Ngaih aw... Selung Na Liap Lou Aw...(Part IV-VIII)

User Rating: 0 / 5

Star InactiveStar InactiveStar InactiveStar InactiveStar Inactive
 

paumuanlalguitePART IV

Ka ann huan ding teng ka zoh in ka nupi’n luui lam ah tuitawi ding in ahong sawl a, ka buckette uh biakinn lam a zat dia hong la gai uh ahihman in tuithei a ka puak angai maimah hi. Lampi khawng a mi hongpaite’n hong en ua, tangval khat seng a tuithei pua a tuitawi chih hong muhchiang un a nuih uh za mahmah in hong nuihsan ekh-ekh ua, ka zum mahmah mai hi. Huaiteng genlouh naupang hon lampi dung a omte khawng in mihai tuka hong ngai in hong na kou in hong na tawng zawmah uhi. Zum mahmah napi in kei hihding banga ka ngaihtuah mai ziakin poi bel kasa lawkei hi. Himahleh thilnuam chu ahi hetkei, gentheih huai kholdiak mah abang hi.

Ka tuui tawi ding ka ngah in ka nupi tawh Lalboi Krismas sa ne ding in a kuantou nawn ua, keibel a kuan dia sehkhak a ka omlouh man in inn ah ka papi lupna ngak tutpih a gilkialtak a ka om mai angai hi. Window apan in mi ann ne ding a kuan souhsouhte kamuh chiang in ka gil hong sukial semsem a, ka neulai hinkhua bang ka phawk thakthak a, tu ka tuailai a nop ding hun laitak a hichibang a ka om mai poi kasa mahmah mai hi. Alehlam ah milak a ka kihel louh bangleng kei adia nuamzaw a batna aom lehlam hi, aziakbel I lawmte’n puan thak sitset hong silh ding uh, kilawmtak a hong om ding uh, huaite lak a kei ka nasep puan sawpsiang lel tawh kava om ding bangleng khanvualte en na leh zumna ding phet ahihmanin.

Ann nezou hong tung ua, ka gilkial mahmah napi in ann hong tawi uh ka kinep hetlouh manin kava en tuankei hi. Himahleh ka nupi’n hong sam a, kava pai leh “Muanpu, hia ann khalkhat om, meh kong tawikha kei ua, chi tawh meh mai inla, na kham phetchiang in kuang leh bel teng sawpsiang inla kemsiang vek aw…” hong chi hi. Ka gilkial law mahmah ahihmanin ken leng pautam lou in ka la a, chi tawh ka meh hi. Ka gilkialluat manin lim kasa mahmah thou a, himahleh kam thum khawng ka baak zoh in hong bei a, ka gil avah zou mahmah kei hi. Himahleh gilvahlou chih ngam ding vual ahikei, kam thum hong tawi bang uh leng a hampha lua kahi chih ka thei a, kipahna in ka sim veve hi. Ka neek zoh phet in kenleng kuang ka heem a, ka um leh beel teng uh ka nawtsiang hi.

Ka man phet in kei leng kisak ngal a leengkhawm dia Chingte tot touh ngal sawm in ka room lam ka zuan pah hi. Himahleh ka nau Lalboi in “Umuan, lui ah ka kisilna ding tuui va tawi aw…” chi’n hong sawl a, ka lin mahmah mai hi, himahleh seel a nial vual ahihlouh manin ka va tawisak pah hi. Phalbi lai ahihtoh khua vot mahmah ahihmanin ka tui tawi zoh in mei chihthak in Lalboi kisilna ding tuilum suansak ngai zawmah a, ka lungsim kinawh tawh sana ka en-en mai hi. Chingte in hong na ngakzou mah de aw chih khawng kia ka ngaihtuah a, ka muh utluat tawh ka khasiat bang asuak zawzen hi. Ka manphet in kintaka kisa in Chingte te inn lam ka zuan toupah hi.
Chingte in hong na ngaklah gawp ahingei ding a, a gate uah hong na ngak hi. A kiang ka tun phet in “Umuan, na hehpihhuai ngei, na hinkhua kong theisiamlua a, nang thu a paithei hileteh hong kingaksak hetlou ding na hih dan ka theilaw mahmah a, huaiziakin kisuanglah hetken aw…” hong chi a, kenleng “Ching, hi thamtham e..” chih teng a dawng in lengkhawm ding in ka kizuikheta uhi. Leenkhawmna mun ka tuntun un ka luutsuakpah ua, khosung nungak leh tangvalte ana kimkhin diimdiamta uhi. Kou leng Chingte tawh a nunglam deuh a ka tu ua, ama nitak a ka tutkhawm louhtang un ka tukhawm khata ua, ka kipak mahmah mai uhi. Ka lasak khawm tunglai utawh teh in chu ka kilamdang mahmahta uh, ka aw uh bang kituak diak khawng bang kasa a, nuam kasa mahmah mai uhi.

Sawtlou ka tutkhawm nung un Upa pa’n nungak mi nga singpi hawm dingin hong sehkhia a, Chingte leng a samkha zawmah hi. Poi kana sagu mahmah mai a, amah tawh tutkhawm a laa sakkhawm ka ut mahmah a, hong theisiam lou uh bang kasa zawzen hi. Chingte pawtkhiat nung ka tutdan lah alem nawnkei a, ka lasak tha leng suaklou in tut in ka tut thoh a, lawmte amau nungak chiat tawh tukhawm a laa sakhawm kamuh chiang in enhuai uh bang kasa a, hampha sawnsawn uh kasa mahmah mai hi. Bangziaktak a ka utlouh lamlam ah omkha ka de aw….. Pathian in ka thumna hong dawng lou hi inteh maw peuh chi in kei leh kei bang, Pathian bang ka mawhsa kha thepthup zel hi, ka gentheih luat manin.

Huchia leengkhawm a ka omlai un khosung heutute khat hong luut a, “Muanpu na om aleh hongpai in, thu poimawh khat aom a..” hong chi hi. Kei leng thumangtak in kava pawtkhe pah mai hi. Khosung heutute ahihna uah ka zahtak mahmah a, a nungnung uh ka zuui hi. Lampi ah bangthu ade aw chia kan ka ut mahmah a, himahleh ka kan ngamkei a, paulou in a nungnung uh ka zui hi. Huchia bangtan hiam ka pai nung un innkhat ah hongluut pih ua, singpi-tuilum khawng hong dawnpih uhi. Kei bel ka gilvah hetlou ahihchiang in lim kasa mahmah a, ka guuk kipah mahmah mai hi. Singpi khawng ka dawnzoh un hong pawtkhiatpih nawn ua, kholai lam ah hong paipih uhi.

Huchia saulou ka paizoh un Community hall ah hong luutpih ua, lamdang kasa mahmah mai hi. Pasal khat hongpai a, ka khut hong khihsak a, ka mai hong tuamsak mawk hi. Ken bel athu bangmah theilou kahih chiang in heutute chih dandan in ka om hi. Thakhat in ka nunglam apan ka nungzang singkhuah in hong khen ua, nna kasa mahmah mai hi. Athu gen chih lah omlou in hong zep ek-ek mai ua, na salua kahihman in ka mittui luang in hong luang hi. A tawplam in khat hong pau a “Na nupi puanza na guuk koi a zuak e?” hong chi phut mawk a, lamdang satakmai in “Ka nupi puanza e? Ken ka theih khaklouhpi, ka gu mahmah kei heutute aw…” ka chi hi. Himahleh na guk mah ahi chi’n hong ngoh teitei ua, zep petmah a hong zep uh ahihmanin ka chi teng a dup gai a, ding leng ka ding thei nawnkei hi.

Zingkhua hong vaak a, kholaizang taka khuam khat ah hong khih ua, ka ngawng ah “GUTA KA HI” chih hong taak sak ua, lampi a hong paisuk hong paitou teng in hong en ua, hong nuihsan tawh, hong engchih tawh, kampau kilawmlou taktak in hong chi uhi. Ka zum law mahmah a, himahleh ka dikna thu hong gensak ding kuamah ka neikei hi. Khuam a kikhih kawm in Biakinn a lapawlsate thawm bang ka ngai a, ka mittui a taakkhe zungzung mai hi. Naupang khenkhat hong tai in chil peuh hong phih ua, hong phih khit chiang un Guta pa chi’n hong kikou khum zaizai uhi. Ka lungsim ah pasal khat hisam inga kei leh kei kitoudelh ka sawmta dia, ka papite inn ka pawtsanta ding chih khawng ka ngaihtuah hi.

Huchia bangbang hiam ngaihtuah a ka omlai in Chingte, Mercy leh Thangpu hong pai ua, Chingte in “Umuan, puanza va gu maw? Leenkhawmna mun khawng ah hong puang ua kei ka lungsim nalua eive,” chi’n hong pumkawi a, hong kahkhum tamai hi. Kenleng “Ching, mite theihdan in Guta pa himahleng Pathian theih in zaw neuchik leng guuktak na ka neikha kei ding.. bangkim Pathian in thei nave..” ka chi hi. Ka lawmteng thum in hong soisakna uh khawng hong etsak ua, ka chiteng dup gai banah mun khenkhat ka si pawt ahihmanin a hihtheih dandan in hong hihsiangsak uhi. Numei tegel genlouh ka lawmhoih Thangpu nasan in hong en a, kideek zoulou a a mittui hong nuul keuhkeuh chiang in ka khasiat hong suak semsem a, kah khiat ek-ek a pha ding hileh kah khiat bang ka ut zawzen hi.

Sawtlou nung in hong paisan ua, khosung heutute hongpai nawn uhi. Alak ua khat in “Tu tantan na van zuakna mun genlou lailai ding maw” chih tawh ka biang hong betsak a, ama a hong soisakna sa uh ahihtawh naa kasa mahmah mai hi. “Heutute aw, gu lou hial kahi, hong khah mahmah maive ua, na hong ngaihkei ualeh leng I khosung uh ka pawtsan na ding..” chi’n ka ngen a, himahleh ka ngetna hong ngaihsak ut khat leng aomkei uhi. Kei bangbang a hichi lawmlawm a bawlsiatna ana tuakkha a om diam maw chih khawng ka ngaihtuah a, ka nu leh pa’n hong dampih keileh leng sanggam pianpih khatbeek neileng hong hehpih a, ka kiang a hong ompih ding om ding hia maw….chih louh gen ding bangmah ka theita kei hi.

Ka zum tawh, hong soisakna ma te uh nat tawh haksa kasa mahmah mai hi. Huaiteng banah mi kou teng tuak, ann na ngawn zing leh nitak a ngolhsak a ka om manin ka gim mahmah mai a, ka tha bei in ding leng ka ding zou kei a, hong khihna mun uah ka tusuk hi. Himahleh ka tut ding phal ahikei a, ka tutsuk chiang in zeep a omzel kahihmanin ding zoulou sasa in ka ding a, ka lungsim in hingzou nawn ding in ka kingaihtuah nawnkei hi. Haksatna, bawlsiatna hiaizah innsung a ka tuah nung a, tua kholai a khosung miteng muh a hiai bang ka tuah manin poi kasa mahmah a, ka lungsim asuna sawnsawn hi. Hak leng hoihtak a hakzou ka hi nawnkei hi. Himahleh kihalhsak sawm a hak teitei in ka daak khiat leh ka gaal lam ah Chingte leh ka nau Lalboi lengkhawm dia kuan kiton ka gaal muh kha geih zawmah a...

PART - V
Ka lungsim in Chingte nangzaw ka lungsim suna tu ding lel nahita ve maw ka chi hi. A lehlam ah, kei lah tagah genthei banah mi simmawh, kingakna ding leh suan ding himhim neilou kahihchian ka nau Lalboi tawh kiteeng le uh kei tawh a kiteen sangin nuamsa zawsam lou ding hia chih peuh ka ngaihtuah hi. Ahitazongin ka lungsim in phal thei mahmah lou ahi dia, ka thuaknate a nat lam leng ka phawk nawnkei a, soisaka ka om sang in leng Chingte tangval tawh kizuui ka muh in ka lungsim hongsu na zaw hi’n ka thei ahi. Hichibanga bawlsiatna tuaklou hileng vualte englou a Chingte tawh nuamtaka leengkhawm ding hi inga ma…… tunlah bangkim a kikhelta. Kum khat sung adia hiai bang a kipahna hun pentaka hiai bang ka tuah hi vangsiatna sawnsawn kasa mahmah hi.

Dakkal khatvel zoh in Chingte tawh ka nau Lalboi ka kianglam zuan in hong pai ua, ka en ngamkei. Ka nuailam nga in ka kuunsuk hi. Thakhat in ka lu hong kikai tou a, ka etleh “Ka vaksa ua hiaichia phata chin a nang ka van uh ana gukhe zawmah, zumna dan himhim na thei hia? Na itpen Chingte kei a ahita chih thei in aw…” chi’n nuihsan tawh Chingte kawi athuah a, ka mai mahmah a Chingte kawi in a pawtkhiatpih nawn hi. Hiai bang mel mu ngei ding a ka kikoihlouh manin ka lungsim tei a dawt mah abanga, ka thuaksiam thei hetkei hi. Chingte lah ka mai a tangval kikawisak ngei himhim ding in ka koih hetkei a, lamdangsakna tawh khasiatna in ka dimta hi.

Ni tum dingkuan mualdawn ah hong san chiichiaita a, hong khah khe dekta ding uam chih khawng ngaihtuah in hong khahkhiat ding kal uh ka ngaklah mahmah mai hi. Huchihlai in heutute bangzah hiam tawh nupi thum ka kianglam zuan a hongpai ka mu a, hong vaw nawn dek uh hi ding chi’n ka lau mahmah mai a, et leng kana en ngamta kei hi. Ka kiang hong naih hiaihiai ua, ka diip kua in ka chii khawng hong liing gawp hi. Hong vuakna sate ulah na law mahmah lai ahihchiang in hong vuakbeh lai le uh bang ka chi thuakta mai diam maw chih khawng ngaihtuah in ka om a, ka lusung khawng sa vutvut hial hi’n ka thei ahi. Ka kiang hong tung phei petmah ua, thuak ding sa a kikoih kahihman in atunglam nasan en ngam talou in ka kuun ngiungeu mai hi.

Heutute laka khat in ka kikhihna hong phelsak a, kipaklua kahihmanin “Heutute aw, ka kipaklua, ka thuakgim lawta, hiai bangteng tuak hita kahihchiang in zotna ding mun ka thei nawnkei a, ka nu leh pa kivuina haan ah hong kha un aw..” chi’n ka ngen hi. Himahleh kuaman a hong dawng hetkei ua, mi nih in ka liang tuak a hong leen in hong paipih uhi. Ka khe in kal asuan zou kei a, ding leng ka ding zohlouh manin puak in hong puak thohmai uhi. Huchia bangtan hiam ka hongpai nung un ka kho hausapate uh inn ah hong tonpih luut ua, ka lungsim in hong soisak beh dek uh hia, ahihkeileh khosung apan hong nawhpawt sawm uhia chi’n ka ngaihtuahna a buai mahmah mai hi.

Innsung ah bench tung ah hong lumsak ua, numei nih in hong zeepna munte khawng uh tuilum in hong zuutsak ua, nat toh nuamsak ka thuah hi. Hong bawldan uh lamdang kasa mahmah mai a, lungbuaitakin ka kingaihtuah nilouh hi. Huchia ka buai mahmah lai in heutute khat ka kiang ah hongpai phei a, “Muanpu ei, heutute’n thil kanchian masa hetlou in ka hong soisa kha ua, na thuakgim mahmah banah zahlaktak mai in kong na bawl kha uhi. Tun thuchiang a kitheita a, na nupi puanza gutu nang nahihlouh dan kitheita a, na tung ah ka kisuanglah mahmah mai ua, hehpihtakin Pathian min in hong ngaidam in aw…” chi’n mittui luangkawm in hong gen hi. Ka kipah tawh ka khasiat tawh gen ding mel leng ka theikei a, ka mittui in hong tuum pah hi. Atawp in ken leng “Heutute aw, kei bel hong ngaidam ding a mansa gige ka hi. Mihing I hihman in bukim omlou ihi a, hihkhelh omthei tham mah ahi, ka theisiam a, na tung uah khasiatna bangmah ka neikei. Nong huatman uh hilou in khotang hoih ding na deihluat man uh hizaw ahi..” chia ka dawng leh a k
ipak mahmah ua, hong enkoltu nupi tegel nasan kideek zoulou in a kidiik huphup uhi.

Ka puannak neih sunsun hong zeepna ua segawp ahihmanin hong suahsak ua, hong khuisak in hong sawpsiang sak uhi. Kei bel ka liamna ma te khawng nalua ahihmanin ka dingkhe zou nai vetkei hi. Nitak leengkhawm bang ka ut mahmah a, himahleh a paizou ding vual ka hikei hi. Leenkhawmna mun ah “Lalboi nu puanza gu a ngoh aom Muanpu pen a gutu hilou a, theihkhelh ziaka kisoisa leh zahlaktak a kikoihkha ahi, a gutu taktak pen Mangpu, Lalboi lawmhoih ahi. Tun Muanpu a liamnate ziakin thoukhe zoulou in Hausate inn ah alum a, kuapeuhmah in thumna ah phawkchiat ding…” chia heutute’n va puang uh ahiding a, leengkhawmte singpi dawn khawlhun in ka tuailaipih tampi hong luut nainai mawk ua, lamdang bang kasa a, kana kipak petmah a, ka lungsim anuam mahmah a, ka natna bang dam huai zawzen in ka thei ahi.

Ka mit ka taikualsak pah a, Chingte hong paikha de aw chi’n ka guuk zonzon mai hi. Himahleh ka mu hetkei a, ka nau Lalboi nasan omlou ahihmanin anih ua kizui uh hidi’n ka muangmawh pah a, ka lungsim khat a nuam hetkei hi. Ahitakin Chingte kei tawh gentheitak a khosak ding ka ngaingam kei a, mangngilh mai ka sawm den a, himahleh ka lungsim ah omlua ahihmanin ka mangngilh zoukei a, ngai deuhdeuh mai hi’n ka kithei ahi. Huchi kawmkal ah lawmte khenkhat bang in “Muanpu leng Chingte hongpai leh zaw tua lumlai bang tu tang zou ding hia…” chih peuh in hong chiamnuih ua, nuihza kholkei mahleh ka kinuisak zelsam hi. Huchia lungsim nuam hetlou a ka omlai in gintak nawn hetlouh nung in Thangpu, Mercy leh Chingte hong luut guih ua, ka mit hah bang lamdang huai hi’n ka thei zawzen ahi. Lawmte hong chiamnuih bangin ka thoutou kha zawzen mah a, hong chiamnuih in hong ot khum zuazua uh ahihmanin ka zum mahmah mai hi.

Chingte sun a Lalboi tawh hong bawldan uh khawng kisuanglah mahmah ahi chih amit hah in ka mu ngala, naih leh hong naih ngamlou genlouh et leng hong en ngamkei a, ka itpen kisuanglah leh nuam sa hetlou a om ka muhchia’n ka hehpih petmah a, va pai a va pom ekmai bang ka ut tha asuak zawzen hi. Achang in hong enzel a, huchi’n anuailam nga in a kuun zel hi. Ka lungsim in “Ching nidang azaw I kimuh chianga nuihmel tuak hanga, tukhawm a nui khawm gige hi hanga maw, tun zaw a kidangta ngei…” ka chi hi. Hausapu in “Tuailaite na hong hawhkhawm kheukhou ua, kipah etsakna leh Muanpu tuahsiat siatbatna ding in singpi leh sang kong liau ding..”  hong chi a, kipak in a awng zuazua mai uhi. Tuailai laka heutu deuh leh hong theisiam mahmah khat in “Hausapu kiphalna etton huai mahmah a, Tuailai tengteng sik leh taang in kipahthu ka gen a, huaikawm in Miss Chingte in singpi hong awm henla, kipak a dawnkhawm chauh hilou in damna dia dawnkhawm I hizaw mah ding uh..” hong chi hi. Chingte singpi awm dawnkha ding kahihmanin ka kipak mahmah a, ka lungsim aguuk nuihnuih maita hi.

Bangtan hiam zoh in singpi leng minta a, Chingte in hong awm ngal hi. Hausapu pe masa dia a kisak leh hausapu in “Na Umuan na piak masak pen ding ahi..” chi’n keilam ah hongsawl a, kei leng tutou in saang di’n ka kisa hi. Chingte khut hong liing a, ka mai mahmah hong en kilkel hi’n ka thei a, nervous tawh kisuanlah thuah ahingei dinga, hong singpi piak ladia kisa anou bang hong sukhia a, mi hong pai khawmten hong nuihsan zaizai uh ahihmanin ka zum tuak mahmah uhi. Huchi’n nou khat ava lathak a, hong pekiik nawn hi. Ka itluat ziak hia, ka duhluat ziak hia, hun dang a ka singpi dawn tengteng saang inleng lim kasa zaw a, nuamsa gawp kahi diam damlou ka hihlam bang leng ka kiphawk khanawn hetkei hi. A chiamnuih bawl tawh, a houlim tawh ka hulum mahmah ua, mi genthei ka hihlam himhim leng ka kiphawk kei a, ka nu leh pa hong sih san nung ading a haksa thuak himahleng nuam ka sakni mahmah khat hiding in ka um hi.

Singpi khawng ka dawnzoh un tuailai lamte zanhak ding chi uh ahihmanin leenkhawmna lam zuan ding in hong kisa kheukhouta uhi. Ka aam mahmah mai a, omlai le uh kachi vungvung mai hi. Himahleh khaam theih ding hilou ahihman un kipahthu gen in mangpha ka baan khak hi. Hong paisan gai ding hita unteh chi a kana lungkham mahmah lai in Thangpu, Mercy leh Chingte in hong tutpih lai uhi. Hausapu in “Thangpu, na lawmpa uh ana kithuahpih lai unla kou ana lumphot nung” chi’n a lupna lam hong zotsanta hi. Kou lawmta ki-it diakte kia ka omta ua, himahleh gen ding thei leh apau masa zaw ding omlou in ka ki-entuah luakluak uhi. Atawp in Thangpu in, “Muan, hong bawldan uh paw siam hetlou hiveng aw, kong simmawhna hi zenzen lou in, na tagah ziaka na nupite hi’n khosungmi khenkhat hileh hong simmawh uh salua kahi…ka lungkim kei law mahmah..” hong chi hi. Himahleh ken “Thang, huchi zenzen lou e, I tung a tung bangbang puakdan siam ding ahi, ka thuakna bangbang a hong thuakpih nahi uh chih ka thei a, kei kipaklua kahi..” chi’n ka dawng thuk hi.

Huchia ka houlim nilouh lai un Chingte leh Mercy ana kideek zoulou ahi ding ua, ana kinuul nilouh uhi. Amau mittui hong luang hial chiang un kou lawmta zong ka kideek zou tuansam kei ua, ka vek ua kikawi in sawtkhop ka kikahkhum nilouh uhi. Huchi’n Thangpu kia “Lawm aw, Pathian I muang ding ua, nikhattei eileng mite en a ki-om ding ahi” chi’n ka kihehnem tuah nilouh uhi. Ka genbeh a “Ki-it kingai lehang leng nungak tangval teng leengkhawm ding chih ahihmanin leenkhawmna innlam va zuan nawn phot unla, damleh zingchiang in kimu nawnni hang..” ka chi hi. Thangpu inleng “Himah e maw Muan, lungnuamtak in ana lum inla, zingkal chia dam in kimu nawnni aw..” chi’n pai ding in hong kisata uhi. Himahleh Chingte in “Uthang, Mercy tawh ana pai mai un, ken Umuan kong tut zanhahpi ding..” chi’n utlou a, Thangpu inleng “Ching, huai na chih theihleh na UMuan inleng nuam sa tuam mahmah ding eimahve” chi’n Chingte a paisan uhi.
A paizoh nung uh minute 10 mahmah a pau omlou in ka tutna tuak uah ka om uhi. Atawp in Chingte hong paiphei a, ka lukhung ah hong tutou in ka natna ma te khawng awl in hong zuutsak hiauhiau a, nuam kasa mahmah a, ka natna ding leng om nawnlou a bang zou hial in ka thei ahi. Tuilum peuh hong zaan suansak a, ka taksa dupna teng khawng hong zuutsak a, ka kipak petmah mai hi. Hiai kana hong it a hong enkol zou aom de aw chih khawng ka ngaihtuah a, sun a Lalboi tawh hongpai ua hong bawldan uh kana puaknatna tengteng bang leng a bei zou dimdem hi’n ka thei ahi. Chingte in tuilum a hong zuut zawh in a pheitung ah ka luu hong koihtou a, ka sam awl a hong zuut sak hiauhiau kawm in “Umuan, tusun a ka omdan nong ngaidam theidiam? Na hong ngaihdam leh na lungsim a om bangbang hong gen in, na chih bangbang a om dia mansa kahi…” hong chiphut hi.

PART - VI
Lamdang bang kasa zawzen a, gen masak gen nanung ding himhim bangmah ka theikei hi. Awl in Chingte mai ka entou a, “Ching, na Umuan in zaw chiklaipeuh in nang a ding in ngaihdamna anei gige ahi. Himahleh amah mi genthei-tagah, iittu leh panpihtu ding bei ahi a, aman zaw hong ngai petmah a, nang omlou in leng a om theikei, ahitazongin hichibanga mi genthei ading in na nu leh pate’n a tanu hawmthoh uh hong phal uh a gintak huaikei a, nangleng awl a taisan thei nahi a, a khonung a amah ading a lunggimna leh ngaihtamsialna lel asuak diam maw?” ka chi hi. Chingte inleng “Umuan ei, na hong ngaidam a ka kipak petmah. Himahleh na theih ding a ka deih chu itna in khentuam a neikei a, itna mitdel ahihmanin neih leh lam, hauhsaknate  a mukei a, itna in genthei-tagahte a haw kei a, amau ading in a kipe zaw hi…” hong chihkhum a, dik kasa a, ahizong gen ding dang ka thei tuan nawnkei.

Ka lungsim a buai mahmah zel a, ka ngai mahmah a, amah tellou a hinkhua zat ding ka ngam himhim kei, ahi alah kong ngai chi in va dawng phut leng akhonung a kei a ding a gentheihna maimai ahizaw diam chih bang ka ngaihtuah a, ka lungsim kisual tuahtuah ahihmanin geen ding ka theikei. Atawp in “Ching, hong it hong ngai ka hihdan na theihsa ahi a, gen beh ding tuan ka theikei, kong ngailua. Himahleh keisang a hoihzaw, pilzaw leh siamzaw hong ngai tam mahmah ahihchiang in mailam hun ah kei ading in lunggimna lel hong tun ken aw…” ka chi khong hi. Huchi’n Chingte in ka luu a khut a hong kawi belh in “Umuan, daaltu a tam ding a, thu leeng tuamtuam leng a tam ding chih I theihsa ahi, himahleh mihing daai kuaman kaai zou lou ahi…” chi’n hong dawng tei hi. Ka lunggulh leh ka deihpen gige tangzou a taangtung khat suak ka hihman in ka lung akim in anuam mahmah mai hi. Huchia nuamsataka ka kihoulim sung un khua hong vaak man a, kikhelahtak in ka kikhen uh hong ngai nawnzelta hi.

Kei leng halh deuhta banah pawtkhe zouta kahihmanin hausapu kiang ah hoihtaka hong etkol uh kipahthu ka gen a, huchi’n ka nupite innlam zuan in ka paisuk nawnta hi. Lampi ah ka kingaihtuah suksuk mai a, ka nupi’n a puanza kei guuk ahihlouhdan theita ahihchiang in kisuanglah mahmah ding a, nidang sang aleng hoihtaka hong bawl zaw ngeita ding ahi chih ka lamen a, lungsim nuamtak mai in kapai suk hi. Lampi bang ah mi tuamtuam ka kituahpihte’n nidang sang aleng hong hehpih zaw leh hong muhoih zaw thamtham uh hi in ka thei a, huaiten hong kipaksak mahmah in ka hunpaisa a ka tuah haksatna tuamtuamte hong mangngilhsak zou hial hi. Nidang a a nuihmai nasan ka muh ngei hetlouh tampite’n hong muh uh chia’n a nuihmel uh hong langsak ua, huaite ziak in ka kipahna alian tuan mahmah mai hi.
 
Inn ka tung in ka luutpah a, innsung ah kuamah ana omkei hi. Lamdang kasa sim a, “Nupi…koi a om uh e? Hong paita keive..” chi’n ka nupi ka sam pah hi. Room sung apan in ka nupi hong pawtkhia a, “Nang mihing milak ah hong suzahlak na mahmah chia maw, Hausate inn ah va teeng denve, ka kep ka khoi utlouh banga hausate inn a va ki-etkol sak, inn aleng hong pai nawnlouh a, va teeng det ding eivele..” hong chihkhum a, hong hangsan gawp hi. Lampi a ka ngaihtuahna tawh chu a kikhai mahmah mai. Inn ah heutute’n hong koih uh hileh hiai sanga etkol a omlou zaw thamtham ding kahihdan a theihluat man ua hausate inn a hong koih uh lah ahingala. Lampi a ka kipahna, ka nuihna tengteng inn ka tung leh ka kahna luankhi hongsuak maimahta a, haksa kasa mahmah mai hi.

Huchia ka nupi tawh ka kihou lai un ka papi room sung ah thawm ngaihtakmai kaza ua, ka kihoulam uh leng phawkkha nawnlou in kintak in room sung ka delhlut ngal uhi. Ka papi a lupna tung apan ana kia a, kintaka pom in a lupna ah ka sial nawn hi. “Papi…papi” chi’n ka samsam a, himahleh a dawnna kamkhat leng zaak ding a om nawnta kei. A awm ah ka sawn a, ka hu ka pia a, himahleh a sou khawlsa kasuhing thei nawnta kei. Ka papi lupna gei tuanglai ah ka tusuk a, ka mittui in hong zui ngal a, pasal chi’n ka kideek teitei sawm a, himahleh kideek zou ding vual kahikei. Khovel a hong iittu taktak pen ka papi ka damsung a mukha nawnlou ding kahihmanin, ka lungsim ana a, puakdan ka siam theikei hi.

Bangmah kallou in nungak-tangval ka inn uh hong dim pah ua, ka vante uh hong heem pah zungzung uhi. Kuateng hong hawh a, kuateng ka kiang a om hiam chih na ngawn ka theikei hi. Ka papi luang bul ah ka tu a, ka towel liangbaat in ka kinulnul mai hi. Bangtan hiam zoh in ka kiim ka etleh ka gei ah Chingte ana om a, chik a hong pai a, bangchik a ka kiang a hong tuu ahia chih leng ka theikei. “Ching, hong hawh maw, ka kipaklua” chi’n chibai ka buuk a, amai ka etleh aman leng ka papi hong na iit pih petmah ahi chih ka thei a, amit asan in a bawk thiithiai a, kei hong iit ziaka hichitaka hong suunpih, a meel bang daang kiukiau zawzen kamuh chia’n ka khasiattha bang asuak deuhdeuh hi’n ka thei a, ka papi innsung a aom tawpni ahihtawh chi’n ka kah ek-ek mai hi.

Programme tengteng zoh in haanmual lam ah hong paipih ua, paitang zou nawnlou kahihmanin Chingte in ka khut in hong leen a, ka papi luang koih khiatna ding mun ka tungzou hamham hi. Pastor in ahun zat ding daan teng hong zohtak chiang in tangvalte’n a haan hong vuhsak ua, ka it mahmah ka papi vuiliam ahi maimahta hi. Innlam paikik suk nawn ding bang haksa kasa mahmah mai a, ka nupi tawh Lalboi kia tawh khosak ding chih ka ngaihtuah chiang in ka kihta mahmah a, haanmual a omsuak bang ka ut hi. Himahleh Chingte in hong leen den ahihmanin ka thatawl tawh awl in innlam ka zuan uhi. Inn ka tungphet un lupna ah hong sial ua, gimlua ka hi ngei dinga, lum pan ka kisak leh kana ihmu khangal hi. Nitaklam nitum kuan in ka khanglou zoupan a, ka manglam ngen mah bang in thilteng ka mu a, ka hi meimuai den hi.

Ann ne ding in hongsam ngal ua, neek ngap mahmah lou ka hihman in ka nedah ding chi’n ka gen hi. Himahleh Chingte in ngai thei mahmah lou ahiding a, kuang a vala in sikkeu khat in hong tulh a, duh leh duhlouh thu hilou in hong nesak teitei hi. Ken leng thumanna chi in ka ne a, ann duhlou ka kisak leh tampi bang ka gai maimah hi. Ka neek zoh phet in kava kihahsiang a, Chingte in ka inn uh va pha ni na kisukhalh kawm in hong chi ahihmanin va pha ding chi in keileng ka kisa hi. Awlawl in ka pawtkhia ua, lamdung khawng ah ka vaak kawikawi uhi. Nidang hun a ka kizuihni chiang ua ka gen ut uh tam mahmah hinapi in tuni in zaw gen ding thei leng ka om kei ua, zuih in ka kizuih thoh uhi.

Chingte te inn ka tung ua, “Umuan, hiai ah na tawldam kawm in ana lum inla kei kava kisil ding aw..” chi’n kisil ding in a bathroom lam uh hong zotsan pah hi. Vangsiatna ana tuak nasa mahmah hinapi in Chingte leh mite hong itdan leh hong khotuahdan kamuh chiang in vangse ding inleng vangpha bang ka kisa a, ka lunggim mahmah napi in ka lungsim khat akhamuang a, nuam kasa veve hi. Bangmah kallou in Chingte hong kisil zoupah a, “Umuan, nana chim man hia? Manta ka hi aw..” hong chi a, ken leng “Ching, nou inn aom bang I chim na zenzen dia?” chi’n ka dawng thuk hi. Amah mah in “Umuan, paisuk ding na chih hunhun a paisuk theih himai ahi, leengkhawm dia hong kisa suak ngal kahi aw..” hong chi a, “Hi thamtham e Ching..” kenleng ka chithuk teisam hi.

Khua bang hong mialta ahihmanin Chingte tawh ka pawtkhesuk nawnta uhi. Inn ka tung un nungak leh tangval ana tam mahmahta a, leenkhawm bang ana pankhin zawzen ua, zumhuai bang kasa sim hi. Krismas sawnglaitak ahihtawh leenkhawm bang anuam mahmah mai a, ka lungsim ah, kou innlou deuh hileh zaw Chingte tawh tua sanga leng nuam sazaw ding hi ung amaw ka chi hi. Leenkhawm nuam panpan ka chihleh Val Upa pa hong ding tou a, “Tunitak leenkhawm nuam mahmah hinapi in I daak chiam uh daak 7 bang gingta ahihchiang in, YPA vaai pen ah khakna dan I nei ding ua, a tungap laiteng in I tutpih lai ding uh..” hong chi a, kei bang in nuam kasak ziak adiam hun tom sa in kana aam mahmah mai a, lah hihtheih bangmah omlou ahizel hi.

Lengkhawm zoh in Chingte in hong paisan ngam naikei a, hong tutpih lai hi. Innkong ah mei awi kawm in ka tuu ua, kha bang vaak ahihzawmah tawh houlim in nuam kasa mahmah mai uhi. Chingte in ka khasiat a ka kingaihsiat khak ding hong veeng mahmah ahihdan ka mu deuhdeuh a, ka kipahna ding, ka lungsim nopna ding lam thu ngenngen hong genpih a, nuam kasa a, Chingte pilna thupi sa in ka itna bang a lian deuhdeuh mai hi. Bangtan hiam zoh in “Umuan, dawr ah kuva va hai ni..” chi’n hong zawn a, ken leng “Hitham e, na duh taak in ah..” chi’n kuva haai ding in ka nih un kava kuankhia uhi. Gate kaan zoupan Chingte hong kipalpuk a, ken leng kaai thou pah in dawr lam ka manawh uhi. Ka inn uapan dawr tan hi a gamla tham sim mahmah hi. Huchia ka paitouh uleh dawr tungman nailou deuh in thakhat in Chingte nu ka mu guih ua, anu’n “Chingte, nang zumlou maw? Hiaipa apan kihemkhia in kong chihna sawt lawta hilou maw? Lengkhawm na hih lehleng pai hun in paive, hong paizok oh…” chi’n Chingte baan tang a hong kaihkhiatsak a, naa kasa mahmah mai hi……

PART - VII
Chingte a utkei mahmah a, kei kiang hong zotkiik sawm ahi chih ka theihphet in kenleng Chingte hong letna khut ka lakkhiatsaka,  “Ching, hilou ahi, ei mawhna ahi. Bangteng hileh I pi leh pute’n ‘Nu leh pa thuman anah loh apeek’ ana chih bang un nu leh pate thuman kaan a thupi zaw omlou ahihmanin na nu chihna niallou in innlam va zuanphot mai in..” chi’n ka sawl a, huchi’n Chingte inleng  a nu a zuitouta hi. Lampi ah kei kia in ka pai kiik suk a, ka lungsim chu agik mahmah, himahleh ka gentheih ziaka hiai bang teng ka tuah ding mah ahi chi’n ka pom teitei mai hi. Ka inn uh ka tungsuk nawnpah a, mi ana paimang gaivek simta ua, ka nupite leh tanau-laina hong giahpihte’n lupna khawng ana bawl ua, lum ding in ana kisa diamdiamta uhi.

Keibel a lumthei ding vual hinawnlou kahihmanin Lalboi guitar ka lakhia a, innkong ah mei awi kawm in awl in ka tum hi. Kha bang a vaakpha mahmah mai a, lungleen huai kasa mahmah mai hi. Phalbi laitak ahihtawh khua vot mahmah hinapi in ken bel ka lungsim asat luat ziak hiam vot kasa hetkei a, lungngaih tampi tawh laa sa in ka tuu hi. Ka neulai a ka hinkhua zatdan khawng, ka nu’n a liangkou a hong puaklai nite, ann hong moplai hunte, ka seenlai hunte khawng ka mitkha ah hong lang zungzung mai a, sapkiik theih hileh ka ut mahmah mai hi. A lehlam ah, ka nupite innsung a ka haksatdan leh mite muh a bawlsiata ka omdan khawng ka ngaihtuah chiang in khasiat huai bang kasa mahmah hi. Hichibang haksatnate ngaihtuah kasawm ngeikei, himahleh hichibang hunchiang in ka lungsim ah hong langh mawk ahihchiang in ka ngaihtuah khanaka, kei leh kei kisulungkham maimai kasuak zel hi.

“Sian aw tanbang na hawmsiam, hizong kei tan nalua sa’ng, lungzuan ngaihtam sialna lel… banghang mimbang na piang ka hiam, lungzuan ngaihtam siallel dia, simlei kei di’n zuanna lel….” chih laa khawng ka lungsim ah hong lang dundun mai a, khanvualte khawng lungnuamtak leh khamuangtaka duh leh deih ne a leizou a, nu leh pa ang a lumte khawng enhuai petmah uh kasa hi. Hichibanga ka haksat a, mite deihlouh ding kahihdan ka theih gegu nunga leng bangziaka mi va ngai teitei ka diam aw…chih khawng ka lungsim ah hong suak a, kei leh kei kimawhsakna ding bang ka hau mahmah mai hi. Itna I chih khawng ei ut bang a bawltheih hileh ut hina maizen ing e maw…. kei tan bangchise adiam maw chihlouh vual ahikei hi. Tantawk a lungkimdan ka kisinsin a, himahleh tuahsiatluat hial chiang in kilungkimsak teitei chih bang thil haksapi asuak hi.

Theihlouh kal in aak bang hongkhuang a, zingkhua vaak ding in hong kisata hi. Innkuanpihte’n khua dam sa ding uh ahihmanin mei kana tohsak thaka, a dawn ding uh singpi-tuilum awmsa in kana koihsak vek hi. Huaiteng ka zoh in lum tuan sese lou in luikhuuk lam ka zuanpah a, tui khawng kava tawi hi. Tui ka tawi ngah nung in leng a thou om nailou uh ahihmanin annbel khawng suansa in kana koihvek hi. Huchi’n sawtlou nung in ka inndongta ua ka tanute khawng uh hong thou ua, a sepding uh tampi ana zohsak ka hihmanin a kipak mahmah mai uhi. Kei leng awl a kihahsiang in gim mahmah sim kahihtawh ka lupna ah sawtlou va ihmu ning chi in ka lupna ka zuanpah hi. Lupna tungpan chih ding in bangmah ngaihtuah man nawn vetlou in ka ihmusuk pah ngal hi.

Ihmu pan chih ding in “Muanpu, muanpu” chia hong kisam kaza a, thakhat in ka khanglou hi. Ka daaktouh leh ka gei ah ka nupi ana ding a, “Muanpu, nang a bang chi eh? Nasep ding hichituka tama, inn hah ding khawng adima om a, nang hichih lup mawk chih om theilou, hong thouzok…” hong chi a, ka ihmut khamlouh tawh ka hehtha bang asuak sim maimah hi. Himahleh heh a phatuam ding omlou ahihchian ken leng “Nupi, kare ana ihmu khalai ka vele, hong thou ngal ning aw..” chi’n ihmutsuak kawmkawm in ka thoukhe nawn hi. Ihmut ka khamlouh ziak leng ahingei dia, ka lu khawng ana mahmah a, ka omdan anuam in alem thei mahmah kei hi. Himahleh tawldam theivual hilou ka hihmanin ka ngap dandan in sep theihteng ka sem a, innkhawng hah in vante khawng hoihtak in ka lemfel thak ua, daai khawng ka bawlthak nawn uhi. Ka sepzoh un ann hong neek hun ngal ahihmanin tawldamna ding hun om nawnlou a, nguaitakin ka om niingniang hi.

Huchihlai in ka niite khat in honna hehpih mahmah ahiding a, “Muanpu, bangchi e? Na mel adik hetkei. Na nguailua, damdawi ne inla, va lum in, na taksa mahmah leng a chau lua..” hong chi a, kana guuk kipah mahmah mai hi. Hichibang a hong sawlthei omlou a lum hileng haansan tuak ding kahihmanin. Kenleng ann kanek zoh phet in ka nii hong piak damdawi ka ne a, ka nekzoh in ‘Nii, saulou khawng kava lum dia, kong tawldam zek ding” chi in ka lupna ka zuanpah hi. Ka lup leh ka theihlouh kal in ka ihmu khanawn paha, mang lamdangtak mai ka nei hi, ka mang ahihleh hichidan ahi  khua mial mahmah nuai ah keikia in munkhat ah ka tuu hi, ka kuun a, thil tuamtuam khawng ngaihtuah in sawtkhoptak mialnuai ah ka om nilouh hi. Hak leng hak ngamlou in thumna khawng nei in ka om hi. Huchihlai in thakhat in vaak hong taang in kamu a, keileng kiguih zawzen ka hihman in ka daakkhia hi. Ka daakkhiat leh ni ahong vaak hoih mahmah a, huai ni zuungte’n ka mai mahmah hong khohkha hi’n ka thei a, hoihtakin ka hakthei kei hi, huchia ka mit
vaak apan liah a ka om laitak in mikhat ka kiang ah hongpai in Muanpu lungkham ken..”  hong chih tawh kiton in ka khanglou guih hi.

Ka khanloh leh lamdang kasa mahmah mai a, ka maban a nuamsa ding ka hi de aw, ahihkeileh si maimah ding ka de aw, chih bang ka ngaihtuah a, mi kianga lah a hilhchetna va kan ngam tuanlou ka hihmanin ka lungsim aguuk buai mahmah mai hi. Kei leng ka thoukhia a, ka mai khawng ka phiatsiang zoh in sana ka-et leh nitaklam daak 4 bang ana ging manta ahihmanin koimah pawtkhe nawnlou in ann neek ding ngak in ka om hi. Bench ah kei kia in ka tu a, ka zalmang lamdang takmai ka ngaihtuah khop a, ann ne ding a hongsap lam bang uh ka phawkkha kei zawzen hi. Innkong a kava pawtkhiat leh ana ne zaizaita ua, kei leng kuang khat laa in ann ne ding in kava kisapah hi. Ann ka neek kawm nasan in ka ngaihtuah khaden a, ka ann nek bang a lim kei zawzen zou hi’n ka thei ahi. Bangtuak ding ka diam aw? chih kia ka ngaihtuah khop a, ka lungsim a nuam thei mahmah kei hi.

Gil vah lah bang, vahlou lah bang in ka kham hi. Nitaklam dak 5 bang hong gingtou a, verandah a thil tuamtuam ngaihtuah kawm a ka tut leh ka lawmpa Thangpu hong vaakluut hi. Ka muhphet in “Eh, Thang nong hawh zenzen a, bangchisim e? Tulai kimuhlouhna bang sawt bang zawzenta a, lunglen huai theilua hive aw..” ka chih leh aman leng “Thang, bang poimawh om hikei, bang nana chichi hiam chia hong vaak luut maimai kahi. Den in Chingte ka inn uah hong hawh a, a nute’n pawtkhiat ding leng phallou uh ahihdan khawng hong gena..” hong chipan, a genzom ma in kana pautuh pah a “Thang, a nute’n lah hong deihsaklouh utawh haksa mahleh kei ading a lampi om tuanlou ding ahihchiang in houh ka kikhen mai uh ahoihpen ahidiam?” chi’n ka dong hi. Thangpu in “Muan, lunglel pahpah lou e pasal, aman nang hong ngai nawnlou hileh thutuam, hong ngai law mahmah a, hong ngaihna thu mittui luangzen a ka kiang ah hong gen ahi” hong chi hi.

Thangpu thugen in ka lungsim hong subuai deuhdeuh a, va ngaih teitei ding lah a nu leh pate’n hong deihsaklou law mahmah ua, tankhak zoh ka kinem tuankei. Ahi alah ka ngailaw mahmah zel a, “Umuan, mihing daai kuaman kaai zoulou ahi…” chia hong gen khawng bang ka bilkha ah hong ging chiaichiai mai hi. Ka loh ding daan tuan ka theikei, Chingte tawh kimuhtheihna ding lampi lah bangmah ka theisamkei hi. Thangpu mah in “Muan, lungkham hetken aw, na kisukhalhna lah hikawm ding in tunitak leengkhawm in vahawh leng hilou maw, hong kisa in aw kong tawn ding” hong chi a, ka lungsim in leenkhawm omlai ahi maw kachi zawzen hi. Ken leng “Thang, zingchiang a kumlui kikha ding eimahve maw…tunitak apan leenkhawm kipan nawn ding maw?” chi’n ka dong thuk hi. Aman leng “tunitak apan leenkhawmna programme kizang nawnta ding ahi..” hong chi a, huchi’n kenleng “ahihleh kana kisa dinga, na hong tawn dia va leengkhawmni aw..” ka chi a, Thangpu’n leng kisa dia hong paisan ahihmanin keileng kihahsiang ngal in ka kisa pah hi.

Sawtlou nung in Thangpu hong tungtou pah a, keileng mansa a na om kahihmanin ka nupi kiang ah leengkhawm a kuan ding ka hihdan uh ka hilh a, huchi’n Thangpu tawh kizuui tou in leenkhawmna innlam ka zuansuak pah ngal uhi. Lampi ah Thangpu kiang ah “Lawm, Chingte lah hong leengkhawm theilou ding hia maw… amel khatvei bek mu nuam hina maizen ing e..” ka chih leh Thangpu in “Muan, lungkhamkoh, na vaangphat leh mukha thei nahi, Mercy kiang ah ahihtheih leh hihtheihlouh thutuam, nava zawn ding chia ka sawl ahi” hong chi a, ka zak in ka kipak mahmah a, hong hawh thei ding chih thei hikei mahleng ka lawmte hong khualna thupi kasak mahmah ziakin Chingte meelmu ka bang zou hial a, atung ah ka kipak mahmah hi. Chingte hong hawh theihlouh khak ding ka guuk lauh mahmah mai a, Pathian kiang bang ah hong hawh theihna ding in ka thuum kha zawzen hi.
 
Sawtlou nung in leenkhawmna inn ka tung khong uhi. Mi ana tam sim mahmah mai a, kou leng luutpah in munkhat ah kava tupah uhi. Ka tut utawh kiton in Chingte ka guuk zon pah a, himahleh muhkhak ding in a omkei a, poi kasa mahmah mai hi. Ka lungsim abukim theikei a, ka lasak ut tha himhim leng asuakkei hi. Bangtan hiam ka tutzoh un Thangpu kiang ah “Thang, ka gimsim a pai mai ding hia?” ka chihleh Thangpu in hongphal hetkei hi. Lawmpa’n hong phallouhluat tawh ning kawmkawm in ka tu nilouh hi. Huchia lungsim nuam hetlou a dakkal 1 vaal bang ka tutzoh un konglam ka etleh Mercy leh Chingte hong luut kamu chet a, gimsim ka kisakna tengteng bang beizou hi’n ka thei ahi. Ka kiang uah hongtu le uh ka ut mahmah a, himahleh tutna awng nawnlou ahihmanin sapna vual aomkei hi. Himahleh vangphathuaitak in ka kimaingat kha geih ua, ka kimutuah hoih mahmah ua, ka lungbel akim veve hi.

Leengkhawm a kimpih vualte’ng lasa a nuamsatak mai a aomlai un kei leh Chingte inbel lasak ding lamlam leng ka phawkkha kei uh. Ka nih un ka ki-entuahtuah mai uhi. Huchia bangtan hiam ka ki-ettuah nilouh nung un Chingte in akhut hong lakhetou in innkong lam a khuttal in hong kawk zauh hi. Ken abang gen ade aw chi’n ka theisiam mahmah kei a, chih dingdan tuan theilou kahihmanin Thangpu kiang ah ka gen leh “Muan, innkonglam ah kihouni chi ahi ding, innkong ah vapawt leteh..” hongchi hi. Kenleng awle chi’n innkong lam ka pawtpah hi. Innkong munkhat ah katu a, Chingte lah hong pawtkei a, Thangpu inleng hong khem hiding eive chi’n kei zaakkhop in ka phun numnum hi. Himahleh minute 20 vel zoh in Chingte hong pawtkhe petmah hi. Ka kiang ah hongtu a, gen masak ding theimel ka omkei uhi. Atawp in kenleng “Ching ikimuthei a, ka kipaklua..” ka chihleh Chingte inleng ka khut hong leen in “Umuan…”

PART - VIII
Chingte inleng ka khut hong leen in “Umuan, hichibang a hun haksatak kal a na meel kong muhkhak hampha ka kisalaw petmah, ka gensa mihing daai kuaman kaai zoulou ahi chih ana thei gige lai in aw, ka nute’n hong hal ua, I kaal ahaksa mahmah mai, himahleh I ki-itna pen a kip zoh peuhleh hun hongpaizel dinga Pathian in a lampi ding hong sehsak na ding ahi a, lungliap hetken aw… Nidang dan a kimu in kipawl theikei mahlehang ka itna leh ka lungsim chiklaipeuh a nang kianga om gige ding ahi aw..” hong chi hi. Zaak nuam kasa mahmah mai a, ka kipak in ka lung anuam mahmah tuam a, ka tunga van giktak mai kikoih laakkhiat mah abang zou hi. Ken leng “Ching, hichibang nunga leng na hong it veve lai thupi konsa in kong ngaisang mahmah a, nang sang in kei ading in a kipahhuai zaw thamtham, kong it deuhdeuh mai..” ka chi hi. Kum tampitak kikhen nunga kimukiik mah ka bang ua, nuam kasa mahmah ua, ka kipaak tuak mahmah uhi.

Lengkhawmte’n lah nuamsa deuhdeuh, a leenkhawm ging uh ngaih deuhdeuh mai, kou lah Chingte tawh kuamah eng tuanlou in koumau chiat in nuam kasa thei mahmah mai uhi. Sana bang ka en-en mai ua, dak 2 ging ngeikei leh chih bang ka ut mahmah mai ua, zanhak dia Upate kiang ah vanget mai bang uthuai kasa hi. Himahleh hitheilou ahihchiang in ka aam mahmah mai ua, ahitazongin gen ding tam theibel ka omkei uh. Bangmah genlou in zankhovaak in tu le ungle nuam kasa mahmah thouthou ding uhi. Sawtkhop a pau omlou a ka tutkhawm nung un Chingte in “Umuan, khatvei a ka nu’n hong bawldan na lungsim analua hia, ka kisuanglah dan, hehpihtakin hong ngaidam in aw..” hong chi hi. Ken leng “Ching, kisuanlah thu gen ngai zenzen lou ahi, ki-it a kingai taktakte’n hiai bang a hun haksa a tuah gige mah uh ahi a, ka theisiam lawtel, hiai bang ka tuah ziak in ka lunglel kei a, kong itna lian semsem zaw hi’n ka thei..” ka chihkhum hi.

Chingte kei ading a first love ahihziak hiam chih ka theikei, ka itna alian mahmah diak hi’n ka thei a, aching bang in gentheih huai kasa mahmah mai hi. Huchibangin amah ading in leng a first love kahi a, hong ngai mahmah sam hi. Ngai in bangteng chi lengle ken bel keilam ki-enlou theilou kahih chiang in ka itna zah inleng ka itna thu ka gen ngamkei a, akianga ka gen ut teng nasan leng ka gen ngamkei hi. Chingte in ahihleh itna kia hilou in hong hehpih mahmah mai a, ka haksatdan teng kam khat leng gen ngailou in a theivek a, a chih bangbang in om theikei mahleng hong theisiam mahmah a, ka khasiat ding leh ka lungnoplouh ding a veeng petmah hi. A lungkham tawp inleng ka mai ah dah meel in aom ngeikei a, hong kipahsak sawm in ka lungsim anop-a, ka hinkhua haksatnate mangngilha, apaisa ka hinkhua leh ka nu leh pa ngai a ka lungleng ding a veeng mahmah mai hi.

Huchia kipaktak leh kikhelahtaka ka houlimsung un dak 2 ana gingman ahidinga, lasate hong dai ua, Upapa’n leenkhawm khakna thumna hong nei hi. Chingte tawh innlam zotkiik nawn ding haksa kasa tuak mahmah mai uhi, aziakbel vangsiat leh kimuh nawnlouh theih ahihmanin. Thumna a neihzoh in lengkhawmte hong pawtkhe diamdiam nawnta ua, kou leng awl in ka tutna uapan ka dingkhetou uhi. Chingte in “Umuan, ka gate tan uh nong khak ding aw..” chi’n hong ngen a, keileng ka utpen mah ahihchiang in seel sese lou in “Ching, ahihlouh zenzen a, hong kha thamtham e” chi’n Chingte-te innlam zuan in ka paikhe phei uhi. Lampi ah Ningta, Chingte-te innvengte, numei pauthei mahmah khat amahkia in anapai a, kou leng numei vuak apai hial sang in chi’n delhphei in ka kitonpih uhi. Chingte ka aam luatziak ahingei dinga a inn uh bang tungbaih ka kisa mahmah mai hi. A gate uh ka tunphet in “Ching, I leelsa simthute lungpai pai tembang kuahden ni aw… mangpha photni” ka chi a, aman le’ng “Umuan, vual in hal in tun leh zuate’n hong hal zongleh, itna mitdel zaw halzou ding simlei ah omlou ahi aw..” hong chithuk in huchi’n ka kikhen thei khongkhong uhi.

Nidangteng sangin leng tunitak chu ka lampi pai leng nuamzaw hi’n ka thei zawzen ahi. Lampi bang ah ka ngaihtuahna, ka lungsim a nuam mahmah mai a, ka guuk nuih suksuk maimah hi. Inn ka tun in kong ana kalhzel di uam aw chia ka lauhguuk sim leh ana kalhkei ua, kei leng luut in ka room ah ka luutsuak a, ka van kheek in lupna tung ka kideenna pah hi. Ihmut ka sawm chiang in ka ihmu thei mahmah kei a, ka bilkha ah ““Umuan, vual in hal in tun leh zuate’n hong hal zongleh, itna mitdel zaw halzou ding simlei ah omlou ahi aw..” chia Chingte hong thugen hong gingden a, thildang ka ngaihtuah sawm chiang inleng ka lungsim ah adang aomthei hetkei hi. Chingte hong itna thupi kasa deuhdeuh a, hiaibanga numei hoih leh lungsim piching ka neihkhak hampha ka kisa a, Pathian in ka tagahna liahkhuh a, ka lungkhamna hehnemtu leh mangngilhsaktu ding a hongs awl hiding bang in ka koih a, Pathian kiang ah kipahthu ka gengen mai hi.

Ka sana ka etleh dak 3.30 bang ana gingman a, dak 4 a kumlui khakna ding sa-at a ka kuan ngai nawn ding ahihmanin ihmut nadan om kasa nawnkei a, huchi’n ka thoukhia hi. Mai khawng phiatsiang in tui khawng kava tawipah a, nidang teng sanga leng ka nupi maipha ka muhzawk ngaita ahihmanin a thohma a thilteng ana zohfel ding chi hut kahihmanin ka tuitawi zoh in ann huan kawm in inn khawng ka zuut siang pah hi. Ka sep ding teng kasep zoh nung sawtlou in ka nupi leng hong thou a, dak 4 bang ana gingkhinta ahihchiang in kenleng “Nupi, biakinn ah sa-at in kava kuan ding aw..” chi in biakinn lam manawh ding in ka kuantou ngal hi.

Innkong ah Thangpu leng Biakinn lam pha dia kuan toh kituakkha ka hihman un ka kitontou ua, Thangpu kiang ah, “Lawm, zannitak kipahthu hong gen ding kachih hinapi in Chingte kava khakleh kong mukha nawnkei a, kipak petmah kahihdan ana thei in aw, nang omlou hileteh Chingte ka muhna ding lampi aomkei a, nang tawh Mercy lem hong geelsakdan thupi kasa petmah a, ka ngaihtuah chiang in ka kipak deuhdeuh” ka chih leh aman leng “Muan, bang kipahthu gen ngai zenzen lou e, lawmta ichih hichi khawng a I pankhawm ding mah ahi..” hong chihkhum hi.
Houlim kawmkawm a ka paitouh nung un Biakinn ka tungtou uhi. Sa-at ding ana tam mahmah mai a, kou leng Thangpu tawh at ding in ka kisapah ngal uhi. Huchihlai in vangphat huaitak mai in Chingte leng ahong hawh thei nawn a, ka kipak kholdiak hi. Hong muhphet in “Eh, Umuan, hong kuanzou umaw? Na khut uh khawng a thanghuaima in singpi kong sung dia dawn masa phot un” hong chi a, ken leng “Ching, na hong piak taak in dawn thamtham e, huai mah aka I duh..” chi’n ka chiamnuih suk hi. Huchi’n singpi hongpia a, “Tuni zaw nungak tamna, na singpi dawn sung uh na kiang uah kong khawlphot ding, zannitak ihmut theihlouh tawh ka gimlua” Chingte in hong chi a, ka pauma in Thangpu in “Chingte, ihmut mawhna ding hial a bang kichihkha na maizen ua?” chi’n hong chiamnuih a, ka thum un ka nuui zaizai uhi.

Singpi dawnzou phet sa-at ding in ka hong kisapah ngal uhi. Nidang banglou in ka sa-atkhiat zoh atawm mahmah mai hi. Chingte ka melhna ding tawh, ka sa-atna ding tawh ka kidaihzou mahmah kei hi. Huchia awlawl a ka sa-at lai in agal apan Chingte in “Umuan, sa mah hi maw na at, na khut zaw sa muh in hong mu nawn ngalken aw…” chi’n hong chiamnuihsuka, ken leng “Chingte, ki-at kha lengle hongkem hongdon ding ka muangna vele..” ka chitousuk pah lel hi. Bangmah kallou in ka sa-at ding tengteng uh ka zou pah ua, satem khawng sawpsiang in munkhat ah Thangpu tawh katu tawldam uhi. Chingte leng zum zou nawn hetlou asam dinga, alawmte taisan in ka kiang uah hong paisuk hi. Himahleh tu leng tuman lou in a innvengnu Ningta in “Chingte, hongpai dih, huailam va paipai ngailou” chi’n samkiik a, ka lungsim guuk in huainu mawngmawng ka kamsung ah omleh petzaan utna mahmah ing e kachi vungvung hi.

Biakinn a Usher dinga hong sepkha uh ahihmanin innlam ka paisukpah a, ka tunphet in ann kane ngal uhi. Ann ka neeklai un Lalboi kiang ah “Lal, na puannak khat hong khelsak maive maw, tuni Usher a pangdek inga” ka chihleh, ka lametna khen in “Umuan, hi thamtham e, na deih penpen ana silh in aw..” hongchi zenzen a, hichituka Lalboi kampau nem za ngeilou ka hihmanin ka kipak petmah mai a, ka annkam bang a lim tuan mahmah mai hi. Ka neekzoh phet un kuang ka hempah a, ka hepzoh phet in ka kisil hi. Kisil zou in Lalboi puannak khat ka la a, ka kisa pahngal hi. Ka kisakkhitma in Thangboi in hong tawntou man hi. Kumlui khakni chuh ka damsung adia mangngilh theih nawnlou ding ahi, Chingte tawh Usher a kapankhawm patna ding uh ahihmanin, a phur leng ka phur diak hi.

Ka manphet in Thangboi tawh biakinn ka zuan ngal uhi. Biakinn ka tung un Chingte bang ana tungkhin thamta ding in ka um a, himahleh ka zonzon leh ka mu zoukei a, bangchi ade aw? bang buaina nei a hong kikhawmlou dek ade aw? chih peuh ka ngaihtuah khop a, ka Usher hihlam na ngawn ka mangngilh dek zawzen hi. Zingkal a ka phur na tengteng bang abeizou hi. Himahleh lungsim khat ah lametna ka neih teitei laiman in innkong lam ngen ka enen mai hi. Mi kikhawm ding teng hong kuankhin vek abangta a, biakinn leng mi adimta, innkong lam ah muh ding mi a vaang mahmahta hi. Hichitan inleng hong tung naikei a, ka lungsim chu aguuk buai mahmah ta. Mikiang a vakan mawk nadan lah a omkei, kinemtakin ka ngakngak mai a, himahleh kikhawm tawptan inleng a meel muh in aomkei lailai a, ka lungsim anuam thei nawntakei hi.

Kikhawm tawp innlam paingal mai ding hi chia pai dia ka kisak leh ka nunglam apan “Umuan..” chia hong kisam kaza a, Chingte hingei ding chia kinemtak a ka-et leh alawmnu Mercy ana hi maimah hi. Ka kianglam hong zuan a, kenleng “Mercy, bang chisim e?” chia kana dot pahleh aman leng “Umuan, Chingte-te innvengnu Ningta in Chingte nu kiang ah zannitak leenkhawmna ale Chingte hong tellou, innkong a Muanpu tawh tuden uh” chia va heek segawp a, Chingte nu’n kikhawm le kikhawmsak utlou ahi hong chi hi. Ka hehtha asuak mahmah mai a, pai vengveng a huai Ningta va biangbet ek mai ka ut hi. Kei leng lungsim nat tawh ka hehtawh biakinn konglam ah ka pawt hi.

 

Related Link: Ngaih aw... Selung Na Liap Lou Aw...(Pat I-III)

.