Tulel India Apan Ei' Tulel Poimoh

TULEL INDIA APAN EI' TULEL POIMOH
~Lawm Tangpua, Pearsonmun
email : This email address is being protected from spambots. You need JavaScript enabled to view it.

lawmtangpua2

I theihchiat mah bang un India gam a tengte nam tuamtuam, tawndan, gingdan kibanglou leh Politics a thuneih kituh leh kituak hetlou te i hi uhi. Deihdan leh muhdan kibatlouh ziaka Vaihawmna innpi(Parliament) na ngawn a khedap a ki dengtuah theite himahleu India dou leh a gam leh mite adia lauhuai, melma om chiangin pumkhat a pangkhawm in, kuamah ngapthoh theih leh phelkhap theihding in om hetlou hi.

Apaita 14th February, 2019 ni in Jaish-e-Mohammad(JeM) pawlte'n Jammu and Kashmir a Awantipora mun a India sepaih(CRPF)convoy te a sihchilh bomb toh a beihna uah sepaih 40 in sihna tuak in tamtak te'n liamna tuak uhi. Hiai thiltung ziakin India a teng kuapeuh lungphawng mahmah in, makai leh heutu lubawk tuamtuam te'n a mohpaih dan uleh tuabang a gamtangte a mawkmai a koih ahihlouh dingdan uh puangkhe souhsouh uhi. Hiaibang a hun haksa leh dou a om hun chiangin gamkhat, vaihawmna khat nuaia om hihna langsak in ngaihdan kibanglou neuhneuh te koihkhia in, khekhat a ding leh pumkhat thei uhi. Congress President leh tulel a India vaihawmna innpi a Opposition leader Rahul Gandhi in J&K a thiltung toh kisai thuthak sai mite kimuhpih in hiaibang a sepaihte tunga hiamgam leh ngongtatna in India mi le sate lungtang khoihkha leh nasak mahmah ahihdan gen hi. Aman a genzelna ah, hiaibang a India phelkhap sawmna lohching ngeilou dinga, India mi leh sate pumkhat suah semsem zaw ahihdan taklang in Party tuamtuam omte'n leng Government panlakna kithuahpih a dingkhawm ahihdan puangkhiakna nei hi.

I tulel Nam leh Gam dinmun et in eilawi leng ngaihdan, deihdan leh muhdan kibatlouh ziakin i sungthu deihthusam banglou ahi chih kuapeuh theih ahi. Himahleh, tuate ziaka poisak neilou, mulkimna bei leh satan vanzat te siksan a i neihsak ding thil lauhuai pen ahi. I khotang i etchiang in, hiamgamna leh ngongtatna in tawp neilou bangmai ta in, kipimang leh ganta banga kithahna in tawp neilou hi. Apaita 13th February, 2019 nitak in Mata khua a om K. Tualkhanlian(55)s/o(L)K. Liankam mulkimhuai tak leh melse tak a thah in om hi. A gawl(throat) tem a aat ahihban ah a zahmoh leng aat-tan sak in om hi. Hiaibang a ganhing tunga gamtatna dinga leng khengval a i chipih/sapih leh i sanggam uh thah a om mai pen poi petmah hi. Hiaibang hun haksa leh poimoh ah Nam heutu tuamtuam te leh mipite'n ngaihdan ki keel-ki zekzek te koihkhiak a, tuabang a i sanggampa uh tunga gamtang te zungkalh a vaihawmna i maituahsak uh kuapeuh mohpuak ahi. Tulel dinmun ah Young Paite Association(YPA) in tualthattu te matkhiak ahihma siluang lakkhiak hilou ding chi'n sun leh zan in Morgue ah phatuamngaitak in ompih uhi. Banah, 15th February,2019 in YPA Ghq leh PTC Ghq makaite'n DC kiangah tualthattu dakkal 24 sunga matkhiak a misi innkuante kianga zangna dopna kilawm huntawk piak ding chih phutna lehkha pia uhi. Hiaibang a Nam heutute panlakna phattham ching in nungthuap poimoh mahmah a, tuate ziakmah in tualthattu zongna leh suina paitou lel ahi chih i thei a, matkhiakpah leng i lam-en ahi.

Hiai banga hinna laksak nunga mulkimna bei leh melse tak a koih mi simmoh leh huham tawpkhawk te gamtatna ahi chihlouh theihlouh hi. Khovel a mulkimna bei tawpkhawk a i theih, Africa lamte leh ISIS te leng hiai sanga uangzaw in gamta tuanlou uhi. Tuaziakin, hiai banga gamtatna mihing kuapeuh in mohpaih a sukbei ding ahi. A Nam thil a ngaihtuah in leh hun paisa te etkik in, Paite nam mi le sate bit in, kuamah muhsit leh ngapthoh te kihilou hi. Hiaibang a i nampih leh sanggampa thuakna tungtawn a chet theih bel, i tulel bouruak hun lemtang a la a, i nam ngamthoh tak a phelkhap sawmte khutnung ahikei ding chih theihlouh hi. Tua ziakin, kuapeuh in hiaibang a mulkimna bei a gamtatna i innsung a hongtung te i nam chouna ahi chih i phawkthak a i kipumkhat poimoh petmah hi. Hiai bang hun haksa leh luangkhawm poimoh laitak a mahni ngaihdan paipih a, engpau leh piaktuam nei a omkha i hih le bel hihna neilou leng hikha ding i hi.

Hiaibang thil deih huailou tawpkhawk eite lak a omta ahihna ah a sukbei eite mohpuak a hihbangin YPA/PTC Ghq te nungthuap a panlak theihna chiat a i lak uh poimoh ahi. I gam India vaihawm tute leh Pawl tuamtuam uliante ngaihdan, muhdan, utdan, deihdan leh hoihsak kibatlouh ziakin kisel, kina mahle uh India phelkhap sawm leh suksiat sawmte douna ah khekhat in dingkhawm theingal uhi. Prime Minister Modi, Rahul Gandhi, Rajnath Singh leh heutu tuamtuam te'n J&K a CRPF si te a tanau te ahihziak hilou, India mi le sa ahihziak ua suun leh a tangkou pih ualeh bangdia ei tawmchik unau, sakhat, namkhat te ki awlmoh lou ding e! Hiaibang hun a pangkhawm siam leh khekhat a dingthei te Nam bit, khangtou leh chidam te ahi. Thil a hoihlou tawp i tuah hun a leng a hoihtawp piangna mun hithei gige ahi chih phawkthak in i hihna ah kikngam, pangngam leh bawlhoih ngam hih sawm chiat ni.