Ngaih aw... Selung Na Liap Lou Aw...

User Rating: 0 / 5

Star InactiveStar InactiveStar InactiveStar InactiveStar Inactive
 

paumuanlalguitePart - I
Lamka leh a sehvel a siamsinna ziak leh sepna tuamtuam ziaka omte hong tung zungzungta ua, khosung a gamlum mahmah maita hi. Tape recorder nei teng inn ah lungzuan laate kikhah in khosung a paungaihna zang in “A tungnung, a tungnung, tungnungpen Mang thupi, hiai lei ah tangtawn in lem leeng hen halleluijah..” chih laa te hong kikhah ging zuazua mai a, lungleng thei mi tampite ading in a lunglen huai mahmah mai hi. Innkuan mun tuamtuam a kikhen vengvungte ading a kimuhkhawmna hun hoihtak ahi a, mi tampi ading a kipahna leh nopsakna hun ahihhangin kei leh ka khote uh khenkhat ading in bel mualliamsa hunte ngaihna apuang a, “Innkuan kim in Krismas zangnuam lai veng…….” chih kaan gen ding a om hetkei.


Kei pen tangvalnou pan, neuchik kahihlai in kanu leh pate’n hon omlouhsan uh ahi a, ka papite etkolna nuai a khanglian kahi. Ka papi’n hong deihsak mahmah hinapi in ka nupi pe’n in hong deihsak law hetlou ahihmanin aguuk in haksa kasa thei mahmah mai a, ahitazongin belh ding dang nei tuanlou kahihmanin a chih bangbang ua phunlou leh paulou a ka-om angai mai hi. Tangval himahleng inn nupi nna teng sepsak in ka om a, tuitawi, annhuan leh innsung nasep in ka buai thei mahmah a, ka lawm leh vualte kimawl khawng bang ka ann huan kawm khawng in ka en in a ka eng thei mahmah mai hi. Himahleh keizaw huchibang a lawm leh vual pawl man ding vual kahitakei hi.


Krismas hun ding hong naai hiaihiaita a, khosung a tangvalte leh papite bang satang hawl in gamlak ah kibuai thei mahmah mai a, nungak leh nupi tangzaang teng lah singpua tawh tuitawi tawh abuai thei mahmah mai uhi. Huchia satang hawl a ka omna uah chikmah a ka gintak ngeilouh leh ka tung aleng tung dia ka gintak ngei hetlouh sakhi lianpi takkhat ka kaplum kha a, ka kipak mahmah mai hi. Mi adin zaw sakhi khat man maimai himaithei, himahleh kei adin chu a thupi petmah a, ka sakhi kaplup bang ka zuutzuut kha zawzen hi. Khua bang mial dia kisata ahihmanin ka samat kho tangvalteng in zawng in kapai uhi. Lamdung a ka lungsim guuk in ka nuuinuui mai hi.
Khomual ka tun un ka kho nungakte uh bangzah hiam in honna vaidawn ua, tui bang honna pia uhi. Huaite lakah hoih kasak mahmah Chingte leng hong telkha a, nuihmaitakin “Kua a akaplumtu, a kaplumpen kei mahmah in tui kape ding…” chi’n hong nui selsal a, gammang kawm a etlawmtak a Ngeisok paakkhia bang kasa zawzen hi. Tui hongpia a, amah hong piak ahihziak hiam ka theikei, ka pian apan hiai banga tuui limtak, vot kelkel ka dawnkhak patna hi’n ka thei ahi. Ka tawl adam tuam mahmah mai a, ka lungsim guuktak in kithupisakna bang ka nei kha dek zawzen hi. Krismas sa ding man, nungak melhoihsak penpen in tui hong pia, hiai kan a ka thupi ni aom dia hia chi utmai ka hi.


December 23 nitak hong hita a, khosung a hiai/huai Saptuamte chih omlou in nungak-tangval teng in ADVANCE CHRISTMAS hun ka zang khawm uhi. Item tuamtuam hong sai ua, a kopkop a lasak kidemna bang hongsai ua, huaina ding in numei teng min lai ah hong gelhkhia ua, pasal teng in kidok hi. Lawmte’n hong dok ua, khut ka beeng zuazua mai uhi. Kei hun hong tung takin kava dok a, ka dok pen leng en ngam zawzen lou in a saitupa ka piak leh, “Muanpu in a koppih ding in Chingte a dokkha……..” chih hong puang a, mi’n a khut ana beeng zuazua ua, keibel ka kipah tawh ka zum tawh ka san gai a, zum sasa in Chingte tawh ka tukhawm uhi. Kei bel taang ngam vetlou kahihmanin aguk in ka gim mahmah mai hi.
Kidemna tuamtuam kong panta ua, kei tawh Chingte lasak hun hong tungtak in haksa kasa mahmah mai uhi. Chingte bang leng ana zum lawsam ahi ngei dia, mipi laka a daak khe ngam vetkei a, ka nih un anuai lam nga sa in laa kong sa uhi. Ka aw uh liing tuak ahihmanin hong kituak lehlam vanglak ua, ka tuailaipihte un  kou gintak kheel in siam bang honna sa vanglak uh ahingei dinga, khatna hong lasak velvol mawk uhi. Chingte tawh ka tutkhawm khakpatna ahihmanin tutdet ding bang ka ut mawk a, nuam kasa mahmah hi. Ka ki-en tuah taktak ngamkei ua, ka et chiang bang in amah hong et tawh ana kituak kha gaihgaih zel a, ka nih un kinuihsan in ka zum tuak mahmah mai uhi. Hiai bang hun nuam chikleh a om ngei nawn diam maw, tua Chingte tawh ka kipair khak uh tuchauh hilou in kumtawn daih ding khawng hileh chih lamlam lungsim ah aom vungvung mai hi.


Programme tawpdek in Conductorpu in tunitak hun ah kuapeuhmah in na koppihte chiat uh a inntan uh nava khak ding uh, tangval kuamah in nungak amah vuak a paisak louh ding chih hong puang ahihmanin kenleng ka tawp phet un Chingte a innlam uh ka zotpih ngal hi. Hiai nitak Conductorpa bang neizou hileng Award ka pe ut zawzen mai hi. Lampi ah a kihoupih ngam zawsam omlou in paulou-phunlou in ka kizui numnum uhi. Ka lungsim ah gen suk gawp mai ding ade aw chih bang ka ngaihtuah a, lah kithuah masakni a va gen pah zawzen kholou khawng hongsa lawkha inteh kachi a, kagen kei. (A houpih leng houpih ngamlou in ka itna thu leng bangchi gen ngam ding ka maizen diam ah…). Atawp tawp in Chingte te inn ka hongtung ua, gate ah “Ching, kana paiphot ding aw, mangpha aw….” ka chihleh, “UMuan, hong baang ding hong kisa a, na lunglutna lam hikholkei lengle khatveibek nong pawtsam kei dia…” hong chi a, Mangpha ka khak pah zawzen khak bang ka kisiik thak sim a, lah va luut ding nuamsa nawnlou kahih chian, “Ching, zaan lah sawt gawpta ahihchian nidang chia ka hong pawt ding aw…” ka chih leh aman leng “Umuan, na chih teitei leh ahimai keidia leh….mangpha hoihtak” chi’n innsung ah hong lutsanta hi.


Inn kapai sukpah a, ka lum ngal hi. Lupna tung ah ka ihmu theita kei a, ka samat lai a tui hongpiak dan peuh, ka lasak khawmdan uleh ka va khaak a agate ua a kampaute ka lungsim ah a omden a, ka mitkha in ka hunluiteng uh mu dundun mai a, ka ngaihtuah den a, kei kia bang in ka nuui heuhau zel hi. Lungkham chiang kia hilou a lungsim nopluat zawzen chiang bang aleng ki ihmu theilou zawzen ahi maw kachi mai hi. Hiai nitak apan Chingte ka itna puang deuhdeuh mai hi’n ka thei a, ka ngai petmah maita hi. Aman leng hong houpih dan apan lametna hong pe mahmah hin ka thei a, ahoihlam kipia in ka lungkim mahmah mai hi. Huchia ngaihtuahna paisautaka thil ka ngaih tuahtuah laitak in ka aak uh hong khuang a, sana ka etleh zinglam dak 4 ana gingta a, ihmut nadan om nawnkei chi in ka thoukhia a, kisuhalh in ka nupite thohma in innteng hahsiang in tuitawi, ann huan kana zou vekta hi.
December 24 ni ahita a, khosung a pasal teng sa-at ding in biakinn lam ka zuan nainai uhi. Katun in sa ana em ta ua, mi leng ana tam mahmah maita hi. Ka mit ataikual pah a, numei tuitawite pawl omna lam ah aguuk in Chingte ka zongzong mai a, ka muzou hetkei hi. Ka muhlouhtak in ka tha bang adah zawzen hi. Huchia ka guuk zonzon lai in ka nunglam apan “Umuan, hong tunghakna chia, singpi dawnpah aw” hong kichi a, kenle nunghei a ka etleh amel leng mu nailou in a singpi ka sukbuaksak kha a, kisuanglah kawmtak a ka ettouh leh Chingte ana hi a, hong nuihsan a, “Umuan, kisuanglah hetkoh, adang kava lathak ding” chi’n hong kiheisan pah hi. Hong painawntak in singpi hongpia a, “Umuan, zannitak I omdan teng ngaihtuah kha khop ing a ihmu thei mahmah lou keive..” hong chi a, kenle “Ching, kei kia ding ka kisak leh nang leng ana huchi sam nahi maw….” ka chi a, huaiteng kihouman in ka mai ah sa-at ding hong koih ua, nasep kapatpah angai maimah hi.

Part - II
Ngaihpente melmu kawm, melh cheuhcheuh kawm a nasep hi a gimhuai ding himhim a omlam ka theikei hi. Singpi bang ka duh thithe mai a, Chingte in hong piapia maileh chih bang ka ut mahmah hi. Ka mailam ah singpi bawl a buai mahmah uh ahihmanin ka gal etet mai a, aman leng hong na guuk etet ahisam ding a, ka ki-entuah kha gaih zel ua, ka kinuihsan zel uhi. Loukhoh chiang khawng in I maban ah hong tutu leh loukhoh kihaat mahmah ding in ka um zawzen hi. Ka sa-at ding tam mahmah hinapi in ka zou zungzung mai hi. Huchia Chingte melh kawm a sa ka at-at nalam in ka theih hetlouh kalin ka khut ana aat kha kahi ngei ding a, ka tutna mun ah sisan hong tam mahmah mai hi.
Ka khut a si hong taakkhiat zungzung chiang in ka lawmpa Thangpu in ana mupah ahingei ding a, Chingte kintak in hongsam hi. Chingte ahihleh kou khote Nurse zou neihsun ahihmanin ka kisaktheihpih mahmah khat uh ahi. Chingte inleng hong delh phei pah a, damdawi khong vala in hong nuhsak ngal in hong tuamsak pah hi. Ka khut a tuamsung teng Chingte mai kana enkha den a, Chingte inleng nervous sim ahingei dinga ka khut natlouhna nasan hong tuam kha zawzen a, ka lawmta un ki-entuah in ka nuui ekek uhi.
Hoihtaka hong tuamsak zoh in sa lah aat thei ding hi nawnta lou kahihmanin innlam pai mai ding in ka kisata hi. Ka paidek leh Chingte in, “Umuan, hong na ngak ou, kong khasuk dia, na inn uah Tetanus khawng in kong kaap ding” hong chi a, kenleng “Na hong kaap dam ut taak in hithamtham e..” kachi a, huchi’n ka nih un ka kizuuisuk uhi. Inn ka tungphet un ka nupi’n hong na mupah a, “Muanpu, thadah selua va ki aatkha maw? Na khut sa dan a mu maw? Sum neihlouh tawh hong ki-enkol zou lou ding ahi aw..” hong na chihkhum pah momot a, ka maizum tawh ka lu bang lian huaihuai hileh kilawm in ka thei zawzen ahi. Chingte mai leng ka en ngam nawnkei a, haksa kasa petmah hi. Thakhat in Chingte hong dingkhia a, apawt vengveng hi. Nuam kasa hetkei a, Chingte omlouh beek a hong hichih hileh bel poi kasa hetkei ding hi.
 
Anung sawtlou in Chingte ka lawmpa Thangpu tawh hong luut nawn ua, “Umuan, kong kaap ding aw..” chi’n nemtak in hong gen hi. Ka khasiat bang hong suak zawzen a, ka khotheih tuung, ka nu hong sihsan ma deuh a kikaap lau a ka kah ekek lai khawng ka mitkha in amu dundun mai hi. Chingte hong hehpihna thupi kasa mahmah mai a, gen ngamkei mahleng ka itna a pung deuhdeuh mai a, kei ading in lungkham-lungziin kibehlap deuhdeuh ding ahi chih ka thei mahmah hi. Chingte tung ah ka kisuanglahna alian deuhdeuh mai a, kenle “Ching, ka kipaklua. Himahleh ka dinmun na theihsa ahi a, ken bangmah hong hihzou hetlou ding kahi aw..” ka chihleh Chingte inleng “Umuan, nang panpihkhak vualzawlna banga ka ngaih ahi a, nangsang in kei ka kipak zaw..kisuanglah hetken aw..” hong chi a, a hon khotuahna tawh ka dinmun teng tawh ka ngaihtuah khawm chiang in pasal himahleng kideek zou nawnlou in ka biang ah ka mittui hong luangkhe keuhkeuh a, ka kinep hetlouh in Chingte in hong nuulsak hi.
 
Nitaklam hong hita a, biakinn ah daak hong ging in michih a annbel chiat uh pua in biakinn lam ah ann ne ding in kithalawp takmai in a kuan zungzung uhi. Himahleh kei bel ka maizum lua a, Chingte meel mahmah leng mu ngamlou kahihchiang in ann ne ding in kava kuan ngamkei hi. Ka sungkuante bel va kuanvek ua, inn ngak in kana om mai hi. Hong pai kiik un ka gil kial tawh ann hong puak ngei ding ua kinemtak in ka nupi kiang ah “Nupi, na saneek uh alim hia?” chia ka ze dot leh, “Lim mah e, nang ann ne aleng hong pai ngaplou in a neek leng ne ngap kei niteh chia ann leng hong tawi lou kahi uh..” hong chi a, ka gilkial tawh ka hehtha bang asuak zawzen hi. Himahleh kamkhat pau leng kam thum beek a dawn a om ding kahi chih theilua kahihmanin bangmah ka gen tuankei hi.


Huchia ka omlai in naupang khat hongpai a, “Umuan, na lai ding” chi’n hong pe gaih hi. Ken leng bangthu a mahmah de aw chi’n ka enpah hi. Ka etleh “Umuan, khomial ma in hong kuantou inla ka inn uah hong tawn teitei in aw, hong na ngakden ding kahi…. From Chingte” chih teng akigelh hi. Kei leng kipahtawh ka phur mahmah mai a, a lai ka muh zohzoh in lengkhawm ding in ka kisa ngal hi. Ann nekhawm a kuan a nunungte pawl lampi ah hong pai panpante tawh kei lengkhawm dia kuan ka kituak uhi. Mi’n “Muan, koi ahoh dek e?” khawng hong na chih chiang un lengkhawm a kuan vachih ding lah baih lawlai ahihchian ka gen ding bang ka thei zawzen kei a, pawt halh maimai ding chih peuh in ka dawng hi.


Sawtlou ka painung in Chingte te inn ka tungtou hi. Chikmah a ka maingal na ahihlouh manin luut ding bang ka lin mahmah mai a, lah Chingte hong ngetna vuaksuak sak genlouh a meel mahmah leng mu utlua kahihman in kong kiu in kava luut hi. Chingte in hong muhphet in “Umuan, tuni ann ne a hong kuanlou maw? Ken hong na zongzong ing a kong muhlouh phet chia ka lungsim nuamlou a naupang khat lai kongpiaksak ahi..” hong na chipah hi. Kenleng “Ching, hong hawh utlua hinapi inga man zoulou, mi nunga va kuan lah nuamsa nawnlou inga” chi’n ka dawng thuktei sam hi. Chingte inbel hong theisiam mahmah mai a, “Umuan, ka muh a ann na nek keileh ka lungnuam hetlou ding ahihmanin na ann ding kong tawisak a, na neek ding ahi..” chi’n ann hong thuuk hi. Keileng thumu kisa in ka gilkial tawh ann ne di’n kava kisa ngal hi.


Ann kong ne a, ka gilkial lua ahingei dinga, neek petmah in ka ne hi. Huchia ann ka neeklai in Chingte kidiik hileh kilawm in ka thei a, ka etphei leh a mittui ana nuul a, kideek zoulou ahidia “Umuan, tuni lou ale na gilvah ngah ngeilou ding neive maw, kong hehpihlua, na gilkial nikhua in hongpai gige in aw..” chih toh hong kah khum ek a, ann leng ginatak in ka ne thei nawnkei. Ahitakin loukhoh na kigim thei mahmah ahihchian annkam limthei mahmah a, himahleh ka nupi’n “Ann na haihai tawh nang kuanu-kuapa vaakzoh ding e” hong chihsan pahpah ahihmanin gilvah in ann ne ngam ngeilou mah kahi. Chingte hong deihsakna leh hong hehpihnate in ka lungsim tengteng alata a, amah lou thildang ngaihtuah thei ding vual kahi nawnkei hi.


Ann nekzoh in Chingte leng hong kisapah a, khua bangleng mial simta ahihmanin leengkhawm na innlam zuan in ka kizui kheta uhi. Chingte tawh tut nana a tukhawm ding chih ka thukimna uh himahleh a mun ka tun tak uh chiang in ka Upa pa un “Tunitak nungak leh tangval kuamah tukhawmsak lou ding, kagaal ettuah kawm a laa sa ding..” hong chi a, ka tup uh ka tangtun zoukei uhi. Ahitazongin a first line tuak ah ka tukha ua, ka ki-en tuah theiden ua, tukhawm lou thouthou ding inleng nuam kasa mahmah veve uhi. Zaan dak 12 hong ging in Upa pa mah in pawttheihna hun hong pia a, huchi’n innkong lam ah zuntha ding khawng in ka pawtkhe nainai uhi. Chingte in hong zuanphei a, kenleng amah ana ngak in ka nih un ka kizui pawt uhi.


Innkong bel ana vot mahmah mai a, Chingte inleng vot salua ahingei dinga hong liing keuhkeuh hi. Kenleng ka puanza silhlai lakhe zok in Chingte ka tuamlum a, singpi awmte kiang ah mei kava awipih hi. Singpi awmte leng koutegel hong theisiam mahmah uh hile kilawm in “Nou tegel mei ana en unla, kou kava kisuhalh ding uh” chi’n hong pawtkhiatsan uhi. Ka nih un ka tukhawm ua, thil tuamtuam khawng houlim in nuam kasa mahmah uhi. Hunchiam hong bei a, Upa pa’n nungak-tangval teng hong samluut nawn hi. Kouleng thumangtak in luut ding in ka kisapah ua, chihleh vangphathuaitak mai in Upa pa’n “Singpi awmte om nailou ahihchiang un noutegel in ana en phot lai unla, hong man chiang un hong luut pan un” hong chi zenzen a, ka nih un ka ki-entuah ua, kipak tak in ka tutna mun mah uh meikiang ka zuan nawn uhi.
Ka tutkawm un ka houlimna uh ka sunzom nawn uhi. Nitak masalam a ka lasak khawm dan khawng uh, ka omdan khawng peuh uleh ka zumthu khawng uh gen in kou tegel in kua lengkhawm lamlam leng ka phawkkha nawn vetkei uhi. Hichibang a hun lemtaang mu gige theile ung a nuam mah ding, kha hoihvak zawmah tawh nungak-tangvalte ading, abiik in kei leh Chingte a ding in chu a khiaklah huai mahmah mai hi. Singpi awm tuanvaite bang hong pai nawnkei henla, a inn uah va ihmu sukmai le uh chih khawng ka ngaihtuah mai hi. Ken leng hiai kaan a hun lemtaang a om nawn de aw, Chingte kiang a ka itna thu leel suk mai ding ade aw, chi’n ka ngaihtuah hi. Bang e pasal! chih lungsim tawh ngaihzawng a neih leh neihlouh beek dotkhiat teitei ding himai ka chi hi. Huchi’n kenleng aw liing pelhpelh kawm in “Ching, tangval na nei hia?” chi’n ka dongsuk ektamai hi……..

Part - III
Chingte inleng hong en a, nuikawm a hong dawng dia a kisak laitak in “Kare, nou tegel inleng nuam ana sa gawpta nahi ding uh e?” chi’n singpi awmte’n hong chiamnuih phei ua, ka thugen uh sutzop theih ding vual ahinawn takei hi. Poi kasa mahmah a, va pawt photlai ua singpi kana awm na ding uh va chih theihvual lah hilou, ahizong hehtha suah huai sim mahmah mai hi. Chingte in “Umuan, poina e maw, I dam dia awl in hiai sang a hun lemchang zaw ah I gen thak nawn ding aw..” hong chi a, kenleng “Ching, hi thamtham e..” chi’n leenkhawmna innsung lam zuan ding in ka kizui khe nawn uhi. Innsung kava luut ua leh miteng in kou tegel kia hong na mitsuan uh abang zawzen a, ka zum mahmah mai ua, zum selua tutna ding bang mupah lou in milak ah ka ding kha nilouh zawmah uhi.


Dak 2 hong ging a, Upa pa hong dingtou in “zingkhua hongvaak pah ding ahita a, Krismas pii ni ding ahihtawh I nguai kha ding ua, leenkhawm hiaitan in I khaak phot ding ua, singpi dawn in kuapeuh innlam I zuanta ding uh” hong chi hi. Chingte tawh koubel baih kasa mahmah lai ua, kizanhak leh leng ka kham naikei ding uhi. Ahitakin itna thu himhim bangmah genkei mahle ung Chingte tawh bel ka kingai mahmah tuak uh hi’n ka thei ahi. Chingte leng kei tawh lou in bangmah a utkei a, midang tawh kizuih a midang tawh leenkhawm ding bangleng a ut hetkei hi. Huchi’n singpi khawng dawn in pai diing in ka kisata uhi. Huchihlai in Chingte in “Umuan, ei hiai ah I zanhak suk mai diam?” hong chiphut hi. Kenleng “Ching, hilou e. Upate thau nilh ahi ua, I zahtak a, a thuthu I man ding uh ahi. Huaiziakin eileng I pai phot ding a, damleh zingni-thaini chiang khawng a hiai sang a leng nuamzaw thamtham ding ahihman in huaichiang in tunitak sanga anuamzaw a hun zang ding ihi” ka chi hi. Chingte inleng “Umuan, na gen adik. Na chih bangbang in I pai ding aw” hong chi a, huchi’n kou leng Chingte te inn lam zuan in ka pai uhi. Bangmah kallou in a gate uh ka tung ua, Chingte in “Umuan, tunitak beek hong baangve maw” hong chi a, kenleng “Ching, ka dinmun na theihsa ahi, huaiziakin hong theisiam inla, awl in kana pai dia, damleh zingchiang in I kimu nawn ding aw…” chi’n mangpha kikhak in ka paisanta hi.
Chingte ngetna nial hi haksa kasa mahmah a, himahleh a thu mang leng ka inn ua tazou nawnlou ding kahi chih ka theih mahmah ziak in Chingte thu ka mang ngamkei a, ka nulehpa tawh khosa hilai leng zaw hiai bang a hunnuam khawng Chingte tawh zangkhawm den thei ding hi inga maw chih khawng peuh ngaihtuah in ka hinkhua haksa kasa mahmah mai hi. Inn ka tun leh kong ana kikalh a, ka kiuhkiuh hangin hong in ka omta kei a, verandah ah zankhua ka zatmai angai hi. Ka puanza lah Chingte in silhsuak kha ahihchiang in vot kasa mahmah mai a, innkong ah kei kia in khitui-naptui tawh om in ka liing keuhkeuh mai hi. Kei leng hiai a khovot thuaka zankhua zang thouthou ding ka hihleh chi in hanmual lam kava zuan a, ka nu leh ka pa haan ah giak leng nuamzaw inteh chi in a haan tung uah kava lum hi.


Ka theihlouh kal a ana ihmu kha kahi ngei ding a, numei hon pau ging in hong phawng a, ka daak khiat leh khua ana vaak hoih mahmah mai hi. Keileng kintak a ka dintouh leh numei hon hongpai kamu a, amau leng lamdang hongsa mahmah mai ua, ka kianglam hong zuan uhi. Chingte telkha ngei di’n kana lamen mahmah a, himahleh a telkha kei a alawmnu Mercy bel hong telkha hi. Mercy in hong muh phet in “Umuan, nang zing khangkhang a hiai ah hanmual a bang hih e?” hong chipah a, kenleng “Mercy, Krismas bang hong hih mawkleh ka lung leng a ka nu leh pa haan vehna va nei kahi” ka chi hi. Himahleh Mercy in hong na thei mahmah ahidia “Umuan, hong khem koh, hiai a giak na hi, na puannak nung khawng ah leng a kithei mahmah, bang lungkhamna nei e?” hong chi a, “Mercy, lungkham zenzen lou e..” chih teng in ka dawng thuk a, ka kikhen uhi.


Inn ka paisuk a, kongkhaak luutpan ka nupi’n “Muanpu, zankhovak a pawt anuam hia? Kintak in ann hong huan inla, na huanzoh chia tuitawi inla, inn zuut ngal oh…” hong na chipah hi. Kenleng “Nupi aw, kong paihak kha ua, nana hoih ihmut lua ua hong phawng ngamlou kahi. Ann hong huan pah ning aw..” chi’n awl in ka gen a, hong sawlteng ka sempah hi. Ka papi haatlai a, lupna tungkia a hun zanglou hileh zaw amah beek in hong theisiam mahmah ding hia maw ka chi hi. Ka lunggel ngaihtuahna a saang mahmah mai a, ka ann huan kawm in ka mittui hong luang mawk hi. Ka mittui pawt ka nupi’n ana mukha chiitchiat a, “Muanpu, zankhua a pawt, inntung nasem dia kong sawl leh kap ngamlai maw, huchi ding na hihleh na omna ding mun dang va zong mai ou…tuni leng inn ana ngakden aw, hong kikhop leng ngaikei, innkhang a singtum ana ekh aw..” hong chih beh zawmah lai hi. Ka thuak hi a haksa mahmah mai, kei gentheih bangin midang a genthei a omsam diam maw ka chi vungvung mai hi…
 
Ann te ka hong neekzoh un ka nupi’n kikhawmlou a inn a nasep ding hong guan ahihchian kikhawm utlaw mahmah sam napi in inn ngak in ka om hi. Ka lawm leh vual teng puan hoih taktak silh a Bible tawh biakinn lam zuan diamdiamte ka muh chian ka eng thei mahmah mai a, kei ading inleng khatvei tei ni hong taang leh ka uut mahmah mai hi. Ka nupi te kikhawm dia a kuan zoh un ka nasep puan silh in innkhang huan ah singtum lianpi khat ekh ding in heipi tawh ka kisa hi. Mi kikhop vekziak ahingei ding a, khua a daai mahmah mai a, ka sing ekh ging bang ngaih mahmah hi in ka thei ahi. Ka kho-ul tawh ka mittui tawh buak in hong buak a, ka tha a gim mahmah mai hi. Gimlua ka hihmanin ka khawl a, ka gei ah singliim nuai ah ka tuu a, biakinn a ka tuailaipihte Krismas tawh kituak a a lapawlsak khawng uh kaza a, amau lak a teelkhak bang ka ut mahmah mai hi. Hizong ka utlouh lampi ka zuihphot angai zel hi.


Thakhat in “Umuan….” chih aw kaza a, ka daakkhiat leh Chingte ka mu hi. “Ching, mi kikhoplai a nang hiai a bang hong hih zenzen e?” ka chihleh “Umuan, ken hong mulou inga azong dia hong kuan kahi” hong chi hi. Bangmah genzom man nailou in Chingte mah in “Umuan, ka lawmnun hong gen a nang zannitak inn a pailou a haanmual a va giak maw?” hong chizui ngal hi. “Ching, ka paileh ana ihmu khin ua va phawng ding lah ut nawnlou inga huailam va zuanmai kahi..” ka chihleh Chingte in “Umuan, poina e maw, kou inn ah hong paizaw leteh maw, na hinkhua haksa hina maizen e maw, tuni kumkhat a I ni poimawh petmah na ngawn ua nasepsak a na omtel, ka pawsiam kei..” chi’n ka mai ah hong kap hi. Kenleng “Ching, huchi zenzen lou e, Pathian in kei adia nopna ni hong suak sak pah na ding ahi, na hong hehpihdan ka thei a, kei hinkhua sangin leng na hong hehpihna ziakin ka khasiattha a suakzaw” ka chi a, kei leng kideek zou tuanlou in ka kap suk hi.


Huchia ka kihouhou sung un kikhawmte hong tawpta uh ahingei ding a, ka ni aw ka zapah hi. “Muanpu, nang nasem ding a inn om hilou maw, nungak tawh kiheel ding a kong omsak kisa maw?” hong chisukpah hi. Kei leng ka kisuanglah petmah mai a, Chingte kiang ah, “Ching, poisakna inleng ngai kenla, awl in nana pai zaw mai diam? Damleh nitak leengkhawm ding in ka hong tawntou pah ding” kachi hi. Huchi’n Chingte inleng “Umuan, kong hehpihlua, keiziak a taai thuak nahi maw, hong ngaidam inla, awl in kana paitou dia, nitak leengkhawm teitei ni aw..” hong chi hi. Ken leng “Ching, kisuanglah ken, kei ziak hizaw ahi, nang nopsakna louhna ding omlou ahi…” ka chi a, huchi’n Chingte leng awl in a innlam uh zuan in a paitouta hi.


Kei leng inn ah ka luut a, innsung luutpan ka nau (ka papite tapa neihsun) Lalboi in “nangpa leng mi pangbel a om a, nungak hoih tata bang theiviau, tangkha hetlou ding nahi aw, nangsa kei ading in lampi aomzaw, ana kiheemkhe leteh na lungsim a nuamzaw mai ding e…” chi’n nui sim phaphal kawm in hong engchih a, nuam kasa hetkei hi. Krismas ni ahihtawh ann huanbaih ngai ding ahihchia’n kei leng sil leng kisil manlou in ann huan ding in ka kisapah ngal hi. Ka nupi’n “Muanpu, ann tam huankoh, mi nih vuak nek ding hisaap in huan aw..” hong chi a, kenleng “Nupi, mi nih chih nang, ka papi, kei tawh Lalbawi, I vek ua mi lii kipha hilou maw..” ka chihleh “Nang na papi ana tutpih aw, ann ne aleng hong kuan sese ngaikei..” hong chihsan a, ka ann huantha bang adah mahmah mai hi. Ka ann huan ka en a, ka gilkial tawh kine khalou ding hia chih khawng ka ngaihtuah chiang in ka khasiat tha asuak mahmah mai a, ka nu ka ngai vungvung mai hi.

.