Phualpi Nasem Uliante leh Politiciante Thuneihna

User Rating: 0 / 5

Star InactiveStar InactiveStar InactiveStar InactiveStar Inactive
 

PHUALPI NASEM ULIAN TE LEH POLITICIAN TE' THUNEIHNA
Politician te Dan(Law) tung ah om

By: Muamuan Tawmbing | This email address is being protected from spambots. You need JavaScript enabled to view it.

Muamuan Tawmbing

Politics huang ah Civil/Central Service sapsap ding in IAS leh IPS te'n dinmun neikha se uh bang hi. Hiai officers te ahihleh i gam dinmun et in leng political godfathers chih theih ding khop a dinmun poimoh luah hilai uhi. A omdan bel, politicians te'n a lungtup uh a mualsuahna ding ua a vanzat uh hoihpen hi ua,  tua officers te posting na ding thu leh amaute a dia bitna ding tanpha in kizopna hoihtak nei uhi. Huchibang a Civil Servant/ Officer khat in huai a Politician pa hiam ahihkeileh a Boss khat mai etna a dan toh kituak lou nasep (illegal Activities) va hihsak chih pen i gam a paidan ahi hi. Tua bang officer te pen adam sung ua koltaang hilel uh chihna a hi ua, lah nuse theilou, ahihhang a paikhawm a nungta khawm theilou (can neither leave them nor live with them) ding khop a Political Power in i officer te uh power henchip ana hi hi. Political interference toh kisai in Central Services malakna in issue tampi omkha mah inte, ahihhang in tuabang a Central hiam, State hiam apan Officer tungtawn a vai om khempeuh te ah politicians te deihdan ahihlouh chiang in Politician te' poimoh louh mi suak uh a, a zattheih ding mi mah uh a zon uh kul in,  kithuahpihna ana pelou mawk thei lai uhi. Tua te khawng in transfer and posting i chihchih zong om sak thithe in, sepna mun a sem mumal manlou in kisuansuan mai, office a Pending issue tampi kibaang loh chih bang om baihsam mahmah ding hi.

Tua Officer sapsap te lak ah  SP or DM or Commissioners i chihte zong guhbawk pi khat ana hiden uhi. CM nangawn toh tangtak a kithuzaak theihna dinmun poimoh len hi uh a, Politician te toh zong line hoihtak nei ding uh chihna hi. Aziak bel amaute nasep uh leh dinmun pen uh i Politician te hat leh hatlouhna dia poimoh pi ahi hi. Hitamahleh DIG, IG or Commissioner/Secretary chih khawng a dopsang ahih chiang un a poimohna uh kiam a Politician te ading in zong phamoh nawn vaklou zel uhi. Amaute order petu leh control tu DC, SP leh DM i chih khawng hiven ah, tua lubawk IG, ADG leh DG kichi kuama theih ngellouh leh poimoh sak luat louh state capital ah zong tampi om dia, amaute bel a lubawk te chihchih sem a, dik leh diklou chih hilou a Order semkhia hilel hong suak uhi. IAS officers te zong Secretary khawng hong ngah tak chiang un Glorified Babu suak lel uhi. A omdan bel, Central Service a dinmun a sang deuhdeuh leh khotang Politics ah dik leh tang a vaihawm ding thil haksa chihna ahi. Dinmun sang teng Politician te ukna nuai a om ahihman un, om detlai a utleh Politician te toh a ton khawm a, a ki humbit tuah uh poimoh chihna ahi hi.

I theihna dan in Civil or Central Service apan a mohpuakna tang te ading in neekguukna leh taakguukna ding mun omlou chih ahi. Hitamahleh amaute ading in lampi khat omlai hi, tua bel Sum meet bawlna ding a Dikloutak or dikloutak a na sem dia kuahiam phalna leh consent pia a nasep (illegal activity or allow the illegal things to go on to make money) chih dan pen amau ading a zuih tambiik hiding in um hang. Tua diklou tak a thilhih pen in lauthawng sak ahihman in Office a pawtkhiak natan ua leng theihkhiak ahih a mat khak ding lau uh a, risk laa tuk a om hi uhi.

Theihkhiak a Matkhiak ahihlouh tawp un a nasepsak uh a huangsung ua thil tung te in thu gen veve a, a reputation uh 80% sia chihna himai uhi. Dan in a phallouh khat sem dia kuahiam phalna pia a, huai apan sum meet mu uh hita tawk leh leng a sum te a Innlam a, Gou leh gam lei a, Car lei kichi ching tam utlou zel ding uhi. Aziak bel vigilance action or CBI or Income Tax raid chihte maituah thei gige uh ahihman un huai in a damsung career uh suse thei ahih banah Suangkul bang zuut a hinkhua zattheih ahi hi.

Kumteng in a sawm a sim top civil servants te awk gige uh a, mipi nautang theih phaklouh kheel in a thuneihna huang ua dan toh kituaklou gamtatna te ah theihpih tu ana hisek uh ahihdan theih ahoih hi. Huchi a neekguukna khat a tangtak or mi tungtawn a hong kidiah chiang un ihmu theilou leh lung nuamlou in om uh a, a guuk mah in ki honkhe toutou uhi. Zuau khat gen ziak a zuau mah a ki siam tan touhtouh ngai chih bang dan in a kiseel guuk nading un a guuk mah ngai ahihman in Neekguukna (Corruption) i chih "ONE WAY TRAFFIC With No U-Turn that results in tragedy" chih theih mai hi.

Hiai a pan a muhtheih bang hihiam i chih leh Political Power in Central Services te ukkhum ahi chihna ahi. I gam ah Eimi mahmah DC, DM, SP nei teltul mah lehang, i politics phual a ding in a siamna uh leh pilna uh mawltak a zatsak hisek uh chihna ahi. A Pu te uh thuthu mang a, seelguuk ding leh mu zenpi mulou dia zonsak chihte a zohnaak uh leh a posting na ua bit himai ding uh a, huchilou ahihleh omna mumal neilou dia suan kualh thithe hilel sek ding uhi. Huchibang ahihleh bang ahia i poimoh kin uh? Civil Society power? Political Power? Central Service power?

Ei context a i etchiang in Bank hi in Administrative offices te hitaleh Eimi mah i tudim phial uhi. Hinapi in Social Worker khawng kihah poimoh mahmah mawkbi chih chiang in tuabang a eimi sapsap te'n sem top in bangmah leng veina nei lou a hong tutop, amipi te uh ading hamphatna leh thu kipahhuai omte leng luikhe lou a, vakan thithe ngai chih hitel ahih chiang in I central service neih un Gam leh Nam itna niamsak a, mipi te veina leh awlmohna sukiam a mahni gilpi ading a zaleenna lel ana hi eive chih muhtheih in om hi. Eimi a tut tamsem leh Eimi officer leh mipi kibei hilel zel hi. Hiai tengteng thuneih a, ngawng heek tu i Politician te Thuneihna leh Civil Society te thuneihna himai hi. Huaiziak in bang chileh Political power kichian tak nei a, a zat ding bang tak a zattheih ding ahia chih siut tham ching hi. Educated Politician mah maw or DC, DM, SDO, SP, etc te a sepding bangtak uh semsak thei dia Phalna leh thuneihna pethei te chih ngaihtuah tham ching mahmah sak in om hi. I Political power heekdan a dik ma teng laisiam in officer tampi nei mahlehang hong dik thei ngeingei lou ding hi. Aziak bel i omna gam pen Political power tungtawn a ki ukna lel ahihman in thukin ading in huiamah pibawl ngai hi. Mahni innkuan te gilvah ta leh uh zong i mipite gilvah khatheilou ahihman in i vaihawm dan uh khektuak tampi na om lawtel ahi chih phawk thak deih huaiba, i Power tawite uh a zatdan i siam keh i gam siatna a Guuta lubawk kihilel ding a, khatveini tei paihkhiak leh mualphou a ki om thei ahi chih theih ding in hoih hi.

(Hiai thugelh ahihleh Civil service huang a luut hoihlou chihna leh discourage nadan hilou in, political power toh a kizopna uh hithei hi a i theihte taklatna leh huai apan a poimoh bang hi a, a diklou kipatna bang hihiam chi a bawldikna ding mun phawk thak deihna a hong kiluikhia hizaw hi. Kuamah mimal kawk tuam a om kei a, i dinmun teek toh kituak kha i om zenzen leh a phatuam lam a lamai ding in i kicial ahi.)