Siamsinte kiang a laikhak – Part 2

Siamsinte kiang a laikhak – Part 2

David Neihguk, Dr. Pau Biak Sang

pbsnagngaihte

david p neihguk

 

 

 

 

 

 

 

“An investment in knowledge always pays the best interest.” – Benjamin Franklin

Thumapi

Laikhak khatna (Part 1) ah Class X zoh chiang a zil ding, lohching ngeingei dia panlak dingdan, siamsinna in a tup pipen nek-leh-taak muh nading ahi chihte leh sinlaite ading a lohchinna taktak board exam pass kia hilouin maban zilna dia competitive examinationte a lohching (qualify) hiam ahihkeileh sepna muh ahi chihte i na taklang khinta uhi. Part 1 a simkha nailou/sim nuam ten hiai reference [1] akipan simtheih ding hi.

Phuluun pawtna diing leikha’n keivang chih bang in class XII zoh khit chiang a ziltheih ding subject-te class XI a stream (Arts/Commerce/Science) I na lakte a hong kingata ding ahihmanin class XI leh XII pen sinlaite maban kalsuan nading a akingakna bulpi (foundation) ahi chihtheih hi.

Class XII zoh chiang a maban zil beh ut-te a ding leh a sem nuamte a ding in telding tampi ana om kik leuleu hi. Siamsin khenkhatte a ding a thupukna (decision) lak haksa thei ahih man in hiai Part 2 hong kigelh nawn hi. Hiai ah a anen-aham-a gelh sawm ahi kei a, himahleh atup pipen tuh siamsinten’ a hun laitak a pilvanna/theihkholhna (awareness) nei a, huai tungtawn a mahni kizon khiak a poimoh tak leh leng theichiang tak a thupukna (well-informed decision) lak theih nading ngimna ahi.

Siamsin lungtup mualsuah nading in

Kum 2017 in class 12 (CBSE) exam piate 100 lak ah 82 in pass ua [2], JEE (Engineering) exam piate 100 lak ah 30 ching ua [3] leh NEET (Medical) exam piate 100 lak ah 54 in gelhching uhi [4]. Hiai in tulai khovel ah kitaitehna sang mahmah ta ahi chih hon theisak hi. Competitive examinations adiak in JEE leh NEET examna a ding in vaigam ah siamsinten’ class 6 a kipan in kisakkholhna (preparation) panta uhi. Class 12 zoh chiang a maban a bang hih ding chih ngaihtuah pan na hih khak leh khawl(study break) la-a nakisak kholh ngai kha ding hi. Himahleh, theih dia poimoh ahihleh JEE-Mains class 12 zawh kum akipan in thum vei kia exam gelh theih hi. NEET ahihleh huchibanga kum bikhiah om tadih lou hi.

Ei siamsinte leng a gelhchingte lak a atam theilam I tel theihna ding un a baih theilam a kisakkholhna I pat uh alou-theilou ahita hi. Pass nading kia a laisim lou in, tupguhna leh chihtakna toh panla in hanchiam chiat le kuamah I phak zoh louh ding omtuanlou hi. A zekai pen in class 10 zoh chiang a kisak kholhna kipat teitei ding ahi. Tua dana kisak kholhna nei himahleh, theih kholh louh thu a sepna zonngai ahih keileh line dang a kisuan ngai chih khawng ahih zenzen leh leng kisak kholhna omsaten maban ah nakpitakin hong panpih veve ding a, sepgim man thawn tuanlou ding hi.

Class XII (Science) zoh bang career lam zui ding?

Class XII zoh chiang a maban panlak dingdan kalbi chi-thum a khen in, huaite a banban in I ensuk ding uh:

1. Professional course
2. Pure Science
3. Kaam (Job)

1. Professional course

Professional course I chih chiang in nekzonna tawh kisaia seppipen-a neih ding zilna chih theih hi. Seppipen-a neih ding zilna ahihman in a course ah hihding tamlua (hectic) mahmah a, simding-sepding leh bawlding tampitak om hi. A huchihhangin graduate khit chiang in sepna muh baihlam mahmah zel hi. Sen-leh-pai lam ah, a college dungzui in sum-leh-pai haksate ading in education loan muh leng baihlam a, scholarship zong ei singtangmite a ding in a tuam lieuliau in om taangpi hi.

Professional course sung mah ah zong line tuamtuam ana om nawn a, huaite lak a deihhuai pen a kitheite anuai a bangte ahi. Hiai anuai a kigelh tellou professional course dangte ahih leh Journalist, Law, Internet, Web designing, IT leh adangdangte leng science student-te a ding in zil theih tampi om hi.

siamsintefigure01

A tung a kitaklang college-te ahoihpen a kitheite ahi a, huaite a admission I muh keileh leng college dang tampi ah ziltheihna ding om veve hi. Huaite theihna ding in magazine bang, internet tungtawn bang ahih keileh huailam zil mi i thei khatpeuh kiang ah kan theileng a hoih pen ding hi. Siamsimte leh nu-leh-paten I theih ding ahih leh ahitheitan in government college-te ah admission zong masa in, I muh kei hial leh private college-te mitsuan leng, aziak ahih leh private college-te a fee uh tamzaw tham hi. Hiai a tung-a college kigente India a college hoihpen a kigente ahih banah Government funded college ngen ahi ua, private college-te sang in quality hoihzaw tham in a fee zong tawm zaw hi.

a. Medical

Medical lam lunglut-te ading in career guidance hoihtak Rev. Hangpi Manlun, D.Th student UTC, Bangalore in a gelh article hoihtak om ahih manin hiah ah hong kigelh thak nawn tuanlou hi. Simtuten’ references [5] a link kipia tungtawn in simtheih ding hi.

b. Engineering

Engineering degree ahoihna ahih leh graduate khit chiang in sepna lam hi in siamsinna lam hitaleh deihtel theihna (option) tamtak om hi. Engineering graduate ten amau line a sepnate a sep theih ban uah line dangte exam theih teng leng gelh theih vek uh hi. Degree zil sung teng mathematics leh science ana omtou den ahih ziak in Science leh Arts graduate-te sang in common examte ah hamphatna nei tungtuan uh hi.

Engineering lunglut-te ading a subject poimohte ahihleh Physics, Chemistry leh Mathematics ahi.

IITs-te a admission muh na ding in JEE-Mains leh JEE-Advanced gelh chin ngai a, himahleh college dang NITs leh SFIs college-te a admission muh na ding in JEE-Mains gelh chin kisam a, ahih hang JEE-Advance akisap louhna zong om hi.

JEE-Advanced tungtawn a engineering zil theihna government college (CFTIs chih a le kithei) a nuai a te ahi:

• Indian Institute of Science, Bangalore (IISc).
• Indian Institutes of Science Education and Research (IISERs) Berhampur, Bhopal, Kolkata, Mohali, Pune, Thiruvananthapuram leh Tirupati ah om hi.
• Indian Institute of Space Science and Technology (IIST), Thiruvananthapuram.
• Rajiv Gandhi Institute of Petroleum Technology (RGIPT), Rae Bareli, UP.

c. Architecture

Zo-dawn nusia a Lamka khawpi a pemna (urbanization) eilak kia a thiltung hilou in, khawvel pumpi a thil tung ahi. Mihing omna peuh ah tenna ding inn poimoh hi. Huaiziak in Architecture lam lunglut-te a ding in a huap(scope) hoih mahmah hi. Maban ah tenna inn ding kia hilou, auditorium leh adang dang leng tampi hong kiphamawh tou lailai ding ahih ziak in hiai course a lunglut-te ading in maban limchi mahmah hi.

Lamka khuasuak Architect lawhching bang zah hiam ki om ta a, huaite lak a khat ahihleh Mr. Liankhanlun Ngaihte @Frank L Ngaihte ahi. Lunglut na neiten amah mimal in email leh Facebook tungtawn in houlimpih theih ding hi. A email address ahihleh This email address is being protected from spambots. You need JavaScript enabled to view it..

Architecture a admission muhna ding in AAT (Architecture Aptitude Test) exam piak ngai hi. Hiai AAT exam pen JEE-Advance a chingte kia in piak theih hi. AAT a subject poimohte ahih leh Mathematics, Aptitude leh Drawing ahi.

d. Nursing

Nurse lam ah eimite ki tallang mahmah a, India-a award sangpen Ministry of Health and Family Welfare, GoI in apiak National Florence Nightingale Award for Nursing sang bang le ki-om tham ta hi. Nursing toh kisai theih beh nuamten Nu Vungzanem interview na hiai reference [6] ah simtheih ding hi.

Tuchiang in nurse zil na college tam mahmah ta a, Lamka ah leng nurse zilna mun khat sang a tamzaw omta hi. A tung a table a kigelhte ahih leh B.Sc nursing zil na dia India a college hoih pente ahi ua, huai a kaizou dia siamna neite ading in sen-leh-pai le tawm zaw a, huchi loute ading in private nursing college tuamtuam ah leng ziltheih luat hi. A tangpi in private college-te a fee tam deuh hi. B.Sc Nursing zil theih nading in class XII (Science) ah biology lak ngai hi. GNM ahih leh class XII a science lalou ten zong ziltheih hi.

2. Pure science

Physics, Chemistry, Maths, Computer science: Science lam lunglut khawldiak, maban a Research scientist tumte a ding in Bachelor of Science (B.Sc) hoih mahmah ding hi. Hiai zil na ding in India a college hoihpen a kigente IISc, IISER leh St. Stephens College ahi.

IISc leh IISER a zil theih na ding lam li (4) om hi: A lam masa thumte (First three) ahih leh JEE-Mains, JEE-Advance leh NEET exam score khat penpen tungtawn in admission muh theih hi. A lam lina (4th) pen ahih leh Kishore Vaigyanik Protsahan Yojana (KVPY) tungtawn in ahi. KVYP ahih leh scholarship (Rs. 5000/month) Department of Science and Technology, GoI in a piak ahi. Hiai scholarship muh nadingin kumteng in exam piak theih hi, hiai exam class XI, class XII leh Degree 1st year student ten gelh thei uhi. Hiai scholarship mu ten’ direct in IISc leh IISERs-te ah interview piak theih hi. Hiai toh kisai thuchian kimzaw reference [7] ah muh theih ding hi.

St. Stephens College ah admission muh nading in class XII percentage hoih mahmah muh ngai a, huai ban ah cut-off mark tunglam mute ading in aptitude test leh interview piak ngai lai hi. Tulaitak in Lamka khawsuak Dr. Chinkhanlun Guite in hiai college ah Assistant Professor (Physics Department) sem lellel hi. Thuchian kimzaw thei ut-te ading in reference [8] tungtawn in kan theih ding hi.

Akigensa top college-te lou B.Sc (Physics, Chemistry, Maths, Computer Science) zil na ding college hoih tampi om veve hi.

siamsintefigure02

B.Sc Botany or Zoology zil ut-te ading in college teng phial ah zil theih ding hi. College hoih deuh a kai bel a phattuamna tampi om mahleh huaite I muh kei hial lehleng zilna ding mun Shillong, Delhi, Kolkata chihlouh Manipur mahmah ah leng tampi om hi. B.Sc zoh chiang in maban ah academic lam ah M.Sc leh Ph.D tanpha ziltouh theih hi. Sepna lam ah ahihleh Indian Forest Service (IFS) exam bang leng piak theih hi. IFS ahih leh Civil service-te toh a dinmun kibang hi.

B.Sc Biochemistry, Microbiology, Biotechnology, Genetics: Biology lam lunglut-te a ding in hih theih tampi om lai hi. College khatpeuh hiai course offer peuhpeuhte ah zil theih hi. Hiai course-te ahih leh Botany toh Zoology banglou deuh in specialise deuh a, a syllabus uh kibang sim banah, molecular biology lam khong focus deuh a research sunzom nuamte a ding in phatuam mahmah ding hi. Hiai course tulai a medical research adiak in cancer research lam nakpitak in kisaikhakna (relevant) nei hi. Ei Lamka khawsuak hiai lam a research bawl lellel bang leng ki omta hi. A chiang zaw sem a thei ut-te ading in reference [9] ah simtheih ding hi.

Alangkhat lam a etin (on the other hand), hiai course-te specialise lawpah ahihman un, maban ah general knowledge (biology lam ah) bah lawh thei chih bang le om thei ahih man in, B.Sc (Life Science) khong zoh masak phot a, Master level a specialization sunzop chih bang le omthei tham hi.

Huai lou Biology lam lunglutna nei leh professional line deuh a pai nuamte a ding in Paramedical field lam B.Sc Radiology, BPT (Bachelor in Physiotherapy), Medical Lab technology khong zil theih gige a, hoih tak a zoute a ding in amau field chiat ah sepna hoih pipi omtham hi.

3. Kaam (Job)

Hithei hileh, class XII zoh chiang a sepna zonpah a hoih pen hikei mahleh innkuan khosakna vai leh thil tuamtuam ziak a maban sunzom theinawn lou a sepna lam mitsuante a ding in zong lampi tuamtuam om veve hi. Huchilou a, lailam lunglut nawmloute adingin leng nekzonna ding lampi om lua hi. Huai-te a nuai a kigente bang ahi:

siamsintefigure03

a. Defence services

Class XII science toh zoute ading in Army, Navy leh Airforce-te ah sepna kum khat in nihvei kila zel hi. Huai a ding in a tung ah kipia exam-te piak ngai hi. Defence a sep a hoihna tampite lak a khat ahih leh a facilities a hoih ban ah promotion bang leng hoih mahmah hi. Hiai lam a lunglutna nei siamsinten reference [10-13] a kipia link te hoihtak-a et zel poimoh mahmah ding hi.

Defence service a commission mu ei Lamka khawsuak leng a hunkhop ki omta a, Colonel rank tan tung zong ki omta hi.

Merchant Navy, Commercial Pilot: Class XII a Physics, Chemistry leh Maths lam siamte adingin Merchant Navy ahihkeileh Commercial Pilot Licence lam khong ngaihven theih ding hi. Hiaite ahih leh college tangpi ah ziltheih louh a, a zilna college a tuam lieuliau in om hi. Hoihtak a zoukhe theite bel a maban uh limchi mahmah hi. Lunglutna nei ten mitvaktak a internet tungtawn in a zil theih nading tuamtuam omte ngaihven a, zilzoh ding leh zohlouh ding ngaihtuah kawm kul ding hi, a ziak ahih leh a zil man tam mahmah hi. Ei Lamka mi leng a zil I omta ua, siamsin hiai lam lunglutna neiten laigelhtute hiam ahihkeileh a thei ding khat peuh kiang ah kansui theih ding hi.

b. Central services

Class XII zoh chiang a sepna lam lunglut-te ading in Staff Selection Commission (SSC) saina nuai ah Combined High School Level (CHSL) Examination gelh theih hi. Hiai exam a kidongte ahihleh General Intelligence, Quantitative Aptitude, English leh GK ahi. Lohchinna nei ten Central Government Lower Divisional Clerk (LDC) post semthei uhi. Lamka ah leng hiai examna a ding coaching lak theihna mun bangzah hiam ah omta hi.

c. Banking

Bank a sep lunglut-te ading in Institute of Banking Personnel Selection (IBPS) saina nuai ah clerical exam gelh theih hi. Hiai examna a ding in leng Lamka ah coaching lak theihna mun bangzah hiam ah omta hi.

d. Entrepreneurship

Sepna zong hilou a sepna piangsaktu hih ut leh sumsinna lam tempaina neite ading in Lamka khawsung ah hunlemtang (opportunity) tam mahmah ta hi. Sepna a neulua a lianlua chih omlou ahihman in kuhkalna leh chihtakna toh nasem ut-te ading in Lamka khawpi kan a mun hoih omlou ding hi. Hiai toh kisai thuchian kimzaw thei ut ten reference [15] na ah muhtheih ding hi.

Hiai lam lunglutna neite ading in Pu CT Lian Guite in a hilh sek Rural Skill Employment Training Institute (RSETI), Bijang, Lamka ah crash course zil theih ding hi. Hiai course ahih leh kumkhat in tamvei pi om a, lunglutna neiten’ Pu CT LIan mah thuzak theih ding hi.

Siamsinte hasotna

Tulai khovel ah kithuzaktuahna (communications & information) nakpi tak in baihlam ta a, ei gam ah leng I phat tuampih mahmah ua, thil hoih ahi. Siamsinten a manpha thei pen a I zat ding uh kiphamawh hi. Huai ding in laisimna lam ah class room teachingte kia a hunsak lou in e-learning toh pang kawm thei leng theihna nakiptak in kibehlap ding hi. Tulai a e-learning minthang mahmahte ahih leh Khan Academy [17] leh MIT open courseware [18] ahi. Hiai website-te ah high school subject-te a thawn in teaching ngaih theih hi.

Huaiban ah tulai internet tungtawn a thil teng muh theih vek phialta ahih man in, I mobile a net pack i thun te, Facebook, Instagram leh WhatsApp-te zatna khong kia a zangbei mai lou in, thil i theih nopte www.google.com khong ah zon a baihlam tak in muh theih mai hi. Internet zang phatuam ten amau phattuam nadi tampi mukhia uh hi.

Thukhitna

Haichi a hoih na ding a lei hoih a poimoh bang in, siamsinna gah hoih muhna ding in college hoih a kai poimoh hi. College hoih a kai theih na ding in class XI leh XII hih hoih kia hilou, maban a zil theih course tuamtuamte class X zoh phet akipan dalkhol/madal (proactive) tak a ngaihven zel poimoh hi. Ahihhangin, college hoih a I kai khak kei lehleng, lungkiak louh ding ahi. Siamsintu(eimah) I hahpan nakleh ki loching thei veve hi.

Hiai laikhak saulou ah thilteng kimtak a kigelh senglou ahihmanin ahihtheihna munte ah simbeh ding in reference (etton) ding hong kikoih hi. Siamsinte leh simtuteten’ hiai tungtawn in hun (adiak in class XI leh XII) amanphatdan, tup khat nei kawm a laisim a poimoh dan leh mahni kimuangngamna (confidence) toh mainawt a poimoh dan I theih uh ka lam-en uhi.

Sepna(Kaam) lei-te hilou a, pilna lei-te hi zaw ding in siamsinte leh nu-leh -pate Pathian in hon vualzawl hen.
“Siamsin Pallai lou Ngei Ding in Siamsinna mah Awle!“

*Laigelh tuten ’ hiai article hon etdiksak leh feedback hoih taktak hon pia Mr. Samuel T. Thawngkhanlian leh Miss. Linda Samte te tungah kipahthu kagen uhi.


David Neihguk in IIT Madras apan B.Tech 2010 in zou hi. Mahindra & Mahindra ah kum 7 asep nung in tun Bombardier Transportation ah Acoustics & Vibration Engineer sem lel hi. Mahindra a asep lai in scholarship tungtawn in M.Tech zou khia hi. Email: This email address is being protected from spambots. You need JavaScript enabled to view it.
Dr. Pau Biak Sang in Indian Institute of Science (IISc) Bangalore apat PhD 2015 in zou hi. Tun University of Texas Health Science Centre at Tyler (UTHSCT) Texas, USA ah Post Doctorate Research hih lel hi. Email: This email address is being protected from spambots. You need JavaScript enabled to view it.
[] reference chihna ahi.

Abbreviations
AIIMS: All India Institute of Medical Sciences
AFMC: Armed Forces Medical College
CFTI: Centrally Funded Technical Institutions
IIT: Indian Institute of Technology
JEE: Joint Entrance Examination
LHMC: Lady Hardinge Medical College
MIT: Massachusetts Institute of Technology
NEET: National Eligibility and Entrance Test
NIT: National Institute of Technology
SFI: State Funded Institutions

References
1. http://www.zogam.com/articles/articles-ii/educational/4150-siamsinte-kiang-a-laikhak-part-1.html
2. https://www.news18.com/news/india/cbse-declares-class-12-results-2017-with-moderation-policy-check-your-marks-here-1413869.html
3. https://engineering.careers360.com/articles/jee-advanced-2017-post-result-statistics-22-eligible-candidates-skip-registration
4. https://www.indiatoday.in/education-today/news/story/cbse-neet-2017-984332-2017-06-23
5. http://www.zogam.com/articles/articles-ii/educational/1762-career-guidance-medical-doctor-mbbs.html
6. http://www.zogam.com/articles/articles-i/interviews/3087-nu-vungzanem-toh-houlimna.html
7. http://www.kvpy.iisc.ernet.in/main/index.htm
8. http://www.ststephens.edu/department-of-physics/dr-chinkhalun-guite/
9. http://www.zogam.com/articles/articles-i/interviews/2999-phd-zouthak-paubiaksang-toh-houlimna.html
10. www.joinindianarmy.nic.in
11. https://www.joinindiannavy.gov.in/en
12. http://www.careerairforce.nic.in
13. www.upsc.gov.in
14. http://ssc.nic.in
15. http://www.zogam.com/articles/interviews/2394-interview-with-ct-lian-zopa-2013.html
16. http://www.zogam.com/articles/articles-i/interviews/3054-d-suanhau-hebron-hair-cutting-salon-neipa-toh-houlimna.html
17. https://www.khanacademy.org
18. https://ocw.mit.edu/high-school/

RELATED ARTICLE: Siamsinte kiang a laikhak – Part 1