Book Review - Gam Siangthou A Zinna

BOOK REVIEW : GAM SIANGTHOU A ZINNA
- Muanniang Tunglut

muaniangtunglut2

Gam Siangthou chih i zak chiang in lungtang hon dengkha pah hi. Damsung a khatvei bek a leitang vasiik a, Jesu sulnung vazuih tuh gingtute’ a di’n lunggulhhuai vungvung hi. Pu Tuan Khankhup in nihvei ava zinna ah, Jesu pian nung kum sangbi nihna leh kumzabi 20na a dia Krismas nanungpen Bethlehem ah vazang hi. A mit mahmah a a muh Jesu Kris toh kisai mun poimoh leh chiamtehthamte’ tungtang hongelh leh limlak hoihtak honthuahte lungluthuai, navakhuai leh manpha petmah hi.

Hiai Laibu ah Israelte’ (Judate) khangthu leh tulai hun a a dinmun uh chiangtak in kigelh hi. A kawm (cover) ah Dome of the Rock kholangtak a muhtheih in om a, Judate, Kristiante leh Muslimte a dia mun poimoh petmah ahihdan leh leitung a mun kituh pipen, mun buaipen kichi hial ahihdan genchet in om hi. Khovel khangthu toh kisai, adiak a Middle East buaina theihsiamna leh vantang theihna behlapna tampi ngahtheih hi.

Laigelhpa thil limtak a sui mi ahihna ah Israelte Suangtute (Patriarchs) Abraham apan Vaihawmmite leh Kumpipate banah Laisiangthou a mi poimohte’ tanchin leh khangthu ( etsakna dia Herod Antipas Suangtu Herod the Great or Herod I tungtang bang) sut tou dedet a, Laisiangthou bu – Esther, Daniel leh Jonah leng nouneltak in sui hi. Laisiangthou sinlelte leh Pathian thu thuktak a sui utte’n hiai Laibu phattuampih mahmah ding uhi.

Spanish pau a Via Dolorosa leh Paite kampau a Lungkhamna Lampi kichi kongzing a Jesu tung a thil thupitak tungte chiamtehna, Kros Khawlmun (Stations of the Cross) 14 tungtang kigelhte lungkhoihhuai mahmah. Kros paw kawm a Jesu’ pai didan mitkha in kilang den hi.

Tulai hun a dia khut a gelh lai (manuscripts) muhkhiak thupipen leh thillui muhkhiak thupipente lak a khat, Tuipi Si Laibu zialte (Dead Sea Scrolls) tungtang leng Laibu ah kimu. Qumran tangte a kawlhawm sung a kipan kum 1947 leh 1956 kikal a muhkhiak hi a, Jesu hihna leh a nasepna toh kisai thu tampi om ban ah Laisiangthou a kigelh khalou thu tampi leng om hi. Laigelhpa’n a kimuhkhiakdan leh laibu zial a thu omte hoihtak a hon taklat pen lungluthuai leh navakhuai mahmah hi.

Laibu sung a bung pumpi khat (Bung 9na) ah Jesu Kris tungtang kia kigelh hi. Jesu’n kros a a thuakdan thupitak, Laisiangthou a leng kigenlou muhtheih hi.
Sappau a thil haksa thuakvuallouh, genvuallouh a haksa 'excruciating’ kichi tuh Latin pau in 'excruciatus’ hi a, 'kros a kipan’ chihna ahi. Hiai a pan in leng kros a sihna a haksat didan, sihna gilou leh mulkimhuai ahihdan suangtuah theih in om.

A khut leh khepek a kilhna leh vuakna liamte kia hilou in, kros a kilhden a om in i Toupa Jesu’n a hu lak leh khahkhiak teng a nasatak a athuakdan hoihtak in muhtheih a, nehnou louh vuallouh hi. La in, 'A thuakdan ka theih in, ka khitui a luang nak....’ achih in genkha mahmah. Ei a dia a thuakdan diktak theihchianna in Amah ziak a i mansuahte (sacrifices) bangmah hilou ahihdan hon theisak semsem hi.

Khovel khangthu a mulkimhuai mahmah, lungsim hon phawng leh tutan a kigenlai, Kidoupi IIna lai a Adolf Hitler nuai a Nazi Germany leh Germany opkhum gam pumpi a Juda mi 6000000 vel thahna, Holocaust tungtang leng abul- a- bal in muhtheih hi. Judate’ medical experiment bawlna dia nakpi a zat a omdan uleh huai toh kisai a physician minsepen Dr Josef Mengele tungtang leng Laibu ah kimu hi. Holocaust toh kisai a thukhenna, tangthu a trial thupipen kichi hial 'Nuremberg Trial’ tungtang hongelh in vantang theihna behlap mahmah hi.

Entebbe lenna phual a Israel military leh Mossad ten Air France Flight 139 pikawi a om, a sung a tuangte Israel mi tamzaw lamdangtak a ava hutkhiakna uh lungluthuai mahmah hi. Hiai hutkhiakna tuh “mihing suangtuahna, lemtheihna, hangsanna leh thilhihtheihna tunglam pek a Pathian in Israelte a hutkhiakna chihlouh vual ahi kei”, kichi hi. Israelte’ kisakholhdan, Cabinet meeting a akikupnate uleh hutkhiakna lamdang a sepsuah dan uh teltak in muhtheih a, movie a et sang in Laibu a kigelh sim nuamzaw tham hi.

Laigelhpa’ a di’n Gam Siangthou a Zinna tuh ginna toh kisai a lungsim a a khualzinna ahi a, Pathian in a nam teel Israelte’ tung a a nasepdan thupi leh lamdangtak taklat na leng ahi. Pathian a taisan chiang un gawtna thupitak tuak mahle uh, Pathian thu aman chiang un a vualzawl a, melmate’ tung ah vualzohna thupitak pe zel hi. Israel in 1948 a zalenna a muhna bang, Juda mi gam tuamtuam a kithehdalhte Israel akiknawnna uh leh lamdangtak a pikiik a om uh tungtawn bang in kilang mahmah hi. Gingtute’ a dia zillai poimoh mahmah tuh ei leng Jesu Kris a teeltuam kihita a, Israelte’ tung a Pathian in a nasepdan ei tung a a sepdan leng ahi hi.

Laibu a thu kigelhte atatak ngen ahi a, Pathian thu kia hilou in khangthubu leh theihna kibehlapna hontuntu leng ahi. Huaiziak in miteng a di’n lungluthuai leh manpha mahmah ding hi. Laibu manpha tuh gou chingtham ahih ziak in kuapeuh in a neihchiat uh ka deihsak a, manphatak a kembit a, ta leh tu leh tusawnte natan adia koihching di’n hoih kasa hi.

Gam Siangthou a Zinna in 500 lel man a, a thutunte’ manphatdan toh et in kithaman mahmah hi.


--oo000oo--