Pupate hun a pan a na minthang Rih dil

PUPATE HUN A PAN A NA MINTHANG RIH DIL

By Muamuan Tawmbing

muamuantawmbing

Indo-Myanmar gamgi zul a om, Pupate hun a Mizoram a ding a Dil lianpen kichi sek (a kitheihdan), hilele Burma (Myanmar) a om Rih Dil pen i pipute'n "misikhua" (misisate' kha paina) chi a " zek" a ngaihna mun uh ahi kichi hi.

Nidanglai in i pi-le-pute'n huangvulh-ganta te hiai Dil pan in na lakhe sek uh kichi hi. Hiai Dil ahihleh Mizoram-Myanmar gamgi a om Zokhothar apan simtum lam Km 3 vel gamla Rihkhodar kichi Kho kiangnai a om ahi kichi a, hiai Dil tanchin ah thiltung mak pipi leng na om hidan ahi.

A HONG PIANDAN:

Nidang in hiai mun pen mualvum/ tangtung a om hi a, Dil na vung kha ngeilou hi. Rih kichi thumal ahihleh Pawi nungak melhoihtak khat ahi a, a nunawn (a nu nihna) in bawl genthei lua ahihman in, a sanggamnu toh loulam ah nasem in koihden a, a sanggamnu'n a U ann ding va galpuak thoh zel hi. Nikhat a unau un dangtak-sawlsam gawp om uh a, a U in a nau dangtak siding en ngamlou in " Bawi, lungkham ken, hiai mun a Dil a hong vung di ka hi" chi'n vaikhak a, huchi'n a kithumna bang in Gulpiteek in Dil suaksak petmah in hong vung petmah hi kichi hi. Unau ki-it petmah uh etsakna ahihman in tua Rih Dil pen Saapte'n Love Sign a chih uh Itna etsakna lim (❤) meelpuak zia in om sese ahihban ah, a dunglam 3 km Sq, availam 1.5 km vel in lian kichi hi.

RIH DIL A LAMDAN BIIKNA:

1. Hiai Dil pen Pianken Dai ( Natural Fencing) 3 in a dandan in uumkual hi; A masa tuizul ah Muisum pian in uum kual a, anihna ah phaipheek kung pian in uum in, a danthumna ah Apple kung pian sing chikhat in uumsuak hi.(Hiai Dil umna singte mundang ah kisuan hing zoulou chise se uhi)

2. Hiai Dil pen Tuivapi chikhat in ngak uh a, a Dil nawl khawng ah tuithasek uh hi; huai atuite i lakkhakleh i theihna(sense) teng mangvek kichi hi. Etsakna di'n huai tui(egg) tawi a innlam zuan a a chiah chiang un a kipatna mun uh mah tungkik zel uh chihdan ahi.

3. Kumkhat sung in Dil kitoh/nit hun omzel a, kuahiam in tua Dil tui pen bottle khawng zang in innlam ah pua bang hitaleh, huai Dil nit hun in tua a tui puak pen leng a koihna munmun ah na ni'n zel chi uhi.

PUPATE NA SUUTDAN:

Rih Dil gaal tumlam (Mizoram) ah Tang dung sangtak (Hrillang Tlang) kikhung a, khangluite'n, misi' khate'n khovel a paisan taktak ding chiang un hiai Taang a kipan Leitung hon gal-et a, khelah leh ngai a a kah zoihzoih na uh ahi chi uhi. Tua zoh chiang in Myanmar leh India gamgi a luanglut Triau (Chiau Lui) hon kantan in, huchiin Sahnu in Hawilopar (Nungkiklouh Pak) na khiah in misikhua (tua Rih Dil) ah paipih vengveng uh chih ahi.

Hiai pen Tuitaw Gaal hun in (French) te'n a thuukdan na teh sawm in, saipi bangzah hiam vaklutsak mahle uh a suakta omlou in, amau mi bangzah hiam in sihloh uh kichi. Japan Gaal inleng Japan sepaihte'n JCB/Dozer zang in mual vuhvang a Dil sung a tui Khahkang a sawm uleh Dil sung apan Gulpi samnei dingtou in mi 2 in na sihloh ua, na tawpsan kei uleh na sibei lai ding uh chia a theihsak ahihziak un khawlsan uh chi in kigen hi.

TUNI TAN AH

Tulai inleng khalik teng in hiai Dil ah thil kilang muhtheih om zel chi ua, Khua amui nakleh Kawl Sepaihte'n kuamah a om ding phallou in mi sawlkhe tawmtawm uh kichi hi. Kawl Kumpi in Tax lakna leh Venbitna nuai ah hiai Dil zuun-le-enkol ding in kineih bawl (neitu hihna tang) uh a, nektheih/dawntheih chituam tuam zuak in, foreigners tel in vehtu tampipi om gige zou chi uhi. A Dil gaal mualtung ah Buddhist Pathian lim kivel (mould), atung a Gulpi lem kibawl muh theih om a chih ahi. Hiai Dil pen amun ah dup gingen in lang a, a gaal ah bel te sialsial leh tuihing/green colour hileh kilawm in lang zel thei a, i etna a gamlaat leh nai zil in kibanglou chi uhi. Hiai Rih Dil pe'n Mual bangzahhiam in umkolh tangtung a om himahleh, a kimveel teng Tuilou bawl theihna vek hi a, Rihkhodar khote neekmuhna munpi leng ahih ban ah, hiai Dil khawlmun ah hiai Rihkhodar khua kisaat hun leh khosaatte min kituangsak in, tua ah ei pi-le-pu, Zomite min muhtheih omlai hi chi in na kichiamteh hi.

NOTE: Pi leh Pu-te hun apan a i nazaak uh, hiai Dil toh kisai gendan leh theihdan tuamtuam theihpih sam in, a mun hohkha i om leh leng a tanchin sui a theih utna toh i omna ding ngaihsutna neikawm a hong kigelh ahi hi.

~Muamuan Tawmbing