Corporal Punishment i chih bang a hia?

User Rating: 0 / 5

Star InactiveStar InactiveStar InactiveStar InactiveStar Inactive
 

corporalpunishmentarticle

Corporal Punishment i chih bang a hia?
By Ginza Vualzong.
Ginza
Tulai teng i gam uah "Corporal Punishment" chih kammal zaak ding in hong om veu a, a thei chian ki om mah leh a thei chiang lou a tam zaw hi ding in ka gingta. Corporal punishment in a huap a lian a, i gam dinmun toh ki tuak a zat vek theihmah a diam chih bang et hoih poimoh ka sa hi.

India gam mun tuamtuam ah school naupang te thagum a soisakna (physical punishment) 69% pha chih 'Child Abuse in India - 2007' survey Ministry of Women and Child Development, Governent of India nuai ah musuah ahi. Research proof om lou pi in a tangpi in naupang soisakna school hi in insung hi ta leh naupang bawlhoihna dia ngeina dan a lak in om hi. Himahleh tu in bel khovel pumpi in a pom ahih leh naupang soisakna pen naupang khantouhna daal tu hi a, naupang soisak a om te a phychology uh buai in physical abuse te ngeina seh ua, amau in le mi tung a khut khaak poisaklouhna hon nei uhi.

Huchi in 2009 kum in Right of Children to Free and Compulsory Education (RTE) Act bawl khiak hi a, 1st April 2010 in India pumpi a zuih dingin hong om ta hi. RTE nuai ah Corporal punishment khaam bikbek hi a, Section 17  ah hi chi bang in ki gelh hi:

17. Prohibition of physical punishment and mental harassment to child –
(1) No child shall be subjected to physical punishment or mental harassment.
(2) Whoever contravenes the provisions of sub-section (1) shall be liable to disciplinary action under the service rules applicable to such person.

Huchi Corporal Punishment i chih bang a hia? Naupang omdan (behavior) bawlhoih na ding a taksa hihnatna (infliction of pain) hiam ahihkeileh soisakna (punishment) piak pen Corporal Punishment ki chi hi.

Corporal Punishment chinih in ki khen tangpi  hi. Physical Punishment leh Mental Harassment.

Naupang tung a thagum suah a soisakna bang chi tuk in na keilele Physical Punishment kichi hi. Hiai in a huam khak te:
1. Vanzat tuamtuam chiang, khedap, duster, konggak leh adang dang te zang a naupang zep, khen, pek, su, sik, kei, khuat, sam laihsak, tawpek chih te.
2. Naupang nuamlou taka omsak - bench tung a dingsak, bang lam nga a chair bang a tusak, ding kom a bag pawsak, bil nih gel len a dingsak, khukdinsak chih te.
3. Thagum a thil utlou sasa neksak - chalk, dusters, buan, malta, sahbon etc.
4. Class room sunga kalhkhum (Detention), toilet, libray etc sung a kalhkhum chih te.

Mental Harassment i chih chiang in thagumsuah lou a naupang lungsim hihnasak a theihte ahi.
1. Naupang hihna suniam thei dia kampau zat (sarcasm).
2. Naupang zahlaaksakna dia min tuamtuam a sam leh tai.
3.  Naupang background leh nu-le-pa hihna a kou.
4. Naupang medical background leh a nu-le-pa damtheihlouhna a kou (HIV/AIDS, TB etc)
5. Naupang laisiamlouh ziaka chiamnuih leh simmohna.
6. Naupang lai theithei lou (learning difficulty) leh lehkha sim haksa sa (speech or articulate disorder) chiamnuihna.

India Constitution nuai a Article 21 toh RTE  Act paikhawm in naupang education leh dignity kembit a,  corporal punishment in naupang lungsim ah lauhthawnna guan a, school kai utlouhna hon neih pen in naupang te 'right to life leh dignity' hon su kha a, constitution kalh hi.

Indian Penal Code (IPC) nuai ah section tampi a Corporal Punishment file theih in om hi. Physical abuse toh kisai section teng in le book theih a, Section khenkhat a poimoh diak te: Section 305: Abetment of suicide committed by a child; Section 323: Voluntarily causing hurt;Section 325: Voluntarily causing grievous hurt; Section 352: Assault or use of criminal force otherwise than a grave provocation; Section 506: Criminal intimidation; Section 509: Word, gesture or act intended to insult the modesty of a woman; Section 354: Outraging the modesty of a woman.

RTE Act 2010 pek a zat ahih taak manin i gam a School leh institute tuamtuam te hiai Act tawh kituak a naupang etkoldan i etthak uh poimoh hi. Khanglui lai a ki etkoldan - chiang pum a ki zep, ki soisak chih te tu hun vaai hi nawn lou a, thagum zang lou a naupang piching tak a etkol dan lampi i zon uh hunta hi. RTE tawh kituaka naupang etkol didan sinsakna teacher te a dingin India government in Training programs tuamtuam nei hi. Hiai training te phatuamtheipen in zat sawm chiat ni, a huchih keileh Corporal Punishment ziakin school minsiatna hon tun zel kha ding.

Langkhat lam ah tulai school naupang te khel mahmah ta ua, teacher te zahtaak lou tampi om chih thudik khat ahi. RTE Act nuai a Corporal Punishment or Physical Punishment phal hi nawn lou ahih chiang in, Teacher ten pilsiamtak a naupang te itna toh etkol siam ngai mahmah ding hi. School Authority in Disciplinary guideline ki chian tak bawl hen la, huai dungzui in naupang thukhelte etkol hi leh a hoih mahmah ding.

Etsakna:
1st Incident:  Teacher in naupang thuhilhna nei (feedback session).
2nd Incident: Principal toh ki houlimsak.
3rd Incident: Nu-le-pa tel a houlimna
4th Incident: School akipan expel.

Bible in "Spare the rod and spoil the child. Prov 13:24" ana chi hi. Khanglui ten "tai louh ta tuh sawn ahi" ana chi nawn a, huchi ei society ah Corporal Punishment pen hi thei lou ding chihna ahi diam? Bang tan huam sak a, bang tan huam sak lou ding?
Kei mimal ngaihdan in bel, tua a tung a Corporal Punishment ki pe deudou teng a hi sipsip a zuih eilaka hi thei nailou in ka ngaihtuah hi. Vaigam leh sapgam a mi te bel civilised ahih na uh kum 1000 val hi ta ahi a, amau toh iki teh thei nai kei a, amau a dingin a zuih haksa lou deuh ding in ka mu. Eiloi tunai a khovak mupan te i hi ua, i lungsim uh leh iki etkoldan te uh piching zou nai lou mah ahi. Thagum suah a ki zep ekek leh sisan suah hial zaw uang lua ahih manin, hiai pen topsan thei leng deih huai kasa.

-------------------

References:
1. Guidelines for Eliminating Corporal Punishment in Schools by National Commission for Protection of Child Rights (NCPCR).
2. Protection of Children against Corporal Punishment in Schools and Institutions by National Commission for Protection of Child Rights (NCPCR)