Lamka' Lei-Man Leh I Dinmun

LAMKA' LEI-MAN LEH I DINMUN
~ Lawm Tangpua, Pearsonmun, This email address is being protected from spambots. You need JavaScript enabled to view it.

4th January, 2019(Sintawpni)

lawmtangpua2

Mihingte khovel a i hongpiang khiak apan poimoh, alou-theilou i taksap omsa ahi. Tuate ahihleh - Nek ding, Silh ding leh khosakna ding mun kichian michih in i neih ngai hi. Kenzaw ka poimoh kei, ka utkei, ka hihzou kei chihtheih mawk hilou a, mihing i hihna tak a i poimoh hizaw hi. Tuaziak in, neklim deuh nekding, silh-teen hoih neih ding, inn - lou buching leh nuam a khosak ding chihte i lungput uh ahi a, ahi ding him leng ahi. Tua, i poimoh te lakah nek-taak, silh-teen te bel a neilou tawpkhawk inleng top-tawm in ngawllou leh vuaktang lou in omtheih hi. Himahleh, innkuan a khosakna ding mun kichian i poimoh vek uleh poimoh pen, tu dinmun ah mi hausa te kia neihzoh ding hong bangta hi.

Eimite a dinga khopi omsun leh khopi pen a i neih LAMKA khua ahi. Eite adingin i khopi himahleh khopi i chihte toh tehkaak theih ding bel hilou hi. Manipur state in District 16 a neihte lak a khat ahi a, mihing 1,74,138 vel omna mun leh innkuan 31, 259 vel te khosakna ahi(2011 census). Ei a mite nek-taak zonna leh sum muh leh bawllam a kiniam lai mahmah in, mundang a nasem a kuankhia a kichawm te i hitangpi ta uhi. Banah, leilung hauhsakna gentham leh etlah ding neilou, haichi leh thilpiang omlou, laklut ngen a kitoudelh te i hi uhi. Pawlam a I poimoh te laklut leh thonkhiak/Kikawm tuahna lam ah Manipur state pumpi inleng a kingakpih top Dimapur lampi (NH-2) leh hunteng a kingakna taklou Imphal-Jiribam Highway(NH-37)te kia in honchawm ahihban ah tuipi kiang(coastal areas)a tengte leng i hisam kei uhi. I gam dinmun hiaibang ahihlai in lamdangtak in lei-man/innmun(land value) sang petmah hi. Tulel a i gam man/innmun man(rate) kibang kim chiah keimah leh bazar leh teddim road zul ate a tangpi in 38ft. X 120 ft. te'n 1 crore hitangpi a, feet square a i hon hisap chiangin Rs. 2192/- bang tungzou mawk hi. Banah, bazar kim leh kiang hilou, veng tuamtuam te ah 35 ft.x70 ft. te 4 lakhs khawng hitangpi a, feet square ah Rs.163/- tungban hi. Gam man toh kisai in Manipur Government ngei inleng State sung mun tuamtuam te a zatna/manphat dan(utility/value) en in a rate ding bikhiah vek hi.Tua Minimum Guidance Value(20th March, 2012) ah ei Lamka(Churachandpur) lei-man(land value) Rs. 20/- ft. Sq. lel ahi hi. Tua i paidan ah bel Government hon bikhiah toh ei rate sun leh zan in kikhia suak hi.

Ngaihtuah zual in ah i thilzuak ding a manphatna sanga manpha zaw/tamzaw tham a zuakthei ihihna ah kipah huai petmah ding hi. Himahleh, tua i genpen 'GAM/INNMUN-LOUMUN' ahihna ah pilvang tuak leh ngaihtuahna saudeuh piak poimoh hi. Thil man(rate) himhim a kaltou/pung baihlam mahmah a, a kiakniam haksa mahmah chih i niteng poimohte man tungtawn te a atheichiang te i hi uhi. I khosakna(lifestyle) te uah sangtak bangin khosa mahleng a tamzaw thamte nektawm zong leh khosa petmah te i hi uhi. Tuaziak mah in, number i theih zahzah piansim a gam man i tamsak mi vantang leizoh ding banglou hi. I paidan i paipih zel leh i gam i chih mihausa 2/3 gam kia a hongsuak thei dinmun ahi. Mi tangpi te'n gentheih-mangbat i tuahni chiangin i neihsun/gou(innmun) lou masuan ding neilou i hihna ah i koihkhiak uh ngai a, tua i hon koihkhiak chiang un a neihnawn ding 'van-a gah' a chihte utoh kibang hi. Tuaziakin, hun hongpai zel ah a tamzaw te i gam mah ah kiteng zou nawnlou ding bang hi. Thilman in tamlam manoh zel bangin tua i rate unleng tamlam hon manoh dinga, huaizah baihlam tak a neizou hong tawm hiaihiai in namdang sumhau te khut ah i gam i koihkhe keiding chihngam huailou hi. Sum tamlam i delhna ziakin i Lamka ah mun bangzah namdang te'n hon neihkhum ta ua chih ngaihtuah tham mahmah. Bitna ngai poimoh in Politics ngei ah leng Constitutional safeguard i poimoh dan uh i tangkou uhi. Himahleh, a sungthu ah i gam mah a teng dia tualniam lua hihtheih ahi. Tuaziak in, i tulel paidan uh i hihna toh kituak a bawllem 'challenge' masapen suak hi.

Mihing i khosakna dan ah taksap, damlouh leh gentheihna tuaklou ding chih omlouh banah, khosakna ah kipalpuk theih vek ahi. Tuaziakin, tulaitak a Hausa banga kilang, innmun-loumun buching leh gam zuak ding neite leng denchiang mah a a zongtu, a leitu a pangkha ding i hi chih phawk ni. Tua hunchiang a eimah in a gah i loh ding 'rate' bawlkhia hihtheih ahi. Kivaipuakna ah Village Authority(VA) neite i hi ua, singtang khota gamman chih omlou a tengte toh vaihawmna kibang a omte i hi uh. I gam a daileng buk bawldia hongpai te i muhleh eilawi in European commode i ngaihtuah lai in a hongpai taktak pen gamlak a daileng mai sangin dailen buk bawlsak himhim ni chihna toh kibang hi. Hiaibang dinmun a i omlai ua lei-man(innmun)gamdang leh khopite toh kibang a aom mawkpen thil ngaihkhawk huai mahmah ahi. Khopite ah bel innmun mantam in nekzon-khosak leng baihlam zel hi. Lamka ahihleh siam leh pilte dingin sepna omtham dinga, himahleh mi tangpi a dingin 'jugali' chihlouh omlou a tualeng mitheih ngah leh tanau haulou te dingin muh gige hilou hial hi. Tuabang khosak haksa kawmpi a iom teitei ziak ahihleh i gam leh khopi neihsun, i inn(home) ahihziak ahi. Tuaziakin, summeet bawlna hiam a ommai hilou, khovel a i gam leh innlum neihna ding omsun ahihziak in a khosa niamtawp inle innmun/gam aneihphak hoih mahmah hi.

Innmun/lei-man a tam thilpoi hingal lou ahi. Himahleh, huai in a hetkhak dingte ngaihtuah louh theihlouh ahi. Eimi tamlou chik, kihou ngeilou leh kimu ngeilou tawpte leng i kisui nai ut ngial uleh pi/pu kichih tuah theite ngen lak a number i theih zahzah uh gen i batlouh hial ding uh ahi. Namdangte sukha leh hetkha ahikei a, eimah hon hetkha ahi chih i phawk thak ni. Tulel i lampi kawchik leh neugawp keeklet ding hoihsa in i poimoh ngaih uhi. Government in hon hihsawm takngial lehleng awlsam lou hial ding hi. A gam a hetkhak dingte'n Lamka rate a compensation kineplouh theihlouh ding, government inlah land-value abawl uh pansan a piaksawm ding hi. Tua Lamka rate leh Government rate tong leh laam a kikhia hizel!

I tulel paidan a lei-man/innmun man sangtak pen mi tangpi hihzoh dia bawllem i deihchiat uh a gingtak huai hi. A bawllem Mohpuakna leh etzuina lam ah enleng DC ding hia? ADCC? ahihkeileh Nam heutute hia? Village Authority? Ngaihdan leh deihdan tuamchiat hongpawt lam-et huai hi. Himahleh, a taksuah taktak na dingin mundang/gamdang khenkhat a innluah/lei ding chianga tualsuak mite toh pawlam mite a piak dan uh, a rate a kibatsaklouh dan ua ei a tualsuak mite niamzaw leh deihsak tangthei leng i gam/inn uah politics hi'n khotang hileh bit ding hihang. Banah, a kisaipihte'n lungsim ah chipih-sapih te itna/ngaihnatna leh gam/nam bubit ding deihna ziaka tawmchik a zuak/piakngam poimoh ding hi. Hiaibang a mahni meetna ding pekhia leh koihkhe ngam a i om chiangin taksuah theipan dinga, dialdial leh diamdiam a hingkhawm leh tengkhawm thei ding hihang!