Indongta vai leh i gam gitlouhna (crime)

Indongta vai leh i gam gitlouhna (crime).
By Ginza Vualzong.

Ginza New

Tunai a i gam sung a kithahna mulkimhuaitak thuthang khong i zak chiang in, i lungsim uh phawngsak mahmah mai hi. Hinna kilaksak kia a lungkim lou in, taksa kahiangte bang atkhiaksak hizomah a, hichi bang a khutkha pen gitlouhna nasat di dan suangtuah theih in om hi.

I gam ah avangkim in mulkimhuaitak a kithahna ahih kei leh sihna muh ding leh zak ding om zeuhzeuh hi. Hichi bang kithahna leh sihnate a thattu matkhiak chih zak di om ngei lou sek hi. Hichi bang crime hihte matkhiak hi a, akituahpih gawtna akipiak ngeilouh ziakin, hiai dan lungphawng huai thute avangkim a zakdi om sek hikha maithei ahi.

I gam ah crime dou dingin Police i nei uh hi. Himahleh law & order enkaitu a i neih uh Police zat dan siamlou i hi uh hia, ahihkeileh Policete zattak dia omlou hi uh hia chih ngaihtuah tham ching mahmah hi.

Ei singtangmite thuhoih thupha genna dingin family council, Indongta neite i hi. Huchi bangte i hih ziak un insungmi kisukha ahihkeileh mi khut a sihna i tuah chiang un, indongta level in i genveng sek uh hi. Indongta vai a thil genveng kong khat a hoih mah leh crime hihtu pen akibawl hoihna ding a gawtna leh aki ngaihtuahna di jail hun piak a om lou hi. Hiai bang a migiloute'n a gitlouh man uh thuak kha lou ua, gitlouh a poidan le theilou ua, a sungkuante - a nu leh pate'n sum tampi liau loh uh hi. Huai ziakin i gam ah migilou zalentak a vialvak tam mahmah ding ahi.

Kei ngaihdan in indongta vai zatna di ahih leh tup mawng hilou by accident a kisukkhakna khong hi ding ahi. Tup mawng a kithahnate bel Police mah a piakkhiak hi hen la, a khialpen kibawl hoihna ding in jail lutsak hi leh. Indongta vai a crime i gen veng sek ziak un migiloute a dia lauhna omlou a, thilsia ahih uh tawpsan tuanlou uh hi.

Kholai houlimna khong a chiamnuih a agensek uh lakh bangzah hiam i neih leh mihing luang lak theih ahi a chi uh hi. Hiai in indongta vai a i kihoulem sek uh ngaihnepna mi lungsim ah pia a, mi hinna lak ahihkeileh mi a dia siatna va hih ngaihnepna mi lungsim ah omsak hi.

Huai ziak in tupmawng a gitlouh hihte indongta vai in gen veng nawn kei ni. I gamsung a law & order enkaitu Police khut a pekhia in, Police hih hat ni. A poimoh dungzui in migiloute matkhiakna dingin Police leh District enkaitute pressure i piak uh ei mipite mohpuak ahi.

A langkhat lam ah Policete le mipi in a muan theihna ding ua pan a lak uh poimoh mahmah ahi. Case omte a sui khiak mengmeng ua, justice a kinthei pen a deliver uh poimoh ahi. Police in case sai khe lou a, a om det uh leh mipi in Police muang lou ding ua, Indongta vai mah hong tu kik di ahi. Tua banah Police in case a hoih taka a sai na ding un mimal hiam pawlpi hiam in thuneihna zang a vasukbuai louh ding ahi. Huai ziakin mipi leh Police pangkhawm a i gam sung a sual i dou uh poimoh mahmah ahi.