Zingsol Album Review

User Rating: 0 / 5

Star InactiveStar InactiveStar InactiveStar InactiveStar Inactive
 

Zingsol aksi sun in taang hiam? - A review by Ginza Vualzong

Mcmuan S Ngaihte in hiai album thak - ZINGSOL a bawlsawm akipan in kana thei kha hi. Kum bangzah hiam nasataka aki sakkholh nung a hiai album hon bawlkhiat hi kipahpih huai ka sa hi. A tup guhna leh chihtaknate ziak a hong gahsuah ahi a, pahtak huai mahmah ahi. Hiai album bawlna dingin ngaihdan mi tuamtuam kiangah ana kaikhawm a, kei ngei leng ngaihdan tamvei pih hon dot khat kana hi hi. Ngaihdan tam a kaihkhop ziak in hiai album bang le tangzaau mahmah a theih hi a, nam tuamtuam bangle hiai album toh kisai a ki pangkha a theih ahi. Video Album bawlna dia haksatna a tuahte ka theihpih a, audio vuak a release mai di bang in le kana hasot kha ngei hi. Himahleh lungkelou in a pang a, a tup hon mualsuah ngei hi.  

I gam a zawl la leh gamngaihna la om nawnlou di ahi de aw chih theihkhop a gospel la in hon opkhum lai in, ZINGSOL album hong ki bawl khiat hi nahvak huai ka na sa mahmah hi. Gospel la a hoihkei chihna hi lou in, eimi ten thil khat i hih chiang un i hih souhsouh ua, line khat kia ah i pai naak uh hi. Zawlla album ki bawllouhna sawt kuam ahi ta a, huai ziakin ZINGSOL album hi kipahpih huai mahmah ahi.

Video Album di shooting a bawlma in hiai album a la te ngaihkhak kana nei zeuhzeuh hi. A music leh lasak dan tulai mahmah ka sa a, ngaihnuam ka sa hi. A diak in "Zonunnem", "Kum 4 Liamta", "Deih Anglai" leh "Lem in chia" chih te nalh ka sa mahmah hi. Ni khat ni nih a la record zual ahi kei a, Delhi a Thianhoih Recording Studio a kum bangzah hiam kivei a bawl ahihmanin music value omlua in ka mu. A tangpi in, ki simmohna hi lou in, innlam a recording bawlte'n ni khat ni nih a recording khong a hon zoh chiang un, musiciante a dia creativity suahkhiatna di hun omlou a, a la key zuih top mai louh lampi om lou hi. Tua ziakin innlam a album ki bawlte i ngaihkhiat leh a music paidan tangpi ki bangvek sim hi. Duhthusam hon gen zual leng, hithei hileh lasa siam ten amau band/musician ki neih uh hen la, mahni music te ki phuahtawm in, siam mahmah chiangin studio a va record pan le uh, i la te uh musical value nasatak a khangtou dingin ka gingta hi. Khovel a la nalh i sakte, music nalh i sakte uh mahni lungtang akipan ngaihtuah khiat a khum ahih ziakin mi lungsim sawtpi thaam uh hi. Tua mah bangin eimi ten le i music leh la te uh tua sang a hoih zaw a mi lungsim luah ding i deihle mahni lungtang a kipan music i compose uh hunta a, studio musicte (electronic music) a ki nga mai lou a, mahni instruments te ki tum a record bawltheih hun ta hi.

La khum teng in Music Video bawl teitei di i sak uh khanmohbok ahi de aw chih ka ngaihtuah sek hi. Aziak audio record na sangin video bawlna ah sum tampi i seng zaw sek ua, artiste te a dia puak gik khat suak maimah sek hi. Tua banah visual a i hon et chiangin music lam a ki focus nawn lou in, a video a actors te'n lungsim luah zaw nak ua, a siam kei zawk mah chiang ua a la kipan nasatak a 'distract' kihi sek hi. Tua ziakin kei mimal ngaihdan in, audio album released hi masa hen la, tua akipan 'hit songs' a om leh huai te kia video in bawl zaw leng sum le save zawtham dia, hoih zaw dingin ka gingta hi.

Zingsol Music Videote mun tuamtuam a ki shoot ahih manin mit tai mahmah a, actors te leng siam thei mahmah uh ka sa. A diak in 'Zingsol II' leh 'Kum 4 Liamta' video nalh ka sa biik hi.

"Deih Anglai" chih louh hiai album a la teng McMuan in a phuahvek ahi. Mcmuan hi talent nei ka sa a, mi lungleng simpi hi dingin le ka ngaihtuah hi. Music career toh kisai in mailam ah lohchinna leh lamzanna ka deihsak mahmah hi. Kum 3 bang liamta a hiai album bawl dia ana ki sa ahih man in, hiai Zingsol album i lasasiamte uh phungvuhna leh promote na in leisak chiat dingin ka hon ngen ut hi.

zingsol