I THILTUAH LEH EITE

I THILTUAH LEH EITE
Lawm Tangpua, Pearsonmun
Email : This email address is being protected from spambots. You need JavaScript enabled to view it.

lawmtangpua2

Tulai Lamka khopi a veng tuamtuam a ganhingte tunga maktak leh mulkimhuai tak a thiltung omtou ngitnget te'n lungsim hihnuam lou mahmah hi. Kuapeuh ateek-akhang, aneu-alian, amei-apa i lung uh a donga, bang/kua thilhih leh sulnung hiam chih kikum in i lunghimoh uhi. I gam leh khangthu a hiaibang om ngeilou ahihna toh, ahiding chetna bangmah omlou a, tulel dinmun ah bel i ngaihdan ah kinga suak hi. Hiai thiltung in ngaihdan tamtak piangsak in mahni chiat a suipawl leh tuate thugen sawn apan ngaihdan leh gingdan neileng tamtak ki om hi.

Hiai tungtang report ki zate leh a lem i muhte tungtawn gamsa khutnung ahiding chihtheih bangsim mahleh ahiding chih chetna a omlou lampang hizaw hi. Ganhingte kithahdan te lamdang in mulkimhuai thei mahmah a, a thahdan leh khoihdan leng khengtou zel bang hi. Khatna ah, a ganhing thahte ngawng-hek/bot tan in a taksa pumpi toh khen in nawse zel hi. Nihna ah, a ganhing thahte sung khuah in a taksapum melse tak in nawsia hi. A thumna adingin ganhing lianzaw a hong kisuantou adiam chihtheih in ui(dog) leh vok(pig) te lamdang deuhdeuh in si uhi. Khenkhat te a taksa mun khenkhat lamdang deuh a sukliam ahihban uah liamna ma neuchik sih-pih leulou pawl leng om hi. Hiai thiltung te kibatna mahmah leh a lamdang mahmah ahihleh thah leh khoih ahihlai un thawm thupi neilou in ahunlai a theih hilou tangpi hi. Banah, ganhing site sisan kangsa ngen hi tangpi uhi.

Hiai thiltung toh kisai thei ut in i sui ua, ngaihdan leh gingtak dan chituam taktak i nei uhi. Khenkhat te'n gamsa gamtatna hiding in i koih ua, khenkhat te'n bel mihing leh gamsa te tunga thilhih theihna neite sulnung hiding in i gingta leuleu uhi. Google khawng ah i thiltuah toh kibang zong in i gam a om ngeilou  Ganhing chikhat(ui toh kibangsim) te sulnung ahi chipawl leng om ki om veve hi. Bangteng hileh, thiltung sate i mu in i theita ua, ngohding leh a ziak tutna ding i beidong uh chih a chiang hi. Ganhing site taksa leh kithahdan te apan bang ganhing peuhmah hiding hiam chih dotna liantak ahi. A kithahdan leh sihdan te uh mulkimhuai in mihing leh gamsa khutnung ahihtheih na tawm mahmah hi. Bang gamsa hong gamtang hitaleh leng tuhun a i kim leh kianga khosa ahihngai ahi. Himahleh, tuabang gamsa mel leh puam mukha omlam zak khak hinailou, a mu-sim omkha te leng muhdan kibanglou vek hilai hi. Gamdang apan zanhun teng a hong taitung in hong gamtang zual chihte lah thil omthei hilou ahihna ah, pom in pomkei taleng thil lamdang, mulkimhuai leh mihing/ganhing tunga thilhih theite nasep hikha ding hi.

Veng tuamtuam ah YPA Unit te makaih in duty om vingveng a, hiai in patau leh mangbang a omte khamuan ahihna ah kipah huai petmah hi. Government lam inle panla in gan si-te test abawlna leh a thiltung namun etchetna a neihna ua gamsa khutnung mah ahihdan puangkhia hi. District Administration ngei inleng mipite pataulou a omding a anget banah suizuina pailel ahi chi hi. I pompih kei chihna hilou in i theih dia poimoh mahmah bel, Government in muhtheih louh thilhih leh nasep theihpih mawklou ding uhi. Sabeng mite 'Sa-mit' a ahak zel bang un, tua goverment lamte mohpuakna bel gamsa sulnung suahsak teitei ding leng ana hikha ding hi. Ngoh ding, gen leh sak a tam tham ding, himahleh a hichet theikei mahleng mihing leh gamsa khutnung dinga gingtak huaina neu petmah hi.

Hiaibang a thiltung lamdang i tuahlel te eilawi in banchi'n i la a, i ngaihtuah hiam chih thil poimoh mahmah hi. Hiai toh kisai in kupnop leh poimoh sak tamlou te enkhawm ni. Apaita June 8, 2018 in Assam a Karbi Anglong District veh a zin Abhijit Nath, engineering graduate leh tulel a Guwahati a sumdawng lel leh Nilotpal Das, Musician leh event manager te mipi thangpai hon in naupang pimangtu dia muangmoh ziakin vawlum uhi. A khonung in a vawtute mat ahi uh himahleh, ngoh-khelh a om leh mohna neilou maban lim meltak nei tuailai nihte hinna lakkik theih hinawn tuanlou hi. Tulai thiltung te ziakin kuapeuh i hamhaih a, Satan bia i chihte gamtatna ahih gingta tamtak leng i om uhi. Denchiang a aziak ding beidong leh thangpai a Satanic i sak te tunga theihkhelh gamtat theih ahi. A ziakbel, satanic i chihmawk te mi tangpi theih hilou ua, kuahiam mi tuamdeuh a kichei Satanic sak ziaka thuaksak theih ahihna ah pilvang poimoh mahmah ding hi. Kuahiam setan be dia i gingtak, i etkhiak om leh leng ak-lu a bohtan lai hiam, vok khuak a neklai leh sisan tawplai tuakkha zen i hihkei leh kuama'n khut khakei leng pilvang huai mahmah ding hi. Assam a thiltung bangmai a hehngoh leh tangpaih ziaka mohna nei hetlou te tunga gamtat khelh ding i veng gige ding ahi.

Nihna ah, hiai thiltung toh kisai in November 3, 2018 in Chiengkawnpang te'n a khosung uh Pathian min toh Siansuahna a na neita ua, tutan bangmah thiltung huaiselua theih ding om tadih lou hi. I theihchiat mahbang in hiaibang thiltung huaise tak, gamsa leh mihing sulnung sangmah in mihingte tunga thuneite gamtatna ahih gingtak huai mahmah hi. Tuaziakin, veng tuamtuam a duty i paipih kawmkawm in Lamka khopi a Saptuam pawlpi tuamtuam te kigawm khawm in Lamka khopi Siansuahna bawl in mahni chiat in ki velthakna in zang leng a phattuam ngei lam-et huai mahmah hi. Thiltung te ngaihtuah in salam sangmah a kisikna diktak toh Pathian i naih a, khalam galvan toh douzawk ding a na hikha ding hi.

Thumna ah, tulel i dinmun uh et in lungkham huai petmah hi. Tawmchik te himahleng Politics leh khotang a ki melma vek, hoihna sanga siatna ding ki deihsak zaw leh mahni angmasial te ngen i hi uhi. I Nekzonna leh summuh dante genbei tamlou ding hinapi Diktatna midang adia tangkoupih leh mahni kipe mawnglou te i hi uhi. Numei-Pasal thangtatna leh khamtheih in hon zelsuak in phaktawp tungta! I tulel dinmun et in i maban uh mulkimhuai mel mahmah a, tua i tuah dingte hilhkholhna(sign) leng hithei lua hi. Huaiziak in, i thiltuah te tungtawn a mahni chiat in kingaihtuah thak in kisikna toh Pathian bel leng ahun lai leng hikha ding hi. Kuamah thugen kingai khia a zuite i hikei ua, mahni pil leh dik kisa te Pathian in hiaite tungtawn a thuhilhna leh theihsakna honpia hikha ding hi. Tunitan ah ganhingte tungkia ah gamtang lai a, mihingte tung ah hong kisuan kei ding chihtheih hilou hi. A kikhelma in, kingaikhe tuahlou te himahleng mahni chiat in kingaihtuah thak a Pathian lam nga a ngaihdam theihna lungsim toh lampi dik leh tang i zuih i mohpuak ahi. Huchi hileh i innsung, khotang, sahkhua leh politics hong nuam in chidam ding hi. Mi kuahiam i ngaihdam dingte'n ngaihdamna a phu(deserved) leh poimoh ziak uh hizawlou in ei mahni lungsim a muanna leh tawldamna ahi i poimoh uh. Huaiziakin, kuapeuh in i thiltuah te pawng patauh a lau mailou in mahni chiat kibawlthakna dingin zang phatuam leng thil huaisia leh mulkimhuai tak tuak banga i kingaihsut pen i gam leh eite bawlthak tu suahthei i hi. Kuapeuh in thil a se-tawp i tuahkhak ale a hoihtawp piangsaktu hithei ahi chih phawk gige kawm in mahni a kibawllem tuakte leh hoihzawkna dinga kalsuan chiat dingin i kideihsak a tuate hamphatpih ding eite mah hihang!