VAPHUAL

User Rating: 5 / 5

Star ActiveStar ActiveStar ActiveStar ActiveStar Active
 

VAPHUAL

By  Thangsuanlian Naulak, Grant Recipient, Rufford Small Grants


I gamsung ah haih vualloh in sing leh lou, leh gamsa hih tawm hiaihiai ta ahi chih achet theih hi. Tuchiang inah khovel pumpi ah hiaite poimohna thei in kepbitna naa Government leh NGO tamtak te’n sem uhi.

India ah Kum 1894 British Sorkar nuai ah amasapen ding in First Forest Policy Dr. Voeliker malak na nuai ah puak khiak in om a, huai ah gammang(forest) kepna pen gamsung masawnna (well-being) dia zat ding, huaiding in gammang pen tuilou dia keklet phal leh mipi poimoh te gammang apat deihbang a lakphal leh hiaite banah gammang apat siah(revenue) tam theibang muh di chih khongte ahi. Kum 1952 in 2nd Forest Policy India Sorkar in hon puasuah nawn uhi, huai ah gammang apat gan an, sing-at, sing khuah, leh a dangdang te atam theilam apoimoh banga puak suah ding, gamsa kepbit ding, gankhoi te gammang a khah zan louh ding chih te khong atangpi ahi. 3rd Forest Policy kum 1988 inah hong kipuasuah nawn in, huai a tup pipen ahih leh gammang kepbit (conservation ­- “to ensure environmental stability and maintenance of ecological balance”) ding chih ahi pen mai hi. Gammang toh kisai ah hamphatna/muhkhiak (economic benefits) pen a nunung a koih di chih ahi. India in gammang kepbit na di toh kisai dan aneih te India Forest Act, 1927 leh Forest (Conservation) Act, 1980 chih te ahi. Huchilou in gamsa kepbit na di toh kisai in Wildlife (Protection) Act, 1972 anei hi. Hichibang in India sorkar in gamsung ah singleh lou kepbitna ding in panla tou nilouh hi.

Eilawi hih tawndan ngaina mi ihi ua, Vaphual (hornbill) bang National bird tuk a ngaih leh i nam ading etsak (symbol) nei mahmah vasa ahi. Huai ziak mah in Vaphual lem hih pawlpi tuamtuam in logo ah tuang sak in, leh amin mahmah bangle i namsung ah literature khong ah leh pawl min ding a akizatna tam hi. Etsakna in, zogam.com, Paite Tribe Council, Zomi Artist Association, Phualva times leh Hornbill Cable Network ten a logo uah Vaphual lem tuang sak ua. Phualva Times leh Hornbill Cable Network te bang Vaphual min apat kila sawn ahi. Literature tampi ah le Vaphual akizatna tampi om a, abik in la pau ah ki hah zat hi eg. phualva dungsun/phualva bang itna. Tutung Zomi Namni a kum 70 chinna lawm ding in iki sa ua, Football tournament ngial uah mascot ding in Vaphual i zang uhi. Vaphual hih “part and parcel of our cultural identity” chileng i khial kei ding hi. Himahleh atak in Vaphual kepbitna ding a pawlpi khatmah in pan alak lam kithei nailo hi.

2017 kumsung a Guite road leh Tipaimukh road kawmtuah in Thanlon bial sung ah study kava ki bawlna uah Hornbill chi 4 va kimu a, huaite ahihleh Phualpi/Phualtak (Great Hornbill), Vaphual (Wreathed Hornbill), Vahai (Oriental Pied Hornbill) leh Vakhawpi (Brown Hornbill) te ahi. Government record ah bel Phokngang (Rufous-necked Hornbill) leng om kichi hi. India ah hornbill chi 9 om lakah i gam uah chi 5 om chihna suak hi. Phualpi/Phualtak mei hih jangtalam khong a kizang leh eilak ah pawlpi tuamtuam in logo a atelsak pen uh ahi.
WhatsApp Image 2018 02 18 at 1.12.04 PM

Photo: From top left clockwise (Phualpi, Phokngang, Vakhawpi, Vaphual, Vahai). For Representational purpose only.

Nikum in Lamka leh asehvel ah school tuamtuam ah naupang pawl 9 leh 10 te lakah survey aki bawl na ah mi 588 lakah vaphual 35% chauh in atak in mukha ngei uhi, huailak 76% ten mi matsa (captive) mukha uhi. Hiai in i gam ah Vaphual zat hih kibeng nak mahmah ahih chih hon musak hi. Huaibanah naupangte lakah 73% ten vasa beng mi theih nei uhi. Hiai in i gam ah vasa ki beng nasa mahmah ahi chih hon thei sak hi. Dawngtute lakah 78% ten vasa bengte gawtna/gam (penalized) hoih sa uhi. Naupangte lakah 99% ten Vaphual zat hih igam ah kepbit poimoh sa ua, huaibanah 95% in gamsa zat himhim kepbit poimoh sa uhi.

Hiai atung a survey kibawl na apat khangthak ten Vaphual zat kepbitna pat poimoh sa uh ahi chileng ki gen khial lou ding hi. Sapte ngial in Vaphual zat hi “Farmers of the forest / gammang a singnou suante” chi hial uhi. Hiai omzia chu Vaphual in singgah anek chiang in a tang te tha khe jel a, huaikia hilou in mun gamla pipi tuah ahihman in mun tampi a singnou phawi chihna suak hi. Study aki bawlna apat Vaphual zat himhim a khosak/gamtat na mun uh hi khosung apat km 7 sanga tawmzaw lo hi. Lou haichi akhoih loh kia hilou, asa le sum muh hial na dia thamlo hi. Huaibak ah Vaphual lu bang a tak sangmah in gamlak ah a om i muh leh kilawm zaw uhi. Huaiziak in summuh na dia etlah tak ahih loh banah ei pawi khoih khalou vasa ahi.

WhatsApp Image 2018 02 18 at 1.12.16 PM
Photo 1) Phualpi_Mongon khua 2) Vaphual_Bukpi khua 3) Vakhawpi_Kaihlam khua 4) Vahai_Thanlon khua

Bangtan hiam paita a Chingpi kap toh kisai survey abawl na uah Churchandpur mi hih chingpi kap dia kuan khia tampen achi uhi. I gamsung a gamsa kepbit ding gen phak louh, mundang a kuan khia kihi zaw mah lai. Nikum December kha in lawmte toh vaphual endi chi in singtang khua khat ah ka kuan uhi. A gamtat na mun ua en dia ka kuan uleh a kap dia kuan te paina lampi bang ngil vetvut zozen, lou lam aki tot gige na mah ban. Vaphual tele hai lou ahih ciang ua kou endia ka kuan ua ana ki hem mang khin daih ta uh. Phiangsan!!! Huaikia hilo in khua Hausa khenkhat Kani/Poppy ching phal le tampi ki om hi. Hiai kiching na munte atangpi in Zo lam (munsang/mun ki dawhlehlou neihna dia gamla) hitang pi deuh hi. I khawtang adia thil deih huai lo ahi banah hiai munte hi aki vat ma in gampi khong hideuh tangpi ahihman in sing lianpipi (mi nih leh thum kawi zawh) te zatna ding om taktak lo in kiphuk hi. Vaphual te ading a gamtatna mun uh ahih bakah ah khosung a tui kila lut bang le hihbuai khathei hi. Aziak ahih leh atangpi in singtang ah tui aki zawl te munpi/kipatna kha springwater (leinuai apat tui pawt khia) hitangpi a, huai te recharge area (leinuai a tui te kikhol khawmna theihna dia aki lak na munte) khah munsang/khokhung lam/zo lam khong ahih man in singkung omlohna a lei in tui ahip dizah a hip theilo in lei nuai a tui hong tawm in huchi in khawsung a tui kai pen atam di bang a tam lou chih bang om thei hi.

Lui enta le, abik in Lamka sung a lui I chih te gentak om nawn lo hi. I gam ah mahni angsung khualna lian mahmah in mipi van (common property/resources) te mimal in i deih dan chiat in ki zang thang hi. Tuivai leh tuima hih tu lel dinmun adia lui lian a i neih uh ahia, himahleh tudan a pai touh lehbel kum 20-30 sung a mel lamdang zou mahmah ding hi. Hiai luidungte hih kep siangthou leh kepbit tuak mahmah hi. Vahai leh Vakhawpi te gamtatna mun ahi a, alui pangtuak metre 100 tan bang a singphuk ding hiam ahihkeh tenna/lou dia zat pholloh dingin kham na bawl theile, a lui siangthouna akikembit ding a, gamsate tatna mun kepbitna ahihding banah tunung chiang a iki sak theihpihtham hong hiding hi.

I khosakna akibat louh ziak in, Singtangmi thouthou din le atual niam deuh le ki om a, amaute adin khosak haksat ziakin gamsa kap chih te leh gammang apat sing leh lou lak phallouh bikbek ichih sak thei kei hi. Himahleh khovel kikheng zel ah i nek zawndan leh khawsak dan a kibang den a om chih hithei lo ding hi. I kim leh kiang a hinna nei sing leh lou, vasa leh gamsa te poimoh dan thei a kembit ding in Civil Society, Philantrophic organisation, political organisation leh khua hausa te’n pan lak tuak mahmah hi. Vaphual kepbitna ding a panlak theihna ding in Vaphual zat himhim kap leh anou khawi dia lak chihte kham in huaibanah a singgah nek te innsing ding ahihkeh sing-at ding in lak kham hileh tuban kum 20 chiangin singtanglam bangle imitkha/ngaihtuahna a om bang in vaphual zalen tak a gamta muh theih a om ding in ka lam en hi.

Tulai in abik in Lamka leh asehvel ah airgun zang a vasa beng kithang mahmah hi. Hiai hi etkai ahih keileh denchiang a i ngaihtuah phaklouh pi a siatna - adverse ecological effect ban ah ihihna uh i.e. cultural identity mansuah theihna tan lampi hon tun thei ding hi, huailou inle naupangte et ton dia thil chin hoih loupi ahi. Wildlife (Protection) Amendment Act, 1991 dungzui in va-ak (House crow) chih louh vasa peuhmah a sumdawng(trade) kham ahi. Eilawi hih i gentak sa mah bang in tawndan ngaina mi ihi ua, huaijiak mah in sa mat (hunting) bangle iFundamental Right tuk in kingai hi. Himahleh nam khangtou ihih ut leh gamsung hauhsakna te kepbit poimoh ahihdan thei in huaiding in thathak la chiat ding in kisa ni. Sapte’n “Change is the only constant” achih mah bang un, eilawi hihi i lungput uleh i khawsak dan uh I khek tuak uh tampi om ding hi. I cultural identity leh core values te uh kephoih (preserve) leh zat touh theihna na ding un eilam apat le kipiakzoh (sacrifice) banah i nekzondan ule ki kikhek (evolve) ngai ding a. Kum 70 paita in tu, tem leh thau zang in nek ki zong a, tuchiang inle atamzaw in huaite mah kizang lai hi. I gam uh Biodiversity hotspot a sim telkhakahihna ah Eco-tourism potential lianpi kinei ahihman in i gam sung sing leh lou te kembit peuhmah leng denchiang a kisik lou hial ding ihi. Vaphual in pan ni awle, lawm!

Laigelhtu:

Thangsuanlian Naulak

Grant Recipient

Rufford Small Grants

(Note: Hiai laigelh hi 2017 kum a Delhi Paite Indongta toh pangkhawm a awareness campaign/school visit apat data ki kaikhawm a gelh ahi.)

WhatsApp Image 2018 02 18 at 5.03.06 PM

Photo 1Vahai nupa a kua di avel lai uh (Kaihlam)

 

WhatsApp Image 2018 02 18 at 1.12.37 PM

Photo 2 Vahai nou lakna bang (Bukpi). 1)A kung kitan na bang 2)A kung kipai sau mahmah 3) Vahai kuahawm

WhatsApp Image 2018 02 18 at 5.08.32 PM

Photo 3 Kaihlam apat khe a pai Mualnuam tung di kuan

WhatsApp Image 2018 02 18 at 1.12.44 PM

Photo 4 Mualnuam Convention English school Library ah awareness campaign

 WhatsApp Image 2018 02 18 at 5.18.52 PM

Photo 5 Mualnuam Kua a poster kitak

WhatsApp Image 2018 02 18 at 1.13.02 PM

Photo 6 Pamzal JB School ah Calender hawm

WhatsApp Image 2018 02 18 at 5.11.43 PM

Photo 7 Sing-at bang (Diameter Feet 6 leh inch 11)

WhatsApp Image 2018 02 18 at 5.12.00 PM

Photo 8 Sing-at te buk bawl pansan a gam giak na mun

WhatsApp Image 2018 02 18 at 1.13.21 PM

Photo 9 Sinzang khua ah Calender hawm khia

WhatsApp Image 2018 02 18 at 1.13.43 PM

Photo 10 Tuivai lui (tuima toh a kizopna)

WhatsApp Image 2018 02 18 at 1.13.35 PM

Photo 11 Wildlife week 2017 a team te leh poster kitak khia toh lim kilakna