Fuh Honsa Uh!

Fuh Honsa Uh!
~ Lianzamang Tonsing @ ZM Tonsing

zmtonsing new

Nitak khat lawmpa’n a zi om dan hoih a saklouh ziak in a nau pawkawm tit-tit in a sunghte’ inn ah hon va hohpih hi. A sunghte’ inn ka tung un lawmpa’n a zi om dan bangkim a sunghnu (zi’ nu) kiang ah gen a, a sunghnu’n le theisiamlua hileh kilawm awmtak in a lu bang su ngaungau zozen hi. Himahleh, ahong paukhiat hialtak in lam-etlouh lam daih ah hon dawng a, “na lawmte khawng n’on tonpih, na zi mi lak a selphou na hi” chi’n lawmpa hon salhbawl maimah hi. Ka ngaihdan ahikei hialna a lah ka va pau somsom tuankei.
Ka lawmpa midang khenkhat bang hileh a zi tung ah khutkha ding a, thagum zang a zi bawlhoih sawm di ahihlai a tua aman a zi’ nu kiang a kamdam a honva genpihpen a sunghnu’n ana pakta mahmah di ka saklai in ana huchikei maimah hi. A tanu (ka lawmpa’ zi) hoihlouhna tuh ahihna mah ahihziak in selphou chih om thei nawnlou a, a makpa pa toh pangkhawm a a tanu hoihlouhna bawlhoih a sawm ding uh a mohpuakna uh hi zaw hi.

Mihing hoih bukim ki-omlou a, mihoih mahmah i chihte’n leng hoihlouhna gen di khatbek nei teitei hi. Tuamah bang in mi hoihlou chi a i theihte’n leng hoihna khatbek nei veve ding uhi. Ahi a, tua i hoihnate i kiphat leh pahtawi kawmkawm in hoihlouhna i neihte kimawkgup lou a, a poimoh leh kisalh a, vuak leh zep a pha di ahihleleng kivuakmai ding ahi. “Hakai pahtak a lungvei” chih paunak a i neih mahbang un, i hawmthoh leh duatluat thilte a khonung a i buaipihpen, mi lak a hon suzahlak leh mualphou sakpen di hithei ahihman in pilvan mahmah kisam hi.

I khotang sung siatna; i namsung buaina khawng setan in hon lok ahi chi’n setan i ngoh ua, diklou chihna hipah tuan keimahleh thudikte a dik chi ngamlou, a diklou leng hum theihtawp a i kihumziak uh hizaw kha ding hi. Huan ah, khenkhat te’n ipu-ipate’ khelhna Pathian in phuba honla ahi, huaiziak in ipu-pate’ khelhna Pathian’ mai ah ngaihdam i nget ding uh ahi chi’n gen kheukhou sek uhi. A dik hia diklou chih gentheih mawk hikei mahleh ipu-ipate sang a i hoihzawkna uh gen di ka thei tuankei!
Gensau zeklai le - ipu-ipate’n singbul-suangbul leh dawi-le-kau khawng ana bia ua, tuate ziak a khial diak dan a ngaihsun ihi kha dia aw? Tua ei, Tangthupha ngahnung kum 109 bang chingta, Pathian hing’ ta kichizensam te’n le Pathian sang a i thupi ngaihzawk leh i muanzawk uh bangbang a om a? Pathian, Pathian chi in i ki-Khristian sak mahmah ua himahleh i Khristian hihna pen vangam kaina di tan ahih zohlouh khak diing lauhuaipi ahi hi. Sum-le-pai deihtakna, angmasialna, huaihamna leh duhgawlna, thuneih utna, numei-pasal kal a thangtatna, hiamgamna ban ah nekgukna leh diktatlouhna toh kidim ei Khristian-te singbul-suangbul leh dawi-le-kaute ana bia ipu-ipate sang in bangpi’n i hoihzaw ua le? Khristian i hihtak ziak ua hoihzaw dan a i kingaihtuah mawk aleh bel dikkhinvek khollou kha ding hi.

Khotang vai ah genle hang ipu-ipate’ hunlai leh tulai i khotang dinmun uh kilamdanna tamtak om ding hi. Diktatna, sang a upa zawte zahtakna, tagah-meithai leh dai kilkal a mite kankuah leh khotuah a, golhgukna omlou a adik-atang a vaihawm chihte ipu-ipa’n ana zuih leh paipih uh himahleh ei khang a i mansuah uh ahi maimah hi. Huaiziak in ipu-pa’ khelhna sang a eilawi khelhna pen teh thoh di hileh eilawi a pen gikzaw khamohlou ding hi. Khristian kichih pawng mawk a Pathian i tung ua lungkim a, vangam a hon pilut diing hilou hi. Huai naksang in huntawpni chiah Pathian’ mai a kisiamtanna di hunlem om di bang hileh eisang a khialzaw a i ngaihtuah Pathian thu ana zakha hetlou ipu-pate’n kisiamtanna di hauzaw kha diing uhi.

Khatvei nitak khat nnasem ka pailai in ka sak ah numei 3 culvert tung ah ana ding uhi. A kiang uh ka tun toh kiton in nervous chihna le hituanlou in suang khat siklep in ka kipuk dek a, tua numei 3-te lak a khat in ngaihdeuh mai in a lawmte kiang ah “hiai pa hong kipuk dek eitel voi, naaaakkk fuhtuak e” hon chikhe zoizoi mawk hi. A zul a om a lawmte beng-ngong a di uam ahihkeileh ngaihpau law kha deuh ahihlam kitheilou di hialkhop a om a zaw diam ah a thugen a lawmte sang in ke’n ka zachiang zaw di! Himahleh a zalou dandan in ka pai au-au a, inn ka tung in facebook ah “numei khat in fuh honsa” chi’n kiphatna’n ka zang daih a, a kizen kawikawi vanglak.

Ahi a, ka gennop tak tuh a kipuk dekteng ‘fuh’ (banghiam kham) chihna ahi diam? Huan ah, “fuhtuak” ahon chih a kipan in i khotang uh ana se petmah hi di hitah chih ka lungsim ah hong kilangpah hi. Kua hiam khat i theihngei hi’n theihngeilouh hitaleh banghiam khat kham nei hi ngeingei dia gintakna i neihtheihpah mawk in i khotang dinmun uh genchiang mahmah hi. Khatvei gari ka ki-accident ziak in police station ka tung kha a huai ah leng police-te khat in “na fuhlua a hi’nteh” honna chita get hi. Hichibang a fuhlou pi fuh honsa 2-vei ka tuahna ahita! Mel lam khawng hon en vengveng a fuh (melhoih) honsa khawng hile uh tuh kipahhuai lawtel di hive’n! I gawng a lah khamtheih hih; i hong thau zek alah zupuak hizel!

Insung leh khotang a i kikol dan uh a zalenluat ziak in tu’n a gah i lou lellel ua, setan bang i ngoh zaw mah uhi. Setan nnasep khat tuh ahipeuhmah a himahleh tua setan in nna ahon sepna dia a bul pan a, a kongkhak hongtu eite mah ihi hi. Khamtheih-guihtheih, zu-le-sa i uangbawl mahmah ua, numei-pasal khentuam omlou in khamtheih sal ah i tang zengzung uhi. Tulel dinmun et in i khotang dinmun leh maban uh bing mahmah a, hiai bawlhoihna diing in mahni inkuan a kipatthak poimoh hi.
Ka lawpa’ sungnu’n leng a tanu hoihlouna selphou dan a lalou in “Ke’n ka na sal ding, ka na thuhilh dia hong hoih mai diing ahi” chileh vaiveng pah mai ding hi. Hoihlouhna a leng kisal ngamlou a, gup theihtawp a i kigup in gah kipahhuai hontun ngeilou diing hi. Kei mohna ahi; kou inkuan moh ahi chilou a pangpalek bang a tungnung kituh a, ahoihlou lam i kingoh tuahtuah nilouh laisung uh i khotang leh i minam chidam in khangtou ngeilou diing hi.

© ZM Tonsing | 08042019