sim lut ding ahi chih thei ni. I haichi tuh peuhmah in hiai leithuah ponung apan khantheihna (nutrients) mu ahi chih leng thei ni. Hiai lei hoihna imansuah leh, I haichi leh theite hi in, sing suan teng le khan dingdaan in a khangkei peuhmah ding uh chih theih ahi.  



  1. 4.Nasem tu ding: Khul khat a nasemtu ding mi 40-50 chih taklat ahita. Nasep suukpi lai in mi 80 in hunbi nih a sep ding chih ahi. Huchi hita leh khul 17 ah a tawmpen in mi 680 in hunbi khat ah sem ding suak hi.

Nasemtu dingte khutsiam (skilled) leh khutsiamlou (unskilled) a khen ahih na ah, khut siamte’n bel daan toh kituah pih bang in sepgimman leh hamphatna tuamtuam a muh uh lam et ahi. Himahleh, khutsiam loute bang ichi ding ua le…? Contract labour daan in I sem ding ua (a sem lel leng om ahih melta), huai a lungkim leh nep a om maimah ding idiam…?

  1. 5.Gam/ khomite: JOGPL in leng ahon theihpih uh hiai ahi, “Leikawm thilmanpha” zonna mun lian zaw, gam za zaw leh tamzawte khomite lou neihna mun ahi. Tua munte ahihmanin, zangna dopna sum (compensation) gamneite kiang ah gamleina leh haichi hihsiatna man piak ahon sawm uhi. Tua hiai zangna dopna sumte lam en a I gam ana pekha I hihleh poi mahmah ding hi. I na tuahkhak sate (Khuga Dam Displacement) ale pil theimai le chih huai mahmah hi.

 

Awlmawh Huai Mahmah Thilte

  1. 1.Draft Report tungtawn a “Leikawm Thilmanpha” zonna dia JOGPL in a etlah mahmah thilte; Tui (leinuai tui, luite leh tusisamte), Gam Leitang (a tam zawte singtangmi khosak na gam himah leh, gam tamzawte unclassified forest ahihziak), Nasemtu ding (khutsiam loute), Huih siang omna gam chih te
  2. 2.A hon taklat sa mah bang un, 99% singtangmi omna mun ahi chih en le I na theih sa uh ahi. Huchi kawmkaal ah, kuamah theihpihlouh (ka theihkhelh ahihkeileh) in I gam leitang lian huntawk mahmah mite’ phelhleh dia I piak khiak theih lamdang sa ing. Huchia ka theih khelh ahihleh lah, mahni angmasialna ziak a I piak khiak ahi diam chih leng kidot thak hun mahmah ta ahi ka chi hi.
  3. 3.Churachandpur district in 73.34 % unclassified forest leh hausa thuneihna nuai a om ahi chih leng ahon theih pih uh hi. Huchibang a ahon theih pih nung ua, bang lam etna a I gamte pekhia I hi a chih leng kidot thak hoih sa ing. Ahihkeileh, I gam tung a le gen-leh-sak neizou nawnlou ihita ding uam…?
  4. 4.Tuni tan in, thilnget I hau thei mahmah ua, Manipur State Sorkar hi in, India Sorkar hitaleh, bang tan I tung a chih leng etthak tuak sa ing. Sixth Schedule, Fifth Schedule leh Autonomous District Council te I ngen a, bang tan ahong taksuak (being actualised) a le…? Bang lam etna a I nget uh ahihiam chih leng khotang theih di’n pulaak thak leng bang achi dia…?
  5. 5.State tuneihna nuai ah MLR & LR Act, PESA, FRA, leh adangdangte ahong omtou ta chih leng ithei. Act tamzawte I pompih vak uh gingta kei ing, himahleh I pompih louhlouh kawm a exercise ahihthou leng gingta ing.

Etsakna dingin, Kho hausa vaihawmnate sukbei dia sawtkuam tak ana panla ta ua, tunitan in khua bangzah hiam te Village Authority in khek ahita hi. Hausa hihna maimai I kep bit zohkei a, I Gamleitang humbit ding angmasial hetlou ding mi a om ke’n zaw, Tribal, Indigenous, leh sociological concepts tuamtuam pansan in panmun khawh sawm mah leng, I thasente uh a hong vuaksuak ding hi. 



http://www.jubilantenergy.com/uploads/file/Execuative-Summary-Paite%20Version-for-Block-1.pdf

 

http://jubilantenergy.com/uploads/file/Executive-Summary-Paite-Version-for-Exploration-Block%20AA-ONN-2009-2.pdf

 

 

 


 

.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING