MANIPUR’ MIHANGSANTE

THE PATRIOTS OF MANIPUR
--------------------------------------
MANIPUR’ MIHANGSANTE
by
Dr Tualchin Neihsial

tualchinneihsial

Manipur in Manipur gam leh leitangh huutna len veenbitna dia hinna phal a hangsantak a pang a,gam-le-minam sihpih ngam mi bangzah hiam a neihte lak ah “Mihangsante’ Ni”[Patriots’ Day] ci a ni khat a minvoh biik uh toh kisai in Manipur aa dia mihangsan kholdiak a a koihte uh ahihleh Bir Tikendrajit,Thangal General, Paona Brajabasi,Niranjan Subedar,Jamadar Kajao Singh leh Chirai Naga cihte ahi deuh diak uh hi.
Manipur gam leh leitangh humbitna dia Mangkaang gamkeek kumpi douna a makai leh madawk Bir Tikendrajit leh Thangal General khailup a om ni uh, 1891 kum, August 13 ni theihgigena in Manipur in Patriots’ Day [Mihangsante’ Ni] kumteng in thupitak in zang gige mahleh,huai ma lam in mihangsan 3-Subedar Niranjan[1891 kum,June ni 8 in khailum ua,Jamadar Kahao Singh pen 1891 kum,May 25 ni in khailum ua,Chirai Naga bel 1891 kum,Ocotober ni 13 ni in khailup in om hi.Hiai mihangsan khailup a om lou,mihangsan 22 dangte bel damsung suangkulh taang diing in Manipur gam polam ah thohkhiak in om uh hi.


1. Bir Tikendrajit
Bir Tikendrajit Signh i cih Meitei Leeng[Maharaja] Chandrakirti Singh’ tapa ahi a, a nu’ min ahihleh Chomtham Chanu Kousasawri Devi ahi. 1859 kum in Tikendrajit a piang hi. Naupang neucik ahih a kipan in sakol tungtuan leh gaalvan zang a gaaldoudan kisin a lungluut pah hi. Sahang bet a lungluutna leh a kithalawpna lam ahihman in kum 16 ahih in a khut a temsau tawi in sahang liante maituah in a kisualpih ngam hi. Sahang tampi a thahna ziak in a pa’n sahang bengtu cihna min “koireng” a khusak hi. Kum 21 a upa ahih kum in, Naga Hills Expedition ah Manipur Political Agent, Johnstone, zui in a kithuahpih hi. Manipur Political Agent a hong kuan Grimwood’ zi Mrs Ethel ST. Clair Grimwood in a laibu gelh “My Three Years In Manipur” ah,”...feet 5 leh inche 8 lel in a din a sang a... mit-hah kilawmtak nei leh mi nuihmaai pu hi. Polo a kimawl lai a et a nuam. A tha a hat mahmah a, gam sung a mihatpen ahi ciin Meiteite’n a hon hilh uh” ciin Bir Tikendrajit tungtang na gen hi.
Laibu sim lam ah Tikendrajit lungluut khol kei mahleh Bangali leh Hindi bel siamtak leh naaltak a pau theihna diing in kisin hi. Manipur Political Agent Major W.McCulloch a kipan in Mikaang pau kisin mahleh a siam theih louhna ziak in a tawpsan hi. Manipur Political Agent dia hong kuan masa leh kuan nanungte na doubawl leh nanbawl mawk pen in phattuamna tun lou hial diing ahi cih a theih ziak in na lawmbawl in ana kithuahpih zaw hi. Grimwood in nakpi in Tikendrajit kithuahpih lou hileh Surachandra a hawlkhezou kei diing hi.

2. Thangal General
Thangal General kici Thangal nam a kipan,Thangal khua mahmah a piang ahihman in Naga nam himahleh Hindu sakhua a zuihna ziak a,Meiteisuak ahi ci in Nagate’n gen uh hi.Meitei laisiamte’n bel Meitei mah ahi a,Ningthoujam beh,a pan’ min Kangabam Kshetri Singh ahi a, a nu’ min Thokchom Chanu Puinu ahi a ci uh hi.1891 kum a Mangkaang Gaamkeek kumpite’n Manipur hong busim a, a hong luhkhiak dek lai ua Manipur gam leh leitangh huutna a hinna pe ngamte lak a khat, thugen siam leh vaihawm siam mahmahte lak a khat hiin kigen hi. Assam Chief Commissioner, Mr Quinton, leh British officer dangte thahna a kigolh leh Mangkang kumpinu’ tung a gaalbawl ci a ngoh leh siamlouh tansak a omna ziak in, 1891 kum, August 13 ni nitaaklam in Imphal kho laizang a om Polo Ground ah khailup in om uh hi.

3. Paona Brajabasi
Paona Brajabasi i cih Meitei Leeng Gambhir Singh’ hunlai a kipan a minthang ahi a, a pa’ min Kangabam Kshetri Singh ahi a,a nu’ min Thokchom Chanu Puinu ahi. Paona Brajabasi i cih Manipur gam leh leitangh huutna a mihangsan penpente lak a khat ahi hi. 1891 kum a Manipur gam luhkhe dia Kawlgam a om Tamu a pan Colonel Presgrave makaihna nuai ah Mangkaang sepaih hong kuante pen Paona Brajabasi makaih in Meitei gaalkap 400 in Pallel kho kiang a om Khongjom mun ah nasatak in nana dou in nana nang mahle uh nangzou lou uh hi.Hiai mun a kidouna om ziak in “Khongjom Gaalpi=Khongjom War” cih minvoh ahi hi. Hiai hun leh mun mahmah ah Paona thah in hong omkha hi. Manipur sepaih a pan a sepna pan tawlkhawlsa[pensionsa] himahleh sa-le-gaal makaih dia sapkhiak a om dungzui in gam-le-leitangh aa dia sisan leh hinna na piate lak a khat ahi hi.