PASIAN (GOD) LEH PAWLPI (DENOMINATION)

User Rating: 0 / 5

Star InactiveStar InactiveStar InactiveStar InactiveStar Inactive
 

PASIAN (GOD) LEH PAWLPI (DENOMINATION)
By Johnlal Samte

johnlalsamte

Thumapui
Reformation hun masang in khovel a Khristian jou sia khu hattuam khat ana hi siang hi. Hinanleh, Martin Luther in Theses 95 ahing gel zou mi tamtah ten hattuam sung a kihil na dihlou te ahing thei chiang un kidaidan na leh kikhenna hing pung deudeu in Khristian sunga pawl (denomination) hing um tou deudou a, hing pung be semsem nalai ding hi. Tuamin, ei gamsung a jong nasatahin hing zel a, hattuam-Pawlpi hing pung deudeu ta hi. Tua ahiman in tulai pei dan leh huinung dan te iet chiang in Pasian sang in pawlpi min (denomination) te khu asang jo in kikoi ta ahidan ki chiang mama hi. Atamzo in vang hisam sih, jong hi sih ichi Meithei, ahinlah; Pasian sang a I pawlpi ten uh I ngai sang jo dan uleh-Pasian kel khel a nasem ihi uh ama chi en khom vai ichi hi.

Pawlpi Min (Name of Denomination)
Pawlpi khat poupou in pawl min kinei chiat a, tua I pawl min khu ei ma hina ahi lel hi. Pawlpi khat poupou in min nei chiat ihi chiang in Pasian sang in I pawlpi min khu I ngaisang zo dan leh ipi bol zo dan ki lang mei ding in aging tat huai hi. Tami, mun ah pawlpi min bang zat ahiai hing gen kha ding ka hi man in nop mo sa leh athangpai mi bangzat ahiai khat jong um ding in ka gung ta hi. Ana huchi kha ium leh ta leh jong kisuang la lou kei a gen suh dimdem veve ding kahi man in, ahi thei leh kisiam than an la lei hoi zo tham ding in ka ngai sun hi. Pawlpi min khenkhat te enkhom vai Assemblies of God, Anglican Church, Baptist, Catholic, Evangelical, Free Church, Independent Church, Jehovah Witness, Lutheran, Methodist, Presbyterian, leh adang dang gen kha lou tampi aum nalai hi. Tua pawlpi min I gen te en talei, atamzo khu mani kithangngal na hileh aki lom hi. I pawlpi min te ua …………um zou chiang in ‘Church’ chi um pan hi. Ahi taleh, hattuam (Church) khu ei a bang in ibawl ua-alang khat lam a et ding in hoi hi leh aki lom mama hi. Ahinlah, anua izui uh Jesu kamteng apat in en talei, Jesun ‘Ka Hattuam’ (My Church) ana chi khu ei gingtu te ihi jo uhi. Ei khu hattuam nei ihi sih a, Jesu khu Hattuam (Church) nei pa china ahia, pawlpi (Denomination) nei pa ana hilou Meithei ahi. Tua hi man in I pawlpi min ua pat en talei Pasian/Jesu khu akhatna ah aki koi lou dan aki chiang mama hi.

Jesu apat zilthei
Anua izui uh Jesu kei tung a ahing len lai in Israel ten aki let sah pi mama ukhu ‘Temple Worship’ ahi. Ajiapen gamdang-namdang miten tambang biahna ana nei sih ua, ana nei sun te jong khu Israel te biah dan toh aki bat lou jiah in ama uh ‘Temple Worship’ khu achituam (unique) deu dia in angai sun ua, aki thangngal pi mama uhi. Hinanleh, Jesu ‘Temple’-biah inn a aki tom hi. Pasian I biah na ah, I pawlpi min te ukhu I ngai sang sengseng ua, midang pawlpi te toh ki pawl khom utlou leh eima pawlpi I ngai sang in pawlpi dang mindang neite kungah Pasian umlou hileh kilom hial in pawlpi min a shi ngam leh pawlpi min ngai sang seng gingtu itam seng ta uh hilou ama? Tuami in Pasian thangpai na hing tung leh kilom hial hi. Jesu Jerusalem Temple sung a thangpai a aki tom na khu, atangpi a gen dan in summet bol na a aki zat zia ahi chi atangpi in aki gen hi. Tuami banah, Jesu Jerusalem Temple a aki tom na zia khu ahileh midang ten mun leh mual anei zou lou pen uh –sakhua leh pawlpi min a midang ten mun anei jou lou uleh ki pawlpi nei sah, ki pawlpi lian sah mama ten midang te mun apia lou pen ukhu thangpai pi a akitom za ahi. Mani pawlpi min chou nagisang na khu, midang te a ding a mun pelou china ahi lel hi. Midang te mun ipia lou na in eima leh eima ah ki thupi sahna leh mani kidei khopna leh midang te simmo I lungsim tong a um gen khe simsim lah gen khe chet lou lungsin tong a um ahi. Jesu lei tung a ahing len lai a miten bangma a asim loute uleh, min anui sat te lungsiat pa ana hi khin khian ahi. Thamlou in, ama ngel na ngon jong lusuh na ding neiloupa ahi giap hi. Temple te lian deudeu in aki bol a, ki sa kho mi sah mama sakhua lamkai te Temple-Biahinn sung a aum ua, hinanleh, I Hundampa un vang biah inn sung na san a mun nei lou tamei zen!! Tuami khu pawlpi ngai sang sengseng te jia ana hilel tah ahi. Tuhun in en ta lei pawlpi ten mun tam pipi, building thupi deudeu ilam ua, tuanah koi te aum ei chin en talei…sakhua, pawlpi lamkai teng ki khum na ana hikia leuleu hi. Mijong, agenthei gia na nei lou, zuu leh sa, khamthei jia a koiman bang ma a sim loute giana ding nei loute I biah inn sung te ua khatvei be gia na phual ipe kha tau ma chi ki ngai sut tham ching mama ahi. Duhdah lou jia kiho mo, ki mi bol lou nalai set……Jesun ‘kei mi hoi leh, midihtat te hol a hing pei ka hi sih a, mi khial, mi pam pai te hunkhe dinga hing ka hi jo hi’ ana chi hilou ama? Ei lah Jesu nua jui, ama sep ban sem iki chi ua, ahin lah ama bol bangbang ki bolt a mongmong lou, pawlpi min leh pawl min a buai thei changchang ei lah ki thupi sah mama. Tua ahi man in tulai gingtu kichi te hinkhua khu en talei Pasian gingta sang in pawlpi min (denomination) gingta itamzo ta uhi. Thamlou in, mi atamzo te en talei mani pawlpi min ngai sang ta sengseng in pawl dang-hattuam dang a kihop sang a kihop lou ma tel zo ki um nalai, tuabanah um na lamlam a pawlpi min ngai na sengseng a midang te toh kisiat, kibal jong kho sa lou a pawlpi phut khe ziahziah lel, kidaidan nate leh kisiat jong kho sa lou Pasian a ding in chi vial n alai!! Pasian ading in achi sang un Pawlpi min a ding in chi uleh dih jo vet di hi ven, hucia dih na leh minthan na hol nana  pi. Hattuam (Church) in khen tuam anei sih a, hinanleh, pawlpi (denomination) in khen tuam anei a, kikhen, kidaidan na a uang sah semsem hi. Ka buai dap na gige khat ahileh anau izui uh Jesu khu koi pawlpi (denomination) ah ah alungkim pen de o chi ahi?

Gamtuam/Khopi ah
Tukhang in khovel khangtou dungjui in eimi kichi te jong mun tuam tuam a Pasian gualzawl na tang in sep leh bol, lai sim leh a dang dang toh kisai in mun tuamtuam ah iki the thang ua kipi ching simsim hileh aki lom mama hi. Tuabang ahing hi chiang in mun tuam tuam a ihing um chiang un iki ngia na ua, mi leh sa khat, unao-laigum zom aki khen thei ihi sih chi bang slogan dan leh movement dan in ijang ua, ahoi mama a, jong ahi di mong ma ahi. Khopi ah ihing um chiang un ahi dandan in tomkhat sung chu I nam min pua in biah na ibol ua, tom khat zou chiang in I pawlpi (denomination) biah na kiphut doh jel in, masang a ina biah khompi, I U leh nao, pianpi-laigum zom te kinua sia san in I pawlpi (denomination) ma kipi bol kia ta jel hi. Pasian biah na ah I U leh nao-laigum jom hi hang ichi te toh jong kibe khom thei lou phot ahi chiang in ilah ua kiit na leh kituana tasam ding ma ahi. I U leh nao te sang a I pawlpi min ma kiit in ki ngai sang jo vevo hi. Pasian in sanggam-laigum asiam a, pawlpi (denomination) asiam kha sih hi. Ahi leh eiloi in, iit leh ngai di pen ki iit kha lou dan ana hijel. Pianpi te toh munkhat a luang khom theilou mihing in Pasian ka ging, Pasian a hat in ki lang nan leh tua bang mite khu Phaisai toh ki bang lel ahi. Hamkhat, tondan ki bang, ne leh ta ki bang, na san jong munkhat a be khom thei lou minam ihi man un dahuai mama a, Pasian lung itua zou na de o chi bang ngai sut na tampi um leng hi.

Israel te
Israel te khu Pasian nam tuam tel tea hi uh chi ithei tham uhi. Pasian in Israel te atel lai in, khentuam –pawlpi min toh atel sih hi. Ana tuam tel na liuliau ahileh, aunpi ua, kihken umlou a anampi ua Pasian khat, munkhat, min khat…pawl dang2 umlou a anampi ua abiah ding uh ana dei jia a ana tuam tel ahi. Mindang leh pawldang a ahing kikhen uleh ahing tuam pet chiang chiang un Pasian lungthah na atung ua atung jel hi. Pawl dang leh mindang anei te ukhu gamdang te pasian, bolthu pasian te abiah na uh khu ahi. Tamnah, I pawlpi ten siamthu pasian abia uh kachina ahi sih hi. Isarael ten gamdang pasian teleh mindang pasian te ahing biah chiang un, ama uh Israel te sung mama a kihen na leh kidaidan na hing um in, tuami in Paisan lungthahna tung va giap hi. Pawl min leh mindang ngai sang na khu, mani ki dei khop mama leh ki dei tho mama ihina a sulang giap hi.

Thukupsitna
Akoi akoi gingtu kichi jousia  khu pawlpi nei lou aum sih a, ahinlah gingtu hingal a pawlpi nei sese lou gingtu ana um veve hi. Ahitaleh, Pasian leh Pawlpi chi min vo in thu tampi igen khe ta a, dihsa jong um vai in, dihsalou jou ki um tham ding ahiman in akoi akoi in ithugin khu Pasian hi hen lan, Pasian min ina sep khu Paisan min ma hi hen lan, pawlpi min pen khu sang in Paisan ma ki ngai sang jo thei hen lan imi. Isa te toh hoi tahtah a ium in jong lung kitua tah in munkhat a Paisan be khom thei talei kiki chi na sengseng ahi hi. Mani pawlpi ngainat na in I biah I Pasian min siat sah na ahi giap hi.