Hinna in a Thiltup (Purpose in Life - Mathai 5:13-16)

User Rating: 0 / 5

Star InactiveStar InactiveStar InactiveStar InactiveStar Inactive
 

Hinna in a Thiltup (Purpose in Life - Mathai 5:13-16)
-Jamin H Vualnam

jaminhvualnamnew

Toupa Pathian in Mihingte amawkmai a honbawl hilou a, a chimthoi man leh sepding bawlding aneihlouh man a honbawl/siam leng ihituan kei hi. Huan hon bawlkhelh leh thuman sakna a honbawl khemkhem, honbawl nimnem leh bawl maimai leng ihi kei. Deihthawh tak, hawmthoh tak leh amah lungtuak a amah batpih a honbawl ihih ban uah, amah Nna semding leh pahtawi a amah thupiakte zui a kemding leh hihkipak a phatdia siamneel tak leh deihthoh tak a honbawl mihingte ihi uhi. Tuaziak mah in atapa Jesu Khrist, hiai leitung a huntomchik anungjuitetoh kithuah a muntuam leh gamtuam a vaak a thil lamdang leh thupi sem a hun azatlai in mipite leh anungjuite kiang ah gentehna leh thuhilhna tuamtuam anagen hi. Mihingte ihin nasan leh hinsung adia poimoh leh ihinna in athiltup tampi anagen a, huaite mah i khristian hinkhua leh ginna adia kul ahihban ah, I mihinpih leh midangte tung a itaklat ua hihding semding leh zuidia hon lamet mihingte ihi uhi. Tuate lak a nihte, Mathai bung 5: 13-16 pansan a saulou in kikum zual leng chidan ihi.

Amasa ding in 'EI' mihingte hinna leh kha (spirit/soul) nei a honsiam ihih ban uah, 'Lei chi' na hi uh honchi hi. Chi/salt itheihsa bang un; limna, alna leh kepbit nadia hoih leh phatuam ahihban ah poimoh mahmah hi. Chi/salt pen pe'ng, al-lou leh mawl a hihnabei in omleh bangmah di'n aphatuam kei dia, zatnabei in kuaman adeihlouh diing ban ah paih khiak a chil zialzial louh ngal manphatnabei ahihdan agen hi. Tua ahihman in ihin nasan tuh imihinpih leh ei mahmah adia limna, alna hidia hondeih ahihdan theih masak deih huai hi. Midangte nawngkaisak leh amaute adia khaatna, hoihlouhna, mitsiipna, donkholhna leh ninhuaina tuntu ihih intuh ihin nasan zangkhial leh hingkhial suakding hi hang. Keimah hindan leh khosak danten mite akipahsak a tuamah in mite adia limna atut/apiak ding tuh; ihin nasan leh Toupa nungzuih nadik hong hipah ding hi. Sum-le-pai, neih-le-lam, inn-le-lou, nekding-taakding kapiak a hunteng akapanpih gige ding chihna hilou in, kahinna a khrist gim kanam a khrist in athuzawh ngaih tuahna leh khrist batpih hinna kaneih ngeingei ding chihna ahi zohi. Tuading in, Toupa Jesu Khrist a kaginna leh muanna kiptak leh diktak ahih ngai masa a, huchi hileh kei ah diktatna hong gahdia huai in keimah leh mite adi'n Limna leh Alna hontun ding hi.

Huan Chi/Salt ahih leh nek-le-dawn leh asethei muatthei thilte kepbit nang in phatuam in hoih mahmah non hi. Huchi mahbang in mihingte ihin nasan pen midangte adia puksiatna, hoihlouhna leh siattheihna apan a kembit, humbit leh vengbittu ihih ding kisam nawn hi. Tuabang ihih theih nang in iginna mah etchian ngai non dia, huchin panpihtu, lamhilhtu leh makaih a vengbittu hoih ihithei ding hi. Salam kia hilou in khalam mahmah a tuabang hihna leh nasep midangte tung a ineih a muanhuai leh gin-om a isepsuah chiang in ihin nasan in atup leh angim hong dik pan ding hi. Ahuchih kentuh hinna manphatdan leh hin man athawn suakdia Toupa deihdan a hing ihihlouh ding ban ah hinna vuaksuak leh hinna manbei suak lel ding hi hang. Chi/salt in kepbitna nna asep bang in gingtu khristian ten ginna leh thudik a kibulphuh kip a, huai mah kembit a diktatna a khangsak leh masawn sak tuh imohpuak ahi hi. Ahun beitheilou damsung daih Diktatna toh nasep-silbawl, gen-le-sak, hinkhua leh hinna ineih a ikepbit chiang in hunteng, munteng ah muanna, bitna, iitna leh kituahna hong om ding hizo hi.

Huan ihin nasan leh hinna in athiltup poimoh nihna di'n 'khovel vakna' ihih dan chiangtak in a gennon hi. I nasep leh hindan te'n vakna tuntu ihihdan leh hihlouhdan baihlam tak in genchian mengmeng hi. 'Nnasep hoih,' 'Nna hoihsep'chih leh 'Nnahoih sep' ichihten agen-nop kibang hetlou ahihdan theih chiang mahmah kisam khathei hi hang. Ahoihlou, ginalou leh thulim lou nna leng hoihsep theih a, huan nnahoih sep leng ginalou leh zulhzau tak diklou tak a sepkhak theih veve hi. Amanbei leh genchiang/sutchiang theihlouh Toupa Jesu Khrist a ka ginna a diktatna nnasep hongpawtkhia tuh Nnahoih sep ahi chih Laisiangthou apan in imuthei hi. Huaituh kahinkhua, kalungsim, ngaihtuahna, nnasep leh bangkim a Toupa thuneihna sangpen leh vaihawmtu hidia kilaan a kaki pumpiakna gahsuah ahi hi. Demna leh soisel nading omhetlou Toupa Jesu Khrist a kaki phumluut a ahih leh huai in kalungsim leh ka hinkhua ah taangtung a kho-om selguk theihlouh bang a vaakna honpia ahihdan phawk ni hang. Huchi hileh genhaat thu leh gentamthu hilou in mite'n kei ah vaakna baihlam tak in amu d'ua, midang toh kilam danna hong piang in huai in midangte lungsim ah naa semding ahi zohi. Khovel/leitung kimvel a pai a munteng a meivak/khawnvak detkuang ding hizolou in, keimah deihdan leh hoih sakdan a hinglou a Toupa Jesu Khrist deihdan leh thupiakdante a hingdia kaki piak-khiat a, gitlouhna, diktatlouhna, thulimlouhna, hoihlouhna leh sualchiteng apan a nnahoih leh dik sem a hinkhua kazatna tuh khovel vakna kahi hi. Jesu Khrist adia kakipumpiak ngeingei intuh kei a vakna leh ka nnahoih sep ten hiai khovel mialna (bolhlohna, siatna, khelhna leh hoihlou chiteng) tung a vualzohna hon tun ngeingei ding hi. Tuamah lah khovel vakna kahihna leh kahihdan kuapeuh in mang ngilh louh a deih huai hi.

Huaiziak in, kuapeuh kisui vengveng in bangziak a Pathian in 'KEI' mihing a honsiam a, hinna honpia a, ka hinna in a gennop leh ka hinsan bang hi hiam chih kidot tuak khading hi. Kei Chi/salt bang a limna, alna leh kepbitna in kapang khana hiam? A'ikeh al-lou, limlou a khateektuk, thuukvelvul, mak tehtoh a ompelhpulh kha kahizo diam? Kepbit malak-salak paidalhtu, khendalhtu, mangthang saktu, hihsetu leh manlouh suahtu kahi khahiam chih kisui ngai khanteh. Vakna hihnak sang a avak om sunsun hihmit-tu, hihmialtu, mutmit-tu hihkhak ding lauhuai mohlou hi. Mei aamkhedia kisa kiukiau abuak mit-tu leh paidalhtu kahih intuh khovel mialna/mialsaktu kahi dia, kahin nasan bangmahlou ahih ding ban ah Toupa hamsia kaloh phet khading chih kivel thak ni hang.!!!...