Laisiamna in a tup bang hipeuhmah ding..!!

User Rating: 0 / 5

Star InactiveStar InactiveStar InactiveStar InactiveStar Inactive
 

LAISIAMNA IN A TUP BANG HIPEUHMAH DING..!!
By Nengsuanmang Phaipi

articlenew

“Laisinna/Laisiamna a san deuh-deuh leh NU leh PA’ hon simmoh bawl bang maimah uh aka’’. Hiai thu-vual kuate hiam kihouna kana zakha laizang chitchiat hi. Khovel pilna, siamna leh theihna lam-ah pil mahmah ve hang aw..!! Theihna leh siamna lam-ah, Pi-le-Pute’ sangmah in theizaw leh siamzaw mahmah ve hang e..!! Hiaibang dinmun a i-din nung aleng bangziak tak a I inn sung, saptuam, khotang leh gamsung a kituahna, ki-iit tuahna, kilainatna, kim leh kiang a mihinpihte’ khotuahna omtheilou leh neithei mahmah lou I ding uam maw..?

Atung a thuvualte ka lungsim ah honglang veu-sek hi. Ahihhangin, adawnna diktak piak ding dan haksa mahmah hi. Lungsim sa vetvut zen a ka ngaihtuah lai-in, ka lungsim ah hiaithu hong dawkkhonung phing hi; LAISIAMNA IN ATUP HOUH I THEIH LOUH LUAT MAN-UH ADIAM. Theih luatziak zaw hipeuhmah kei, ahihziakin lungsim hon kamlua ahih man-in kon gelhsuk lemluam phetve..adik zoulou omte paihkhia inla, adik a-om khak zenzen leh zuikeuh lel in.

Laisiamna/Laisinna bang hipeuhmah ding ahia chih nang leh nang dot-in nakinei ngei hia? Bangziak a skul kai, bangziak a Laibu tuamtuam zil, bangziaka Exam lochin ngai leh mite sangmah a marks tamzaw muhna dinga midangte toh hichituk a ki-el ngai ahia? Laisiamna bang hi’a, bangteng tunkha hipeuhmah ding aleh? Hiai dotnate, sintu naupangte ading vuak hilou hial. Sinsaktute’, Ne-le- Pa ban-ah I te’n na gam leitang iitna leh awl-mohna taktak toh en-mite’ ading hivek thouin ngaih tuah ing. Exam pass na ding leh hinkhua a sepna hoihtak muh utziak chauh a lehkha zil/sin i diam?Ahihkeileh, laisinna ichih naupang sinthei ihih apan sihtan dong hinkhua zatna ding a kichiil na leh kisak kholhna houh a zaw diam? Sepna(job)neih, niteng neek leh taak ding zon, silh leh te’n suktuah theihpen khovel a idam sung ua di’n poimoh tham-mah e..!! Abikin ei-singtangmi’ adi’n poimoh diak. Huchi ahihleh hiaiteng a ihinkhua bukim chithei ding idiam? Laisiamna hiai a ding vuak adiam leh? Hinkhua ichih pen sepna hoihtak neih leh niteng neek leh taak zonna chauh hilou hial hi. Hinkhua pen mihingte’n I damsung a ngeina banglou leh uapkhak lianzaw leh thil thupitak neitheihna ding a itup leh ngim uh hizaw in ngaisun mawk ing. Silh leh ten, nek leh tak zonsuahna ding vuak a na hinkhua na zat intuh, na hinkhua in atup leh ngim taktak na mansuah kha ding hi. Hinkhua zatna ahhaksatna, beidotna, lung-ngaihna tuah hun omtham ding ahi. Huchibang tuah hun a puakdan siamna dingin, hinkhua zatdan theihsiam pen poimoh lopetmah hi. Haward Red Steven in hichi in ana gen hi - “Our lives should be lived not avoiding problems..but welcoming them as a challenges that will strengthen us..so that we can be a victorious in the future.’’Huai ziakin, hinkhua zatdan theisiam kisin pen examna a math(suut), physics siamna ding a kin maimai sangin poimohna lian zawtham neiding in gingta ing.

Sinsaktu leh sintu naupang na hi zong’n, banghang a laisin kul leh hinkhua bang hihiam chih kidot poimoh ding hi. Hinkhua bang hipeuhmah ding ahia? Vasate, silpakin a tuam sing leh guate, tuipi a ngasate-hiaite in leng hinsan neivek uhi. Hinkhua pen zawnna leh hauhna, a bawng a chi leh sa kikhen tuahna, gamkhat leh ngam khat kal a tawplou hial a kidou tuahna, lung-gelna, kingaihtuahna, khemna leh lungtang tawng a kiselgu-enna,tup guhna, hehtheihna, iitna, launa, huatna, lung himohna hiaite tengteng ban-ah thiltampi omlai..mihingte hinkhua a himai hi.

Himahleh, mihingte’ atangpi in thiltampi omlak ah banghiam khat chauh neihsawm leh theihsawm a kisakhol hileng akilawm hi. Examna chi tuamtuam ah I lohching ua, sepna hoih taktak imu ngei ua tuazoh in Zi leh Pasal a kinei tuah, Khawl(Mechine) in na asepkhiat zungzung bangin I pung hulhul uhi.Huchi kawmkal in hinkhua zatna ah-dawilokna, lung himohna, lauhna toh kidim lailai tazen hi. Huaiziakin, siamna leh pilna zonsuahte in hinkhua zatna ah phat-tuam luatna hon tunlou abat ton tam mahmah hi.

Naupang ihonghih apan I damtouh intuh, mipiching khat tuh na hong hingei ding hi. Huai hun in, mipiching hihnung a bangbawl a bangsem ding kahiam chih dotin na kinei ngei himhim hia? A tangpi in; mihingte’ piching khat I hong hihchiangin, Zi leh Pasal a kineithuahte ihi. Koimun a khosa leh koimun a omding chih na theihma ngei-in Nu leh Pa dinmun na honlen kha maimah ding hi. Huchih hunchiangin henkol bulhmah na bang maimahta ding a, ni dang a hun nuam zalentak a nazatte na hon zang thei lawmlawm nawn keiding hi. Na maban dingbel, tek leh vuai lam manoh ding ahimai hi.Hiai teng khawng mah adiam hinkhua zatna in atup leh a ngimsan? Hiaibang dotna nang leh nang khatvei bek kidot hoihna sakei maw..? Na Nu leh Pa ana khosakna uh ahoih viau intuh, nangleng panmun hoihtak na nei khamai thei. Huan na Pa bang inleng sepna hohtak honguan theih khamai ding. Na Nu-le-Pa ziak’n koppih hoihtak bangle neikha tham niteh. Himahleh, hiaiteng na neih nung aleng, natheih dia hoih mahmah khatbel nangleng nikhat nichiang a siatlam,tek leh vuai hun nei thouthou ding na hihdan na manghilh louh a hoih ding.

I theihsa mahbangin, naupang hihlai a kim leh kiang a lauhna tellou a khosak theihpen poimoh mahmah hi. A tam zawthamte I khanlet chiang un lauhna toh kikhang lian a, kikhosa mawk hi. Khenkhat te-Khosak dingdan lauhna toh, khente sepna mansuah khak ding lauhna toh, tawndan mansuah ding launa toh, kim leh kiang ate lauhna, sihding lauhna toh kikhosa hi. Huaiziakin, lauhthawngna omna mun-ah, pilna leh theihsiamna taktak omthei lou hi. Huchi kawmkal ah Zalenna(freedom) toh khosaktheih ana hilua hi. Zalenna I chihpen I ut leh dah hitheihna hipah lou hial hi.

Hinkhua ichih thil kilawm tak khat hi’n ngaihsun ing. Ei mihingte’n thil thulimlou pipi a ina zat pen uh hilaizang lou hial ahi. Tu dinmun a I khotang siat-gawpna, tawndan hoihloute, sahkhua toh kisai a paidan dikloute leh thil tuamtuam a diklouhnate, hoihlouhnate diklou leh hoihlou mah ahi nachih-ngam a, helna ahoih lam-a na bawlgam chiangin na hinkhua- hauhsakna, thukdan leh atuambik nate na theisiam phet ding hi. Huchi hileh, hinkhua pen a omsa chingna hilouin thilthak muhsuahna hong hizaw ding ahi. Hiaipen ‘Education’ in a tup leh ngim himai lou hai maw..? Dan omsa, Nu leh Pate’, sinsaktute hon sinsak leh hilhte-uh zuih nuam mahmah tham-mah, ei-mah ading inleng bithuai zawtham mah. Himahleh, hiaibangte pen mihingte hinsan hikhollou hial ahi. Aziakbel hiaibang hinkhua zatna ah, theihsiamna taktak omtheilou leh zalenna om thei taktak lou ahih manin. I hinsan pen ei mahmah in adik bang hihiam chih zongsuah sawmna hikha zaw ding hi.

Kuama’n hiaibang thilte hihding in hon hanthawn(encourage) ngeisam lou ding hi. Aziakbel hiaibang na hih intuh midangte’n hon-hua ding ua, hon lauding ua, amoh hon khusak laiding uhi. Na Nu-le-Pa in leng hinkhua bit-tak leh muanna toh na khosak hon deihsak ding ban uah, nang mahmah leng bit-tak a khosak ut na hih ziak in. Hinkhua bit-tak a zatsawmna pen thil om-sa lemchinna maimai abang hi. Aziakbel, hiaibang hinkhua zatna ah lauthawnna in zuisek ahih man in. Laisiamna in a tup leh a ngimbel hinkhua pen lauhna tellou a zelentak a zat theihna ahi zaw hi, himah lou hia maw..? Kim leh kiang a lauhna himhim tel-lou a khosak theihna bawl dingbel baih liailou hial a, sinsaktu leh sintute apan ngaithuahna thuktak neihkul ding ahi. Nang bang chituk a thupi di’n na ngaihsun ale? Huchibang khosak theihna I bawk khiat-uh hun petmah ta ahi. Aziakbel,tulai khovel paizia i-et chiangin kithahna a pumdimta, thuneihna deih a panla Politiciante’ pina nuai a ki omta,daan siamte, Policemente’ thuneihna nui a kikhosata ahih man in. Amaute misiangthou/sahkhuami chih a omta. Huchibang mite’n theihna leh dinmun thupi taktak deih uh hi nalai..!! Khovel haina a pumdim ta, mi khat in midang khat dinmun hoihzaw leh thuneihna neihna ding a suksiat tup a neita, khovel nawngkaina a pumdim hit-het, chi leh nam ziak bang, sahkhau ziak bang, gin dan tuamziak bang a kimuhsitna toh khovel a mihingte pumdimta, mihingte haina leh khelna a pumtuam a ki-omta. Huchibang kal a ei-mah leng a chinpen leh thunei pen hi dia kisakhol leh hasot a ki-om mawkta bang ahi.

Education in a tup leh ngim pen hiai I Society setak lak a lungkim tak a khosak ding adiam? A hih keileh zalen tak a khosak ding? Ban-ah, Zalenna bukim toh khankhiat a khotang hoizaw bawl khiat leh tunding diing? Zalenna ichih pen I tunung a dingvuak hilou in tu mahmah in kipoimoh lopetmah ahi. Khotang a zalenna I bawl kei-uh leh siat-gawpna hongtung petmah ding bang hi.Tu mahmah a kim leh kiang zalentak a khosak theihna ding bawl khait kisam hi; tuabang hileh eimahmah in adik leh dilou ki saikak theipan phet ding hi. Hiaibang khotang, kim leh kiang a zalenna ineih chiang un-pilna leh theihsiamna taktak kinei ding a, khovel I maituah theiding ua, khovel in honpuak lut thilte theihsiamna inei thei ding uhi. Zalenna toh tonkawm helhel a, khol-lou hial a thilzilna,suina leh etkhiatna I neihchiang un-thutak, Pathian leh iitna ihon zongsuah theipan petding uhi. Himahleh, lauhthawngna I khosak lailai leh bel-theihna taktak,siamna taktak kizil leh kimulou
kha ding hi.

Huaiziakin, Education in atup leh ngim pen lauhthawngnate’ ziak a mihingte ngaihsutna, mihingte ki tanauna, mihingte ki iitna suse thei thilte sunglam leh polam a hihchimit leh nuai chimit hi-het ding chihna hong suak hi.

Laisiamnate azatdan leh azatna ding mun uh theihsiam kiphamoh a, I zat-theih uh leng kul lua ahi. A laipilna lam a vapumpil hoihlou zaw chizezen khang, ahihhangin hiai pilna leh siamna I neihte izatdik kei a, azatna ding bangtak a izat theih kei uh lehbel Laisiamna leh pilnate in omzia neilou leh phattuam lawmlawmna neilou suak kha ding hi.