Ka Vasa Mat Masakpen

KA VASA MAT MASAKPEN
By Ginkhenpau Valte

ginkhenpauvalte new

Tuktui luanlai ahi a, daitui a tam mahmah hun ahi.

Vuahzuk ni zingkal khat ka inn pangkhang lam ua tawlet kiang a laisim a ka tutleh vasa ham chilchel leh ahonpi a gamta zaizai a singkung khawng bohging vengvungte thawmging ka gal zak hi. Huaite’n hon thathousak a, huchi in kintak in gophel leh sailumtang bangzahhiam la zok in ka inn nunglam ua huandai nawl lam ka delh pah vitvit hi.

Nidang in, kei kia hiam ahihkeileh ka lawmte hiam toh hitaleh leng vasa ka beng zelzel sam a himahleh ka mankha ngei naikei. Ka school kaipih lawmte bel vasabet leh gamvak chihte a siamthei mahmah ua, school khawng bang a leng aguuk a gophel hon pua in sunkal peuh in vasa va man thei zel uhi. Oh! Ka genchian masakha kei a, tulai khangthak hun a khopi a school kaite’n tua ka gen omziate a thei kei ding uh e. Hmm... Ka hon gen thak ding aw, chi phingle. Haha...

Singngat khua a ka school uh bel khonawl simpi khat a om ahi a, ka inn ua kipan gamla lou a om ahi hi. A kigendan in, ka school building uh ahihleh Japan gallai a sepaihte’n jail a ana zat uh ahi. Kou school kailai hun a Headmaster’ pisa leh vankepna a kizang pindante bang a baangte suang lianpipi a kibawl ahih ban ah a kongkhakte bang leng, tulai a movies khenkhat a kimu sikpum a kibawl jail kongkhakte toh kibang hi. Himahleh heutute’n huai sikpumte seelna ding hia ahihkeileh kongkhak apan a sung a kimuhpailet theih louhna ding chi uh hia, sikpek khawng in a thuap uhi. Jail a ana kizang ahih ziak mah in a naupang lamte’n gimneihhuai simsim thu-le-la bangzahhiam hiai school mun-le-mual toh kisai ka za uhi. Akhente’n jail sung a ana si bang zong om inchin a khate uh omlai ziak a thawmging bang zan chiang a om nakkhem ahi a chi uhi. Adik leh diklouh zaw ka thei tuankei, himahleh lamdang ka sak pawlkhat ahihleh ka school kai hunlai ua nungaknou khenkhat dawimat ahi chi a a buaipih mahmah uh thu khawng ahi. Huai thute ka thei gige lai a, numei gawng leh saang getgawt khat huchibang a a buaipih lamtak uh ka muhkhak khat mel ka mitkha ah thamden hi.

Awle, ka school uh pen khonawl a om school ahihna ah sunkhawl chiang in gamlak ah suaklu, sippak, leh adangdang khawng va lou in ka ne zelsek uhi. Hiai thu na simlai in na lungsim ah, genkhe kei mah leteh, “‘Ahihleh a heutute un phal uh adiam?’ na chi sim maw?” Haha... Hiai thute pen a kimzaw in aban lam ah gen thak sawm zaw mai ni aw.

Huai hunlai a bel singkung leh vasa i chihte bang leng, tulai bang lou in, ana tam lawlai hi. Exam chiang bang in, sunkhawl hun chiang in singkung khawng ah tuang kawm in lai kisim zel hi. Singkung a tamleh a paak leh a gah leng om ding chihna ahi. Huaite a omleh a nethei ding vasa leh ganhing om ding chihna ahi nawn hi. Vasa a omleh vasa man ut mihing om nawn ding chih theihsa ahi leuleu hi. Himahleh school kai sung a vasa bet ding heutute’n phal lou ding chih theihsa ahih nawn man in school a gophel puak khaam ding uh ahi chih thudik ahi nawn hi. Hinapi in, hun khenkhat ah, vasa bet kilawp mahmah ka lawmte khenkhat in a kawlzal lianpu uh sung ah gophel hon guuk puak zel uhi. Sunkhawl nihvei kinei sek hiven, huai sunkhawl nihna leh a sawtzaw hun pen ah dak gin phet chiang in gophel toh lawmte dainawl lam ah diang pah vitvit in vasa va man thei mawk uhi. Kei siam louh toh teh in bel thupi mahmah uhi. Sawt naikei mahleh, kou neulai hun tan in leng vasa leh gamsa man tamtam kithupi ngaih lai hi.

Kik nawn leng. Ka inn pangkhang lampang ua huandai lam kintak in ka delh a, ka biakinn lampi zotna uh mantu ding a kelkong lianlou ka bawlna uh ka manoh hi. Huai apan awl in vasa hamging leh lengging zaizaite omna lam ka manoh kawm in pilvan ka suah hi. Vasa leh gamsa bengkhate’n na thei mahmah ding ua, vasa leh gamsate’n thawmging zathei mahmah mai uhi. Ka pangkhang lam kelkong uh awl a kaan in, kou innkuan kia zat chih theih khop a neu ka biakinn lampi uh zui in, kun khiukheu zezen in ka gemphei hi. Kou gam leh pa Kamthawn’ gam kikal a kuamah teen nailouhna leh singkung pou linglengna gamawng khat om hiven, vasate huailak ah om in nuamsatak in hamging zaizai maimah uhi.

Puanak bantom silh ka hihman in lampi kawchiktak nawl a loupa leh singnah a om daituite’n ka baan leh khut khawng hon nomsak ua, a hon sukkhak tuung bang in vot mahmah keuhkouh kholdiak hi. Kigingsa leh kikamsa a gophel tawi ka hihman in ka letna khutte bang leng kaap pah thei ding in mansa in mailam ah ka zanphei sim kawm a, ka letna khut leh gophelte teng leng huai daituite’n nomsak nipnep vek hi. Zing vuahzu theu pian simta mahleh phiinlai ahihman in ka lutung khawng leng hong kawt zou a, ka mit tung lak khawng ah leng daitui leh vuahtui kihel neng kai ningneng hi.

Lamnawl a awl a pialkhia in huai vasate ka gemphei zel a, paulou-phunlou leh chiangkang nasan siktan ngam lou khop in thawmging neih louh teitei sawm in ka gem khiankhian hi. Vasa neuzaw tamkhop tawm leklek muh ding om sam mahleh huaite ngaihsak lou in a honpi a gamta a lianzaw vasate mah ka mitsuan den hi. Himahleh huai vasate’n amau ka muh chet ma in hon na mu masazaw ua, a khate uh zaap in lengkhe nainai uhi. Gamlapi bel boh lou in, a pamlam deuh ah ging nainai nawn uhi. Ka phawn nawn a a len mang gaih vek khak ding uh lau kawm in ka kisa thak a, daitui a dim singteh leh loupate awl in ka nawkphei thak hi. Huchi kawmkawm in ka mit tung a daitui leh vuahphinte tui hong takkhe ding a kisate ka khut leh baan a awl a huul kawmkawm in ka gem phei zel hi. Huailai a ka mit hatlai hiven, mitbulh ana bun manta bang hi leng bel dongkholh a nuamchiam khollou maithei ahi chih ka ngaihtuah kik chiang in ka thei hi.

Saulou ka kikhinphei zoh nung in nahpa kawmlak ah huai ka gepgep vasate ana taang lingling nawn ka galmuh hi. Kei leng pilvan theihtawp suah thak in, pai khiankhian kawm in kaap thei pah ding a mansa in ka gophel bang ka lenkip hoih thakthak hi. Kaap di’a ka kisak bawl chiang in lemtang thei lou a, amau vial tawmtawm uh ahih zawkmah toh ngim dek pat chiang in ngimna khek ngai pah zel hi. Kei leng lungkelou in ka pang thak zel a, akhenchiang bang in ngim chenchen in kaap dingdan bang in ka gophel gui ka lai ponpon man zel hi. Himahleh a lemtang thei mahmah kei nilouh hi.

Chikmah a vasa man ngei nailou ka hih toh huai zingkal bel khat beek mat teitei ka ut mahmah hi. Huaiziak mah in man loupi a inn kik ding ka ut kei a, vot sim mahleh ma ka sawn zel hi. Ka lungsim ah mat teitei ka sawm a, huaiziak mah in ka naihphei zom zel hi.

Ka maizawn a awm tan vel ding khawng a saang nahpa lak ah vasa lian huntawk khat taang kawmkawm a om ka mu hi. Huai vasa awm paak ka mu a, khibah bang sim a ngou sim hilhial a om tiktek ban ah “baibek” sang a lianzaw deuh hi a ka theih man in “hehou khi-ok” kichite hi ngei ding in ka gingta hi. Ke’n leng huai ka muh pen mitsuan den in ka tum tintenta hi. A mai lak a om nahpateh khat in hon liah zelzel thei a, vuahphiin nipnipte tui takkhe keuhkeuhte’n huai nahpateh pen dengkha sek ahihman in kisawiling thei zel hi. Huchi in, meizun kaai thithiai lak ah muchian thei taktak kei mah leng ka galmuh thei milmial zel sam hi. A lenkhiak man ding laugu ka hihman in, kaap ek suk mai ka sawmta hi.

Ka gophel letna lenkip thak in, ka sailumtang bang gophel kuang toh kiptak a len khawm in, a gui ka kai tontonta hi. Hong lemtang chet lou thak ahihman in ka khahkol thak a, huaizoh in a vasa pen hong dawk milmial nawn hi. Kintak in ka gophel gui ka lai ponpon a, ka laih theih tan ka laihkaak zoh in ka khah ekta mai hi. Nahpateh in liahtou geih man mahleh huai nahpateh pen kaap pailet suak in vasa awmlak kha hidan in ka thei hi. Ka gophel khah ging za in vasa dangte lengkhe souhsouh ua, huai ka kaap vasa pen tuanna singkung liing in daitui leh vuahtuite kithehkhe sungsung geuh hi. Vuahphit nilouh toh meizun tam lua ahihman in ka mu zui thei nawnta kei hi. Himahleh ka khut tegel in banghiam a thei hi. Ka kaap khak toh kiton in ka khut tegel in banghiam ana thei a, gen theih hetlouh khat in ka khut hong ombit in nuam mahmah in ka thei hi.

Gamlak leh lak lou chihte khual lou in, kipahna lianpi toh, huai ka vasa kaap pen kaapkha hingei a kithei in, a sih ngei leng lamen ka hihman in ka delhphei somsom hi. Singnah leh loupa a daitui leh vuahtui omte paulou a phuphei nungnung in huai vasa tuanna lak ka tungphei lunglung hi. Mu pah kei mah leng tomchik sung in anuai lak ah ka mukhia hi. Kintak a la in, vasa humsam a khai kawm in, ka lungsim ah “ka mat nawn dingleh laamlaam” chi in nuihmaitak in ka en hi. Kipak lua ka hihman in inn tunkik ding kal ngaklahtak in ka om a, vasa dang kaap nawn ding lamlam leng huai hun chet in chu ka gelpha nawn dekkei hi.

Lungnuam leh kipak mahmah kawm in lampi ah ka paikhetou a, huai apan nui heuhau leh lungkim mahmah kawm in inn ah ka pai hi. Vasa leltak mat leng hichitel ana hidan ahi maw ka chi lungsim khonung thak hial hi.

Damsung a vasa mankha tuh kihita peuhmah phot a! Haha...

©Valte Ginkhenpau, 2019.