Tangtung Louding

TANGTUNG LOUDING
By Liana Ngaihte

liana ngaihte

( Fiction maimai ahi, gelh vaal luat a omleh ngaihdamna kon ngen hi.)
 "Tangtung theilou ding ngaihsut gige na in, lungsim ngeina putzia mansuah theih ahi”.

Huaite ziakmah hilou ding amaw lungsim neu leh lungsim kawchiik non chih gige na uh. Ngaihtuahna gim huai pipi kana ngaihsut ziakmah adiam tawl demdum na’n hon tuum gige hi.
Panlading chi’n kal ihon suankhia a, kongkhak bulah dinkhawl guihin, “ kuate hiam hamphatna ding amaimah diam maw” chi’n thazawi takmai in kal kasuan khia hi. Banghiam ihih dek chiangin makaite gin omlouh leh neekguuk taakguukna mahin hon meekton sukzeel abang hi. Ken bawldi teng va bawl mahleng atawpna ah deihsakna mutuankei ning chi hina zeenpi lungliap pipi in vaki hih nuang sam hi. Mahni mit a niin mulou pi’n mite mit a niin kimupah sek hi.

Igam dinmun zaw hichilua hiveh, huaipek apan ibawlthak keileh paidik nawn kenteh kichisek hi. Makai hoih leh hoihlouhnate kithei mahmah hi. Atuam deuh ihon teelching alah, khantouhna ding khopin panla isa zoukei zeel hi. Pathian phawkmi makai dingin ideiha himahleh atamzawte adingin lungtunna a om tuankei hi. Mihing duhthusam nitengin akikhenga, makaite apan kinepna leng nitengin kikheng hi. Hichibang kinepna lungtun huai tangtung ngeilou ding hi. Tangtung naaksangin hiai ngaihsutna in iitna kiamsaka, ken bangchileh hamphatna aguukin kalai suah theidia chih ngaihsutna hong pawtin hazaatna lungtang honglian hi.

“Sakhi apii asanleh anou leng asan” chih danin, eilak ah leng ahoihlam hi’n aselam hitaleh chii tuhsa tampi om hi. Tua idinmun uh khengding, paidan khengding I gengente uh tangtung theihna dingin khang hong kikheng nawnlam ahihkei ngal leh tangtung lou ding hi. Tui luanglai vahei kawi sangin aluang main aluang nading lampi sial masa leng, isial lampi ah hong luang nalou ding maw. Kineek siatna idouzawh chiangun igam – inam adingin bitna, khantouhna, kideihsakna leh diktatna hongom mailou ding maw. Abul apat panlou hanga aleek apan ileh patziaka kileh zial khinvek ihih maimah ziaka buaizel hi’n mu ingh. Pathian lauhna neilouin bel, a mihin pihte iit dingin gintaak huai lawmlawm lou ahi. Pathian laulou heutu nahih ngeingei leh, na nungzui tengteng kawkuak a kiak ding maban ahi. Nang nahoih zaw, napil zaw, natungnung zaw ichih theihma lemna omthei louding bang hi.

Kuapeuhmah in mihing pahtawina sangin Pathian pahtawina mah delh zawlehang hoihzaw ding hi. Nanglehkei panlakna ziaka isepkhiakte ki sialsial keini hang. Nang thilhoih hihte ziaka na damsung leh leitung na nutsiat zawhchiangin kipahman muding hiteh.

Gamdanga sepna hoih pipi sem tampite aw, Kumtawp hunbi uapdingin I pianna gamlei nazuan ua, atamzaw te’n bang ageen ualeh? Maizen!!! Leivui khulua painawn louh ding hi. Mawkmawk huaibang chikei unla, idinmun namit mahmah a muu chinua, diik zawmah lai nahih manun nou loungal idinmun theisiam ding omkei hi. Nang honsuang tute tualniam taka omden ding phal nahiam? Nou banga chitna – siamna neite mahin igam nakep dinguh kingak lah lua ahi. Igam in nesethei ding kisam nawnlou, tungdingtu ding kisam hihang.

Siambang sinte’n igam – inam mah lunglaiah batin hong pang unla, tangtung louding gamlei ah haibang na ngak nung ei. Nou vualtung tuanna khempeuh kou adingin hinna ahi. Kou hinna bel nou adinga tha petu ahihlam ngilh keini.Gingtu diktak inbel asiamtu deihlouh thil himhim ahihkei hi. Toupa Pathian ahi chih theini.