Interview with CT Lian - ZOPA 2013

User Rating: 0 / 5

Star InactiveStar InactiveStar InactiveStar InactiveStar Inactive
 

Zogam.com Person of the Year Award (ZOPA) 2013 winner Pu C.T. Lian tawh houlimna Zogam.com in ki nei a, amah personal background, a sep khiak te leh thil tuamtuam a, a ngaihdan te dotna ki nei in, a nuai a bangin hon ki taklang ahi.

Zogam.com: Sim tu te theih dingin, na tanchin tomkim, na background leh na sepna te hon gen ve maw?

C.T. Lian: Amasa penin Zogam.com te interview theih dia ka om man in kipah huai kasa a, natung uah kipahthu ka hon gen masa hi. Ka min tak ahihleh Chintwahlian Guite ahi a, mi tamzaw te’n CT Lian/Chin Guite chi’n ahon thei uhi.

Tulel dinmun a ka sep khak nate a nuai a bang ahi:
a) Owner Manger - C T Lian Convenience Stores
b) Managing Director – Lamka Building Society
c) Executive Editor- Manipur Express Sunday Supplement paper
d) Project Consultant: Agape Mission Cooperative Credit Society LTD
e) Resource Person - Nehru Yuva Kendra, Churachandpur District Non

Non Profit Organization lam a ka ki hel khakna munte:

a) Chief Coordinator – Lamka Trader’s & Self Employed Association
b) President -Bungmual Youth Club
c)  Asst. Secretary – Young Paite Association, Bungmual Unit

Brief background – education / work experience

Lehkha sim na lam ah lehkha siam thei a topper la chih dan deuh te chu kahi hetkei a, ahihziakin kuhkal naziak ahi ngei dia bangtan hiam tuh kana tung sam hi. Ka neulai in JN Model School leh Bethany Christian College te ah kana kai a, Manipur Board nuai ah Higher Secondary kana zou khia hi. Huai zawh in Gujarat Univeristy nuaiah Bachelor of Engineering, Civil Department (BE civil) degree kana zou hi. Hiai zawh in United Kingdom (UK) ah lehkha sim ding in kava kuan a, Master of Business Administration, Entrepreneurship (MBA) kava zou hi. United Kingdom a ka om sung in diploma course leh training tuam tuam ah ka va kihel  a, huai te ahihleh - Community Development Course ah Diploma huaibanah, Life Skills tuamtuam - Social Care NVQ level 4, Manual Handling, Food safety, Fire Safety leh First Aid training te ah leng Certificate kava ngah hi.

Nasepna lam ahih leh, Engineering College a ka om lai pek apat kei leh kei ki tou delh ka hihna ah a niam pen chi mai leng (e.g. catering) a kipat sep khaklouhna kanei ngel kei chil eng ka genkhial kei ding. Gentham ching a kei leh kei ki toudelhna dia kana sepkhak khenkhat te:
1999-2002 – Owner Manager in keimah business Hornbill Chinese Fast Food, Ahmedabad ah mi 12 vel sepna mun kana enkol hi.

2002-2004 - Barista Company (West Zone, Ahmedabad) ah Assistant Territory Manager in kana sem hi.

2004 September to December 2010 sung United Kingdom (UK) ah kiloh tawm in naa tuamtuam kana sem hi. Kasep khakte:
a) School sweeper

b) MC Donald’s –counter Salesman

c) Super market- Sales Assistance

d) Packing Team member - Hasbro UK Ltd

e) Care Worker (night) at Care Home

f) Owner Manager –“Drop off Store” eMart UK Pvt. Ltd

Huaibanah UK a kum 7 ka om sung in St. Julian Baptist Church, Newport  ah Church member khat kahi a huai hunsung in Saptuam activity tuamtuam – Fund raise, Biakinn a social work chihte ah kava kihel sek hi.

Family :
Kei kahih leh Pa G.Tualkhansong leh Nu Dimgou te nupa Pathian goutan masa pen kahi. Unau li (4) ka pha ua, sangam numei nih leh Pasal khat ka nei hi. Ka Pa ahihleh Manipur government nuai a medical Department a Male Health Supervisor sem ahi a, tukum in a retired ta hi. Ka nu tuh inn nasem (house Wife) ahi. Tu in ka Nu leh Pa, ka naute Nupa leh atate uh banah ka sangam numei khat toh 9, Wales Street, Zoarveng, Bungmual, Lamka khawpi ah ka khosa uhi.
CTlianZopa2013

 

ZOPA 2013 hihna na sang in bang ‘ngaihtuahna’ na nei a?

Hiai ZOPA 2013 award sang ding kahi chihthu ka zak phet in lamdang bang ka sa zozen a, kasepte mipi ten hon acknowledge ahi uh chih chian saktu ahih man in thupi kasa hi. Kei mimal ah nakpi tak in hon haanthawn hi’n kathei a, Kakipak!

Nasep na patkhiak te leh na sepkhiak te dungzui in “enterprising leh socio-economic development for progress” (Lamka context) tungtang mipi theih dia hoihte tamlou hon taklang ve maw.  

Kei thupi ahihleh “Mahni kitou delh” or self - independent, “sem ding in ne ding” chih ahi. Lamka District sunga teng mihing lacs 2.7 lel te’n sepding zongin semleng a lampi omtham dingin ka gingta.

Etsakna ding in WW-II lai in Japan ah Atom bomb khiakziak in Japan gam se gawp in a tuailai te uh bang sibei phial uhi.  Hichibang dinmun a a om lai un a gam a vaihawmtu te leh mipite hongpai khawm in, a vekpi un pang khawm uh hi. Kum 1960 in khovel a silk puan bawl khe tam pen pen hong hi maimah uhi. Kum 1960 in STEEL lam pibawl ding hon chi non leuleu in 1970 in khovel pumpi a Longpi (ship) bawlkhiak na mun thupipen hong suak non maimah hi. Huchibang zelin in 1970’s in Automobile lam GOAL khat hon nei non ua, 1980’s tan in khovel a Gari bawl minthang pente hong suak zel uhi. A non in 1980 apat in Computer leh technology lamah khovel pumpi a top a hipha lai uhi.

Tu hun a hichituk a technology ahoih nung a mahni kitou delh nuam zaw tham ding ahi chih ngaih dan kanei hi.  Amasapen in i gamsunga vaihawm heututen i gam sunga sum leh pai kivei dan - i muhna leh zatna (economy) te i theih siam masak ngai hi.

Lamka/Zomi context a i economic dinmun leh maban  na muh dan bang a?

Lamka mi te summuhna leh sum zatna (economy) ua pan et in mihing khat in i sep suah uh Gross Domestic Product (GDP) uh niam mahmah a, kumkhat in Rs 29,000/- nikhat in Rs 72/- man mikhat in kisem suah zou lel chihna suak hi. I District sung vuak a leng tuailai lehkha siam, nasem nuam, nasepna ding nei lou mihing 70,400 ki om hi (Ref: Manipur Express date 26/03/2014 issue).
Hiaite sepna ding a hoh kei leh i gam ua investment a project abawl chih himhim zak a om louh ziakin i gam economy tuh hoihlam sang in siatlam manoh lai ding dan in ka mu hi. I gamsung a sum hong lut zah sang in inflation ziakin i gam mite sum zatna 22% val a sangzaw ahihna ah i gam ah khawsakna haksa deuhdeuh lai ding dan in kamu hi.

Development peuhmah a government kia hiam ahih kei leh mipi vuak in zou lou  ahihman in  tulai a khovel pumpi a pai pen Public Private Partneship (PPP) mah lawhching thei pen ding in ka gingta.

Zomi te progress na ding in Lamka context in traditional economy leh khosakna banglam “alternative economy” om thei ding in na ngaihsun a? Nang concept pen “market oriented” chi leng a dik diam ? “Open market led free-trade” tungtang ah bang ngaih dan na nei a?

Kei mimal muh dan tangpi in ei singtang mite mizia dungzui in service industry sangin manufacture industry lamah na sem leng nuam leh kisa deuh in kilohching baih zaw deuh ding in  gintakna  ka nei hi. Technical leh professional lam zil in nei leng ei singtang mite ading sepna muh nop deuh ding leh nuamsa deuh ding in kangaih tuah hi. Banah IT lam bang leng hih thei mahmah ding in ka kigingta.

Government a sepna nei loute i gam a thil piang leh omsa te mah zang in “mahni sumdawn” hah bawl leng i gam ah mahni kitouhdelh phet hilou in hausa in i gam leng  hong khantouh thei zaw tham ding in mu ing.

Kei mimal ngaihdan in open/free trade gamdang toh ki sum dawn tuahna a om hoih kasa. Mahni kitou delh zou nai lou gam mite a ding bikin zatdan i siam a policy bawl isiam leh i khantouh theih na ding uh akal bi hoih pen khat hong hidin ngaih tuah na kei hi. Banghiam ei a ding a hoihlou a om ding dal na in policy dan in Memorundum of Understanding (MOU) bawltheih ahi.


Na sep hoih mahmah khat a ki gen “Lamka a Helmet compulsory a zat ding” leh Gari High Security Registration chih ahi. Hiai tungtaang campaign leh pressure na patkhiak dan leh a hong ki implement dan hon gen beh ve maw. Tu din mun in Lamka Traffic bang chi bang lel in a om a ? Hiai te ki zui lai hiam?

Hiai helmet compulsory leh gari registration government in zuih dinga sawt pek a dan (law) a ana neih sa uh ahi. Ka kho lai pot nalam ah mi tam tak gari kiphu kha ka vabuai pih mun mahmah a, damdoi in ah leng tamtak kava tun kha hi.

Bangziak hiam chih research ka na bawl hi. Kha kua (9) sung damdoi inte ah registration booth te ua pan data ka kaihkhom te a pan in gari accident ziaka damdoi in kitun nithum hal in khat om zou ziah ziah a, ni 16 hal in gari accident a si khat ki om zou chih ka mukhia hi. Pa tauh huai (alarming) sa in DC’s lui Jacintha Lazarus ka va houpih leh aman ngai poimoh in order hon bawl hi. Huanah Lamka SP’s  lui Mangkhogin IPS  toh pang khawm in implement in hong om hi.

Lamka District Transport Office ah gari a high security registration plate thuah govt agency ten ahon pat nung uh nitam lou in, mikhat in hiai a agent ten a customer te uh kuamah “receipt” hon pia nuam lou ua, a sum lak uh leng mundang a toh ki bang hetlou tamdeuh himai thei - nang enquiry hon bawl in chi in LATSEA ah thu hon tung hi. Huai takin ken leng District Transport Office ah thil om dan kava kan pah a, gari tuamtuam a asumlak zah uh leng lai a note khia vek in a contract nei tu German company  te Mumbai  head office ah legal advisor pa  phone tung tawn in thil om dan ka hilh hi.

A zing in Lamka a franchise lasawn tute nasep hon kholsak ta uhi - amau ten a rate diklou pi a ana lak ziak ua receipt ana pe ngam lou dan uh ana hi. LATSEA tungtawn in hiai thu ka buaipih uhi. Huai nung apat gari number plate thuah thak te peuh mah te receipt piak hi ta a, mipi tamtak ten leng asum uh a mukik uhi.

Helmet compulsory implement  nung kha 9 nung a ka muh suah ahih leh gari accident ziak a liam  45% bang kiam zou in, a si 80% in kiam sotdan hi.

Lamka ah tutan in Helmat khuk compulsory ahi lai.

Tulel a khawpi sung a lampi Teddim Road National Highway kichi pen lampi dang ah heikhiak theih leh ahoih ding. Footpath toh kisai kon gen ngut ding. Gari accident katuah te atangpi in gari in anunglam a pat aphut uh ahi sim vek hi. Kei hoihsak  dan takin chuh  drainage pen PVC pipe hih ding, footpath pen 6 feet a aliat  ding huchi leh khe apai teteng footpath tung kia a hong pai thei ta ding ua accident leng hon tawm tuan mahmah ding chih ahi.  

CTLiantrophy
Tunai a intervention nasa tak a na lak a kithei leh mipi lung phong sak mah mah “Khuga Dam nude video tape” tungtang na personal experiences hon gen beh ve. A case pen koi tan a tung lel lel a? A tangpi paidan in “numeipawl “ te deuh in a case a  take up di uh hileh kilawm tak, nang na take up a , bang ziak deuh ahia? hon provoke leh motivate deuh bang ahia?

Ken hiai Video a hichi lawm lawm a ki sawisak a om pen vaigam hi in sapgam hileleng ka sanggam nu chuh huh ding mah kahi. Numei soisa tute matkhiak a, dan toh kituak a gawtna piak ding deihna leh maban a hichi bang ki soisak a, akhonung a i gam a hongtun non louh na ding deihna in police a paipih kahi. Numei pawl te hih khelkhel dingin ka koih tuan kei a a mu tu, a theitu, a paw natu te hih theih mah in kakoih hi.

Hiai thu FIR police a kabawl khit in Churachandpur Joint Women Organisation te toh kihoulim in amaban pai didan genkhom na leng kanei uhi. Numei pawlte toh pangkhom a  panla ding in hong kisak lai un, tuahsia tuak te inkuan te leh kei mimal mahmah leh i nam leh gam a ding a hoih zawk na ding in a na  dai mai in chi a kham a ka om manin heutute thuman na in numei pawl tuamtumte toh ka dai uh hi.

Tu in mimal tak in ka enzui non kei. Mat a om te sawtlou nungin a (bail) in a pawt khe ngal uh hi.


Hiai case ah bang feedback a om a? bang hiam “backlash“ chih chu hiai case na take up ziak in nang tung ah ‘mohsakna‘ hiam ahih keileh, eilam a kithangsak mahmah “vauna” bang “anti- tradition, anti- custom/system “ leh ‘doudalna” te nana tuak hiam? Bang a na ngaih dan leh response?

Hiai Khuga dam incident ka buai pih ziak in milian tamtak te muan na ka khasuah a, LBS te waiting sheds nih leh beautification man  3.5 lacs natan kamuh louh loh hi.

Hiai thu ah phatna leng tampi katuak a huchi zah mah phial in mawhsakna/ngawhna leng katuak hi. Kamsia tuamtuam a ki vau na katuak, ka hinna tan pha a lauh huai theih khop in vau na katuak hi.

Tradition leh custom toh nahih dan kituak lou ahi chi in hon khou mah uh. India dan toh kituak ahih na ah custom toh kikalh kasa kei, i zat khak pen zang kha ihi mai kachi hi.

Mohsak na khauh theih mahmah a puak zawh louh hial ding bel ahi ngal kei hi. Hiai heutu dang te hoih deih dan kalung sim in kangaih tuah vengveng a tu tan pha in theih siam haksa kasa lai hi.

Mailam ah election na din sawm hia?  

Kei kaneu chik a apat khotang nasep lunglut mi kana hi. Tua kei khomkhom a kana septe miten hoih honsak pih ua, mipi’n alian zaw deuh in honsem in chia  hon sawl a ka om leh ka nial kei ding.  


Lamka a non tribals – Meitei leh vaite population pung lua pen patauh huai na sa hia? Hun hong pai zel ding ah ei tribal te hon thuneih khum thei di dinmun a lat pen, pan bang chi lak hoih na sa a?

Patau tham e. Ka gam ah hong lut kei un chia kidal mok theih lou ahih man in dan toh kituak policy hoih bawl a dal ngai hi. Dan toh kituak policy mah ngai non leuleu a, hiai ding in policy bawl thei ding a om public leader te MDC/ MLA te effective mah mah a ngai uh hi.Tu chiang in thauvui thau tang sang in khuak pilna pen hong poimah zaw ta hi. Tu chiang in nidang bang ahi non kei a mitam ten vai hawm ding chih om non kei a, khuak pilna neiten vai hawm hi zaw ta hi. Etsakna dingin Lamka i tampen ziak in vai i hawm ua tampitak genthei i om lai uh. Lamka ah Meitei - vaite tamlou hong om ua, a khuak pil na un Lamka economy 60% hon control ua, amau te kuamah khutdoh a gen thei a om kei uh.


Zogam.com leh media (social media etc) tuamtuam te tulel a na muh dan - na ngaihdan - hoih na sak , hoih na sak louh, leh hichi zaw deuh leh na chih a om leh hon share ve.

Social media abik tak in Zogam.com hoih kasak na khat ahih leh society sung haksat na tuak panpih na piak chihte a chiin ban ua gamsung khantouh nading lam thil te ah  nak tak a pan la hi a katheih man in hoih kasa hi. Hiai banah Zogam.com i chih pen miteng zattheih a ki pak teng in leng gen theih na mun, a heh teng in lah gen theih na mun, ahoih zawk na ding thei teng in leng a gen theih namun, research scholar te a ding a issue khat ahong om chiang a, a lom pi a mipi te lungsim paidan/ngaihdan/deihdan theih theih na mun ahih banah thu hoih teng thusia teng kisung khom theih na mun mite thil theisak tu leh mi tamtak lawm bawlsak tu ahiman in  hoih kasa  pet mah hi.

Ka ngaihdan in column khenkhat  yellow page/telephone directory/counseller centre/ citizen advise column (legal/govt benefit schemes tuamtuam  banah a thil apply didan theisiamsak theih na)  bang hong om beh thei lai leh hoih zaw sem dingin ngaih dan kanei hi.

Zogam.com thupi  Bridging the Zomi’s a hih toh kituak in thuhoih lahoih, thudik, thutang te mah hon hah bawl (promote) le uh ka chi a, a tuung in mi ten hon theisiam kholkei dek mah le uh thudik mah in  mi kai khawm (Bridging the Zomi’s ) pen ding in gintak na kanei hi. Hiai banah miten Zogam.com chi a hon ngai sang ten briding the zomis i hih ziak a hon ngaihnat theih nading un mite lunglut theih na ding activities tuamtuam nei tam leng tua sang in khansem thei ding uam chih ngaihdan kanei hi.

Zopa-Winner-with-team